4 Ajawyi oo Jesu rape ypy pè ãrõ upa. Yvyra mõ^a rè ojiupi oẽ, a'e pe wyi tomã'ẽ Jesu rè okwa remẽ. “Ãmẽ tè amã'ẽ kuwa ee”, e'i oupe.

5 Ãmẽ ajaire a'e wyry rupi Jesu okwa remẽ, opyta rã'ĩ oyvatesa ee omãjã. Kee e'i ijupe:

– Sakeu, kuise'ẽ jẽ ewyjy ejo, e'i Jesu ijupe. Aatà nerupi neretã gyty, e'i. A'e pè apytatà rã'ĩ. I'ete põ? e'i ãmẽ Jesu ijupe.

6 Ãmẽ:

– Hoõ, ja'e, e'i Sakeu.

Jesu rè oryvay rewarà mõ kuise'ẽ jẽ owyjy yvy pè. Ajaire weraa Jesu oupi wetã gyty.

7 Pirujẽ omã'ẽ ee mãe kõ ijayvu yvu kupa upa. Kee e'i kupa:

– Haa! Manyvore põ nivoi mã'ẽ retã gyty Jesu oo ojimory iko? e'i e'i kupa.

8 Ajamã'ẽ ajaire wetã mè Sakeu opõ'ã. Kee e'i Jesu pè:

– Erõvijã, age'e kee a'età. Ema'e kõ pẽ amosãità nimoma'ei mãe kõ pè ky'y. Ape'otà myterà rupi imosãi, e'i. Ãmõ, ekarakuri poromoripea rupi aekyi sikaepo ava mõ po pe wyi remẽ, a'e irõte rõmõ tesõ amojivytà ijarerà kõ pè ime'ẽ mijẽ, e'i Sakeu.

9 Ãmẽ aepo renu remẽ, kee e'i Jesu ijupe:

– Age'e sõsi aã tetã jarà ojireko katuoka Janejare'e pè ky'y. Tãmõ Aparão reruparà mõ ekoi, ijeapyrerà e'eay rõmõ. 10 Okãjã mã'ẽ vo Janejare'e pè mijã. A'evo mãe kõ mokatuarà rõmõ tè ajo ajimojane ike pepõ'õ mè aiko. Nivoi mãe kõ reka tè ajo imotekokuwa kõ. Ajaire “hoõ” te'i Janejare'e ijupe kõ, e'i Jesu.

11 Ajaire Jesu kõ ojiapy jẽ oo Jerusarẽ taa pè ovãerĩ kupa ky'y. Ãmẽ Sakeu retã wyry pewarà kõ, kõi Jesu ayvu wenu ji'i mãe kõ, kee e'i opy'a pupe kupa:

– Kuise'ẽ jẽ Janejare'e ojikuwatà uu Jõvijã rõmõ janepytery pè, e'i oupe kupa.

Ãmẽ Jesu poromo'e jẽtà. Ãmẽ ayvu mõ omosã'ãga mijẽ. 12 Kee e'i Jesu:

– [Ajivytà rã'ĩ aa erena kyty, Papa rena kyty, e'i. Ajawyi tapeposiko katu jẽ ikõ eayvu rupi erapykyre kyty nẽ, e'i.] Jõvijã wasu rè tè ajimosã'ãgatà tapekuwa sa'u, e'i. Ãmõ 'ary pè kwaima'e temimoe'e mõ ojisyrytà rã'ĩ oo ãmõ yvy kyty. Ojimojõvijãokatà oo. Kãramõ aekwerà pè ojivyrĩ tarà mijẽ uu. Jõvijã wasu rõmõ tè ojivyrĩtà uu ky'y. 13 Ãmẽ wemĩgwai kõ ookwai rã'ĩ imuu imogeta kõ. 10 rõmõ ookwai imuu, “Ejo toromogeta”, e'i. Kee e'i ijupe kõ: “Ajisyrytà rã'ĩ aa”, e'i. “Ajawyi ema'e kõ rè peja'a erapykyre kyty peiko”, e'i. “Moma'e kõ pepyy ime'ẽ erokwa epy rõmõ, karakuri tapepyy ekojẽ erapykyre kyty”, e'i. Ãmẽ pe'ĩ karakuri moeta mõ ome'ẽ me'ẽ rã'ĩ tè a'e a'e kõ pè imosãi. “Hoõ” e'i ãmẽ kupa.

