– Aa! Maty põ Janerõvijã Jesu reãgwerà? e'i kupa.

4 Ojimopirai tesõ ãmẽ kupa. Manyvo ne'i ãmẽ kupa. Ameve kwaima'e kõ mõ ojimoikatu ovake kõ, mõrijõ rõmõ. Ijyru poko sĩ gatu mãe kõ. 5 Ãmẽ wãivĩgwerà ojimonyi ojayvy wãgyo mõ. Kee e'i ãmẽ kwaima'e mõ ijupe kõ:

– Manyvo põ uve jẽ iko mã'ẽ peeka tite teãgwerà rena pè, omãnõ mãe kõ põ'õ mè? e'i. 6 A'e naikoi ike ky'y. Opoerapa opõ'ã oo. Uve mijẽ ky'y. Pekuwa jẽ põ ijayvukwerà? Kõi e'i amãtejẽ Karireja yvy pè jypy remẽ. Pekuwa jẽ põ aekwerà? 7 Kee e'i amãtejẽ itõkõ pejẽ: “Janejare'e Remimuurerà ojimojane mã'ẽ ojime'ẽ kuwa nivoi mãe kõ po pè omãnõ”, e'i oupewarà mõ maekwerà. Ãmõ, “A'e kõ emoputuputurità emõ'ã ejuka kupa”, e'i maekwerà. Ãmõ, “Ajamã'ẽ aja paire moapy 'arà remẽ Janejare'e omomoera tarà mijẽ ereãgwerà imopõ'ã”, e'i maekwerà. Aekwerà rupi katu opoera opõ'ã, e'i wãivĩgwerà kõ pè.^a

8 Ãmẽ si Jesu ayvukwerà rè oja'a kupa ky'y.

9 Ãmẽ ojivy oo kupa. Jesu remimonokwerà kõ resa oo kupa, 11 rõmõ mãe kõ resa. A'e kõ pè omome'u kupa. Ãmõ kõ pè teve omome'u. 10 Aã reitõ kõ wãivĩgwerà aekwerà rè omã'ẽ mãe kõ: Maria Matarena. Ãmõ, Joana. Ãmõ, Maria, Tiaku y. Ãmõ kõ teve. A'e kõ omã'ẽ ee maekwerà kõ omome'u Jesu remimonokwerà kõ pè. 11 Wenu mãe kõ “aje ywete” ne'ive ajamã'ẽ. Jokery pewary vo 'ejẽ emimome'ukwerà rewarà mõ.

12 Ajare Peturu ojã oo Jesu reãgwerà rena resa ky'y. Ojayvy rã'ĩ ee omãjã. Soõ, kamisa kõrijõ ijõvãnawerà jẽ tui upa. Ajawyi ojivyrĩ oo mijẽ wetã gyty.

– Manyvo sipõ? e'i ojimopirai rõmõ.

13 Ãmẽ aja 'arà peve Jesu remimo'ekwerà kõ mõ, Jerusarẽ taa pe wyi ojisyry ootà ãmõ taa kyty. Emausi eu a'e taa pè, a'e kyty ootà mã'ẽ. Kuipe'e sa'u a'e taa tui. A'e kyty oo iko kupa. Mõrijõ ootà kupa. 14 Ojimogeta ojiupe oo iko kupa. Jesu jukaawerà rè ojimogeta iko kupa. Kõi ojimorarai 'ete ee ijuka kupa maekwerà. Pirujẽ aekwerà rè ojimogeta iko kupa. 15 Ãmẽ oporegeta iko remeve, Jesu sikaepo ovãe ipyri kõ iko. Oo upi kõ pee rupi ãmẽ. 16 Ajamã'ẽ “Jesu teipã'ã”, ne'i kupa. Omã'ẽ ipe ee kupa. Ea kõ nomãrãkuwai maevo sõ tite ajamã'ẽ. Ajawyi Jesu nokuwa amãtejẽi kupa. 17 Ãmẽ Jesu e'i ijupe kõ:

– Moma'e rè põ pejimogeta peiko? e'i.

