– Pekwa erenone rupi wãi taa tui upa mã'ẽ gyty. A'e pè pevãe remeve, pemã'ẽtà jumẽtu^a memyry rè, nooytyive upi mã'ẽ rè. Wãnõ tatui kupa mã'ẽ rè pemã'ẽtà. A'e rè pemã'ẽ remẽ, pejora eru ike ije, e'i. 3 Ãmẽ ava mõ sõ kee e'i pejẽ remẽ, “Moma'e rõmõ põ pejoratà eraa?” e'i sõ pejẽ remẽ, kee pejẽtà ijupe: “Ãnĩ! Orerõvijã tè ‘eeru’ e'i ore. Ajawyi oroeraatà rã'ĩ. Ajaire omojivytà imuu”, tapejẽ ijupe ãmẽ, e'i ijupe kõ.

4 Oo Jesu ayvu rupi ãmẽ kupa. A'e kyty ipõ jumẽtu memyry rè omã'ẽ kupa. Oka rova pyri wãnõ tatui kupa mã'ẽ rè omã'ẽ kupa. A'e ojora eru kupa, Jesu e'i maekwerà rupi. 5 Ojora kupa upa remẽ, omã'ẽ ee mãe kõ e'i ijupe kõ:

– Manyvore põ pejoratà eraa? e'i kupa.

6 – Orerõvijã tè “eeru” e'i ore, e'i kupa.

– Hoõ, peraa ãmẽ, e'i ãmẽ ijupe kõ kupa.

7 Ãmẽ weraa Jesu pè kupa. Oyru poko kõ oinõ ijape 'aryvo kupa. A'e ape 'aryvo Jesu oo iko.^b 8 Ãmẽ ovãe iko remẽ, aty wasu kõ oo upi. A'e kõ mõ oyru poko omovevu vevu imojimoy moy pee rupi enone kupa. Ãmõ kõ ka'aro kõ opo'o, warakuri vo mã'ẽ. A'e omoy moy teve Jesu renone rupi kupa. 9 Pirujẽ aty wasu wapuka pukai tesõ Jesu renone iko kupa. Janejare'e omoe'e teve eewarà mõ iko kupa. Kee e'i kupa:

A'evo Jesu renone wereko kupa. Ãmõgwerà ovake rupi okwa kupa. Ãmõ kõ akypy rupi oo. Pirujẽ oryvay ee iko kupa.

11 A'evo Jesu ovãe Jerusarẽ taa pè iko. [Ovãe remẽ, owyjy jumẽtu memyry ape 'aryvo wyi.] Ajaire Janejare'e moe'ea retã gyty oo iko. Tetã ypy pè oike rã'ĩ ee omãjã okwa. Nopytai ajamã'ẽ. Karupa ky'y wyi ojikõtevẽ jẽ. Ajawyi ojivy oo Petãnia taa kyty oke, wemimo'ekwerà kõ reve, 12 mãe kõ reve.

12 Kõ'ẽme Jesu oo mijẽ Jerusarẽ taa kyty, Petãnia taa pe wyi. Nikasi amyay pè oo iko remẽ. 13 Ãmẽ moma'eyva'y rè omã'ẽ imono, piku'y eu mã'ẽ rè.^d Opota ipe a'e'akwerà o'u mijã. Ajamã'ẽ ni'aive. Ookwerygà tè tui.

14 Ajawyi Jesu e'i moma'eyva'y pè:

– Mãerã tè ikõ tija'u e'ã ne'a nẽ! e'i wemimo'ekwerà kõ reminu rõmõ.

15 Ãmẽ ovãema Jerusarẽ taa pè kupa remẽ, Janejare'e moe'ea retã gyty oo mijẽ kupa. Etã ypy pè ovãe kupa remẽ, a'e pè teima mosãiarà kõ omosãi kupa upa, Janejare'e pè temime'ẽ rã.^e Ãmẽ Jesu a'evoa rè omã'ẽ remẽ, nopotai. Ojikõ'õ omãjã ee kõ, nivoi wereko Janejare'e moe'ea retã kupa rewarà mõ. Ajawyi ime'ẽarà kõ omoisyry imono. Ãmõ, namesa kõ karakuri rewarà kõ oposiko i'aryvo ipi mãe kõ oity ipujere. Ãmõ, jirusi rena kõ apyka kõ oity teve ipujere Jesu. Ãmõ, moma'e opyy mãe kõ teve omoisyry imono. Ãmõ, karakuri rewarà kõ ve omoisyry. 16 Noerokwaokari moma'e kõ Janejare'e moe'ea retã rupi. 17 Ajaire e'i ijupe kõ moma'e rõmõ tè Janejare'e moe'ea retã.

– Kee e'i itõkõ Janejare'e kareta rè ojikusiwa: “Eretã eupe oporegeta mãe kõ poregetaa rena tè, pirujẽ yvy wãnà kõ totuu oporegeta eupe iwyry pè ipi”, e'i maekwerà tè.^f Aekwerà rupi katu rõwã pereko ajamã'ẽ! Imona mã'ẽ retã vo 'ejẽ pereko! e'i imoãtãre'ã kõ.