14 – Ajaire wemĩgwai kõ oity oo. Ãmẽ a'e yvy pewarà kõ nopotai kwaima'e oõvijã rõmõ toiko. Ãmẽ wetãrã kõ mõ opyteporo imonooka jõvijã rã rapyky rupi, a'e wãnà kõ pè too kee javo kupa, “Noropotai ãwĩ orerõvijã rõmõ toiko”, te'i kupa. 15 Ajamã'ẽ ojimojõvijã jẽ upa. Ajaire ojimojõvijã maire, ojivyrĩ mijẽ uu aekwery pè. Ovãe remẽ, wemĩgwai kõ omuu, kõi karakuri ome'ẽma jypy remẽ ijupe maekwerà kõ. Kee e'i ijupe kõ: “Ikatu tè põ peposiko ekarakuri pupe? Pepyy moma'e ime'ẽ epy rõmõ, ekarakuri tije'e ekojẽ põ?” e'i. 16 Ãmẽ emĩgwai mõ kee e'i: “Pe'ĩte karakuri itõkõ neme'ẽ ije mijã. Age'e itã'ã aposiko paire, 10 rõmõ tesõ moeta amoaty ky'y. I'ete põ?” e'i. 17 Ãmẽ: “I'ete. Eremĩgwai e'eay rõmõ ene”, e'i tõvijã ijupe. “Eayvu rupi katu eremime'ẽgwerà nereko. Ajawyi jõvijã rõmõ neikotà ky'y. 10 taa wãnà kõ rè jõvijã rõmõ neikotà”, e'i ijupe imoe'e. 18 Ãmẽ ãmõ ve uu oõvijã gyty. Kee e'i: “Jõvijã, pe'ĩ nekarakuri itõkõ neme'ẽ ije jypy remẽ mã'ẽ. Aposiko ipupe paire, 5 rõmõ tesõ moeta amoaty ky'y. I'ete põ?” e'i. 19 Ãmẽ a'e peve: “I'ete” e'i tõvijã ãmẽ. “Ene oromojõvijãokatà. 5 taa wãnà kõ rè nejimojõvijãtà”, e'i.

20 E'i jẽ Jesu:

– Ajaire ãmõ ve uu oõvijã pè oporegeta: “Erõvijã, aã koiwerà, neremime'ẽgwerà amokatu ereko. Kee a'e eupe: ‘Jõvijã ojivy uu remẽ tamojivy ijupe’, a'e eupe. Aõjã kamisa miti pupe imokatu ereko. 21 Ajirokyje newyi rewarà mõ amokatu jẽ tamoma tite e'ã. Orokuwa katu. Nejimomojy mã'ẽ tè ene. Neayvukasi mã'ẽ teve. Maipe neremokatuive moma'e ipe remeve, neo ajaire ekyi ipi. Ãwitõ ava mõ nojimitãi epe remeve, oo ajaire temitã'akwerà po'o ipi. Ãwĩvo 'ejẽ neiko. Aja rewarà mõ moko a'e”, e'i emĩgwai imojivy karakuri oõvijã pè. “I'ete põ moko areko?” e'i. 22 Ãmẽ kee e'i tõvijã ijupe: “Ãnĩ! Temĩgwai aiweray rõmõ neiko”, e'i. “Neayvukwerà rupi tè oromomorijauokatà, kee ere maekwerà rupi: ‘Ãwitõ ava mõ nojimitãi epe remeve, oo ajaire temitã'akwerà po'o ipi’ ere tite si ije. ‘Nejimomojy mã'ẽ tè ene’, ere. A'evoa nekuwa ipe mijã. 23 Manyvore põ karakuri rena pè nereinõi ekarakuri ãmẽ, tojimovija upa? Ãmẽ aã age'e ojimoatykwerà revejẽ apyy kuwa mijã, eremime'ẽgwerà”, e'i imoãtãre'ã. 24 Ajaire ãmõ kõ pè e'i jõvijã: “Peekyi aã wyi ekarakuri moeta. Eremĩgwai 10 rõmõ moeta omoaty mã'ẽ pè eme'ẽ”, e'i. 25 Ãmẽ kee e'i kupa: “Orerõvijã, a'e karakuri pe'ĩrõwã wereko. 10 rõmõ tesõ uve ijupe. Orome'ẽ jẽ kuwa põ a'e pè?” e'i kupa. 26 Ãmẽ: “Ava mõ ojime'ẽ ijupe mã'ẽ oporu katu remẽ, ãmẽ ywesõ ojime'ẽtà ijupe. Ajamã'ẽ ava mõ noporui ojime'ẽ ijupe mã'ẽ remẽ, jaekyità ojime'ẽ maekwerà iwyi”, e'i.^b 27 Ãmẽ ãmõ kõ rè, kõi jypy remẽ nopotai too jõvijã wasu rõmõ mãe kõ rè kee e'i jẽ: “Pekwa ojimoãpã ere mãe kõ pijarà mõ eru aã ike”, e'i. “Erovakeve ikõ peapisipa nẽ”, e'i jõvijã, e'i Jesu aepo momewa.

