Warrgarm pꞌadnaanau haajerr chan hĩs Cristoou maach kõit haajem dʌ̈i barba sim
9
Mag Hẽwandamau nacha maach jöoin dʌ̈i hiek deewai jaautarrjö Haai hi jëeujem di hëutarran,
sĩi hich mʌig heegarm dipaaupai hëu sĩejim haajem.
Mamʌ magʌmjã,
hag hee parhooba haju kꞌaba,
hich Hẽwandamau jaau wai sĩejim hanaabá,
jãga hõrau hichig jëeuju kꞌap hamkꞌĩir.
2 Mag di mʌgta hëu sĩejim haajem:
Di hãbpai simta,
hag hee tꞌuram numí tꞌuurkꞌa sĩejim haajem.
Nacharam,
“Lugar Santo” ha tꞌʌ̃r sĩejim hanaabá;
maigpain pꞌadnaan parhooba dubju haai naajim haajem.
Mag hee lámpara hausĩiujem dʌ̈i Hẽwandam hatꞌee pan hausĩiujem mesjã sĩejim haajem.
3 Maimua hãbakꞌai hagjö hich hag gaaipai hëugar tꞌuur sim “Lugar Santísimo” ha tꞌʌ̃r sĩejim haajem.
Mag heen hãba chi pꞌadnaan pörkꞌa sim happaita año gaai biek hãbpai duubjeejim hanaabá.
4 Mag dub nʌm haig sĩejim haajem,
incienso pꞌaag kꞌʌrr pꞌĩr dën nasãdjö hʌ̃gtꞌaa wau sim;
maimua hierr sĩejim haajem hĩchab,
baaudi pꞌĩr dën.
Mag baaudi,
Hẽwandamau mag maach jöoin dʌ̈i hiek deewai hich hiek pꞌã deetarr hag hãkꞌaajem baaudi hajim haajem.
Chi baaudeg “maná” hanʌmjã sĩejim haajem,
jarr pör hagjö pꞌĩr dën sim hee.
Mag tag naajim haajem hag hee:
Aarón kꞌararrau bordón jua hee wai nʌrraajerr,
biek hãb hõrrdʌwi sũrkꞌatarr;
maimua Hẽwandamau Moiseeg ley mokdau gaai pꞌã deetarrjã hagjö.
5 Mag hee nem tꞌʌnʌm baaudi hʌ̃rta hich Hẽwandam sĩejeejim hanaawai,
mag hʌ̃rta hĩchab querubinnaan numí naajeejim haajem,
hich paraa hich hãdëkkꞌër hirig jëeu nʌmjö waukꞌa sim;
hajapcharan angelnaanma.
Mag hagdaujö kꞌĩircha hag hʌ̃r dʌnʌʌutkꞌa naawaita hamach hichiu chi baaudi börr wai nʌmjö naajeejim hanaabá.
Maigta bëewi pꞌadnaan pöröu mag biek hãbpai año gaai mag baaudi hʌ̃r nemchaain bagau jĩpꞌëmamua Hẽwandamag jëeujeejim hanaabá,
hõor pekau kõit.
Magʌm jaauju pöoma wai chirab mamʌ,
magʌm jawaagta mʌg hẽsap pꞌãba chiraawai magdampaita jaau chirʌm.
6 Mag sim haawai mag “Lugar Santo” hanʌm heepain nemchaain kꞌëchnaa pꞌadnaan hʌ̃iba dudub haajeejim haajem,
Hẽwandamag hõor pekau kõit jëwaag.
7 Mamʌ hag hëugar mag “Lugar Santísimo” hanʌm gar chan pꞌadnaan hawijã pöd parhoobam kꞌʌʌn dubba,
hãba ham pör happaita año gaai biek hãbpai duubjeejim hanʌm.
Mag duubwaijã hich jua par kꞌaba,
nemchaain bag dʌ̈ita duubjeejim hanʌm,
hich kõit jëeuwi kꞌar hõrau hamachdëu nem wau nʌmjã kꞌaugba nʌm gaaimua pekau hee burr nʌm kꞌʌʌn kõitpa jëeumamua mag baaudi hʌ̃r chi nemchaain bagau jĩpꞌeeg.