Ãmẽ opyta rã'ĩ kupa. Ijãgyo tè kupa aepo renu. 18 Ãmẽ ãmõ ipu, Kereopasi eu erà pè mã'ẽ oporegeta. Kee e'i Jesu pè:

– Jerusarẽ taa pe wyi rõwã sipõ nejo age'e? Manyvore põ nerekuwai kwee ojinõ maekwerà? Ene rõmõ'ĩte nerekuwai mã'ẽ rõmõ neiko maevo, e'i Jesu pè.

19 Ãmẽ kee e'i Jesu ijupe kõ:

– Manyvo põ pejẽ? e'i ijupe kõ.

A'e rè kee e'i kupa:

– Jesu, Nasare taa wãnà, Jerusarẽ taa pè Janejare'e ayvu mojenuarà tè mijã. A'e ijayvukasi tesõ poromo'ea rè. Ãmõ, mãrãnà jikuwa e'ã reinõa rè. A'e jane kõ omoe'e ipi mijã. Ãmõ, Janejare'e eeve tui mijã. 20 Ajamã'ẽ Janejare'e pè oporegeta mãe kõ rõvijã kõ opõ'ã ajaire ee, janerõvijãgwerà kõ revejẽ. Kovenatu Piratu po pè weraa ime'ẽ tojukaoka kupa. Omoputuputurioka ijukaoka yvyra jipokana rè kupa. 21 A'e pewarà mõ kee oro'e tite mijã: “Ãwĩ janerekyità janeãpã kõ po pe wyi”, oro'e tite. “Jane, Isaeu kõ rõmõ, janemokasità janeãpã kõ pè ky'y”, oro'e tite. Orerako'i tite ee mijã. Emã'ẽ. Age'e omãnõ ãwĩ ky'y, e'i tite. Aja paire itã'ã moapy oroke ky'y, e'i kupa.

22 E'i jẽ kupa:

– Ajamã'ẽ age'e ji'ive oreatyryjarà wãivĩgwerà kõ teminu e'ã mõ omojenu oreupe. Oreãpẽ sa'u ijayvu kõ renu. Kee e'i oreupe kupa. Kõ'ẽ tarà mẽ ve ipõ oo Jesu reãgwerà rena resa kupa. 23 Ajamã'ẽ nomã'ẽi ee kupa. Soõ, nuvei. Ãmẽ Janejare'e remĩgwai yvapewarà kõ ipõ ojimoikatu ijupe kõ javo. Kee e'i ipõ wãivĩgwerà kõ pè kupa: “Age'e uve mijẽ”, e'i ipõ kupa. 24 Ãmẽ aepo wãivĩgwerà kõ omome'u oreupe paire, orejimorypa kõ ve oo esa. Ajaire, “Aje ywete e'i wãivĩgwerà kõ ji'i”, e'i ve oreupe ovãe kupa. “Jesu reãgwerà rè noromã'ẽi”, e'i jẽ ovãe kupa, e'i Kereopasi aekwerà momewa.

25 Ãmẽ si kee e'i Jesu ijupe kõ:

– Janejare'e ayvu mojenuarà kõ ayvukwerà rupi katu tè a'evoa. Manyvore põ napeenui? “Aje ywete” pejẽ kuwasi ijupe kõ mijã. 26 Kee e'i itõkõ ijayvu mojenuarà kõ maekwerà: “Janejare'e Remimuu tojimomorijau jẽ rã'ĩ uu ike remẽ. A'evo paire tè ojikuwatà Jõvijã wasu rõmõ iko ky'y”, e'i maekwerà. Aje rõwã põ? e'i Jesu ijupe kõ.

27 Ajaire pirujẽ weewarà Janejare'e kareta rè ojikusiwa maekwerà Jesu omovyvypa ijupe kõ tokuwa kupa. Tãmõ Moisesi okusiwa amãtejẽ eewarà rã maekwerà omovyvypa. Ãmõ, Janejare'e ayvu mojenuarà kõ okusiwapa amãtejẽ eewarà rã maekwerà omovyvypa teve. A'e a'e kõ rè omotekokuwa kõ, tokuwa katu kupa, “aje” te'i kupa ky'y.

