4
Magua mʌch chan kꞌusëukꞌaba chitʌm,
Hẽwandamau hich garmuata mʌch dau haug kꞌaugwia hichdëuta mʌrʌg mʌg pꞌidagjã deetarr haawai.
2 Hi hipierraa ham kꞌõchgau meraa nem wauwia deeu hagʌm gaaimua mʌch kꞌĩir naauju hayaam nemjã mua bʌ̃ʌrjã wauba chitʌm.
Mua chan sĩi jãg kꞌapꞌʌm hanʌmta har parhooba nem jaau nʌrrjëem kꞌʌʌn kꞌaba haawai hõor kꞌũgurwia maach Hẽwandam hiek pꞌã sim gaai chaauraapaijã jaauba chitʌm.
Hẽwandam dau na magju kꞌãai muan hãba nem hagcha jaaujuuta hẽkꞌaajem.
Mua mag nem jaaunaa wau chitʌmjã chi mʌ hoojem kꞌʌʌnau ni hãbmuajã meraa kꞌaba nʌm.
3 Mua mʌg Hẽwandam hiek jaau chitʌmjã hõrau pöd kꞌaug hauba nʌm kꞌai,
magan makꞌʌʌnan hagtꞌa putiu dau hëu hʌ̃r börr nʌmjö naawaita hamach hokꞌoo nʌm gaaimua mag kꞌaugba nʌm.
4 Hich chi dösãt mʌg jẽb gayam kꞌʌʌn hẽwandamkꞌa sĩerrʌmuata ham dau kꞌĩpi wai sim dʌ̈i ham kꞌĩirjug hʌ̃rjã putiu börr wai simjö sim,
maach Cristo tꞌumaam kꞌʌʌn kꞌãai hʌ̃rpai sim hiekta hʌ̈kꞌapimaaugau.
Mag Cristo hiekꞌaupaita hõtdau bʌ̈ʌg nem hoowai kꞌapꞌʌ haajemjö maachig kꞌapꞌʌ hapi sim,
Cristo gaaita hich Hẽwandam kꞌĩir tꞌeg sim.
5 Mʌ chan pãrag wir haig mʌchta pãar pörkꞌa chirʌm ha jaauba chitʌm,
muan Jesucristota hõrag hamach pörkꞌapimkꞌĩir jaau chitaajem;
hí kꞌabahab chadcha maach Pör.
Mʌch garmuajã Jesucristo kꞌõsi chirʌm gaaimua,
mʌg hi hiek jaau chitʌmua mʌʌn sĩi pãar chogkꞌata chitʌm.
6 Har mʌg durr hompaa naawaijã sĩi hich hiekꞌaupai kꞌĩchag heemua hararag hompaa hautarr hich hag Hẽwandamaupaita hich hiekꞌau maach kꞌĩirjug haardʌ hatꞌamjö hajim,
magbarmua maach Hẽwandam tꞌumaam kꞌʌʌn kꞌãai wajaug sĩerrʌmta Jesucristo gaaimua kꞌapꞌʌ nʌisimkꞌĩir.
Dau hapꞌʌʌ hawiajã Hẽwandam maach dʌ̈i sim kꞌapꞌʌ nʌm
7 Pari mag Cristo hiekta pꞌatkꞌon kꞌãaijã hʌ̃rcha balee simta sĩi maar mʌg dau hapꞌʌʌ durrum kꞌʌʌnauta jaau wënʌrraajem.
Pari mag Hẽwandamau maar mag kꞌitꞌëem kꞌʌʌnagta hich hiek jaaupi sim chan maachta wajaug nʌm hamkꞌĩir kꞌaba,
sĩi hich Hẽwandam jua tꞌeegauta mag wau nʌm ha kꞌap hamkꞌĩrau.
8 Maguata mʌʌn mʌg chitʌmʌn,
nem kꞌĩirpierramuata chachmamjö haajeeb pari warag magʌmpaita kꞌĩirju chirʌʌjã haba chitʌm.
Kꞌar mag dau haug waauwaijã magʌm higwia warag nem wauju kꞌaugba haadeejeeb mamʌ,
magʌm gaaimua hökꞌĩirjug pöomajã haa kꞌaugba chitʌm.