8 Mag sim haig,
hĩs Hẽwandam Hakꞌarau jaauwai,
mag pꞌadnaan dudub haajerr haigta hagtꞌa Hẽwandamag jëeu nʌwe chan Lugar Santísimo gar dubaag put parrg hëu wëjorr hagtꞌa weeudʌba sĩerr haawai,
pöd parhoobam kꞌʌʌn Hẽwandam haarcha dubju kꞌaba naajim ha simʌu.
9 Magta mag ley Moiseeu jaau pʌarr gayamjö sĩi Hẽwandamag nem hinagdam deenaa hirig jëeujeejim haajem.
Mamʌ hĩs maadëu kꞌapꞌʌ nʌm,
mag nemchaain kꞌëchnaa jëeu nʌmuapai pöd mag chi jëeu durrum kꞌʌʌn tꞌãar hajaug paa hauba haajeejim Hẽwandam dau na.
10 ¿Jãgwi?
Hagtꞌa mag ley serbiiba hapʌ̈yaag Cristoou hiek hiiur haibëeba sĩerr haawaima;
magnaa hĩchab hamach ley gaai jaau simjö sĩi nem parhoob kꞌöba nʌm dʌ̈i nem parhoobajã döbanaa tagam nem mag leíu waupiba jaau sim hʌʌrkꞌa nʌm gaaimuapaita hamach hajaug paa hauju hẽkꞌaajerr haawaima.
11 Mamʌ hĩs chan ya mag ley gaai jaau sim wauba,
ya hich Cristocha bëewi hĩsin hichta hʌ̃gtꞌarmua maach kõit hiekꞌaajem chaarkꞌa sĩsiewai,
hichdëuta chadcha hõor dʌ̈ijã hajapꞌa haadëm,
Hẽwandamau warrgar hõor dʌ̈i haju jaaujerrjö.
Hĩs mag maach kõit hi hiekꞌaajem di chan mʌig heegar Haai hi jëeujem di kꞌĩir kꞌaba,
hag kꞌãaijã hajapchata sim.
Mag di chan heegarm kꞌʌʌnau hëutarr kꞌaba,
hich Hẽwandam juau.
12 Mag hõrau hëutarr kꞌaba sim heeta Cristo sim.
Mamʌ hĩs chan ya tag mag chĩb bagta Hẽwandamag deeg kꞌaba,
ni pꞌak hemkꞌöi bagjã kꞌaba,
hich bagchata deejim.
Mamʌ majã mag warm kꞌʌʌnau haajerrjö biek kꞌapan kꞌaba,
biek hãbpai magbarmua tag deeum bagjã higpiba haagta mag hich bagta deebarm.
Magbarmuata ya maach peerdʌ haum hiek peerdʌ hatꞌam.
13 Hiin chadcha mag hamau chĩb bag pꞌak hemkꞌöi bag dʌ̈i haunaa,
hĩchab mag pꞌak hʌʌidam pꞌaatarr kꞌʌrr mepꞌörrag pa simjã dö hee waaurëunaa,
leíu jaau sim chaaur waubarm gaaimua Hẽwandamag jëeujujã kꞌaba sĩi hãr sĩsim hanʌm hʌ̃r jĩpꞌeewaijã,
hʌ̃rpain hʌ̈u chadcha hajaug paa nʌmjö haajem,
deeu Hẽwandamag jëeuju hayaa hapieg.
14 Mag nemchaain bagaupai deeu Hẽwandamag jëeuju hayaa hapiejerr kꞌai,
magan Cristo bag chará hag kꞌãaijã hʌ̃rcha jua tꞌeeg sim,
maach tꞌãarpa Hẽwandam dau na hajaug paapäaig.
Pari magaagan,
Cristo meejã meeba hich mag sĩerrʌmta wounag pawi hichdëupai hichta nemchaai chi hajapcharamdamjö hʌdʌraa hich tꞌõopijim maach kõit.