18 Ajawyi Janejare'e pè oporegeta mãe kõ rõvijã kõ ojimõarõ Jesu rè, aepo wenu kupa remẽ. Ãmõ, tãmõ Moisesi remikusiwarerà rè poromo'e mãe kõ ojimõarõ ee. Ajawyi weka manyvotà wereko Jesu ijuka kupa mã'ẽ. Ajamã'ẽ okyje iwyi kupa, jane kõ mõa'ãrõwã opota katu Jesu ayvu renu rewarà mõ.

19 Ãmẽ karupa ky'y remẽ Jesu oẽ oo Jerusarẽ taa pe wyi, wemimo'ekwerà kõ reve.

20 Ajaire kõ'ẽme, ji'iveay Jesu kõ okwa mijẽ piku'y pyryvo. Ãmẽ omã'ẽ ee kupa remẽ, soõ, osinĩma! Apokwerà wyive ijupa. 21 Ãmẽ Peturu oja'a Jesu ayvukwerà rè. Ajawyi e'i Jesu pè:

– Emã'ẽ, jõvijã! Kõitokõ moma'eyva'y pè, “Mãerã tè ikõ tija'u e'ã ne'a nẽ!”, ere ijupe maekwerà osinĩma! e'i ijupe.

22 Ãmẽ Jesu e'i ijupe kõ:

– Õ'õ, aje. A'evoa rè kee a'e pejẽ. “Aje” pejẽ ikõ Janejare'e kasia pè pepy'a pupe nẽ, e'i. 23 [Ãwĩvoa niwasu'ãi pejẽ ãmẽ, a'e pejẽ.] Ãmõ, aã yvytyry pè eayvu rupi, “Ejisyry pãranã wasu pupe eo!” pejẽ sõ remẽ, a'evotà kuwa ãmẽ, “aje” pejẽ Janejare'e kasia pè remẽ. “Aje põkõ?” napejẽi pepy'a pè remẽ.^g 24 Pirujẽ peporijau ee mã'ẽ rè peporanu ijupe remẽ, ome'ẽtà pejẽ ãmẽ, “Aje a'evotà”, pejẽ remẽ. 25 Ãmõ, kee tapejẽ rã'ĩ, Janejare'e pè peporegeta pekupa remẽ. “Uve sipõ emoaiarerà, ajimõarõ jẽ ikoty mã'ẽ?” tapejẽ. Uve sõ a'evo mã'ẽ remẽ, “awyjepa” tapejẽ ijupe ky'y. Tapejimõarõ e'ã ikoty ky'y. [Tapenearai maevo sõ tite aekwerà wyi ky'y.] Ãmẽ sõsi Janejare'e “awyjepa” e'i tary ve peaiwererà pè, wena pe wyi. Awyje noja'a'ãi aekwerà rè ky'y. [Napemomorijau'ãi eewarà mõ ãmẽ.] 26 Ajamã'ẽ “awyjepa” napejẽi sõ pemoaiarerà pè remẽ, Papa yvapewarà aepo ne'i'ãi teve peaiwererà pè ipi. Omo'y jẽtà pene, e'i Jesu ijupe kõ.^h

27 Ajaire Jesu oo mijẽ Jerusarẽ taa kyty. Janejare'e moe'ea retã ypy kyty oo. A'e rupi wata iko remẽ, ãmẽ Janejare'e pè oporegeta mãe kõ rõvijã kõ ovãe ikoty. Ãmõ, tãmõ Moisesi remikusiwarerà rè poromo'e mãe kõ ovãe. Ãmõ Juteu rõvijãgwerà kõ teve. [A'e kõ: “Siayvumoopa Jesu”, e'i epe kupa.] 28 Kee e'i ijupe ãmẽ kupa:

– Ava ayvu rupi põ moko ere neiko ipi? e'i kupa.

29-30 Ãmẽ Jesu e'i ijupe kõ:

– Pejẽ rã'ĩ ije esa ajawyi. Ava ayvu rupi põ Juwão amyry poromojãmorĩ ipi? Janejare'e ayvu rupi põ? Jane kõ ayvu rupi põ? Aepo pemome'u rã'ĩ eupe remẽ tè, a'età pejẽ ava ayvu rupi aiko, e'i Jesu ijupe kõ.

31 Ãmẽ aepo e'i remeve, jõvijã kõ kee e'i ojiupe:

– Manyvo ja'età põ aepo e'i remẽ ijupe? “Janejare'e ayvu rupi uu”, ja'e sõ remẽ, “‘Aje’ pejẽ kuwasi ijayvu pè ãmẽ!” e'ità jane. 32 Ajamã'ẽ, “Jane kõ ayvu rupi tè Juwão uu”, nija'e'ãi ajamã'ẽ, e'i ojiupe kupa.

Ma'e rewarà mõ aepo ne'i'ãi kupa. Aty wasu kõ kee e'i Juwão pewarà mõ: “Janejare'e ayvu mojenuarà tè Juwão amyry”, e'i kupa. Jõvijã kõ nopotari imojikõ'õoka kõ. Ipojy kuwa ãmẽ ijupe kõ. 33 Ajawyi ne'i'ãi Jesu pè aty wasu kõ reminu rõmõ kupa. Kee e'i kõrijõ ijupe kupa:

– Norokuwai ava ayvu rupi põ uu, e'i rã'ãga Jesu pè kupa.

Ãmẽ Jesu e'i ijupe kõ:

– Ije ve na'e'ãi pejẽ ava ayvu rupi aiko, e'i ijupe kõ.