Jãga haju haai nʌ maachjö Cristo hiek hʌ̈kꞌa nʌm kꞌʌʌn dʌ̈i
2
Chadcha pãar gaaimua mʌ honee chirʌm,
Cristoouta pãar kꞌĩir honee hapi sĩewai.
Hʌ̈u hiruata pãar kꞌõsinaa pãar kꞌĩir jãsenkꞌaajem.
Pãach tꞌumaam kꞌʌʌnau hãbam Hẽwandam Hakꞌaarpai wai wënʌrrʌm gaaimua kꞌod hãbamjö naawai hʌ̈u pãar chikꞌam daupiinaa dau haug kꞌaug paraajã haajem.
Magua mʌ honee chirʌm.
2 Mamʌ pãrau mʌ honeecha hapim kꞌõsi nʌm kꞌai,
tꞌumaa hö hãbata habat,
jũrr chikꞌam hichaaurjã haba,
hagdaujö chikꞌam kꞌa kꞌõsi,
nem wawaagjã chipar chipar kꞌaba,
hãbam kꞌĩirjugpai paraa.
3 Pãachdëupaijã pãach tꞌönaa bigaaum kꞌʌʌnagjã sĩi pãach hëugar hajapꞌa hig hiyʌ̈ʌ hamkꞌĩirpai chan hoob warag nem waumiet.
Mag kꞌãyau warag chikꞌamnaan higwiata,
“Jãkꞌʌʌnan chad maar kꞌãaijã hʌ̃rpai naabma” habat.
4 Nemdam waauwaijã hoob pãrau pãach hatꞌeepaita nem tꞌumaa kꞌĩirjumiet.
Magju kꞌãai hĩchab dich kꞌapeen dʌ̈ijã hö hajapꞌa hajuuta kꞌĩirjubat.
5 Muan pãragjã,
“Kꞌĩirjug hajapꞌata paraa habat” ha chirʌm,
Cristoou kꞌĩirjuajerrjö.
6 Hí hĩchab Hẽwandam haawai hich Haai dʌ̈i hãba sĩejim,
hiwiir hãbjã hʌ̃rʌʌ kꞌaba.
Mag sĩejieb mamʌ,
hich mag hich Haai dʌ̈i hãba sĩerram kꞌõchgau hirua hich kꞌãidu hogdʌ pʌamapꞌajã kꞌabajim.
7 Mag kꞌãyau mag Hẽwandamkꞌa sĩerrta,
hich hajaugjã higba mʌg jẽb gaai bëewia,
parhoobam chaaidamjö tꞌaabachëwia,
jũrr wounkꞌa sĩeichëjim.
Mag,
sĩi hich Hayag hich hʌdʌraa pꞌẽetꞌʌgpinaa hõor hee Hẽwandam chogkꞌaan bëejim.
8 Mag wounag pawia,
wounaan hee sĩeichëwia,
sĩi chikꞌamnaanagta hʌdʌraa hich dʌ̈i hamachdëu hampierr hapijim.
Mag Hẽwandam hipierraa ham kꞌõchgau sĩi hõor tꞌõomie harrjö hʌdʌraa pakuls gaai hich meerpꞌë tꞌõopijim.
9 Mamʌ magtarr jũrr Hẽwandamau hirig hichta tꞌumaam kꞌʌʌn kꞌãai hʌ̃rpai hapiwia hichta tagam kꞌʌʌn kꞌãaijã hajapcharam gaai tꞌʌ̃rjim.
10 Maagwai tꞌumaam kꞌʌʌnau Jesús kꞌĩirpꞌeeta jĩepöröu pꞌõbkꞌakꞌa haju:
hötarr kꞌʌʌnaupa hʌ̃gtꞌarm magwe mʌg jẽb gaaim kꞌʌʌnaujã hagjö.
11 Mag nʌmua tꞌumaam kꞌʌʌnau hi kꞌapꞌʌ hamach meukꞌĩraucha hirig,
“Jesucristo,
pʌchta chadcha tꞌumaam kꞌʌʌn Pöröu;
pʌchdëuta nem tꞌum kꞌap chirʌm” ha hiekꞌamam gaaimua,
hĩchab hich Hẽwandam chi Haaipata mag tꞌö hiekꞌaju.
