3 Hĩchab mʌ hermano Aquiloogjã mʌ salud deebat maimua hi hʌʌi Priscilaagjã hagjö.

Jãkꞌʌʌnau chadcha dʌ̈rrcha mʌ juag hoowi nʌm,

mʌg Cristo pꞌidag pꞌidkꞌa nʌm gaai.

4 Hamau peer hamachta tꞌõopijierram mʌ kõit.

Magua chadcha mua hamag hʌ̈u hajim haajem;

mamʌ mʌch happaimuata mag hʌ̈u hajimjã haba,

judionaan kꞌabam kꞌʌʌn iglesia hee tꞌumaam kꞌʌʌnauta hamag hʌ̈u hajim haajem mʌ kõit,

mag hʌ̈u peerdʌwia maach Pör Jesucristo hiek jaau chitʌm gaaimuata hamachdëujã hũrwi hʌ̈kꞌatarr haawai.

5 Jãg hermano Aquilo di haig culto wawaag hermanonaan podpaajem kꞌʌʌnagjã hagjö mʌ salud deebat.

Mʌ kꞌapkꞌʌʌn wajapꞌam Epenetoogjã salud deebat.

Hichta Asia durr nacha Cristo hiek hʌ̈kꞌajim.

6 Mariaagjã salud deebat,

jãg hʌʌi chadcha hathaba maach Pör Cristo hatꞌee pãar hee pꞌidkꞌawi sim.

7 Mʌ durram kꞌʌʌn Andrónico Junias dʌ̈i jam pãach haar nʌm kꞌʌʌnagjã salud.

Jãkꞌʌʌn mʌ kꞌapeen hajim hãba cárcel deg naajeewai.

Jesucristoou jʌr hautarr kꞌʌʌnau hoowaijã hamau maach Pör Cristo hatꞌee pꞌidag wau nʌmjã hʌ̈u hoojem.

Hamau mʌ kꞌãai na Cristo hiek hʌ̈kꞌajierram.

8 Mʌ salud deebat hĩchab Cristo gaaimua mʌ kꞌapkꞌʌʌn chi wajapꞌam Ampliatoog.

9 Mʌg Cristo hiek jaau nʌm gaai maach kꞌapeer Urbanoogjã salud;

maimua Estaquiigjã hagjö;

mua hi daupii chitʌm.

10 Mʌ salud deebat Apeleeg,

pꞌitꞌurg haauwaijã hʌ̈u Cristo gaaita warag hubʌ kꞌitaajem.

Tꞌum Aristóbulo degam kꞌʌʌnagjã hĩchab mʌ salud deebat.

11 Mʌ durram woundam Herodión haajemʌgjã salud deenaa Narciso di haiguim kꞌʌʌn hĩchab maach Pör Cristo hiek hʌ̈kꞌa nʌm kꞌʌʌnagjã mʌ salud deebat.

12 Trifenaagjã mʌ salud deenaa Trifosaagjã deebat.

Hamjã hĩchab maach Pör Cristo hatꞌeeta pꞌidkꞌa durraajem.

Hãa,

maimua Cristo gaaimua maach hʌ̃pꞌʌi Persidaagjã salud;

hijã hĩchab mua daupii chitʌm dʌ̈rrcha maach Pör Cristo pꞌidag gaai pꞌidkꞌa kꞌitaawai.

13 Rufoogjã salud.

Hijã hĩchab maach Pör Cristo hatꞌee hich pꞌidkꞌa sim gaaimua tꞌʌ̃rpꞌöo sĩejem.

Maimua hi hãdagjã hagjö mʌ saluddam deebat.

Wajapcharan muajã hĩchab mʌch hãdjöta hi jãsene wai chitʌm,

hichdëujã hĩchab mʌ hich chaaijö haajeewai.

14 Salud deebat Asincritoog,

Flegonteeg,

Hermeeg,

Patrobaag,

Hermaag maimua tagam hermanonaan ham dʌ̈i nʌm kꞌʌʌnagjã hagjö mua salud deepʌ̈i chirʌm.

15 Mʌ salud deebat hĩchab Filologoog maimua Juliaagjã hagjö,

Nereoog maimua hi hʌ̃pꞌʌígjã hagjö,

Olimpaag maimua tꞌum tagam kꞌʌʌn maach hermanonaan ham haig nʌm kꞌʌʌnagjã hagjö mʌ salud deebat.

16 Cristo gaaimua pãach tꞌum hãba kꞌodkꞌa tꞌʌnaawai hagdaujö dich kꞌapeen kꞌa kꞌõsi saludaabat.

Mau iglesiapierr hermanonaan Cristo hiek hʌ̈kꞌa durrum kꞌʌʌnau hamach tꞌumaam kꞌʌʌnau pãrag salud deepʌ̈i nʌm.

