10
Hẽwandamau Moiseeg ley deetarr gaai nem waupi jaau sĩerrjö nem wau narran,
sĩi hökꞌar hewag paawai hichdëu maach dʌ̈i nem hajapcha wauju dën chi kꞌũgurpai harr haawai,
hich hagjöcha kꞌaba sĩejim.
Maguata chi leíu chan chi ley hʌʌrkꞌanaa añopierr nemchaain kꞌëchnaa Hẽwandamag jëjëeukꞌamjã pöd hõor hajaug paa hauba haajeejim.
2 Chadcha ley gaai jaau sim hipierr nemchaain kꞌëchnaa Hẽwandamag jëeubarmuapai hõor pekau chugpaanaa tꞌãarjã hajaug paajerr hakꞌiin,
ya kulp chukꞌu naawai hamau biek hãbpai mag wauwi tag nemchaaindam kꞌëchba haajeekꞌam.
3-4 Mamʌ par mag jëjëeukꞌamjã mag pꞌak bagau chan ni chĩb bagaujã pöd pekau chugpaa hauba haajeejim.
Magju kꞌãai sĩi mag nemchaain añopierr kꞌëchnaa jëeupi jaau sĩewai warag mag leíuta hamag hamach pekau kꞌĩir heepapi simjö haajeejim.
5 Maguata Cristoou mʌg jẽb gaai bëewai hich jãg David kꞌararrau hich Cristoouchata Hẽwandamag hiekꞌaju higwi pꞌãtarrjö,
“Tata” hajim hanʌm,
“jãg sĩi nemchaain kꞌëchnaa ofrendakꞌa pʌchig deewai pua kꞌõchkꞌabapai haajeewai,
pua mʌʌta chadcha pʌ̈ibarmgui” hajim hanʌm,
“wounag pawia mʌchchata hõor kõit tꞌõopimkꞌĩir.
6 Jãg pekau chugpaag hawi nem hinagdam deenaa nemchaainta pʌch hatꞌee kꞌëch nʌm pua kꞌõchkꞌaba haajem,
jãgʌmua chadcha pekau chugpaa hauba haajeewai.
7 Magua mʌʌta cha chirʌmgui” hajim hanʌm “Hẽwandam,
pʌch hiek pꞌã sim gaai mʌch higwi jaau simjö hich hagpierr pʌchdëu kꞌõsimjö haag.” (Sal 40:6-8)
8 Chi ley gayan chadcha mag nemchaain kꞌëchnaa ofrendakꞌa deepi jaau sĩeb mamʌ,
hich Cristooucha jaauwaijã Hẽwandam hiek hirig chan jãg pekau chugpaag hawi mag nem wau nʌmjã hʌ̈u kꞌaba sim haajem.
9 Magnaa hĩchab hich Cristoou mag “Mʌʌta cha chirʌm Hẽwandam,
pʌchdëu kꞌõsimjö haag” ha sim haigjã,
mag nemchaain kꞌëchnaa jëeujerrjã warre hisegpʌ̈iwi jũrr hich gaaimuata hĩsin hõor pekau chugpaa tꞌʌnʌm ha simʌu.
10 Mag hichta Hẽwandamau kꞌõsi sĩerrjö meebarmuata maachin Hẽwandamau hich hatꞌeepai nem wau wënʌrramkꞌĩir hich dënkꞌa wai sim.
Mag hichta warrgar nemchaain kꞌeechjerrjö hʌdʌraa maach kõit hich tꞌõopitarran,
mag biek hãbpai meebarmua tag meeba haag hajim.
11 Mamʌ magʌm hãba,
maach judionaan heen hagtꞌa pꞌadnaanau nemchaain kꞌëchnaa hedau hãspapakꞌampierr jëjëeu haajeeb mamʌ,
jãgʌmua chan bʌ̃ʌrjã pekau chugpaa haubam.