Jãga wënʌrraju haai nʌ Hẽwandam hiek hʌ̈kꞌabam kꞌʌʌn hee
12 Cristo gaaimua kꞌodamnaan,
mua pãar daupii chitʌm.
Mua kꞌĩircha pãachig Hẽwandam hiek jaau chitaawai pãachdëu mʌ hipierraa narrjö,
magan mʌ mau warp chirʌmjã higba warag hich jãg hʌ̈kꞌanaat.
Maach Hẽwandam na nem kꞌaigba wauju hökꞌö sĩi maach peerdʌajem hiekta warag pãach hee hʌ̃rpai hapiju hẽkꞌabat,
mag wënʌrrʌmua hubʌ paaukꞌamaag.
13 Magaag hatꞌee hich Hẽwandamauta hich kꞌõchagpierr pãrag mag nem waupim kꞌõsi hapi sĩewai hichdëuta pãar juagjã hoojem.
14 Mag pãachig nem waupi sim waauwaijã,
warag honee pãach wir haig chipar chiparjã haba,
kꞌĩuta waubat,
15 daumaa hãbmuajã pãachig hiekꞌapiju chukꞌu,
mʌg hõor kꞌaibag tꞌʌnʌm hee kꞌaibagjã chukꞌu Hẽwandam chaainkꞌa wënʌrramkꞌĩir.
Pãar magta wënʌrrʌmʌn,
magan mʌg durr hich pekau pömgau hedau kꞌĩejö sim heejã pãar hedjã hee pꞌĩdag pꞌupꞌup tꞌʌnʌmjöta wënʌrraju ham hee,
16 jãga Hẽwandamau maach tꞌãar chi hiiurig paapäaijẽ ha jaau wënʌrrʌm gaaimua.
Maagwai Cristo bëem hedjã mʌchpa pãar gaaimua honee chiraju,
mʌch par pꞌidkꞌaba habarm kꞌapꞌʌ chiraawai.
17 Mua pãrag Hẽwandam hiek jaautarr gaaimua,
hʌ̈u pãrau hãba hirua nem kꞌõsimta wau wënʌrrʌm.
Maagwai hich hag hiek gaaimuapai hamau mʌ tꞌõoju hakꞌiinjã,
bʌ̃ʌrjã machagjã higba hʌdʌraa mua mʌch tꞌõopiju.
Magbarmua muajã pãrau nem wau nʌmjö,
hichdëu kꞌõsim nemta mʌchdëujã wau chirʌm kꞌapꞌʌ chiraawai,
mag mʌ tꞌõokꞌiinjã mʌrʌgan hʌ̈u kꞌërʌm.
18 Maagwai mʌ mag tꞌõkꞌiinjã mʌʌn mʌchin honee chirʌm.
Hoob hökꞌĩirjuu hamiet.
Mag kꞌãyau heeu dëgölp mʌ magwiajã pãachta warag honeeta habat.
Timoteo Epafrodito dʌ̈i
19 Maach Pör Jesuu kꞌõs hamʌn,
mʌigmua jöpcha mua pãar haar Timoteo pʌ̈iju,
pãar hoon mamkꞌĩir,
mag pãar hootꞌurwia pãar jãga nʌ ha jaaubaicheewai mʌchjã honee chiraag.
20 Mʌchdëu pãar kꞌĩirju chirʌm dʌ̈i tag hi dënjö pãar kꞌĩirju nʌm kꞌʌʌn chukꞌu haawai,
Timoteota mua pãar haar pʌ̈iju.
Jãgdamauta chadcha pãar hʌ̈u wënʌrramkꞌĩirjã hich kꞌod hãbam kꞌʌʌn hatꞌeemjö haajem.
21 Tagam kꞌʌʌnan sĩi hamach wir haigpaita kꞌĩirjuajerram.
Mamʌ mag sĩsidʌm Jesucristo hatꞌee nem wauju kꞌĩirjug chan bʌ̃ʌrjã kꞌĩirjubamjöta haajerram.
