2 – Manyvo tekoua Janejare'e Janerõvijã ywete rõmõ janerereko remẽwarà amome'u tarà mijẽ pejẽ. Jõvijã rè tè Janejare'e amosã'ãgatà. Jõvijã ra'yry ojirekotà remẽ, jimi'u wasua oinõokatà tuu. Mõropãrà kõ pè, “Era'yry ojirekotà. Pejo pejimi'u epyri a'evo remẽ”, e'i amãtejẽ. 3 Ajaire, jimi'u wasua 'arà mẽ, kee e'i wemĩgwai kõ pè, “Age'e si pekwa emõropãrà kõ pè javo”, e'i. “Hoõ” e'i kupa. Oo ajaire javo kupa. Kee e'i emĩgwai kõ mõropãrà kõ pè: “Ojinõma jimi'u wasua upa. Ajawyi age'eve ejo jajimi'u”, e'i erõvijã ene, e'i kupa. Ajamã'ẽ “Ãnĩ, noroo'ãi”, e'i kõrijõ enu kupa, ijãvijõ kõ jẽ.

4 – Ajawyi jõvijã wemĩgwai kõ mõ omono mijẽ. “Pejo ky'y!” e'i e'i epe kupa. “Ja'umã'ẽ mõa'ãrõwã ojinõma. Pui ro'okwerà awyjepa ojimiipa ky'y. Ãmõ, so'o rã'ãga ro'okwerà. Pejo ãmẽ ky'y”, e'i e'i epe oõvijã ayvu rupi kupa. 5 Ajamã'ẽ “aje ipõ” ne'i enu kupa. Nooi kupa. Oposikoa rè ywesõ oja'a kupa. Ãmõgwerà koo kyty oo. Ãmõgwerà moma'e pyy oo. 6 Ãmõgwerà jõvijã remĩgwai kõ omoai tesõ. Opyy inõpã nõpã ijuka kupa. 7 Ãmẽ emĩgwai kõ apisiawerà ojenu jõvijã pè remẽ, ojimõarõ ky'y. Ajawyi sota kõ omono toapisi ijukaarerà kõ. Wapisi kõ paire, itapererà kõ wapypa kupa.

8 – Ajaire jõvijã e'i mijẽ wemĩgwai kõ pè: “Age'e ywete jimi'ua ojinõtà. Nonuri ajamã'ẽ mõropãrà kõ. I'ete nonuri kupa, nivoi kupa rewarà mõ”, e'i jõvijã. 9 “Ajawyi kee a'e ky'y. Pekwa te'ĩte taa rupi ky'y. Pirujẽ mã mõ jẽ rè pemã'ẽ remẽ, ‘pejo’ pejẽ ijupe kõ eru”, e'i jõvijã wemĩgwai kõ pè.

10 – Oo ãmẽ emĩgwai kõ pee wasu rupi. Taa waitewarà kyty oo kupa. Weru te'ĩte jane kõ kupa. Mõa'ãrõwã weru kupa. Ivo ekoi mãe kõ. Nivoi ekoi mãe kõ teve. A'e a'e kõ uu uu emĩgwai kõ rupi. Mõropãrà kõ jirekoa pewarà tyru opypy eru kupa, jõvijã remime'ẽgwerà. [Ekoa teãmã a'evo ekoi kupa.] Oporakapa tesõ jõvijã retã wyry ãmẽ kupa. 11 Ãmẽ ajaire jõvijã okwa ipytery kõ pè omãjã. Mõropãrà kõ rè omã'ẽ erokwa. Ãmẽ jirekoa pewarà tyru nopypyi mã'ẽ mõ rè omã'ẽ, oike te'ĩte mã'ẽ rè. 12 Ajawyi a'e pè jõvijã e'i: “Ene pa'e. Jirekoa pewarà tyru eremime'ẽgwerà manyvo põ nerepypyi! Nemoe'eokai rejupa nerepypyi eremime'ẽgwerà remẽ!” e'i jõvijã ijupe. Nipui ajamã'ẽ a'e.

13 – Ajawyi e'i jõvijã wemĩgwai kõ pè: “Aã aokwai imuu mã'ẽ nemoe'eokai! Pepokwa ãmẽ! Pepykwa teve eraa ikatu pè imokuipe'e pãtõmimi pupe ity! Tijãgyoay ojimomorijaua rè upa!” e'i jõvijã wemĩgwai kõ pè. “Hoõ” e'i kupa. A'evo wereko ãmẽ kupa.^a

14 Aepo omome'u poromo'e paire, Jesu e'i jẽ ijupe kõ:

– Ãwitõ jõvijã porokwai epe poromuu wa'yry jirekoa pè remẽ, ãwĩvo ve Janejare'e porokwai poromuu okoty ipi, e'i. Mõa'ãrõwã okwai. Ajamã'ẽ pe'ĩpe'ĩ ojipyteporo uu, e'i.^b

Ãmẽ Pariseu kõ ojapyaka aepo e'i Jesu remẽ.

