EL APOCALIPSIS
Juan kꞌãitarr
1
Mʌʌn Juanau,
Jesucristo chog.
Muata pãrag mʌchdëu hootarr jaaum hig chirʌm.
Mʌg mua jawaagpam hiekꞌan hich Hẽwandamaucha Jesucristoog jaautarrau.
Mag hichig jaaubaawaita mʌ kꞌãaipi hauwi mʌrʌg jaaujim,
jũrr mua hich hiek hʌ̈kꞌa durrum kꞌʌʌnag jaaumkꞌĩir.
Mʌg hiek tꞌum hich jaaubarmjö chadcha jöpcha haju kꞌap hamkꞌĩir,
Jesucristoou hich chog hãb hʌ̃gtꞌar hich dʌ̈i sĩejemʌgta jaaujim,
mag mʌ kꞌãaipi hatꞌam hee jũrr magua mʌrʌg jaaumkꞌĩir.
2 Magbaawaita Hẽwandamau Jesucristo dʌ̈imua mʌchig hoopinaa mʌchig hũrpitarrpa tꞌumaa pꞌã chirʌm.
3 Chi mʌg mua pꞌãbarm hẽsap tꞌʌ̃r sim woun honee haju;
maimua honee hajurau hĩchab mʌg hich hiek pꞌã sim gaai Hẽwandamau nem tꞌum hichdëu jaau sim hiek hãbmua tꞌʌ̃rmam hũrwia hag gaai jaau simjö hi hipierraa wënʌrrʌm kꞌʌʌn.
Ya chadcha tꞌum mʌg hẽsap gaai hichdëu jaau simjö höbëbërg maju dakkꞌa pamam.
Pꞌöbör siete narr hee iglesiapierr Juanau hẽsap pꞌãnaa haaidʌtarr
4-5 Mʌʌn Juanau.
Muata mʌg hẽsap pꞌã deepʌ̈i chirʌm Asia durr pꞌöbör siete nʌm hee Hẽwandam hiek hʌ̈kꞌa nʌm kꞌʌʌnag.
Mua pãar kõit jëeu chirʌm,
hichta warrgarwe hich mag sĩerranaa mʌg hatagjã hich mag sĩerraju higwia,
hich kꞌu juupjem kꞌĩirpꞌee hich Hẽwandam Hakꞌaar sĩerrʌm higwia,
maimua Jesucristo chadam hiek chaarcha jaauchëtarr higwiajã jëeu chirʌm,
pãar dau hee haug kꞌaug paraanaa pãar hʌ̈u wai nʌm dʌ̈i hĩchab pãar kꞌõinaa wai wënʌrramkꞌĩir.
Mag Cristota meeba harrjö nacha hiiu pꞌiidʌwia mʌg reinaan tꞌʌnʌm kꞌãaijã hiek tꞌeeg hʌ̃rcha sĩerrʌm.
Hich hag Cristota maach daupigau hʌdʌraa hich tꞌõopijim.
Magbarmua maach kꞌaibag chugpaapʌ̈iwia
6 hich Haai hanaa hich Hẽwandam hatꞌee maachta pꞌadnaankꞌa haujim,
hich dʌ̈i hagdaujö hiek tꞌetꞌe wënʌrramkꞌĩir.
Hirigta hãba tꞌumaam kꞌʌʌnau,
“Hich happaita hãba Hẽwandam chaarkꞌa sĩerrʌm” ha hiekꞌanaa,
“Hichdëupaita warrgarwejã nem tꞌum kꞌapꞌʌnaa mʌg hatagjã kꞌapꞌʌ sĩerraju;
maata maach Hẽwandamau” ha tꞌö hiekꞌaju haai nʌm.
7 Cristo,
Hẽwandam Hiewaa,
hedjã baug hee hurum tꞌumaam kꞌʌʌnau hamach daúa hooju,
hi tꞌõotarr kꞌʌʌnaupa.
Magbaawai durrpierram kꞌʌʌnau hamach daujã merag pꞌëwi,
jũrr hamach gaai mas haju kꞌap,
hi hökgau hicharaucha bĩejurau.
Magju hanʌm chan sëukꞌaawai kꞌabam.
8 Hich Hẽwandamauta hich higwia,
“Mʌchpaita nacharam hẽsapdau Ajönaa chi hãbmiecharam Zetajö chitʌm” ha hiekꞌaajem,
hich warrgarwejã hich mag sĩerrawi mʌg hatagjã hich mag sĩerraju Jöoirau.
Hichdëu mag sim haawai hoob kꞌĩirjumiet.
Hichta Hẽwandamau,
tꞌumaam kꞌʌʌn Pör;
hi hatꞌee chan pꞌitꞌurm nem chukꞌum.
Kꞌãaipi hatꞌamua maach Pör Jesucristo hootarr
9 Mʌʌn pãach kꞌod har Jesús hiek gaaimua pãachjö pꞌitꞌurg hau pʌʌrba kꞌitaajemuata pãrag mʌg hẽsap pꞌã deepʌ̈i chirʌm.
Mag pꞌitꞌurg haaujeeb mamʌ,
hich Jesucristoouta magʌm hãwataagjã juapá deejeewai,
magʌmjã higba,
pꞌitꞌurg jẽedʌ kꞌitʌmua hi haar barwi hi kꞌĩir wajaug hoo wai chitaju.
Hẽwandam hiek jaau chitʌm dʌ̈i Jesuu nem wau nʌrrarr mʌch daúacha hoojerrta jaau chitʌm gaaimua,
mau döjãrr pꞌʌram Patmos hanʌm gaai preso chirʌm.
