2 Ãmẽ kovenatu Piratu e'i ijupe:

– Aje põ Juteu kõ rõvijã ywete ene? e'i.

– Õ'õ! Aje katu aepo ere! e'i Jesu ijupe.

3 Ãmẽ Janejare'e pè oporegeta mãe kõ rõvijã kõ ypy oporegeta. Nivoi mã'ẽ iteetejẽ omo'y teywete Jesu rè kupa. “Kovenatu tomono ijukaoka”, e'i oupe kupa.

4 Ãmẽ kovenatu e'i mijẽ Jesu pè:

– Neenu põkõ aepo e'i neupewarà mõ kupa remẽ? Manyvo eretà põkõ ajawyi? e'i Jesu pè.

5 Ajamã'ẽ Jesu nipui ky'y. Ãmẽ kovenatu Piratu ojimonyi a'evo remẽ.

– Manyvore sipõ nipui eupe? e'i oupe ojipy'amogeta.

6 Tãmõ kõ jisyryawerà moetea 'arà okwa remẽ upi upi, kovenatu Piratu wemimopã'ãgwerà mõ omoẽoka ipi. Pe'ĩ tè ajamã'ẽ omoẽoka ipi, kwaray upi upi. Aty wasu kõ tè opyteporo a'evo remẽ tomoẽ ipi. 7 Ãmẽ a'evo Jesu wereko kupa remẽ, uve temimopã'ãgwerà mõ, Parapa eu ijupe mã'ẽ. Poromojiapisioka maekwerà tè Parapa. A'e jypy remẽ poromoãpãoka Romã pewarà jõvijã rè. Ajawyi ojimopã'ã upa.

8 Ãmẽ aty wasu kõ ojimoaty kovenatu Piratu pyri remẽ, kee e'i ijupe kupa:

– Kwaray upi upi itõkõ nemoẽoka neremimopã'ãgwerà mõ tãmõ kõ jisyryawerà rè oroja'a remẽ ipi. A'evo eiko age'e, oro'e ene, e'i ijupe kupa.

9 Ãmẽ kovenatu Piratu e'i ijupe kõ:

– Ava põ nepota amoẽoka? Juteu kõ rõvijã põ? e'i Jesu pewarà mõ ijupe kõ.

10 Kovenatu Piratu okuwa Janejare'e pè oporegeta mãe kõ rõvijã kõ ojimõarõ teywete Jesu rè. Ajawyi tè weru Piratu rovake kupa, ãwĩ tomono ijukaoka.

11 Ãmẽ Janejare'e pè oporegeta mãe kõ rõvijã kõ omogeta katu aty wasu kõ. Juteu rõvijã kõ ve omogeta katu kõ. Ajawyi kee e'i wapukai rõmõ kupa:

– Ãnĩ! A'e rõwã! Parapa tè ikõ teremoẽoka nẽ! e'i e'i wapuka pukai rõmõ kupa.

12 [Ãmẽ kovenatu Piratu “hoõ” ne'ive.] E'i mijẽ rã'ĩ ijupe kõ:

– Penõvijã pa'e? Juteu kõ rõvijã pa'e? Manyvotà põ areko ãmẽ? e'i ijupe kõ.

13 – Yvyra jipokana rè ejukaoka! e'i e'i wapukai rõmõ kupa.

14 Ãmẽ Piratu e'i:

– Manyvo rewarà mõ ywete põkõ ajukaokatà ajamã'ẽ? e'i. [Nakuwai 'eteay eewarà, e'i.]

Ãmẽ ywesõ wapuka pukai kupa.

– Ejukaoka sikenẽ, yvyra jipokana rè! e'i e'i kõrijõ kupa ãmẽ.

15 Ãmẽ Piratu opota poromory. Ajawyi Parapa omoẽoka jimopã'ãga pupe wyi, ijayvu kõ rupi ky'y. Jesu ãmẽ onõpã nõpãoka rã'ĩ. Ajaire omono yvyra jipokana rè ijukaoka ky'y.

16 Ãmẽ ajaire sota kõ weroike rã'ĩ Jesu oõvijã wasu retã wasu wyry pè. Oka mytery pè weraa kupa, posikoawerà retã pè. Pirujẽ sota kõ ojimoatypa katu a'e pè upa. 17 Opota Jesu oojai kupa. Ajawyi omoe'e rã'ãga kupa. Jõvijã yru poko ipirã mã'ẽ pè oyrunõ rã'ãga rã'ĩ kupa. Tyru pirã poko opypy ee kupa, oõvijã rã'ãga rõmõ. Joõ vo sõ mã'ẽ oinõ ãkãnytarà rõmõ kupa. A'e oinõ Jesu ãkãg rè, jõvijã ãkãnytarà rã'ãga rõmõ. 18 Ajaire oojai kupa.

