Mʌʌn Pabloou.

Muata pãar tꞌumaam kꞌʌʌn hatꞌee mʌg hẽsap pꞌã chirʌm.

Timoteota mʌ daumaai sim,

mʌ dʌ̈ita hãba Jesucristo chogkꞌanaa hi hatꞌee pꞌidkꞌa sĩewai.

Maagwai maach numiim kꞌʌʌnauta pãach tꞌumaam kꞌʌʌnag saludaanaa hʌ̈u naapim kꞌõsi nʌm.

2 Mag gaaimua maach Haai Hẽwandamag jëeunaa maach Pör Jesucristoogjã jëeu nʌm,

pãar hʌ̈uu wai nʌm dʌ̈i hĩchab kꞌõinaa wai wënʌrramkꞌĩir.

3 Mʌchdëu pãar kꞌĩirju hahaukꞌampierr Hẽwandamag hʌ̈u hajim ha chiraajem pãar kõit.

4 Mag Hẽwandamag jëeuwai pãar gaaimuata warag mʌ tꞌãar honee haadeejem,

5 maach peerdʌajem hiek jawaag maach tꞌum hãbam pꞌidag gaaipai naawai.

Mag warrcha pãachdëu hi hiek hʌ̈kꞌatarr haigmua pãraujã mag pꞌidkꞌa pꞌöbaaderr,

hĩs hewag pawiajã hich mag maadëu hogdʌba wënʌrrʌm.

6 Mua kꞌapꞌʌ chirʌm,

hichdëu jãg pãar tꞌãar chi hiiurig paapʌ̈itarrjö hichdëuta warag pãar kꞌĩirjugjã bãaupiju,

Jesucristo bëe nʌm hora hich pꞌidag waumkꞌĩir.

7 Mʌrʌgan pãarta mʌ tꞌãrau.

Maagwai pãar gaaimuata Hẽwandamagjã hich mag honee hʌ̈u hajim haju haai chirʌm.

Pãarta mʌig mʌ dʌ̈i cárcel deg hãba nʌmjö nʌm.

Mua tꞌetꞌemnaan na maach peerdʌajem hiek kõit hiekꞌaawaijã pãrauta mʌ hipierr dʌ̈i hag kõit hiekꞌa nʌmjö nʌm,

jammua pãachdëu Hẽwandamag jëeu durrum gaaimua.

Pãran warp nʌm,

mamʌ Hẽwandamau mʌrʌg pꞌidag deetarr pãrau sĩi mʌchig happai deeba,

hʌ̈u pãrau dʌ̈i mʌ juag hoo nʌm,

hirig jëeu nʌmua.

8 Jesucristoou pãar kꞌõsi simjö muajã pãar kꞌa kꞌõsi chitʌm.

Mua mag chirʌm haig Hẽwandamau kꞌapꞌʌ sim mʌ sëukꞌaba chirʌm.

9 Maguata mua warag pãar kõit Hẽwandamag jëeujem,

pãach wir haigjã warag hʌ̃rcha hagdaujö chikꞌam kꞌa kꞌõsi hamkꞌĩir;

maagwai kꞌĩirjug paraanaa Hẽwandam dau najã jãga wënʌrraju haai nʌ ha kꞌaugpꞌömam dʌ̈i

10 nem haai kꞌabamjã hisegnaa nem hajapꞌampaita waumkꞌĩir.

Mag hamʌn magan Cristo bëem hedjã pöd hãbmuajã “Pãar kꞌaigba naajim” habaju.

11 Mag hamʌn magan hĩchab hich Jesucristoouta pãrag nem hajapꞌam pöm waau kꞌaugpiju.

Hõrau pãar mag hoobaawai hamaujã hĩchab Hẽwandamag jëeumamua,

“Hʌ̈uta pua ham jãg pꞌë wai chirʌm;

pʌjöm chan chukꞌum” ha hiekꞌaju.

12 Kꞌodamnaan,

mua pãrag kꞌap hamkꞌĩir jaaukꞌim:

Mʌg hamau mʌ cárcel deg pʌ̈ibapäaiwai hõraun tag mua Hẽwandam hiek jaauba hich jãg chirsijupii hajierram.