12 Magarrau Jesuuwan chad biek hãbpai meetarrau tag meeba hich mag warag hʌ̃gtꞌar mawi hich Haai juachaar gar hoo sĩsijim,
hich Hayau hichig hõor kõit waupitarr tꞌum waupʌ̈iwia.
Magbarm haigmua warre hĩchab pekau chugpaag hawi tag nemchaainjã kꞌëchju haai kꞌaba hapʌ̈ijim.
13 Mammua Hẽwandamau hich hoomapꞌam kꞌʌʌn tꞌum hich jua hee pꞌëdeeta hoo sim,
14 hichdëu hichta mag biek hãbpai mag meebarmua sĩi ofrendakꞌa hich Hayag hich deetarrau hich dënkꞌa haumam kꞌʌʌnjã warre hajaug paapʌ̈imaajeewai.
15 Mag hirua hõor hajaug paapʌ̈imaajemʌn chadcharau ha kꞌap hapieg,
Hẽwandam Hakꞌaraujã nawe hich Hẽwandamaucha hiekꞌatarr higwi,
16 “Nacha mʌchdëu israelnaan dʌ̈i hiek deetarrjã hamau mʌ hipierraa kꞌabajierrab mamʌ,
mua hũwaai ham dʌ̈i hiek deejugui” hajim hanʌm.
“Ma mʌgaugui” hajim hanʌm hich Hẽwandamau:
“Mua ham dʌ̈i deeu hiek deebarmʌn,
warre ham kꞌĩirjug heeta sĩuwi ham tꞌãar heejã pꞌã sĩubarmjöta hajugui” hajim hanʌm,
“mʌch hipierraa ham kꞌõsi hamkꞌĩir.” (Jr 31:33)
17 Magnaa hĩchab,
“Hamau mʌch dau na nem kꞌaigbam waaujerrjã mua chugpaapʌ̈iwi,
tag magʌm hiekjã higba hich mag kꞌĩir hokꞌoopʌ̈ijugui” hajim hanʌm Hẽwandamau,
hichdëu hõor hajaug paapäaijem higwia. (Jr 31:34)
18 Magtarr haawai ya tag dich pekau kõit hagtꞌa magʌm nemchaainta kꞌëch wënʌrraju kꞌaba nʌm,
hichdëu jaau simjö chadcha hichdëuta warre maach kꞌaibag chugpaapʌ̈iwi kꞌĩir hokꞌoobapäaiwai.
Hẽwandamta jʌrju haai nʌm
19 Magau keena.
Mʌig heegarin chadcha pꞌadnaan pör happaita mag Lugar Santísimo hee duubjem.
Mamʌ hĩs chan magba,
mag Jesucristoou maach kõit hich bag hãrpitarr gaaimua hĩsin maach tꞌum chi hʌ̈kꞌa nʌm kꞌʌʌnta hʌ̈u warre hich Hẽwandam sim haarcha höbërju haai nʌm.
20 Mamʌ mag hʌ̈u hi haarcha wëtju haai nʌmʌn,
mag Lugar Santísimo gar dicham hugua put parrg hëu wëjorrau tꞌuur sĩerrjã hich Jesucristoouta hich meebarmua warre tꞌorreubapʌ̈imua kꞌʌd wau deebaawaiu.
21 Magwia hichta Hẽwandam haarcha maach tꞌum hi chaainkꞌa tꞌʌnʌm kꞌʌʌn Pörkꞌanaa maach kõit hiekꞌaajemkꞌa sim.
22 Mag chadcha Cristoou hich bagauta maach hajaug paabarm dʌ̈i pꞌadnaanau chi hʌ̃rʌmpai hʌpʌ̈iwi Hẽwandamag jëwaag hajaug paajerrjö hich Hẽwandam Hakꞌarauchata maach tꞌãar hajaug paawi döoujã hajap hʌtarrjö naawai,
warag tꞌãraucha Hẽwandam jʌrtarrau keena,
bʌ̃ʌrjã hirua maach hisegjujã kꞌĩirjuba.
