Pʌch kꞌõchagpierr nem wauba, bigaaum kꞌʌʌn hʌ̈u hamkꞌĩirta nem waubá
15
Mʌg maachdëu Hẽwandam hiek hʌ̈kꞌatarr gaai chadcha hubʌ nʌm kꞌʌʌnauta jũrr har maach kꞌãai kꞌa tꞌũumjö kꞌitꞌëem kꞌʌʌndam chig hapimapꞌa haju haai nʌm,
sĩi dichdëu kꞌõchagpierr ham dakꞌĩir hamau nem wauba haajem nemjã wauba,
wa hamau kꞌöba haajem nem kꞌãijã kꞌöba.
2 Mag sĩi dichdëu kꞌõchagpierr nem wauju kꞌãai,
dich kꞌapeenau kꞌõsim nemta wauju haai nʌm,
nem wajapꞌam,
magʌm gaaimua hamjã hʌ̈u nʌm dʌ̈i warag Hẽwandam hiek gaaita hubʌ paaukꞌamamkꞌĩir.
3 Cristo mʌg jẽb gaai nʌrraawaijã sĩi wir haig hichdëu nem kꞌõsimpaita wauba haajeejim.
Mag kꞌãai maach hʌ̈u wënʌrramkꞌĩirta hõrau hich kꞌĩircha kꞌaigba hiekꞌamaajerrjã higba,
hich Hayau kꞌõsi sĩerrjöta nʌrrajim.
Mag nʌrrarr gaaimua Salmos gaai jaau simjö,
hich Haai gaaimua jũrr hich kꞌĩirta hõrau kꞌaigba hiekꞌaajeejim. (Sal 69:9)
4 Hẽwandamau hich hiek pꞌã sim gaai nawe jaautarran,
maach pꞌitꞌurg wënʌrrawiajã mag hiek gaaimuata warag honeenaa magʌmjã higba hãwat wënʌrrʌmua hʌ̈u hich haar höbërjujã kꞌap hamkꞌĩirta mag pꞌãpijim.
5 Hich Hẽwandamauta mag maach pꞌitꞌurg haauwaijã magʌm nem pꞌitꞌurmjã hʌ̈u maachig hãwaat kꞌapꞌʌ hapinaa honee hapiejeewai hirigta pãar kõit jëeu chirʌm,
Cristo mʌig heegar hõor hee nʌrraajerrjö dich kꞌapeen dʌ̈ijã bibigag chukꞌu hö hãbata wënʌrrʌmua
6 tꞌumaam kꞌʌʌnauta hihãba maach Pör Jesucristo Haai Hẽwandamta tꞌö hiekꞌamkꞌĩir.
Judionaan kꞌabam kꞌʌʌnagpa maach peerdʌajem hiek jaautarr
7 Mag pãach hoowia tꞌumaam kꞌʌʌnag maach Hẽwandamta tꞌö hiekꞌamkꞌĩir,
pãach hee wir haigpaijã tꞌumaa hagdaujö dich kꞌapeen kꞌa kꞌõsi habat,
hich jãg Cristooujã maach kꞌõsi harrjö.
8 Kꞌĩir heyaa habat:
Jesucristo mʌg jẽb gaai bëetarran,
Hẽwandamau maach jöoinag hãb maach peerdʌ haumkꞌĩir pʌ̈iju ha jaautarr haawai,
hich pierrum gaaimua chadcha Hẽwandam hiekꞌa sĩejim ha kꞌap hamkꞌĩirta bëejim.
Magua mua pãrag jaau chirʌm:
Hi bëetarran,
maach chi judionaan hatꞌee chadcha nem wajapꞌa wawaanta bëejim.
9 Pari mag maach judionaan hatꞌeepaijã kꞌaba,
hĩchab Hẽwandamau judionaan kꞌabam kꞌʌʌnpa dau haug kꞌaugwi hich kꞌaugpitarr haawai,
hamagpa hĩchab hi tꞌö hiekꞌamkꞌĩirta bëejim.
Mag hamaujã hi tꞌö hiekꞌaju higwi,
Daviiujã hĩchab,
“Judionaan kꞌabam kꞌʌʌnau pʌ tꞌö hiekꞌapꞌöo tꞌʌnʌm hee,
muajã hĩchab pʌ tꞌö hiekꞌanaa meukꞌaraupa pʌ tꞌumeukꞌarju” ha pꞌãjim Hẽwandam hiek gaai. (Sal 18:49; 2 S 22:50)
10 Maimua Moiseeujã hagjö,
“Judionaan kꞌabam kꞌʌʌnjã judionaan dʌ̈i tꞌum hãba honee habat” hajim. (Dt 32:43)
11 Maimua hich Daviiupai deeu hũwaai,
“Durrpierram kꞌʌʌnau pꞌöbörpierr judionaan kꞌabam kꞌʌʌnaujã maach Pörta tꞌö hiekꞌabat” hajim. (Sal 117:1)
12 Mag maach Pör higwia,
Isaías kꞌararraujã hĩchab,
“Isaí chaain hewagam kꞌʌʌn heemua hãb nemjĩirjö sũrkꞌa höbërbaadëmta judionaan kꞌabam kꞌʌʌn durrpierr nʌnʌidʌm kꞌʌʌn Pörkꞌaju” hajim.