15 Ãmẽ ajaire Pariseu kõ ojimoaty ojimogeta kupa. Kee e'i kupa:

– Manyvo ywete kuwa sipõ Jesu jareko imoai ijayvu rè? e'i kupa.

16 Ajawyi wemimo'earà kõ mõ omono ipe toayvumoteitete Jesu kupa. Kovenatu Eroti koty rewarà kõ mõ ve oo. A'e kõ kee e'i rã'ãga Jesu pè:

– Poromo'earà, orokuwa aje mã'ẽ rè poromo'e ene ipi, e'i kupa. Janejare'e ayvu aje ywete mã'ẽ rupi katu tè poromo'e neiko ipi. “Aje ipõ” ne'i jane kõ neayvu pè remẽ, nerejimo'eai ipi. Nerejimoripeokai ivo maevo sõ tite mãe kõ pè ipi. Nekuwa jẽ ivo katu mã'ẽ. 17 Ivo poromo'e mã'ẽ tè ene. Ajawyi kee jaa rè oremotekokuwa age'e rejupa. I'ete põ Romã pewarà rõvijã wasu Sesa pè tekoua repykwerà jame'ẽ remẽ? Ãnĩ põ ma'e remẽ? e'i rã'ãga ijupe kupa.

18 Ajamã'ẽ Jesu okuwapa ijipy'amogeta ai kõ.^c Ajawyi kee e'i kõrijõ tè ijupe kõ:

– Ivo rã'ãga mãe kõ tè pejẽ! Manyvore põ pepota erã'ã tite pekupa! 19 Karakuri moeta mõ emuu rã'ĩ tamã'ẽ ee, tekoua repykwerà rã rè, e'i ijupe kõ.

Ome'ẽ rã'ĩ karakuri moeta ijupe ãmẽ kupa. 20 Ãmẽ Jesu omojisa karakuri ovake kõ.

– Ava rã'ãgawerà põ aã karakuri rè pemã'ẽ? e'i. Ava rerà põ ojikusiwa teve ee? e'i.

21 – Jõvijã wasu Sesa rã'ãga, e'i kupa.

Ãmẽ Jesu e'i ijupe kõ:

– Õ'õ. Aje ywete pejẽ! Ajawyi jõvijã wasu Sesa ma'e tè aã, e'i. Kee a'e pejẽ. Jõvijã Sesa pewarà tè remẽ, tapeme'ẽ jõvijã Sesa pè ãmẽ. Ãwĩvo ve Janejare'e pewarà tapeme'ẽ teve Janejare'e pè, a'e pejẽ, e'i kõrijõ tè ijupe kõ imogwe kõ.

22 Aepo wenu kupa remẽ,

– Haa! Aepo e'i si Jesu! e'i kupa.

Ajawyi ojisyry oo kupa.

23 Ãmẽ ajaire a'e 'arà remeve, Satuseu kõ mõ uu Jesu kyty.

– Siayvumoopa Jesu, e'i epe kupa.

[Juteu rõvijã kõ mõ tè a'e kõ.] A'e kõ itõkõ kee e'i mãe kõ tè: “Jakãjã remẽ, nijapoera mijẽ'ãi ipi”, e'i mãe kõ. “Jakãjã te'ĩte kõrijõ”, e'i tite mãe kõ. A'e kõ uu oporegeta Jesu pè.^d 24 Kee e'i rã'ãga Jesu pè kupa:

– Poromo'earà, kee e'i itõkõ karamoe remẽ tãmõ Moisesi tijakuwa: “Kwaima'e mõ erekwapa mã'ẽ okãjã sõ nijãkarãive remeve, erekwarerà wereko kuwa imõmirĩgwerà ãmẽ ipi. A'e tè ijãkarãtà ipupe weke'yry amyry rekovijarerà mõ”, e'i emikusiwarerà, e'i kupa.^e

[– Õ'õ, aje aepo e'i maekwerà, e'i Jesu ijupe kõ.]

25 Ãmẽ Satuseu kõ kee e'i jẽ ipe Jesu pè kupa:

– Aepo rè oremotekokuwa si rejupa, e'i rã'ãga kupa. Ma'e remẽ uve kwaima'e mõ, ijatyray imõmirĩ mã'ẽ. 7 rõmõ kupa, teke'yry reve. Ajaire teke'yry ypykwerà wãivĩ mõ wereko mijã. Ajaire nijãkarãive ipupe remeve okãjã werekwarà wyi. Ãmẽ ekovijarerà weke'yry rerekwarerà wereko. 26 Ajamã'ẽ a'e teve nijãkarãive remeve okãjã teve. A'e rekovija wereko mijẽ a'e rerekwarerà. Ajaire okãjã mijẽ rõnõ, nijãkarãive remeve. Ãmẽ ivo ivo jẽ wereko reko jẽ tite kupa. Ajaate imõmirĩ kõ okãjãma ky'y, nijãkarãive kupa remeve. 27 Ajaate wãivĩ terekwarerà tè omãnõ ky'y, e'i rã'ãga kupa.