22 Mamʌ pãrau kꞌapꞌʌ nʌm,
hí warm kꞌʌʌnjö kꞌaba kꞌitʌm.
Maar hãba pꞌidkꞌa wënʌrraajeewaijã,
hiruata chadcha hich haaijö bʌ̃ʌrjã mʌ bʌ̈ hogdʌba hich mag hãba maar maach peerdʌajem hiek jaau wënʌrraajeejim.
23 Magua,
ya hamau mʌch sĩi höbeerpʌ̈iju wa tꞌõopʌ̈iju ha hajapcha kꞌapꞌʌ haadeewai hiita mua pʌ̈iju ha chirʌm,
pãar hoon mamkꞌĩir.
24 Mamʌ maach Pör Cristoou mʌigmua mʌch hʌ̈u höbeerpʌ̈iwia mʌchdëujã jöpꞌëe pãar hoon maju kꞌapꞌʌ chiraawai mʌch chan mua hajappai kꞌĩirjuba chirʌm.
25 Mamʌ hichiita mʌʌgwaiwe mua deeu pãar haar maach kꞌod Epafrodito pʌ̈iju.
Pãrau mʌ juag hoomkꞌĩirta hi pʌ̈itarr haawai chadcha hirua hʌ̈u mʌ hipierr maach Pör Cristo hiekjã jaau wai kꞌitanaa woun hatꞌeemjö hag kõitjã warag kꞌaigpër hiekꞌa kꞌitaajem.
26 Hi hiek ya hirua pãar tꞌumaa hoom kꞌõchag chirʌm haajem.
Hichdëu maumua hũurwai,
mag hi mor machpatarr pãachdëu hũrtarr gaaimua pãrau hi kꞌĩirju nʌm hanaawai,
hichdëujã hĩchab pãar kꞌĩirju sim.
27 Chi mor mas haan hiin chadcha mor machpawia peer meejim.
Mamʌ Hẽwandamau hʌ̈u hi heeg hoowia monaaupʌ̈ijim.
Maata Hẽwandamau mag hi heeg hooba hʌdʌraa meepimuan,
mʌʌn hökꞌĩirjug pöoma chirsikꞌam.
Mamʌ hʌ̈u hi monaau hatꞌam gaaimua Jöoirau mʌchpata heeg hoojim,
mag hi bʌ̈ hʌhʌakꞌarr hoowia gaai machag chirarr warag hatcha hökꞌĩirjug pöm hapimaaugau.
28 Mag hi mor mas sĩerr gaaimua pãrau hi kꞌĩirju nʌm mʌchdëujã kꞌapꞌʌ chiraawai,
jöpkꞌaa pãar haar hi pʌ̈im kꞌõchag chirʌm,
hí deeu monakꞌa barbaimam hoobaawai deeu pãachjã tꞌumaa honee hamkꞌĩir.
Ya mag hí hʌ̈u barbaimaawai mʌchjã tag hökꞌĩirjug chukꞌu chirsiju hĩchab.
29 Mua hi pʌ̈ibaawai,
chadcha maach Pör Jesucristo gaaimua maach dʌ̈i kꞌod hãbamjö naawai,
honee pãach hee hi baarpi hatꞌat.
Maimua jãgjöm kꞌʌʌn wounaan pãach hee baarwai hĩchab wajapꞌa hi dʌ̈i nʌmjö habat mag dʌ̈ijã.
30 Chadcha hichdëupaita peer hich kꞌĩrau hich tꞌõopijim,
Cristoou nem waupi jaau sim hipierraa ham kꞌõchgau.
Maimua hĩchab pãrau pãachdëucha mʌ juag hoom kꞌõsi durrumta warp nʌm gaaimua pöd hooba haawai,
jũrr hichdëuta garpapa ham kꞌõchgau peer meebarm mʌ gaaimua.
Maguata muan pãrag honee pãach hee hi baarpi hatꞌat ha chirʌm.