Chi pꞌãtarr. Chamʌg cartajã hĩchab Efesios dʌ̈i Filipensejö hich jöoi Pabloou cárcel deg simua pꞌãtarrau (1:24; 4:18). Hãb sim hĩchab cárcel deg simua hagjö hichdëu Filemonag pꞌãtarr. Mag jöoi Filemón Colosapierr hajim haajem. Mʌkꞌʌʌn carta tꞌum jayapwe Tíquico Onésimo dʌ̈i pʌ̈iwi ham gaau deepʌ̈itarrau (4:7-9).

Chijã kꞌʌʌn hatꞌeeta pꞌãjĩ. Pabloou hũurwai Colosaam iglesia hee maestronaan hanʌmta sĩi sëukꞌa nem jaau nʌrrjëem kꞌʌʌnjã nʌm hajim haajem. Makꞌʌʌnau hag heyaajã kꞌaba sĩi parhoob nem jaau nʌmua hʌ̈u chadcha hʌ̈kꞌa durrum kꞌʌʌndam warag kꞌaibagta wau wënʌrrajim hanaabá. Magta Pabloou Colosapien chi hʌ̈kꞌa durrarr kꞌʌʌnag mʌg hẽsapdam pꞌã deepʌ̈ijim haajem, mag nʌrrjëem kꞌʌʌnag hʌdʌʌr hamach kꞌũgur haum hugua.

Hamau jaauwai Cristo hiek hʌ̈kꞌa nʌm kꞌʌʌnaujã angelnaan chi tꞌierrnaan hʌ̃gtꞌar nʌmʌgta jëeuju haai nʌm ha jaaujeejim hanʌm. Mag nʌm dʌ̈i hĩchab dich mehëujã pꞌʌʌrbichpinaa tagam ley Moiseeu pꞌã pʌatarrjã hʌʌrkꞌaju haai nʌm haajeejim haajem. Mamʌ magpaijã kꞌaba, hamau nem kꞌaigbacha jaaujerran, hõrag jaauwaijã Jesús chan Hẽwandam kꞌaba sĩi angeljöpaita sim ha jaaujeejim hanaabá, warag hi serbiibag pꞌë nʌm hiekꞌau.

Kꞌan jawaag hajĩ. Mag sĩi nem hagchajã jaauba nʌrrjëem kꞌʌʌnag hʌ̈u maach peerdʌajem hiek hʌ̈kꞌa durrum kꞌʌʌn kꞌũgurpimaaugauta Pabloou hamag hajapꞌa jaaujim, jãga sĩerrʌ́ Cristo maimua kꞌani jãgjĩ mag Cristoou maach kõit (1:15-23; 2:8–3:4). Biblia gaai libro kꞌapan tꞌʌnʌm gaai mag hiek jʌrkꞌiin, mʌg Colosenses gaai jaau sim kꞌãai hajapcha jaau sĩsidʌm hoobaju.

Mʌg carta Colosapienag deepʌ̈itarr tꞌʌ̃ʌrwai peer Efesopienag deepʌ̈itarrjö paimʌʌ sim, kꞌĩirjug dakꞌa naawai. Mag naab mamʌ, chi tema chaar hamau jaau nʌmʌn kꞌĩetꞌuupai sĩsidʌm. Efesios gaai chi carta hëntër hoowai, jãga maach Cristo hiek hʌ̈kꞌa nʌm kꞌʌʌnta hi morkꞌanaa hi iglesiakꞌa nʌ ha simta jaau sim. Maimua jũrr mʌg Colosenses gaai jaauwai, Cristo Hẽwandamkꞌanaa hichta mag iglesia Pör haawai hichdëupaita hõor hich haar höbërju hayaa hapiejem ha sim.