10 Mag mʌ preso chirʌmta biek hãb domighed hich Hẽwandam Hakꞌaarta mʌ gaai pꞌẽs haicheewai,
mʌ dau heertꞌʌg hatꞌamjö habarm hee,
trompeta hiekjöta nem jẽbag mʌ hëugarmua mʌrʌg hiekꞌachëwia,
11 “Nau mua pʌchig nem hoopibarm tꞌumaa hẽsap gaai pꞌãnaa Asia durr pꞌöbör siete nʌm hee mʌ hiek hʌ̈kꞌa nʌm kꞌʌʌn haar deebapʌ̈i” hajim:
“Efesopienag,
Esmirnapienag,
Pérgamopienag,
Tiatirapienag,
Sardipienag,
Filadelfiapienag maimua Laodiceapienagjã hagjö.”
12 Mʌchig mag hiekꞌabaichëm kꞌap haag hawi mua hewag pꞌʌʌrbanaa hoowai,
lámpara bʌ̈ hausĩiujemta pꞌĩr dën pꞌurii kꞌitꞌëem hãbam haig siete nʌm hoojim.
13 Maimua mag lámpara siete nʌm jãrr mua hoowai,
woun hãb hich Jöoi Hiewaa Jesujöhö simta hichkꞌaarjã haraa correerjö pꞌĩr dën pꞌuu kꞌitʌmua hãi jʌ̃naa kꞌajũa bʌ̈ duurga kꞌĩeb bʌ̈ kꞌãdau haar jũa dʌnʌm hoojim.
14 Mag simʌn kꞌĩirjug kꞌaauga sĩerraawai sĩi lanjöta pördam bäppꞌä kꞌitajim,
hich kꞌĩirjug kꞌaugau.
Maagwai hich daúapai nem tꞌum kꞌapꞌʌ haajeewai,
hi dau hoowain sĩi hõtdaujöta huujẽer huujẽer huujẽer sĩsid hajim.
15 Hi bʌ̈,
sĩi nem hinag hõtdau hee bʌ̃ʌupinaa wau simjö nem tꞌeega sĩejim,
broncejö.
Mag nem tꞌeeg sĩewai sĩi huhbʌ hoodʌnaajim,
bʌ̃ʌrjã burrju kꞌaba.
Mag hi bʌ̈ broncejö sĩewai sĩi pꞌuu kꞌitajim.
Mag sim hiekꞌa sim hũurwai,
hichta tꞌumaam kꞌʌʌn kꞌãai hiek tꞌeeg sĩerraawai,
sĩi pꞌũasdau dapagta dö higaau jurrdʌbaichëm hiekjö sĩejim,
hi hiek.
16 Mag simua hich juachaar gar pꞌĩdag siete wai dʌnaajim;
hich hi hee espaar kꞌẽu mii kꞌitʌm pꞌõpá garm magwe dëe kꞌitʌmjã wai sĩejim,
hagua hich hoomapꞌam kꞌʌʌnag bʌ̃ʌrjã hich jua jʌmpiba haag.
Maimua hi kꞌĩir hoowain sĩi hedau pechagkꞌam hee nem pꞌuum hoo nʌmjöta maach dau përpërmjö sĩejim,
pöd hi dʌ̈i kꞌĩircha heerpaju kꞌaba.
Magta mʌrʌg mʌch daúacha maach Pör Jesucristoou hich hoopijim.
17 Mag hoobarmʌn mʌʌn sĩi chi meemjöta tꞌʌbëpjã chukꞌu hi bʌ̈kꞌʌrr buju haimajim.
Mamʌ magbaawai hichdëu mʌ gaai pʌrnaa,
“Hoob jãpꞌierram” hajim.
“Mʌchta nem tꞌum hompaaju nawe chirajim;
mʌg durr tꞌum höwiajã mʌchta hich mag chirsiju kꞌabahab” hajim mʌrʌg.
18 “Mʌchpai kꞌabahab” hajim,
“har meewi deeu hiiu pꞌiidʌtarr;
magtarr cha hagtꞌa hiiu chirʌm,
mʌg hatagjã hich mag hiiu chitʌm hiekꞌau.
Mʌchdëuta kꞌap chirʌmgui” hajim,
“jãagwaichata hõor meepiju,
maimua mag meewaijã chijã kꞌʌʌnta kꞌĩmie durr wëtju” ha hiekꞌamajim mʌrʌg.
19 Maimua mʌrʌg,
“Cha pʌchdëu nem hoobarm dʌ̈i nau pʌchig hoopibarmpa hẽsap gaai tꞌumaa pꞌã sĩubá” hajim,
“mʌʌgwai nem hin tꞌʌnʌm,
maimua mʌgtarr kꞌurjã nem höbëbërg maju tꞌum pꞌã sĩubá” hajim.
20 Maimua mʌrʌg,
“¿Pua kꞌapꞌʌ chirʌ́” hajim “kꞌani jaau sĩ har mua mʌch juachaar gar pꞌĩdag siete wai chirarr,
maimua lámpara hausĩiujemjã pꞌĩr dën siete wai chirarr?”
Magnaa hichdëupai,
“Har pꞌĩdag siete narr,
jã mag siete iglesia nʌm hee hagjö pastornaan siete nʌm kꞌʌʌnta jaau simgui” hajim.
“Maagwai mag chi lámpara hausĩiujem hagjö siete narr,
jãkꞌʌʌn Asia durr mag iglesia siete nʌmta jaau simgui” ha jaaujim mʌrʌg hich Cristooucha.