Hẽwandamau hiek hiiur deetarr jaau nʌm
3
Mag,
muan nem jaauwaijã tꞌum nem hagchata jaaujeewai ¿pãar jʌ̃g hee mua mʌch wir haig tꞌöwiata mag hiekꞌa chirʌmjöo sĩ?
¿Wa mʌchjã warm kꞌʌʌnjö pãar haar hẽsap dʌ̈ita maju haai chirʌ́wa?
Mag kꞌabam.
Hẽsap chukꞌu mawiajã ya pãrau mʌ kꞌapꞌʌ nʌm.
Ni warm kꞌʌʌnag mʌchdëujã Hẽwandam hiekta jaau chirʌm ha kꞌap hamkꞌĩirjã pãar jua heem hẽsapjã higba chirʌm.
2 Mʌrʌgan,
carta chaarta mʌch dʌ̈i wai chitaju kꞌãyau pãach chi hʌ̈kꞌa nʌm kꞌʌʌnta carta chaarjö nʌm.
Mua jaau chitʌm hiek hʌ̈kꞌawia Hẽwandam dau na pãar wajapꞌa wënʌrrʌm hoowiata carta gaai jaaupʌ̈i nʌmjö hõrau kꞌapꞌʌ naabahab,
chadcha mua wajapꞌa Hẽwandam hiek jaau chirʌm.
3 Chadcha hamau wajapꞌa hoo nʌm hakꞌiin,
pãar kꞌabahab hich Cristooucha carta pꞌãtarrjö nʌm.
Mag cartajö hichdëucha pꞌãtarr haawai plumaau pꞌãtarrjã kꞌaba,
sĩi hich Hẽwandam warrgarwe hich mag hiiu sĩerrʌm hag Hakꞌarauta hẽsap gaai carta pꞌãtarrjö sim.
Mag pꞌãkꞌa sĩsimjã sĩi warrgar Moiseeg pꞌã deetarrjö mokdau gaai kꞌaba,
pãar tꞌãar heechata pꞌãkꞌa sĩsimjö hajim.
Hajapcharan mʌrʌg hich hiek jaaupi simua warre pãach tꞌãrauchata hʌ̈kꞌapijim.
4 Mua chadcha mag hiekꞌa chirʌm,
Hẽwandamauta Cristo gaaimua mʌch hiekꞌa chirʌmjã kꞌapꞌʌ hapi sĩewai.
5 Mag nʌm haig chan mag mʌchdëu nem wau chirʌmjã tꞌum mʌch juapaauta wau chirʌm haba chirʌm.
Mua kꞌapꞌʌ chirʌm,
mʌchdëu nem wau chirʌmjã Hẽwandamau juapadam dee simuata waaujem.
6 Hichdëuta mʌrʌg juapadam deejim,
hich chogkꞌanaa hich garmua hõor dʌ̈i haju hiek deetarr jaaumkꞌĩir.
Pãrau kꞌapꞌʌ nʌm,
mag hi hiek hiiur mua jaau chirʌm chan warrgar Moiseeu dau daau pꞌã pʌatarrjö kꞌaba haawai pãach tꞌãar hee sĩeichëmjã pãrau pöd hooba haajem.
Mag Moiseeu pꞌã pʌatarran dau daau sĩejieb pari magua hõor peerdʌ hauba haajeejim.
Mamʌ hĩs jũrr hag kꞌãai Hẽwandam Hakꞌaar maadëu hooba haajemuata hõor peerdʌ haaujem.
7 Mamʌ Hẽwandamau mokdau gaai pꞌãtarr hiek Mooiseeu waibëewai,
sĩi hichta hedau kꞌĩirjö kꞌĩir bʌ̃ʌmjö bëetarr haawai,
israelnaanau pöd hi kꞌĩir heerpabajierram haajem,
dau kꞌakꞌaichgau.
Mag bëejieb mamʌ hich mag sĩerraag kꞌaba harr haawai hökꞌar magba pamamua tag bʌ̃ʌ kꞌaba haadëjim haajem hi kꞌĩir.
Mamʌ pãadë wajapꞌa kꞌĩirjubat.
Mag hich Hẽwandamaucha mok gaai pꞌã deetarr hiek hajieb mamʌ maach peerdʌ haubaju hiek hajim.