23 Hirua chadcha hich hiekꞌatarrjö haajeewai,
dich hipeerdʌ hiekꞌajujã kꞌĩirjuba,
hĩsin warreta maachin ya peerdʌwi nʌm haju haai nʌm,
hichdëu jaautarrjö maach hich haar pꞌë hauju kꞌĩirjugjã hogdʌba.
24 Mag kꞌĩirjunaa hĩchab warag hagdaujö dich kꞌapeen juag hoonaa ham daupii hajuuta hẽkꞌaju keena.
25 Magʌm hĩs mʌg maach Pör Cristo bëejujã warag dakpapa kꞌaawai chará,
kꞌar maach kꞌapeen haajemjö,
culto hee maba sĩi degpai naaju kꞌaba nʌm.
Magju kꞌãai hagdaujö chikꞌam wawí nʌmua warag dich kꞌapeen honee hapijuuta hẽkꞌaju.
26 Mamʌ magba maadëuta mʌg Hẽwandamau maach peerdʌ haaujem hiek wajapꞌa kꞌapꞌʌ narrta,
juau hogtꞌom hi hiseg nʌm hiekꞌau parhooba nem wau nʌm gaaimua hũwaai warr hi kꞌaugba haawai naajerrjö hich mag parhooba wënʌrrʌm chan,
magan Cristoou parta maach gaaimua hich tꞌõopibarmjö hajim,
maadëu hirig maach peerdʌ haupiba naawai.
27 Magta hamʌn,
tag maach peerdʌ hauju chukꞌu haawai,
magan Hẽwandamau maach hi hagkꞌam hed maach sëúa maach gaaita hich kꞌĩir machag meeunaa tagam kꞌʌʌn hich kꞌõchkꞌaba haajerr kꞌʌʌn dʌ̈i hãba sĩi hõtdau hee jẽerjupaita nʌm.
28 Pãrau kꞌapꞌʌ nʌm,
warr Moiseeu ley pʌatarrta hõrau serbiibag pꞌëmjö hamach kꞌõchag haig nem waauwai,
chi hootarr kꞌʌʌnau,
numiim kꞌʌʌnau wa tꞌãrjupam kꞌʌʌnau kꞌãijã tꞌetꞌemnaanag jaaubaawai,
makꞌʌʌn bʌ̃ʌrjã dau haug kꞌaugba,
warre kꞌëchpi jaaujeejim,
chi ley gaai jaau simjö.
29 Pãadë kꞌĩirjubat:
Maagjerr kꞌʌʌn dʌ̈i magta haajerr kꞌai,
¿jãgaju kꞌai Hẽwandamau hoowai hich Chaaita hõrau kꞌõchkꞌabam hiekꞌau sĩi maadëu nem higmapꞌamjö hamach kõit hi bag hãrtarrjã warag hisegnaa,
hich Hẽwandam Hakꞌarau hʌ̈u hamach Hẽwandam dënkꞌa haaujem higwiajã sĩi wau hiekꞌaajem kꞌʌʌn dʌ̈i?
Hamau mag hiseg naab mamʌ,
¿mag hi Chaai bagau kꞌabajĩ,
Hẽwandamau hich garmua hõor dʌ̈i hiek deewai jaautarrjö chadcha hõor pekau chugpaawi peerdʌ hauju haai hapitarr?
30 Mamʌ maadëu kꞌapꞌʌ nʌm,
chi mag nʌm kꞌʌʌnag chan Hẽwandamau sĩi par daúa hoo nʌʌ habaju.
Magua chi mag nʌm kꞌʌʌn higwi,
hich Hẽwandamau hiekꞌatarrjã hich hiek pꞌã sim gaai,
“Muata hõor dʌ̈i hamachdëu nem kꞌaigba waaujerrpierr ham gaai mas hab kꞌaba mas deeju” ha sim.