28 Ajaire Jesu Jerusarẽ taa kyty ojiupi oo iko. Emimo'ekwerà kõ ve oo apyky rupi. 29 Ãmẽ tena kõ pè ovãerĩ kupa remẽ, yvytyry mõ pè ovãe kupa. Oriveiraty eu yvytyry rerà pè. Petepaje taa pyri Oriveiraty tui. Ãmõ, Petãnia taa pyri teve tui. Ãmẽ Jesu omono wemimo'earà kõ mõ wenone rupi, mõrijõ mãe kõ. 30 Kee e'i ijupe kõ imono kõ:

– Pekwa erenone rupi wãi taa kyty, e'i. A'e pè pevãe remẽ, jumẽtu^c memyry mõ rè pemã'ẽtà. A'e mokope ojiãnõtà upa, e'i. A'e 'aryvo ava mõ nooive mã'ẽ. A'e pejora eru ike eupe, e'i. 31 Ãmẽ ava mõ sõ kee e'i peupe remẽ: “Moma'e rã põ pejoratà eraa?” e'i peupe remẽ, kee pejẽ ijupe: “Orerõvijã opota rã'ĩ,” pejẽ ijupe ãmẽ, e'i.

“Hoõ” e'i oo ãmẽ kupa. 32 Ãmẽ jumẽtu memyry wesa a'e pee reme pè kupa, Jesu e'i maekwerà rupi katu. Yvyra rè wãnõ kupa mã'ẽ. Sõjẽ, oka rova ypy rè wãpasĩ tatui upa. 33 Ãmẽ ojora kupa upa remẽ, ijarà kõ kee e'i ijupe kõ:

– Moma'e rã põ pejoratà eraa? e'i ãmẽ oporanu kupa.

34 Ãmẽ e'i kupa:

– Orerõvijã iporijau ee. Ajawyi, “Peeru rã'ĩ ije”, e'i ore, e'i kupa.

– Hoõ. Peraa rã'ĩ ãmẽ, e'i jumẽtu jarà kõ ijupe kõ.

35 Weraa ãmẽ kupa Jesu pè. Ajaire oyru kõ omovevu teima ape 'aryvo. Ajaire omovy Jesu kupa, toẽ jumẽtu 'aryvo wapy. 36 Ajaire Jerusarẽ gyty ojiapy oo kupa iko. Aty wasu oo Jesu rupi a'e remẽ. Ãmẽ jane kõ pee ypy pè wãrõ Jesu kupa. A'e kõ oyru poko omovevu pee rupi enone.^d 37 Oo jẽ kupa. Oriveiraty pyryvo okwa kupa. Ãmẽ pirujẽ Jesu remimo'ekwerà kõ atyry wayvo oporegeta iko kupa. Ory tesõ kupa. Janejare'e omoe'e iko kupa. Pirujẽ omã'ẽ maekwerà rè omoe'e kupa. 38 Kee e'i kupa:

39 Ajamã'ẽ Pariseu kõ mõ ojimo'eai Jesu moe'ea renu kupa. Ajawyi Jesu pè kee e'i kupa:

– Nikatui moko'i remẽ nekoty rewarà kõ. Emomi kõ aepo te'i e'ã kupa ky'y, e'i tite kupa.