Mag sim hãba jaaucheewaijã hich wajaugau sĩi mag Moisés kꞌĩir bʌ̃ʌmjö hapitarrta,
8 jãgwia hag kꞌãyau hatcha wajaug habaju sĩ hich Hẽwandamau hich Hakꞌaar gaaimua hõor dʌ̈i deeu hiek deebarmua ham peerdʌ hauju jaau nʌm.
9 Wajapcharan mag maach peerdʌ haubaju hiek jaautarrjã wajapꞌa harr kꞌai,
magan hich hiek hʌ̈kꞌabaadeewai Hẽwandamau maach kulp chukꞌu hapʌ̈iju jaau nʌmta hag kꞌãai wajapcha sim.
10 Nacha mag mok gaai pꞌã sĩerr hag hajaug chan hẽudee mag Hẽwandamau maach peerdʌ hauju jaau nʌm hiek dʌ̈i bʌ̃ʌrjã barba sim.
11 Mag hiek pꞌã deetarr wajaugau Moisés kꞌĩir bʌ̃ʌmjö hapitarrta hõtdaujö hökꞌar tꞌõmamua chugpatarr kꞌai,
magan Hẽwandamau hich Hakꞌaar gaaimua hõor dʌ̈i hiek deetarrta wajapcha sim,
hag kꞌãyau bʌ̃ʌrjã chugpaa kꞌaugba sĩerraawai.
12 Mag hi hiek hʌ̈kꞌabaadeewai Hẽwandamau maach kulp chukꞌu hapäaijemjã wajapꞌa kꞌapꞌʌ chiraawaita,
mʌchdëu jaaum haig warre hi hiek dawaata jaau chitaajem,
hiek wajapꞌam haawai.
13 Moisés Sinaí durrsĩ gaai Hẽwandam dʌ̈i hiekꞌa sĩi hawia bëewai hich kꞌĩir sĩi bʌ̃ʌmjö tꞌʌnarr hökꞌar chugpamam israelnaanag hoom hugua,
hich kꞌĩir gar putiu börr haaujeejim hanaabá.
Pari hewag paawai mag hirua waiberr hiek kꞌãai jũrr chi hiek hiiur pierrumta wajapcha sĩewai mua chan mag hi dënjö meerba muan warre dawaata jaaujem.
14 Pari mag Moiseeu hich kꞌĩir happai börr haaujerrta tꞌum israelnaan kꞌĩirjugpata Hẽwandamau mag put heegar börr hatꞌamjö hajim.
Maguata hewag pawiajã par Hẽwandam hiek tꞌʌ̃r nʌmjã pöd kꞌaugba haajem,
mag börr simjö sim kꞌecheupʌ̈iba sĩewai.
Mag kꞌĩirjugjã putiu börr simjö sim kꞌecheupʌ̈yaagan Cristo hiekta tꞌãraucha hʌ̈kꞌaju haai nʌm.
15 Hĩs hewag pawiajã,
mag sĩsidʌm kꞌʌʌnau hich Moiseeu hẽsap pꞌã pʌatarr gaai tꞌʌ̃ʌrwai hagtꞌa hamachdëu tꞌʌ̃rmamjã kꞌaugba nʌm.
16 Pari Hẽwandamag hamach pekau chugpaapi jëeuwaita mag ham kꞌĩirjug putiu börr simjö simjã warre barbapʌ̈imjö haajem.
17 Warran Hẽwandam warp narrta ya hi dʌ̈icha wënʌrrʌmjö nʌm,
mag Moiseeu pꞌã pʌatarrau tag pꞌẽetꞌʌgba naawai.
Magua mag dich pekau chugpaapi jëeuwain warre hich Hẽwandam Hakꞌaarta wai nʌisiejem.
18 Maguata maach hi hiek hʌ̈kꞌa durrum kꞌʌʌn chan mag hagtꞌa putiu kꞌĩir börr nʌmjö kꞌaba haawai hëspꞌëg dau wajapꞌam hee hoo nʌmjöta hich Hẽwandam wajaugjã maach gaaita hõrau hoo nʌm,
maach nem wajapꞌa wau nʌm gaaimua.
Mag nʌmua maachin waragta hich Hẽwandam Hakꞌarau wajaug paamaawai warag maach Pör Jesujöta paaukꞌamam.