Juanau mʌg hich kꞌãitarr hõrag jawaag pꞌãawai ya jöoiraa kꞌitajim haajem. Hich mag jaar hĩchab Jesús higar hʌ̈kꞌa durrum kꞌʌʌn hoomaaugau hõrau ham hẽudeejã hẽkꞌanaa, cárcel deg pʌ̈inaa wajappꞌa dau haug waupiejeejim haajem. Hẽwandamau hoowai mag hich chaain wajap dau haug wau durrum hoobaawaita jöoi Juan kꞌãaipi haujim hanaabá, mag kꞌãaipi hatꞌamua nem tꞌum tꞌʌnʌmʌn hichdëuta kꞌap haajeewai mag hich chaain dau hapꞌʌʌ hapi nʌm kꞌʌʌn dʌ̈ijã hichdëu kꞌap haju jawaag.

Magta chadcha Juanau Hẽwandamau hich kꞌãaipinaa hichig hoopitarr tꞌumaa pꞌãjim haajem, chi hʌ̈kꞌa durrum kꞌʌʌndam warag kꞌĩir honee hamkꞌĩir; mag nʌm dʌ̈i hĩchab hich Cristojã hũwaai deeu bëewi hõor hich dau na kꞌaigba haajerr kꞌʌʌn tꞌum tꞌeernaa hisegju kꞌap hamkꞌĩir. Juanaun hich paarmua ya chi hʌ̈kꞌa durrum kꞌʌʌnag Cristoou magju kꞌap hapinaa, mʌg jẽb gaai pꞌitꞌurg hau wënʌrrawiajã, warag magʌmjã higba Cristo dʌ̈ita hogdʌba hubʌ wënʌrrapim kꞌõchgauta mʌg hẽsap pꞌãjim haajem.

Juanau hichdëu nem hoomatarr hĩgkꞌamam hũurwai, chadcha maach dauderraa haju haai sim, dichdëuta hootarr hakꞌiin. Pari maagwai chi hʌ̈kꞌa narr kꞌʌʌnau kꞌapꞌʌ naajim hanaabá, Hẽwandamau mʌg durr kꞌaigba haju jaau sim. Juanau hich daúachata hoojim haajem, Hẽwandamau mʌg durr hi hagkꞌabarm hed jãga hirua hõor gaai jua kꞌʌaba deeju. Hẽwandamau magta hirig nem kꞌĩir pogkꞌe hoopimajim hanaabá, tꞌum hichdëu hootarrjöo jaaumamkꞌĩir. Pari chi Hẽwandam hiek hʌ̈kꞌaba nʌm kꞌʌʌnau chan par Juanau mag hichdëu hootarrjö wajapꞌa hẽsap gaai pꞌãtarr tꞌʌ̃ʌrjerrjã kꞌaugba haajeejim hanaabá.

Ya hĩs hewag paawai Juan kꞌãitarr higwia hõrau hamach kꞌĩirjugpierr jaaujem. Pari Hẽwandamau tꞌumaam kꞌʌʌnag hʌ̃rcha kꞌapꞌʌ hapim kꞌõsi simʌn mʌgau: Mʌg nʌʌ hawia dëgölp Hẽwandamau Jesucristo dʌ̈imua hamach kꞌa hukꞌur harr kꞌʌʌn tꞌum warre sĩi hichdëuta pödpʌ̈iwia hichta hʌ̃rpai sĩsiju. Mag hedan chi mepeerpata Hẽwandamau sĩi heeg bʌ̈ʌu bichtꞌʌgbaadëmjöta haju hanaabá. Pari magtarr kꞌur har hi hiek hʌ̈kꞌawia hogdʌba hich mag durrarr kꞌʌʌnan hich dʌ̈i hich mag wënʌrramkꞌĩir, hʌ̃gtꞌar pꞌë harrwia hich mag hich dʌ̈i pꞌë wai sĩsiju haajem.