(Dt 32:35)
Magnaa hĩchab hichdëupai,
“Muata hõor tꞌumaam kꞌʌʌn dʌ̈i hamachdëu nem waaujerrpierr hich hagjö haju” ha sim “ham dʌ̈i.” (Dt 32:36)
31 ¡Aay hapkꞌiitʌ,
maach Hẽwandam cha maach wai dʌnʌmʌgta mag hich gaai mas hapi sim woun!
32 Mamʌ pãar hʌ̈u magba nʌm.
Magba naab mamʌ,
kꞌĩir heyaa habat:
Warrcha pãachdëu Cristo hiek chadcharam hʌ̈kꞌatarr kꞌuriipai haawai pãach wajappꞌa pꞌitꞌurg hau durrumjã pãrau magʌmjã haba hʌ̈u hathaba chadcha pãrau hãwaatjeejim.
Hich jãgta pënaat warag.
33 Chadcha pãar hee hãaur kꞌʌʌn nʌm;
makꞌʌʌnan hõor pöm wëjöm dakꞌĩirjã sĩi wau wai nʌʌ hawi ham dʌ̈i hamachdëu hampierr haajeejim.
Maagwai pãrau ham dau haug kꞌaaugwai pãachpata kꞌarin dʌ̈i mas waunaa sĩi hõrau kꞌa hisëejã haajeejim ham gaaimua.
34 Mag durrum gaaimua pãach kꞌapeen cárcel deg durrum kꞌʌʌnjã pãrau hʌ̈u dau haug kꞌaaugjeejim.
Mamʌ magpaijã kꞌaba,
mʌig heegar pãachdëu nemdam wai nʌm kꞌãaijã hajapchanaa bʌ̃ʌrjã hãrba haajemta paarpajujã kꞌapꞌʌ naawai,
pãach nemdampa kꞌechtꞌʌg haumam kõitjã hiekꞌaba,
gaai mas kꞌabamjö warag honee magʌmjã pãrau kꞌĩu hãwaatjeejim.
35 Kꞌodamnaan,
jãg pãachdëu hʌ̈kꞌa nʌmjöta warag hogdʌba hʌ̈kꞌanaat,
hĩsin par kꞌãijã maadëu hʌ̈kꞌa nʌm ha kꞌĩirjuba.
Pãach jãg durrum paar deegan,
Jöoirau nem hajapꞌam pöoma wai sim.
36 Mamʌ mag hich Hẽwandamau kꞌõsimjö nem wawaagan,
dau haug wau wënʌrrʌmjã magʌm haba,
hichiita warag hãwat wënʌrraju haai nʌm.
Mag nʌmʌn chadau hichdëu jaau simjö pãar dʌ̈i hajapꞌanaa hich dʌ̈i hich mag wënʌrrapiju.
37 Mag pꞌitꞌurg hau wënʌrrʌmjã,
Cristo deeu bëeju kꞌap sĩi hãwatju haai nʌm higwi,
hich Hẽwandamau hiekꞌatarr hich hiek pꞌã sim gaai,
“Nʌnaat,
pãrau nʌ nʌm woun bëeju chan pöm waaurba sim” ha jaau sim.
38 “Pãar har mʌrʌgta pãach pekau chugpaapitarr kꞌʌʌnaun mʌ pãach dʌ̈i chirʌmjã kꞌapꞌʌ wënʌrraju;
mamʌ chi mʌ hiek hʌ̈kꞌa narr kꞌʌʌnta deeu hewag wët nʌm kꞌʌʌnau chan,
hoob mʌ hamach dʌ̈i chitaju hamiet;
mʌchdëujã tag hamag hoohbam” ha sim. (Hab 2:3-4)
39 Mamʌ maachig chan mag hirua hoobam habaju,
heem kꞌʌʌnjö hewag wëtwi hokꞌooju kꞌʌʌn kꞌaba naawai.
Hokꞌooju kꞌãai,
maachdëun chad tꞌãrauchata hi hiek hʌ̈kꞌa naawai maachin peerdʌwi hich dʌ̈icha wënʌrraju kꞌʌʌnau.
Hich jãgta hʌ̈kꞌanaat keena.