“Magbaawai hamachdëujã hĩchab chadcha hiruata hamach wajapꞌa wai sĩsiju kꞌapꞌʌ haju” ha jaaujim. (Is 11:10)
13 Judionaan kꞌabam kꞌʌʌn,
maguata muan mag hichdëu maach dʌ̈i wajapꞌa hajujã kꞌapꞌʌ hapiejem hag Hẽwandamagta pãar kõit jëeu chirʌm,
pãrau chadcha hʌ̈kꞌa naawai honee hapinaa kꞌõinaa nʌm dʌ̈i warag mag hichdëu maach dʌ̈i wajapꞌa haju ha simta pãragjã hich Hakꞌarauta hʌ̃rcha kꞌĩirjupimkꞌĩir.
Pabloou mʌg hẽsap pꞌã sim higwi jaautarr
14 Cristo gaaimua kꞌodamnaan,
mua kꞌapꞌʌ chirʌm,
mʌchdëu pãrag mʌg pꞌãju nawe pãrau chadcha pãach kꞌapeen dʌ̈ijã hö wajaugnaa,
Hẽwandam dʌ̈i hogdʌba wënʌrrajujã hathaba kꞌapꞌʌnaa,
hĩchab pãach kꞌapeen wawijujã chadcha pãrau kꞌapꞌʌ nʌm.
15 Pari magʌm hãba,
hichiita mua pãrag mʌg pꞌã deepʌ̈i chirʌm,
mʌch himeerba.
Pari ma chan mag pãrau kꞌaugba naawaijã kꞌabam.
Mua mʌg pãachdëu hoojem kꞌʌʌn dënjö pꞌã deepʌ̈i chirʌmʌn,
ya pãachdëu kꞌapꞌʌm nemdamjã kꞌĩir hokꞌoopimaaugauta mag jaau chirʌm,
Hẽwandamau hʌ̈u mʌ heeg hoowi
16 Jesucristo chogkꞌapinaa judionaan kꞌabam kꞌʌʌnag hich hiek jaaumkꞌĩirta mʌ jʌr hautarr haawai.
Magtarr haawai mʌ pꞌidagan judionaan kꞌabam kꞌʌʌnagta maach peerdʌajem hiek jaau nʌmʌu.
Mag jaau chitʌmua hʌ̈u hʌ̈kꞌapi hatꞌaawai hich jãg Hẽwandamag ofrenda deejemjö muajã mag chi hʌ̈kꞌamam kꞌʌʌnta hirig dee chirʌm.
Pari mua mag ofrendajö Hẽwandamag dee chirʌm ha chirʌmʌn,
Hẽwandamau ham haum kꞌõsi haaujem higwiata mag chirʌm,
ya chi Hakꞌarauta hi hatꞌee wajaug paa wai sĩewai.
17 Mag hiekꞌaju kꞌaba chirab mamʌ,
Hẽwandam hatꞌeem pꞌidag mʌchdëu wau chirʌm higwian chadau,
mʌ hiekꞌaju haai chirʌm,
Jesucristo dënkꞌa chirʌm gaaimua judionaan kꞌabam kꞌʌʌnagpa hʌ̈u hi hiekta jaau chiraawai.
18 Sĩi parhoobam nem higwia chan mʌ hiekꞌabam;
mamʌ mʌchdëu mag jaau chitʌm gaaimuata hʌ̈u Jesucristoou hamag Hẽwandam hiek hʌ̈kꞌapitarr paran chadau mʌ hiekꞌaju haai chirʌm.
Mag hamau hʌ̈kꞌatarran,
hamachdëucha mua jaau chirʌm hũrwia mag mʌchdëu jaau chitʌmjö hamach daar wajapꞌa chitʌm hootarr gaaimuata hʌ̈u hʌ̈kꞌajierram.
19 Mamʌ mag gaaimuapaijã kꞌaba,
mag nʌm dʌ̈i hĩchab Hẽwandam Hakꞌaar jua tꞌeegau mua hõor mor masim kꞌʌʌn monaaunaa mepeenpa dau daau jʌr wërp chitʌmjã hamach daúa hootarr gaaimuapata hʌ̈kꞌajierram.
Mag jaau chitʌmuata maach peerdʌajem hiek Jerusalenmua jaaubaaderr Iliria durram magwe jaauwi chirʌm.
