1 TESALONICENSES
Nacharam hẽsap Pabloou Tesalónicapienag pꞌã deepʌ̈itarr
1
Mʌch Pabloouta Silvano dʌ̈i Timoteopa hãba nʌmua mʌg hẽsap pꞌã deepʌ̈i chirʌm pãar Tesalónica pꞌöbör hee Cristo gaaimua maach hãba kꞌodkꞌa nʌm kꞌʌʌnag.
Mua kꞌapꞌʌ chirʌm,
chadcha pãar Hẽwandam chi Haai gaai hubʌ tꞌierrkꞌanaa hĩchab maach Pör Jesucristo dʌ̈ijã hubʌ nʌm.
Marau Hẽwandamagta jëeu nʌm,
pãar hʌ̈uu wai sĩenaa hĩchab kꞌõinaa wai sĩemkꞌĩir.
Jãga wënʌrrajĩ Tesalónicapien hõor dau na
2 Maran mau warp naab mamʌ,
hed hëepierr maachdëu Hẽwandamag jëeuwai hirigta hʌ̈u hajim ha durraajem pãar kõit.
3 Mag pãar higwia hirig hʌ̈u hajim hanʌm haig hĩchab marau kꞌĩir heyaa haajem,
jãga pãrau pãachdëu hʌ̈kꞌatarr hiek gaai bʌ̃ʌrjã hiekchëba warag pꞌidkꞌam kꞌõsi pꞌidkꞌa nʌ,
maimua jãga mag maach Pör Jesucristo bëejujã kꞌõsi nʌ nʌm gaaimua chikꞌamnau pãach dʌ̈i kꞌaigba haadëp haawaijã hichdëu pãar heeg hoojẽ,
magʌm hiekjã higba hãwat wënʌrramkꞌĩir.
Marau kꞌapꞌʌ nʌm,
pãrau chadcha dich kꞌapeen kꞌa kꞌõsinaa Hẽwandamjã kꞌõsi naawaita jãg pꞌidkꞌa nʌm.
Mag gaaimuata hirig hʌ̈u hajim ha durraajem pãar kõit.
4 Cristo gaaimua kꞌodamnaan,
marau kꞌapꞌʌ nʌm chadcha hich Hẽwandamauta pãar jʌr haujim.
Magtarr haawai hichdëujã chadcha pãar kꞌõsi sim.
5 Marau pãar haar Hẽwandam hiek jaau wënʌrraawai sĩi maachdëu jaaum kꞌõchgaupai kꞌaba,
hich Hẽwandam Hakꞌaar hag jua tꞌeegau jaaupibaawai hajim;
maimua mag nʌm dʌ̈i hĩchab chadcharam hiekkꞌa sim maachdëujã kꞌapꞌʌ nʌisiewai hajim.
Pãrau kꞌapꞌʌ nʌm,
jãga pãar hee maar wënʌrrajĩ,
pãach hʌ̈u wajapꞌa wënʌrramkꞌĩir.
6 Pãach daúa maar mag wajapꞌa wënʌrrʌm hoobaawai,
pãrau maar wënʌrraajemjö hawia hĩchab maach Pör Jesús nʌrrarrjö hajierram.
Hich hag gaaimua pãar pꞌitꞌurg haujierrab mamʌ,
hich Hẽwandam Hakꞌarauta pãar tꞌãar honee hapi sĩewai pãrau maach peerdʌajem hiekjã honee hʌ̈kꞌajierram.
7 Pãachdëu magtarr gaaimua Macedoniapienau maimua Acayapienaujã tꞌum chi hʌ̈kꞌa durrarr kꞌʌʌnau hʌ̈u pãar hagpierraa wënʌrrʌm hoo nʌm.
8 Pãar haigmuata maach Pör Jesucristo hiekꞌan sĩi haaidʌbaadëm.
Mag haaidʌbaadëm sĩi Macedonia durrpaijã kꞌaba,
ni Acaya durrpaijã kꞌaba,
durrpierrta haaidʌ jöisim.
Mag nʌm dʌ̈i hĩchab pãachdëu Hẽwandam hiek hʌ̈kꞌatarrpai hogdʌba hʌ̈kꞌa nʌmjã tꞌumaam kꞌʌʌnau kꞌakꞌapdö tꞌʌnʌm.
Mag kꞌakꞌapdö wëjöm haawai marau tag pãar jaauju haai kꞌaba nʌm.
9 Marau hamachig jaauju nawe hamach garmuata marag jaau nʌm,
marau pãar hoon weetwai jãga pãrau maar pãach hee baarpijĩ,
maimua jãga parhoobam nemta pãach hẽwandamkꞌa wai nʌnʌid harrjã hisegmajierrá,
jũrr Hẽwandam chaar chadcha hiiu sĩejemʌgpaita jëeu wënʌrraag.
10 Hẽwandam Hiewaa Jesús meewia hiiu pꞌiidʌtarr hʌ̃gtꞌarmua deeu bëeju pãrau nʌ nʌmjã mau marag jaau nʌm hĩchab.
Magua maach Pör Jesuugta hʌ̈u hajim ha chirʌm,
hʌ̈u hi gaaimuata Hẽwandamau maach hi hagkꞌam hed maach gaai jua kꞌʌaba deeju harrjã maach peerdʌ hautarr haawai.