Mamʌ mag kꞌabajim.

Hante magtarr haigmuata maach peerdʌajem hiekꞌan warag haaidʌa kꞌapꞌii haadëm.

13 Mag gaaimua mʌig soldaaun pöm tꞌʌnʌm dʌ̈imua bitꞌurgam kꞌʌʌnaupa tꞌum kꞌakꞌapdö tꞌʌnʌm,

Cristo hiek jaau chitʌm gaaimuata mʌ mʌg preso wai nʌm.

14 Mamʌ hermanonaanau hoo nʌm,

mʌ cárcel deg chirʌmjã Hẽwandamau mʌ chig hapiba wai sim.

Mag gaaimuata hʌ̃rcha hi hiek hʌ̈kꞌa nʌm kꞌʌʌnaujã warag kꞌupꞌĩiuwia högkꞌaba,

dʌ̈i hi hiek jaau nʌm.

Hamau kꞌapꞌʌ nʌm,

maach Pör Cristo hamach dʌ̈i sĩewai hirua hʌdʌʌr ham hamach happai deebaju.

15 Mag Cristo hiek jaau wënʌrrʌm hee,

hãaur kꞌʌʌnaun mʌ mʌg chirʌm hoowia,

mʌ kꞌãyau hamachdëuta hajapcha jaau nʌm hawia jãg wënʌrrʌm,

chikꞌam dʌ̈i kꞌujʌrpaim hiekꞌau.

Magarrau hãaur kꞌʌʌnaun chad magjã kꞌĩirjuba,

hamachdëu Cristo kꞌõsi nʌm gaaimuata jãg jaau durrum.

16-17 Har mag Cristo kꞌõsinaa mʌjã dau haug kꞌaug paraa nʌm gaaimua jaau wënʌrrʌm kꞌʌʌnau kꞌapꞌʌ nʌm,

Hẽwandamauta mʌ mʌig wai sim maach peerdʌajem hiek jaaumkꞌĩir.

Mamʌ hãaur kꞌʌʌnau chan chadcha jaaum kꞌõsi kꞌabamta juau hogtꞌompaita Cristo hiek jaau nʌm,

sĩi hõrag hamachta chi hajapcharam kꞌʌʌnau hamkꞌĩirpai,

magʌm gaaimua mʌg mʌ cárcel deg chirʌm hawia warag kꞌa honeg chukꞌu hamkꞌĩir.

18 Mamʌ mʌ gaai mas kꞌaba sim jãga hamau jaau nʌ.

Mʌrʌgan tꞌum hich hagjöpai sim;

jaaumapꞌa jaauwiajã hichiita hamau Cristo hiekta jaau nʌm.

Mag gaaimua mʌchpa honee chirʌm.

Mamʌ warag mʌ honeecha haju,

19 pãrau jãg mʌ kõit jëeu durrum dʌ̈i Hẽwandam Hakꞌaar maach Pör Jesús kꞌaigpër hautarrauta mʌchjã hĩchab heeg hoo sim kꞌapꞌʌ chiraawai.

Mag pãrau jëeu nʌm dʌ̈i Hẽwandam Hakꞌarau mʌ heeg hoo sĩewai mʌigmuajã mʌ hʌ̈u höbërju.

20 Mamʌ dëgölp mʌ pöd höbërba hich mʌg cárcel degpai tꞌõowiajã mʌ gaai mas kꞌaba sim.

Sĩi mua hʌ̃rcha kꞌõsi chirʌmʌn mʌgau:

Cristo dʌ̈ita hag na mʌch chiraajemjö hubʌ chitam kꞌõsi chirʌm,

tꞌetꞌemnaan na hi kõit hiekꞌaawaijã hinag chukꞌu hiekꞌaag,

mʌch mag chirʌm hoowia hõrau warag Cristota tꞌö hiyʌ̈ʌ hamkꞌĩir.

Hamau chadcha Cristota mag tꞌö hiekꞌamʌn,

hamau mʌ tꞌõopʌ̈iwiajã,

monakꞌa höbër nʌm dʌ̈i hãba chirʌm.