28 Ajaate oo ovãerĩ Emausi taa pè kupa ky'y. A'e pè opytatà kupa ky'y. Jesu ãmẽ kee e'i:

– Ãwĩ rupi aasavĩtà aa maevo, e'i ijupe kõ.

29 A'e kõ ãmẽ e'i:

– Neo ne, e'i ijupe. Epyta orepyri. Emã'ẽ. Pãtõmaerĩ, e'i e'i kupa.

“Hoõ” e'i ãmẽ Jesu. Oike tetã wyry pè eeve kõ. 30 Ajaire ojimi'utà kupa remẽ, namesa uvuri wapy kupa. Ãmẽ Jesu meju opyy. Janejare'e omoete rã'ĩ imosãità. Ajaire openo peno imosãi ijupe kõ to'u kõ. 31 Ãmẽ sõsi ojikuwa katu Jesu ijupe kõ ky'y. Kee e'i ãmẽ kupa:

– Haa! Jesu tè sipõ janepyri ekoi? e'i kupa.

Oryvay ee kupa. Ajamã'ẽ Jesu ojimopi maevo sõ tite iwyi kõ ãmẽ. Oity kõ oo.

32 Aja paire kee e'i ojiupe kupa:

– Jesu ywe'e sikaepo ovãe janepyri. Janepy'aory rõwã sipõ ji'i pee rupi janemogeta upa remẽ mijã? Janejare'e kareta rè janemo'e remẽ, janepy'aory tesõ enu mijã, e'i ojiupe iko kupa.

33 Ãmẽ kuise'ẽ jẽ opõ'ã ojivy oo Jerusarẽ taa kyty kupa. A'e pè wesa Jesu remimo'ekwerà kõ kupa ky'y, ãmõ kõ reve. 34 A'e kõ kee e'i ijupe kõ:

– Aje ywete Janerõvijã ywete opoera opõ'ã mijẽ. Simão omã'ẽ ee, e'i ijupe kõ kupa.

35 Aja paire Kereopasi kõ wemisakwerà omome'u teve ijupe kõ.

– Pee rupi oroo oroiko remẽ, Jesu sikaepo uu ovãe ore. Orerupi oo ãmẽ. Norokuwai ajamã'ẽ mijã. Meju openo peno imosãi oreupe remẽ tè katu orokuwa a'e tè sikaepo, e'i imomewa ãmõ kõ pè kupa.

36 Ãmẽ si oporegeta jẽ kupa remeve, Jesu ojisaoka ijupe kõ. Atyry kõ pè ojisaoka ky'y. Kee e'i ijupe kõ:

– Tapepy'a piryvypy katu ikõ peiko ky'y nẽ, e'i ijupe kõ.

37 Ojeapy'a ojimonyi ãmẽ kupa. Ajame, “I'ãgwerà rè tè sipõkõ jamã'ẽ jakupa?” e'i tite kupa. 38 Kee e'i ãmẽ Jesu ijupe kõ:

– Manyvore põ pekyje pejimopirai rõmõ? Ãmõ, manyvore põ, “Aje vove põkõ Jesu opoera?” pejẽ ije? e'i. 39 Aepo pejẽ sõ. Pemã'ẽ awi epo rè. Ãmõ, epy rè pemã'ẽ ve. Ije tè ajimoikatu pejẽ age'e. Epirà rè pepoko rã'ĩ esa, e'i. “Aje” tapejẽ ãmẽ ky'y, e'i. Nijapyyi jo'ãgwerà ipi. Nuvei ipirà. Nikãgwei teve. Ãwitõ ije agyvo aiko ike, e'i ijupe kõ.

40 Aepo e'i remẽ, opo rè omono tomã'ẽ kupa. Opy rè teve. 41 Ãmẽ si oryvay omãjã ee kupa ky'y.

Ajamã'ẽ, “Aje ywete Jesu ywe'e põkõ ãwĩ!” ne'ive kupa, jokery pewary vo 'ejẽ ekoi kupa rewarà mõ. Ãmẽ kee e'i Jesu ijupe kõ:

– Uve põ ja'umã'ẽ mõ ike eupe? e'i.

