5
Keena,
maach mor mʌg simʌn sĩi kꞌũchpaim hatꞌee di hëu sĩutarrjöta sim.
Pari maadëu kꞌapꞌʌ nʌm,
mʌg jẽb gaai haawai maach mor mag dijö sim jẽeubaadeewai jũrr hʌ̃gtꞌar Hẽwandamau maach hatꞌee bʌ̃ʌrjã jẽeuba haajem diita wai sim.
Mag di chan sĩi hõrau hëutarrjã kꞌabam.
2 Mag kꞌĩirjubaadeewaita mag mor dijö sim haum kꞌõchkꞌabaadeejem.
Jãga hakꞌiin meejã meeba mʌiguim mor sĩi hisegpʌ̈inaa hich mʌgta warre mag hʌ̃gtꞌar Hẽwandamau maach hatꞌee mor hiiur wai simta hatꞌaimakꞌam.
3 Wajapcharan maach meewai maach hakꞌaran di chukꞌumjöta haadeejeewai sĩi hich mʌg bʌ̃ʌrjã meebata mag mor hiiurta sĩi kꞌajũajö tꞌeg jũapʌ̈im kꞌõchkꞌabaadeejem,
magbaawai sĩi di jöoi garmua di hiiur deg dʌrbabaadëmjö haag.
4 Mʌg jẽb gaaita maach hëu heepai wënʌrrʌm haiguin tꞌõmapꞌa sĩi warag maach mor mʌg sim hʌ̃rpaita mag Hẽwandamau maach hatꞌee mor hiiur wai sim hanʌmjã jũapʌ̈im kꞌõchkꞌabaadeejem;
magbarmua maach mor mʌg dajẽkꞌu kꞌitʌmta jũrr dajẽgba hich mag sĩsimkꞌĩir.
5 Magaag hatꞌeeta warre Hẽwandamau maach hompaawaiwe dajẽgba haajem mor kꞌĩirta deejim;
pari magtarrta pekau gaaimuata maach mʌg dajẽkꞌu kꞌitꞌëem.
Mamʌ magʌm hãba deeu mag mor hiiur maachig deeb kꞌaba deeju kꞌap hamkꞌĩir hich Hakꞌaarjã maachig deejem.
6 Hich Hẽwandamauta mag sĩewai chadcha hich mag haju kꞌapꞌʌ chirʌm.
Maachta mʌig heegar hagtꞌa maach hëu hee wënʌrrʌm haiguin maachin Hẽwandam warp deeum durr nʌmjöta wënʌrrʌm,
7 chadcha daúacha hi hooba naawai.
Pari magʌm hãba hichdëu maachig deeju ha jaau sim chadcha deeju kꞌapꞌʌ hi hiek hʌ̈kꞌa naawaita
8 tꞌõjujã kꞌĩirjuba chirʌm.
Mag mʌ meewiajã hichiita maach Pör Cristo haar hi dʌ̈ita hãba chiraimaju kꞌapꞌʌ chirʌm.
9 Maguata,
hagtꞌa mʌg jẽb gaai chitaju wa jöpcha hi haar maju hawiajã,
mʌig heegarweran hãba hi dawagaata nem wauju kꞌĩirjuajem.
10 Hichiita maach mʌg tꞌʌnʌm kꞌʌʌnan tꞌumaa Cristo hich pörkꞌau pöm sim gaai hoo sim kꞌĩirpꞌee wëtab kꞌaba wëtju.
Maigta mʌg jẽb gaai naajeewai dichdëu hi hatꞌee nem waaujerr paarjã jũrr hich garmuajã hagpierr deemaju.
Cristo hiekta jaaujem hi dʌ̈i kꞌõinaa hamkꞌĩir
11 Mʌchdëu Hẽwandam hökꞌö chitʌm kꞌap,
tagam kꞌʌʌnagjã hi högkꞌawia hi dau na nem kꞌaigba waupim hugua,
hi hiek hʌ̈kꞌapi haujuuta hẽkꞌaajem.
Mʌ mag hagcha chitʌm Hẽwandamau wajapꞌa mʌ kꞌapꞌʌ sim,
maagwai pãraujã mʌ kꞌapꞌʌ nʌm mua nem hagchata wau chitʌm.
12 Mag nʌm haig chan mag mʌchdëupai wir haig mʌch tꞌöwiata mag hiekꞌa chirʌmjã haba chirʌm.
Mua mag chirʌmʌn,
mʌch mag hagcha nem wau chitʌm hoowai mʌ gaaimua pãach chigaa ham huguata mag chirʌm;
maagwai har hamachdëupai hamach tꞌö hiekꞌa nʌrrjëem kꞌʌʌnau pãach dakꞌĩir mʌ hëugar kꞌaigba hiekꞌaawaijã jaau kꞌapꞌʌ hamkꞌĩir.