Magtarr haawai hi bagauta dich kꞌĩirjug kꞌaibag gaaimua maach hokꞌoopijöjöomjã warre chugpaapäaijem,
hãba Hẽwandam chadcha hich mag hiiu sĩerrʌmʌgta jëeu wënʌrramkꞌĩir.
15 Mag hich Jesucristo bag hãrtarrauta maach kꞌaibagjã tꞌum chugpaajeewai hichta maach kꞌaigpeerjemkꞌa sĩerrʌm,
Hẽwandam dʌ̈i hajapꞌa nʌisimkꞌĩir.
Hichdëu maach kõit mag sim haigta Hẽwandamau hõor dʌ̈i hiek deewai maach kꞌaibagjã chugpaanaa maach peerdʌ hauwi hich haarcha pꞌë hauju hatarrjã chadcha hich hag hee höbër sim.
Magtarr haawai mag hich tꞌõopibarmuata warr mag ley jöoi gaai jaau simjö nem waaujerr kꞌʌʌn pekaujã chugpaawi hĩchab hewag pawi maach hich Hẽwandamau jʌr haumam kꞌʌʌn dënjã chugpaajim,
magbaawai hich Hẽwandamau nawe deeju jaau wai sĩerrjö chadcha hich dʌ̈icha hãba wënʌrrʌmua hich juagam nemjã hich mag jʌ̃a nʌisimkꞌĩir.
16-17 Mag Jesuu hich tꞌõopibarmuata Hẽwandamau hich hiekꞌatarr chadcha hag hee höbërpi sim ha chirʌmʌn mʌgta sim:
Hõrau kꞌar hamach meeju nawe hẽsap gaai pꞌã sĩiujem,
hich meebaadeewai hich nem dʌ̈i jãga haju haai nʌ ha kꞌap hamkꞌĩir.
Mamʌ mag tꞌum hẽsap gaai jaau sĩubarmjã chi pꞌãtarr woun meebam haig chan bʌ̃ʌrjã mag hẽsap gayam hiek baleeba haajem.
Maimua ya meebaadeen chad mag hẽsapta nem hiek tꞌeeg haadeejem.
Maguata mag hẽsap gaai jaau simjö haagan,
hichiita chi pꞌãtarr woun chadcha meebaadeeta hichdëu pꞌã pʌatarrjö hi juagam nem jigju kꞌai jiigjem.
18 Maguata nacha Hẽwandamau hõor dʌ̈i hiek deetarr hiek tꞌeeg hapiegjã,
hĩchab nemchaaindam kꞌëch nʌm haig ham bagdam hãr nʌmuata mag ley hiek tꞌeeg hapijim.
19 Mamʌ mag Hẽwandamau hamach dʌ̈i hiek deetarr hiek kꞌap hapieg,
Moiseeu tꞌumaam kꞌʌʌnag hũrmkꞌĩir tꞌʌ̃rjim haajem,
hag gaai hich Hẽwandamaucha hamachig nem waupi jaau sim tꞌumaam kꞌʌʌnag kꞌakꞌapdö hamkꞌĩir.
Magnaa landam oveja kꞌaar dën pꞌurii kꞌitʌm dʌ̈i hisopo piu hãba bʌʌr haujim haajem.
Magnaa mag pꞌak bag chĩb bag dʌ̈i dö hee waaurëu sim hee tꞌʌnaa,
mag Hẽwandamau hamach dʌ̈i hiek deetarr pꞌã sim hag libro hʌ̃r jĩpꞌënaa,
hĩchab hõor hʌ̃rjã tꞌumaam kꞌʌʌn hʌ̃r jĩpꞌëmajim hanaabá.
20 Magnaa hich Moiseeupai,
“Mua mʌg bagau pãar hʌ̃r mʌg jĩpꞌë chirʌm haig,
Hẽwandamau hich garmua maach dʌ̈i hiek deebarmta jaau chirʌmgui” hajim hanʌm.
“Mag maach dʌ̈i hiek dee sim chadcha hich hiekta wounjö hiek tꞌeeg hapiegta mua mʌg chirʌmgui” hajim hanʌm,
“hĩsmua hatagan hag gaai waupi jaau simjöta haju haai nʌm ha kꞌap hapieg.”