– Age'e si tereiko puku Juteu kõ rõvijã rõmõ! e'i rã'ãga ijai kupa.

19 Wãkãnõpã nõpã teve kupa, yvyra'i pupe. Otõmõ tõmõ teve ee kupa. Ojimoenãpa'ã ovake imoe'e rã'ãga kupa. Ãwĩvo wereko ijai kupa. 20 Ajaire omopyso ekyi tyru pirã iwyi kupa. Ijyru omojivyrĩ ipypy ee kupa. Ajaate weraa ijukatà kupa ky'y. [Jerusarẽ taa kupe kyty weraatà kupa, imirai mã'ẽ jukaa rena kyty.]

21 Ãmẽ taa pe wyi weraa ereko remẽ jakatu, kwaima'e mõ reve ojiõvaisĩ kupa. Sireni taa wãnà mõ tè a'e. Simão eu erà pè. Aresãtiri ruu a'e. Ãmõ, Rupu ruu teve a'e.^a A'e ka'api'ity kyty wyi ojivy uu iko. Ãmẽ sota kõ kee e'i ijupe:

– Aã yvyra jipokana emovy eraa py'ajẽ ikenẽ, e'i ijupe kupa.

Omovy eraa ãmẽ ijayvukasi kõ rupi.

22 Ãmẽ sota kõ weraa jẽ Jesu yvytyry kyty. Kokota e'i Juteu kõ a'e yvytyry rerà pè. “Joãkãgwerà rena” jaa tè Kokota e'i kupa. 23 A'e pè ovãe kupa remẽ, sota kõ oinõ janeray mogwapa poã^b uvary aisiriri katu mã'ẽ pupe ime'ẽ ipe Jesu pè mijã. Ajamã'ẽ Jesu no'ui.

24 Ãmẽ ojukatà kupa ky'y. [Ijyru omopyso ekyi mijẽ iwyi kupa.] Ajaire ipo kõ omoputuputuri yvyra jipokana rè, ipy kõ revejẽ. Ajaire omõ'ã kupa. Ãmẽ Jesu ojasiko upa. Ajaire ojimarai rã'ĩ ijyrukwerà rè sota kõ.

– Ava põ opyytà ijyrukwerà oyru rõmõ? e'i imomo momo kupa.

A'evo wereko ipyy imosãi ojiupe kupa.

25 Kwaray oẽmokopa uu remẽ tè a'evo, omoputuputuri yvyra jipokana rè imõ'ã kupa remẽ.

26 Ãmẽ yvyra pee rè kee e'i ikusiwa kupa: “Juteu kõ rõvijã wasu”, e'i ikusiwa kupa. Ãwĩ jikusiwarerà oinõ Jesu apyte 'aryvo kupa.^c

27-28 Ãmẽ, mõrijõ ve Jesu uvuri kwaima'e kõ omõ'ã ijasa kupa. Imona mãe kõ tè a'e kõ. Omojeovai Jesu kupa. Mytery pè katu Jesu tui ãmẽ.

29 Ãmẽ jane kõ okwa Jesu pyryvo remẽ, oojai okwa kupa.

– Ene itõkõ kee ere mijã: “Amoma kuwa Janejare'e moe'ea retã!” ere mijã. “Ajaire moapy 'arà paire, ãmõ tè ainõ tarà mijẽ”, ere itõkõ mijã!^d 30 Ejireko katu ajawyi! Ewyjy mokope wyi, teremãnõ e'ã! e'i ijai kupa.

31 Ãwĩvo ve Janejare'e pè oporegeta mãe kõ rõvijã kõ ve siwã oojai. Ãmõ, tãmõ Moisesi remikusiwarerà rè poromo'e mãe kõ ve siwã oojai. Kee e'i ojiupe kupa:

– Poroereko katuarà tè ãwĩ mijã! Manyvore sipõ nojireko katui? e'i e'i kupa. 32 Aje ywete põ Janejare'e Remimuurerà tè ãwĩ, Isaeu pewarà rõvijã rõmõ? Siãrõ esa! Age'eve owyjy sõ remẽ, “Aje ywete Janejare'e Remimuurerà tè ãwĩ”, oro'età ijupe ky'y! e'i e'i ijai kupa.

Imona mãe kõ teve siwã aepo e'i, Jesu pyri omãnõtà upa mãe kõ. A'e kõ ve siwã oojai.

33 Werywete jane 'aryvo katu kwaray remẽ ky'y. Ãmẽ si apy'awarà mõ ijãpatõma. Pãtõma 'ejẽ, ajaate ijãpẽ kwaray remeve. Pirujẽ a'e yvy rupi pãtõnusu rã'ĩ. 34 Ãmẽ ijãpẽ kwaray remẽ Jesu wapukai wayvo.