42 Ãmẽ pira jimiirerà mõ weru ijupe kupa to'u. 43 A'e Jesu o'u ovake kõ ãmẽ.

44 Ajaire kee e'i Jesu ijupe kõ:

– Jypy remẽ, peneve aiko jẽ remeve itõkõ poromo'e ajupa. Kee a'e itõkõ poromo'e: “Janejare'e ayvukwerà rupi katu ojinõtà tekuwa pekupa”, a'e pejẽ. Erewarà ijayvu mojenuarà kõ omovyvypa amãtejẽ karamoe remeve. A'e rupi katu ojinõ tekuwa pekupa. Aã reitõ kõ kareta jikusiwarerà kõ: Tãmõ Moisesi remikusiwarerà. Ãmõ, Janejare'e ayvu mojenuarà kõ remikusiwarerà. Ãmõ, jõvijã Tavi jĩgarerà. Aekwerà rupi katu tè aiko, e'i ijupe kõ.

45 Ãmẽ Jesu omotekokuwa kõ jẽ Janejare'e ayvu jikusiwarerà rè, tokuwa katu kupa. 46 Kee e'i ijupe kõ:

– Kee e'i ojikusiwa maekwerà: “Janejare'e Remimuu rã ojimomorijautà rã'ĩ omãnõ”, e'i maekwerà. “Ajaire moapy 'arà remẽ opoera tarà mijẽ opõ'ã, omãnõ mãe kõ põ'õ mè wyi”, e'i maekwerà. Aekwerà rupi katu itã'ã aiko, e'i ijupe kõ. 47 Ajawyi kee a'e pejẽ. Eayvu rupi pekwa age'e. Kee tapejẽ imojenu jenu: “[Pejipy'amogeta ikõ peneko rè age'e nẽ.] Pejimosĩoka ikõ peaiwererà rè nẽ. Pejimome'u ikõ Janejare'e pè peaiwererà reitypypyipaoka nẽ. Peporijauesatà ãmẽ ky'y. ‘Awyjepa’ e'ità peaiwererà kõ pè”, tapejẽ imojenu erokwa. Pekwa awi ãmẽ. Jerusarẽ taa wãnà kõ pè ypy aepo jaa tapemojenu erokwa. Ajaire pirujẽ yvy pewarà kõ pè tapemojenu jenu erokwa. Pirujẽ erewarà tapemojenu jenu erokwa ãmõ taa taa kõ rupi, e'i. 48 Manyvo nyvo aiko maekwerà rè pemã'ẽ. Pekuwa ereko manyvo aiko mã'ẽ. Peenu eayvukwerà. Ajawyi pejẽ tè peotà aepo momewa. 49 Ije tè amuutà Papa remime'ẽ rã pejẽ. I'Ãg amuutà pejẽ. Kõitokõ Papa kee e'ipa: “Amonotà e'ãg ijupe kõ”, e'ipa. A'e tè tapeãrõ rã'ĩ Jerusarẽ taa pè ãmẽ, ajaate wayvukwerà rupi o'Ãg omurokatà pemokasiarà rõmõ, e'i. A'e tè peayvumokasità ajaa mãerã tè tapeiko ky'y, e'i ijupe kõ.^b

50 Aja paire Jesu weraa wemimo'ekwerà kõ Petãnia taa kyty. A'e pè ojipomomojai rã'ĩ i'arà kõ gyty oporegeta Janejare'e pè, owaray toereko kõ.

51 Ãmẽ oporegeta jẽ Uu pè ijupewarà kõ mõ upa remeve, Jesu ojieraaoka yvate kyty. Ajaate yva pupe oẽma oo ky'y.^c 52 Ajame emimo'ekwerà kõ omoe'e tesõ ãmẽ. Ajaire ojivyrĩ mijẽ uu Jerusarẽ taa kyty kupa. Oryvay tesõ ojivy oo kupa.

53 Ãmẽ Jerusarẽ taa pè Janejare'e moe'ea retã ypy kyty oo oo kupa ipi. A'e pè ywesõ ekoi kupa ipi. A'e pè Janejare'e omoe'e kupa upa ipi.

[Awyjepa Rukasi okusiwa maekwerà.]