20 Maguata mʌg maach peerdʌajem hiek jaau chitʌmʌn,
hagtꞌa bʌ̃ʌrjã Cristo higwia jaau nʌm hũrba haajem kꞌʌʌn heepaita jaauju hẽkꞌa chitʌm,
ya chikꞌamnau jaauwia hʌ̈kꞌa durrum kꞌʌʌnagta deeu jaau chitʌm ham hugua.
21 Hẽwandamau hich hiek gaai jaauwai,
warr bʌ̃ʌrjã Cristo jaau nʌmjã hũrba haajerr kꞌʌʌnaujã hi hiek hũurwai kꞌapꞌʌ haju ha sim;
maagwai hich makꞌʌʌnauta hi hooju ha jaau sim hĩchab.
Magua mua makꞌʌʌnagta mag jaau chitʌm haig,
hich Hẽwandamau jaautarr heeta höbër sĩebahab.
Pabloou hich Romaag maju jaautarr
22 Mag gaaimuata chadcha mua pöd pãar hoon maba sĩi par hiiupaita majujú haajeejim,
mau hagtꞌa Cristo hiek hũrbam kꞌʌʌnag jaauju pöoma tꞌʌnarr haawai.
23 Pari mau mʌch chirʌm durr ya tꞌum jaau pꞌʌʌrdʌbapäaiwai hĩsin chad maju haai chirsim.
Mag nʌm dʌ̈i hag nawejã maju kꞌĩirju chirarr haawai
24 Españaag mamuata pãar hoon mab kꞌaba hoon maju kꞌĩirju chirʌm.
Mua kꞌapꞌʌ chirʌm,
mag maach hãba honee naawia maigmua mʌ mam hedjã pãrau mʌ juag hooju,
hʌ̈u España barmkꞌĩir.
25 Mamʌ nacha mʌ Jerusalenag mam,
jam judionaan Cristo gaaimua maach kꞌodnaankꞌa tꞌʌnʌm kꞌʌʌnag nemdam deenau ham juag hoomjö hoon.
26 Maan,
hermanonaan Macedoniapienau Acayapien dʌ̈imua hamach kꞌĩrau pꞌatkꞌondam jʌr pꞌiewi jam Jerusalén hermanonaan hapꞌʌʌ kꞌitꞌëem kꞌʌʌn hatꞌee deepʌ̈i nʌmʌu.
27 Mag deepʌ̈iju hapꞌöbaaderrjã hamach kꞌĩrauta deepʌ̈iju hapꞌöbaadëjim.
Hamau kꞌĩirjuawai,
jam Jerusalenpien dʌ̈i dëbpaar pöm nʌmjöta nʌm haajem,
warrcha hamachdëu Cristo hiek kꞌaaugwaijã maach hermanonaan Jerusalenpienau jaau nʌm gaaimuata kꞌaugtarr haawai.
Magtarr gaaimua hʌ̈u hamach peerdʌ naawaita,
hamaujã jũrr hagdaujö haag hawi,
nemdam dee nʌmua ham juag hooju haai nʌm hawiata mag deepʌ̈iju hapꞌöbaadëjim.
28 Wajapcharan cha mʌchdëu jaau chirʌmjö mʌchdëucha mag pꞌatkꞌon kꞌapeenau jʌr pꞌie wai nʌm deebatꞌuurwaita Españaag mamua pãar haig chiraimaju.
29 Mua kꞌapꞌʌ chirʌm,
mʌ pãach haar barimaawai maach tꞌumaam kꞌʌʌn dʌ̈rrcha honee nʌisiju,
Cristoouta maach dʌ̈i hʌ̈u haju haawai.
30 Hermanonaan,
Hẽwandam Hakꞌarau maach wir haigpaijã hagdaujö chikꞌam kꞌa kꞌõsi hapinaa pãraujã mʌ dënjö Jesucristo hiek hʌ̈kꞌa naawai Hẽwandamagta mʌ kõit jëeubat.
31 Mag pãachdëu hirig jëeuwai Judea durr Cristo hiek hʌ̈kꞌaba nʌm kꞌʌʌnag mʌ chig hapibata hirig jëeubat.
Magnaa mag pꞌatkꞌon judionaan kꞌabam kꞌʌʌnau Jerusalenpien hatꞌee deepʌ̈i nʌm mua harrumjã magʌm haba haum kꞌõsi hamag haumkꞌĩirjã jëeubat.
32 Hẽwandamau mag pãrag jëeupi chirʌmjö hamʌn,
magan pãar hoon maawaijã honeeta pãar haar barbaimaawai kꞌõinaa chiraimaju,
majã hʌ̈u Hẽwandamau pãar haar barpimʌn mamʌ.
33 Mʌchdëujã pãar kõit jëeu chiraajem,
hich Hẽwandam hõor kꞌõinaa hapiejemuata pãachjã kꞌõinaa wai sĩemkꞌĩir.