9 Hõraun mʌ kꞌaibag wawaag mʌ hẽudeejã hẽkꞌaajem;
pari jũrr hamau mag nʌm hee Hẽwandamau mʌ kꞌa hogdʌba hichdëuta mʌ tꞌʌa wai nʌrraajem;
tꞌõoju hẽkꞌa nʌmua mas deejeeb pari warre tꞌõo chan tꞌõoba haajem.
10-11 Jesujã juauta ham dën hi tꞌõopʌ̈itarr haawai mʌjã hagjö mʌch chitʌmpierr hi gaaimua tꞌõjuuta jʌr chitʌmjö haajem,
mag dau haug wau chitʌm gaaimua hõrau hoowaijã chadcha hich Jesús mʌ tꞌãar hee hiiu simuata mʌch tꞌʌa wai nʌrraajem kꞌap hamkꞌĩir.
12 Mag hi hiek jaau chitʌm gaaimua mʌchin chadcha tꞌõjuuta hẽkꞌa chitʌmjö haajem,
pari mua mag jaau chitʌm gaaimua hʌ̈u pãar chi hʌ̈kꞌa nʌm kꞌʌʌnan jũrr hiiuta hiiu nʌm,
hi hiek hʌ̈kꞌa nʌm gaaimua.
13 Pari chadcha Hẽwandamau mag mʌch tꞌʌa wai sĩeju kꞌapꞌʌ haawaita David kꞌararrau hiekꞌatarr hiekꞌõoin,
“Mʌch hoomapꞌam kꞌʌʌn jua heemua Hẽwandamau hʌ̈u mʌch chig hapiba höbeerpiju kꞌapꞌʌ chiraawaita warag hi hiekjã högkꞌaba jaau chitaajem.”
14 Mua kꞌapꞌʌ chirʌm,
Hẽwandamauta maach Pör Jesús meetarrjã deeu pꞌiriu haujim.
Magtarr haawai hichdëupaita hĩchab mʌchjã Jesús pꞌiriu hautarrjö pꞌiriu hauwia pãar dʌ̈i hãba hich sim haar maach pꞌë harrju.
15 Mag mʌch dau haug waaujem tꞌum pãrag jaau chirʌmʌn,
jãan mʌch mag chitʌm gaaimua pãachta hʌ̈u hamkꞌĩrau,
magʌm gaaimua hĩchab Hẽwandamaujã dʌ̈rrcha pãar dʌ̈i wajapꞌa haajeewai hich hagjö hĩchab hõor kꞌapankꞌam kꞌʌʌnauta hʌ̈kꞌawia hirig hʌ̈u hajim hanʌmua hi tꞌö hiekꞌamkꞌĩir.
Magamkꞌĩirta mag mʌch dau haug waaujem pãrag jaau chirʌm.
16 Mag Hẽwandamau mʌch pꞌiriu hauju kꞌĩirjubaadeewaita warag kꞌĩirdam hubʌ hich jãg pꞌidkꞌa chitaajem.
Maach mor mʌg chi hʌ̃rʌmʌn chadcha jöoiraa pamampierr warag serbiiba pamáma,
pari jũrr mag sim maach hakꞌaran hedau hãspapakꞌampierrta warag jua tꞌierrpapagmam,
Cristo gaaimua.
17 Mʌig heegar haawai año kꞌapan mʌg dau haug wau chitawiajã mʌg hatag ya Hẽwandam dʌ̈i hich mag hogdʌba chiraimanaa hoowain sĩi kꞌũchpaita mag hapꞌʌʌ chitarrjöo haju,
magʌm tꞌum hãwattarr jũrr Hẽwandamau mʌch wajapcha wai sĩsiewai.
18 Chadcha hagtꞌa mʌchdëu hooba chirab mamʌ,
magtarr jũrr Cristoou mʌch dʌ̈i hajapꞌa haju kꞌĩirjubaadeewaita mʌg jẽb gaai sĩi chikꞌam jua machgau hapꞌʌʌ chitawiajã magʌmjã higba chitʌm.
Mʌg heegar haawai maadëu nem wajapꞌam hoo nʌmʌn jöpcha tꞌum chi matarrjã kꞌaugba haju;
pari hʌ̃gtꞌarm nem chan chugpaajã kꞌaugba hich mag sĩerrʌm hiekꞌau,
hoojã kꞌaugba.