40 Kee e'i ãmẽ Jesu ijupe kõ:

– Ãnĩ si! Tipu jẽ kupa. Nipui sõ ãwĩ kõ remẽ, takuru kõ tẽ tesõ iputà emoe'e rõmõ ãmẽ ky'y, e'i Jesu.

41 Ãmẽ Jesu ojiupi jẽ oo iko, ajaate Jerusarẽ taa rè omã'ẽ ky'y. Ãmẽ a'e wãnà kõ oporijauesa amãtejẽ, okuwa ojimomorijau wasutà kupa rewarà mõ. Ajawyi oja'o taa rè omãjã erokwa. 42 Kee e'i:

– Pene, poromomoiokatà peaiwererà wyi mijã. Poropy'amopiryvypy katu kuwa mijã. Ajamã'ẽ nekuwai pekupa. “Janejare'e Remimuurerà tè” napejẽi 'ete ije. Ajawyi tè keetà kãramõ. 43 Kãramõ ipojy aità peupe. Peãpã kõ tè uutà pemoenawe jimo'yjẽ. Penena wãrimãtà pene kupa. Penetã omopypyrupatà ity kupa. 44 Penekoawerà omoaipa 'etetà kupa. Pepa katuaytà ãmẽ ky'y. Ava jẽ rõwã ojejatà mãrãnai wyi ãmẽ ky'y, e'i. Pirujẽ taa rokenaa omopypyrutà itypypyi teve kupa. A'evoa renone rõmõ tè ajo ipe Janejare'e Remimuurerà rõmõ. Nekuwai pekupa ajamã'ẽ. Aja rewarà mõ a'evotà pejẽ ãmẽ ky'y, e'i Jesu ijupe kõ.

45 Ãmẽ Jesu ovãe Jerusarẽ taa pè remẽ, Janejare'e moe'ea retã gyty oo. Ãmẽ a'e ypy pè mirà kõ mõa'ãrõwã tui upa. Ajamã'ẽ Janejare'e pè moma'e me'ẽa repy rõmõ tè uu uu kupa.^f Janejare'e moe'e rè rõwã uu kupa ãmẽ. Ajawyi a'evoa rè Jesu omã'ẽ erokwa remẽ, omopõ mopõ kõ imoisyry syrypa a'e pe wyi imono. 46 Kee e'i ijupe kõ:

– Nivoi moko pejẽ remẽ! Kee e'i itõkõ Janejare'e kareta rè ojikusiwa: “Eretà eupe oporegeta mãe kõ poregetaa rena tè. Ajamã'ẽ imona mãe kõ retã vo 'ejẽ pereko”, e'i ojikusiwa maekwerà rupi katu peiko, e'i ijupe kõ imoãtãre'ã kõ.^g

47 Ãmẽ kõ'ẽ jawe jawe Jesu poromo'e Janejare'e moe'ea retã ypy pè iko ipi. Ajamã'ẽ Janejare'e pè oporegeta mãe kõ rõvijã kõ nopotai Jesu. Ãmõ, tãmõ Moisesi remikusiwarerà rè poromo'e mãe kõ teve nopotai Jesu. Ãmõ, Juteu rõvijãgwerà kõ. A'e kõ ojukatà Jesu kupa, ojimõarõ ikotyre kupa rewarà mõ.^h 48 Ajamã'ẽ nokuwaive manyvo kuwa wereko ijukaaoka mã'ẽ kupa. Jane kõ ãmẽ opota katu Jesu. Omoe'e kupa ipi, pirujẽ. Wenu takatu ijayvu ipi kupa. Ajawyi jõvijãgwerà kõ okyje iwyi kõ. Nopõ'ã'ãi Jesu rè jane kõ rovake ãmẽ kupa.