– Eri, Eri, rama sapakatani! e'i. “Janejare'e, manyvore põ ereity rejupa?” jaa tè aepo e'i.^e

35 Ãmõ kõ ipyri'ĩje'ẽ tui mãe kõ wenu aepo e'i remẽ. A'e kõ kee e'i tite ojiupe:

– Neenu põkõ? Tãmõ Eriasi pè wapukai upa [towyjy uu]! e'i tite kupa.

36 Ameve ava mõ ojã oo moma'e ipyu mã'ẽ pyy imoãkã uvary ai mã'ẽ pupe. A'e omoturisara imono Jesu juru pè, tomosusu mijã. Ãmẽ kee e'i ijupe kõ:

– Siãrõ rã'ĩ. Maevo tãmõ Eriasi uutà ekyi yvyra jipokana re wyi, tomãnõ e'ã! e'i ijai kupa mijã.

37 Ameve Jesu wayvo wapukai mijẽ ojikyi oo. Opi i'ãg oẽ oo.

38 Ãmẽ uve Janejare'e moe'ea retã wyry pè kamisa ijanamu mã'ẽ ijokenaa rõmõ mã'ẽ. Ikatuay mã'ẽ. A'e Jesu omãnõ remeve apy'a ojiãvasĩ. Yvate kyty wyi tesõ ojiãvasĩ uu ojisa ky'y.^f

39 Ãmẽ sota kõ rõvijã Jesu pyri'ĩje'ẽ tui. Wenu wapukai remẽ. Imãnõa rè omã'ẽ teve. Ojimonyi ee omãjã.

– Eeee! Janejare'e Ra'yry tè sikaepo ãwĩ kwaima'e! e'i ky'y.

40 A'evo remẽ wãivĩ kõ mõ a'e pè ekoi. Kuipe'e wyi omã'ẽ ee kupa upa. Kejõ. Maria Matarena. Ãmõ, Maria Juse y. Tiaku y ve a'e. Ãmõ, Sarome. Mokopejõ Jesu mãnõa rè omã'ẽ. 41 Kõitokõ Jesu rupi oo oo ipãtavõ kupa ipi, poromo'e Karireja yvy rupi iko remẽ. A'e kõ omã'ẽ Jesu mãnõa rè upa. Ãmõ wãivĩ kõ teve omã'ẽ ee upa, Jesu rupi uu Jerusarẽ taa kyty maekwerà kõ. Ijatyray kupa.^g

42-43 Ãmẽ Jesu mãnõawerà ojikuwapa kwaima'e mõ pè, Juse eu ijupe mã'ẽ pè. Arimateja taa wãnà mõ a'e. Juteu rõvijãgwerà kõ mõ teve a'e. Temimoe'e tè Juse. A'e kee e'i ipi mã'ẽ: “Pirujẽ jane kõ omoẽoka Janejare'e o'arà kyty kupa remẽ, ikatuaytà”, e'i ipi mã'ẽ. Ãmẽ Jesu mãnõa ojikuwapa ijupe remẽ, nojipiraui oo kovenatu Piratu resa. Karumẽ a'evo ekoi.

– Jesu reãgwerà taraa imokatu, e'i kovenatu Piratu pè.

Opota weraa imokatu amãtejẽ jimoava 'arà renoneve.^h Pãtõma remeve jimoava 'arà ojiãparõ ipi.

44 Ãmẽ aepo e'i Juse Piratu pè remẽ,

– Omãnõma sipõ ky'y? e'i Piratu.

Ajawyi sota kõ rõvijã omuu. Kee e'i ijupe:

– Aje põ omãnõma Jesu? e'i ijupe.

45 – Õ'õ, omãnõma, e'i Piratu pè Juse.

Ãmẽ kovenatu Piratu e'i:

– Hoõ, eraa eãgwerà imokatu ãmẽ, e'i Juse pè.

46 Ãmẽ Juse kamisa poko opyy. Kamisa e'eay opyy, “rijõ” eu mã'ẽ. Ajaire oo Jesu reãgwerà rekyi yvyra jipokana re wyi. Kamisa poko pupe ojõvã jõvã kupa. Ajaire omokatu pareti kwarà pupe kupa, takuru kwarà pupe. Teãgwerà rena teãmã a'e. Ajaire omokatu paire, oovapy. Takuru ipowyi mã'ẽ pupe oovapy. Omotore tore ikwarà rovake inõ. [A'evo wereko paire, ojivy oo kupa.]

47 Ãmẽ Maria Matarena a'evoa rè omã'ẽ. Ãmõ, Maria Juse y omã'ẽ ee. Ajawyi okuwa Jesu reãgwerà rena mape tui mã'ẽ kupa.