Chadcha Hẽwandam daar hamach tꞌãar kꞌaigba nʌmta magba nʌmjö hamachdëupain hamachta tꞌö hiekꞌapim kꞌõsi haajem.
13 Hõrau hoowai mʌ sĩi lököomjöta pꞌitꞌurg hau chitʌm hoojem kꞌai,
mʌ gaai mas kꞌaba sim;
mʌ mag hoo nʌmʌn jãan Hẽwandamau jaau simjö hipierraa ham kꞌõchgauta hõrau mʌ jãg hoojem.
Pari lököo kꞌaba sĩi mʌch kꞌĩir hich mʌg chirʌmʌn,
jãan pãachig wajapcha hi hiek jawaagau.
14 Cristoou mʌch daupii haajeewaita muajã mʌchdëu nem waum kꞌõsimpai wauba,
hãba hi hiekta mʌch kꞌapeenag mʌg jaau chitaajem.
Mag hãb maach gaaimua meetarr haawai ya maach tꞌumaam kꞌʌʌnta kꞌëchpꞌöbaadëmjö hajim,
tag dichdëu nem kꞌõsimpai wauba haag.
15 Chadcha Cristoou tꞌumaam kꞌʌʌn kõit hʌdʌraa hich tꞌõopiwia deeu hiiu pꞌiidʌjim,
mag hich hiek hʌ̈kꞌa nʌm gaaimua hichdëu hiiu haumam kꞌʌʌnag hamachdëu kꞌõchagpierr nem wau wënʌrraba sĩi hich hatꞌeepaita nem wau wënʌrramkꞌĩir.
16 Warran muan chadcha Cristo sĩi parhoobam kꞌʌʌnjöpaita simpii chirajim,
pari hĩs ya hi hiek hʌ̈kꞌa chiraawai mua kꞌapꞌʌ chirʌm,
hí chadcha Hẽwandam Hiewaau.
Magua warramjö kꞌaigba kꞌĩirjuba chitaawai mua chan sĩi parhoobam kꞌʌʌnau hiekꞌaajemjö hõor hëugar “Jãkꞌʌʌnan magta sĩerrjëem” ha jaauba chitʌm.
17 Ya Cristo dʌ̈ita sim wounan warr hich sĩerrjö kꞌaba,
woun chi hiiurigta pa sĩsimjö sim.
Magbarm haigmua warr nem kꞌaigba waaujerr kꞌĩirjug tꞌum hisegpʌ̈iwia sĩi kꞌĩirjug hiiurta wai sĩsim.
18 Mag simʌn tꞌum hich Hẽwandamauta mag kꞌĩirjug hiiurig paapʌ̈imaajem Cristo gaaimua.
Hich Cristo gaaimuata hĩchab hich dʌ̈i tag hiekkꞌõr chukꞌu kꞌõinaa wënʌrrapinaa maachigpaita tagam kꞌʌʌnag jãga hamjã hagjö Hẽwandam dʌ̈i kꞌõinaa wënʌrraju haai nʌ ha jaaupi jaaujim.
19 Wajapcharan Cristo gaaimuata mʌg jẽb gayam kꞌʌʌn tꞌum Hẽwandamau hich dʌ̈i kꞌõinaa naapiju haai hapijim,
hich hiek hʌ̈kꞌamam kꞌʌʌn pekau perdonaawia tag magʌmjã higba;
pari hichdëu hõor dʌ̈i mag sim kꞌap hamkꞌĩir maragta mag hich hiekjã jaaupijim.
20 Magua maarta Cristoou hich jũrr chogpʌ̈itarr kꞌʌʌn haawai maarta hi hiek jaaujem kꞌʌʌnau.
Magua marau hi hiekta maach hiek gaai tꞌʌwi mag nʌm:
Hi hiek hʌ̈kꞌawia pãach kꞌaibag hirig chugpaapi jëeubat,
Hẽwandam dʌ̈i kꞌõinaa wënʌrraag.
21 Cristo chan bʌ̃ʌrjã pekau wauba kꞌitajim;
pari mag kꞌitarrta,
Hẽwandamau hʌdʌraa hi tꞌõopijim maach tꞌumaam kꞌʌʌn kõit,
hichta mag pekau wauwia chi hikꞌʌ harrjö;
hi dʌ̈i magbarmua jũrr maach dënta chugpaabapäaiwai pekau chukꞌu narrjö nʌisimkꞌĩir.