21 Mamʌ magpaijã kꞌaba hich Moiseeupai mag nemchaain kꞌëchnaa jëeujerr haigjã,
dijã tꞌum bagau jĩpꞌëpʌ̈iwi hag heem chi pꞌadnaan jua choogjem nemjã tꞌumaa hich hag bagau jĩpꞌëpʌ̈ijim hanaabá.
22 Hajapcharan mag ley jöoi gaai jaau sim hoowai,
Hẽwandamag jëeuwain peer nem tꞌʌnʌm tꞌumta bagau jĩpꞌeejeejim hanaabá,
chi jëeuju kꞌʌʌnpa,
Hẽwandamag jëeuju hayaa hamkꞌĩir.
Maguata bag hãrba chan pöd pekau chugpaa hauba haajeejim haajem.
Cristo meetarr gaaimuata hõor pekau chugpaa haaujem
23 Mag,
sĩi hʌ̃gtꞌar Hẽwandam kꞌĩircha Jesuu maach kõit hiekꞌaajemjöta haju hẽkꞌa durrarr haawai hichiita hamau mag nemchaain kꞌëchnaa hag bagauta Hẽwandamag jëeuju haai naajim.
Mamʌ hʌ̃gtꞌar chan mag mʌig heegarmjö sĩi nemchaain bagpai kꞌaba hag kꞌãaijã hajapcharamta hig sĩejim.
24 ¿Jãgwi?
Cristoou sĩi hõrau di hëutarr heepai dubba,
warre Hẽwandam dʌ̈i kꞌĩircha maach kõit hiekꞌaag hʌ̃gtꞌarchata dubtarr haawaima.
Mʌig heegarm kꞌʌʌnau nem waaujerran sĩi hʌ̃gtꞌar jãga sĩerrʌ́ ha jaau nʌm dën chi sëudampai hajim.
25 Mʌig heegarin añopierr pꞌadnaan pör Haai hi jëeujem deg nemchaain bag dʌ̈ita duubjeejim haajem,
hõor pekau kõit jëwaag.
Mamʌ Cristoou chan ham dënjö kꞌaba haawai biek hãbpai hich bagchata maach kõit hãrpijim.
Mag biek hãbpaita hich tꞌõopitarr haawai ham dubwi höbëbër haajerrjö kꞌaba,
biek hãbpai hʌ̃gtꞌarjã höbërwi hich mam sĩerrʌm.
26 Maataa,
mag biek hãbpai hich tꞌõopibarmua nemchaain bag dënjö pöd hõor pekau chugpaa hauba harr hamuan chad,
pꞌadnaanau biek kꞌapan nemchaain kꞌeechjerrjö mʌig jẽb gaai hõor nʌisierr haigmua hagjö biek kꞌapan hõor pekau paar hich tꞌõopienjã hudkꞌʌrrkꞌakꞌa haajeekꞌam.
Pari magba hĩsta ya Cristo hudtꞌurwi biek hãbpai warrgarm kꞌʌʌn kõitpa hich tꞌõopibarm.
Mag hich tꞌõopibarmuata mag nemchaain kꞌeechjerr tiempojã höpʌ̈iwi ya jũrr hõor peerdʌju hayaam jaar kꞌabapʌ̈im.
27 Maadëu kꞌapꞌʌ nʌm,
maach cha kꞌitꞌëem kꞌʌʌn tꞌum biek hãbpaita meejem,
maimua mʌg hatag Hẽwandamau maach hi hagkꞌam hedta hichdëuta maachig maach jãga wënʌrrajĩ ha jaauju.
28 Hich jãgta hĩchab hich Cristojã biek hãbpai hich tꞌõopijim chikꞌamnaan pekau kõit,
mag biek hãbpai harrau warre tꞌumaam kꞌʌʌn pekau chugpaa hauju hayaa hapäaig.
Mamʌ hí deeu bëeju;
mag hurum chan ya tag pekau chugpaag deeu hich tꞌõopieg kꞌaba,
hich bëejujukꞌamjã chadcha hi bëepim kꞌõsi hich nʌ naajerr kꞌʌʌn pꞌë hawaanta hurum.