21 Hʌ̈u monakꞌa höbërkꞌiinjã,

hãba Cristo hiek jaau nʌm gaaipaita pʌʌrba chitaju;

mʌ tꞌõobpʌ̈ikꞌiin chará hajapcha sim,

warre hich Cristo dʌ̈ichata chiraimaju haawai.

22 Mamʌ hʌ̈u chig haba höbërnaa mʌg jẽb gaai maach Pör Cristoou warag hich hiek hʌ̈kꞌapimkꞌĩir hi hatꞌee hõor jʌrju haai chirʌm hamʌn,

mag chan mua jaauju kꞌaugba chirʌm kꞌan hata jaauju kꞌai hirig.

23 Kꞌar jãguata warag tꞌoopꞌem numijã ham kꞌõsi haadeejem:

tꞌoopꞌem hãb Cristo haar chiranaa,

tꞌoopꞌem hãbmua warag hi hiek jaau chitaag.

Mua kꞌĩirjuawai Cristoou hich haarta mʌ haukꞌiin chadcha mʌ hajapcha hakꞌam.

24 Mamʌ mua kꞌapꞌʌ chirʌm hĩchab,

pãar gaaimua hidëu mʌ hich jãg mʌg jẽb gaai chitaju haai chirʌm.

25 Mag pãrau mʌch hig nʌm kꞌapꞌʌ chiraawai mʌʌgwaiwe chan Hẽwandamau hʌdʌʌr hamag mʌch tꞌõopibajujã kꞌapꞌʌ chirʌm.

Mʌʌn pãar hee maach Hẽwandam hiek jaau chitaju,

warag pãar hubʌ paaukꞌamam dʌ̈i honeecha wënʌrramkꞌĩir.

26 Mag Cristoou mʌ pãach haar monakꞌa baarpibarm hoobaawai pãrau honee nʌm hiekꞌau,

“Cristo,

hʌ̈uta pua jãg deeu hi waibëewia maar hee pʌ hiekdam jaau kꞌëraichëm” haju.

27 Mʌʌn mau pãar warp chirab mamʌ,

muan pãragan sĩita Cristoou maachig wënʌrrapi jaau simjöta tꞌum hi hipierraa wënʌrrapim kꞌõsi chirʌm.

Maagwai pöd mʌch pãar haar barba hawiajã,

warppaimua kꞌãijã hagtꞌa pãach tꞌumwe Cristo dʌ̈i hubʌnaa maach peerdʌajem hiek jawaagjã hö hãba nʌm hanʌmta mua hũrm kꞌõsi chirʌm.

28 Har maach higar kꞌaba nʌm kꞌʌʌnau pãach dʌ̈i hamachdëu hampierr hawiajã hoob högkꞌamiet.

Pãrau magmʌn magan magʌm hoowiata jũrr hewag kꞌĩirjuwia hamau hãsie,

“Mʌkꞌʌʌnaun chadcha nem jaau nʌm paarta maadëu ham dʌ̈i jãg nʌm,

jãgan Hẽwandamau jãkꞌʌʌnta peerdʌ hauwia maachta hisegju” ha kꞌĩirjuju.

Mamʌ mag hawiajã,

hich Hẽwandamauta hʌdʌraa magpi sĩewai

29 hoob högkꞌamiet.

Maadëun Cristo hiek gaai hʌ̈kꞌa nʌisiewaita hirig hʌ̈u hajim haajem;

mamʌ hagjö hi hiek jaau wënʌrrʌm gaaimua chikꞌamnau maach kꞌaibag waauwaijã hĩchab hirig hʌ̈u hajim haju haai nʌm.

30 Pãrau kꞌapꞌʌ nʌm,

mʌg maach peerdʌajem hiek jaau wënʌrrʌm gaaimua hõrau maach higar kꞌaba nʌm.

Pãrau pãach daúa hoojeejim,

jãga haajeejĩ mʌ jam pãar dʌ̈i chiraawai;

hĩsjã pãrau hũr nʌm,

jam pãar dʌ̈i nʌmjöta mau mʌ dʌ̈ijã tꞌʌnʌm.