28 E'i jẽ Satuseu kõ Jesu pè:

– Kãramõ Janejare'e poromomoera remẽ, ava rerekwarà rõmõ ekoità? Emã'ẽ, 7 rõmõ werekopa mijã. Ava reve põ ekoità ãmẽ, opoera opõ'ã mijẽ remẽ? Emome'u ore awi, e'i rã'ãga kupa.

29 [Ajamã'ẽ Jesu okuwa Satuseu kõ “nijapoera'ãi” e'i kupa ipi.] Ajawyi e'i ijupe kõ:

– Haa! Napekuwai si Janejare'e ayvukwerà! Janejare'e kasia napekuwai teve. [Ajawyi, “Janejare'e noporomomoera'ãi”, pejẽ tite!] 30 Kãramõ Janejare'e okãjã maekwerà kõ omomoera remẽ, nuve'ãi jirekoa ky'y. Ãwitõ Janejare'e remĩgwai yvapewarà kõ nojirekoi, ãwĩvotà jaiko.

31 – Pejavy, “Janejare'e noporomomoera'ãi”, pejẽ remẽ. Pekuwa ipe Janejare'e ayvu ojikusiwa maekwerà. Kee e'i itõkõ ojikusiwa: 32 “Ije tè nerãmõi kõ Rõvijã wasu rõmõ aiko. Aparão Rõvijã wasu. Ãmõ, Isaki Rõvijã wasu. Ãmõ, Jako Rõvijã wasu”, e'i ojikusiwa maekwerà.^f Aepo e'i remẽ, “Nerãmõi kõ amyry Rõvijã wasu”, ne'i, nokãjãi ijupe kupa rewarà mõ. Uve jẽ mã'ẽ vo ekoi ijupe kupa, kãramõ omomoera tarà mijẽ rewarà mõ. Aepo jaa rè napetekokuwai peiko. Ajawyi nivoi pejipy'amogeta peiko, e'i Jesu Satuseu kõ pè.

33 Ãmẽ aepo jaa aty wasu wenu remẽ, ojimonyi tesõ enu kupa.

– Haa! Otekokuwavay Jesu! Manyvo noereko'ãi Jesu ijayvu moteiteteoka kupa, e'i kupa.

34 Ãmẽ Pariseu kõ aepo rè ojapyaka upa, Jesu nojiayvumoopaokai Satuseu kõ pè remẽ. Ajawyi ojimoaty oporegeta kupa, ovote. 35 A'e mõ wã'ã tarepe Jesu mijã. Tãmõ Moisesi remikusiwarerà rè poromo'e mã'ẽ mõ a'e. A'e e'i Jesu pè:

36 – Poromo'earà, iteetejẽ itõkõ Janejare'e omome'u tãmõ Moisesi pè, ivo tekoua rewarà, aekwerà rupi katu tijaiko. Mã rupi ywesõ põ tijaiko? e'i.

37 Ãmẽ Jesu e'i:

– Kee e'i maekwerà ywesõ: “Janejare'e nerõvijã ywete rõmõ ekoi. A'e ywesõ aje eauvay. Nepy'a pupe eau. Ãmõ, ne'ãg pupe eau. Ãmõ, netekokuwaa pupe eau teve ipi”, e'i maekwerà.^g 38 Aepo e'i maekwerà rupi ywesõ tijaiko. 39 Ãmõ kee e'i maekwerà teve: “Nepyriwarà kõ eauvay ipi. Ãwitõ nejiauvay, ãwĩvo ve tereauvay nepyriwarà kõ, koivo kõ ve”, e'i maekwerà.^h Ãwĩ rupi ywesõ tijaiko, e'i. 40 A'e rupi katu jaiko remẽ, aje tãmõ Moisesi remikusiwarerà ivo tekoua rewarà nijajavy'ãi, e'i. Janejare'e ayvu mojenuarà kõ e'i maekwerà ve nijajavy'ãi teve a'e rupi katu jaiko remẽ, e'i Jesu ijupe kõ.

41 Ajaire e'i Jesu Pariseu kõ pè:

42 – Manyvo pejẽ põkõ Janejare'e Remimuuarà rã pè? e'i. Ava jeapyry rõmõtà põkõ isaky pejẽ põkõ ijupe? e'i Jesu ijupe kõ.

Ãmẽ a'e kõ e'i:

– Tãmõ Tavi jeapyrerà tè! e'i kupa.

43 Ãmẽ Jesu e'i mijẽ ijupe kõ:

– Aje aepo pejẽ remẽ, kee pemome'u kuwa. Karamoe remẽ tãmõ Tavi oporegeta amãtejẽ Janejare'e Remimuuarà rã rè remẽ itõkõ, “Erõvijã ywete” e'ipa teãmã ijupe. Ajare Janejare'e 'Ãg kasia rupi kee e'i ojĩgarà rupi:

46 Ãmẽ aepo e'i Jesu remẽ, nipui kõrijõ kupa ky'y. Aja paire, “Jesu taayvumoopa”, ava ne'i'ãi ky'y. Ojirokyje kupa ky'y. “Kãramõ ajimogweroka ijupe ne”, e'i kupa, ajawyi.