17 Hermanonaan,

mʌch kꞌĩir hokꞌooju nawe pãrag jaaum hig chirʌm,

mʌ hiek hũrbat:

Jãg Cristo hiek jaau nʌm hanʌmjã nacha pãachdëu hũrtarrjöjã kꞌaba sĩi warag hag chaaurta jaau wënʌrrʌm gaaimua pãachjã hamachjö hokꞌoopijuuta hẽkꞌa nʌm kꞌʌʌn dʌ̈i kꞌĩir kꞌapꞌʌ habat;

jãgʌm kꞌʌʌn dʌ̈i chan hoob kꞌapeerkꞌamiet.

18 Jãg nʌrrjëem kꞌʌʌn chan chadcha maach Pör Jesucristo hatꞌee pꞌidkꞌam kꞌõsi haawaita mag wënʌrraba,

sĩi hamach kꞌõchagpierr nem waum kꞌõchgaupaita jãg nʌrrjëem.

Haman chadcha nem hiekꞌaa kꞌaug kꞌĩir hee bëbëdömjö nem jaau sĩerrjëem,

pari mag wënʌrrʌmʌn sĩi hõor kꞌĩirjug meraam kꞌʌʌndam himeraa kꞌũguraagpaita jãg nʌrrjëe haajem.

19 Tꞌumaam kꞌʌʌnau kꞌapꞌʌ nʌm,

pãrau chadcha Cristoou kꞌõsi simjö hi hipierraata nem waaujem.

Maagwai mʌ honee chirʌm.

Mamʌ pʌaba mua mag chirʌm:

Nem wajapꞌam wawaagan chadcha nem kꞌĩirjug kꞌaugta habat;

pari nem kꞌaigbam wawaag chan sĩi warag wauju kꞌaugba dau meraamjöta habat.

20 Pãrau magta hamʌn,

mag parhoob nem jaau sĩerrjëem kꞌʌʌnau hamach kꞌĩirjug pãach hee jaaucheewaijã,

Hẽwandam maach kꞌõinaa hapiejemuata pãrag ham hiek hʌ̈kꞌapiba habarmua chi mepeer Satanás mag hõrag sëukꞌa nem jaaupiejemjã pãrag bʌ̈ʌu hö jʌ̃atꞌʌg deebarmjö haju.

Maach Pör Jesuu pãar dʌ̈i hʌ̈u hamkꞌĩir mua pãar kõit jëeu chiraajem.

21 Hĩsin chad deeu pãrag maach salud jawaagpam.

Mʌ kꞌapeer Timoteo mʌ dʌ̈i hogdʌba pꞌidkꞌa kꞌitaajemuajã pãrag salud deepʌ̈i sim;

maimua mag tag hĩchab Lucioou,

Jasonau maimua hagjö Sosipaterraujã salud haajem;

hamach mʌkꞌʌʌn mʌ dʌ̈i durr hãbam durram kꞌʌʌnau.

22 Keena,

muajã pãrag saluddam deepʌ̈i chirʌm,

mʌchdëujã pãach dënjö hĩchab maach Pör Cristo hiek hʌ̈kꞌaajeewai.

Pabloou mʌg hẽsap gaai pãrag jaaupʌ̈i sim tꞌum muata pꞌãjim.

Mʌ tꞌʌ̃r Tercio haajem.

23 Jöoi Gayooujã hĩchab pãrag salud haajem.

Mʌʌn hi di haigta chiraajem.

Culto wawaagjã hich mʌg degta hõor biirdʌajem,

hi deg.

Jöoi Erastoou hĩchab pãrag salud haajem,

mʌg pꞌöbör heem chi tesoreroou.

Maimua hãbmiecha hermano Cuartooujã hĩchab pãrag salud deepʌ̈i sim.

[

24 Hayoo keena.

Mʌgdampai hajim pãrag jaaum hig chirarr.

Maach Pör Jesucristoou pãar tꞌumaam kꞌʌʌn dʌ̈i hʌ̈u hamkꞌĩir,

maumua marau pãar kõit jëeu durraajem.]

25 Mʌg maach peerdʌajem hiek hich Jesucristo higwia mua jaau chirʌm gaaimua Hẽwandamau pãar hubʌ hapiju,

hich hiek gaai jaau simjö.

Mʌg judionaan kꞌabam kꞌʌʌnpa peerdʌju hiekꞌan,

warrgar hich Hẽwandamau mʌg durr hompaaju nawe hichdëu ya kꞌĩirju wai sĩejim.

Pari magtarrta warrgar hich hi jaaumienag jaauwaijã warre dawaa jaauba,

26 hĩsta hich hag hiekpai wajapcha hõrag kꞌap hapibarm.

Magtarr haawai hĩsta chadcha tꞌum durrpierram kꞌʌʌnag mag maach peerdʌajem hiek jaaupi sim,

hich hiek hʌ̈kꞌanaa hich hipierraa wënʌrramkꞌĩir.

27 Hẽwandam hich happai sĩerrʌmta maadëu tꞌö hiekꞌaju haai nʌm,

hichdëuta maach Pör Jesucristo gaaimua maach peerdʌ hautarr haawai.

Hĩsin chad tag jaauju chukꞌu chirʌm,

magdampai hajim.

Hayoo keena,