Hoob pãach dënjö hʌ̈kꞌa durrum kꞌʌʌn pãach wir haig jaaumiet
14
Kꞌodamnaan,
pãrag jaaukꞌim:
Har Cristo hiek hʌ̈kꞌa durrum pari hamachdëu nem wauju haai nʌ wa wauju kꞌaba kꞌãijã nʌm kꞌaugbam gaaimua kꞌa tꞌũumjö kꞌitꞌëem kꞌʌʌnau pãach dʌ̈i kꞌapeerkꞌam hiigwai hoob ham kꞌa hisegmiet.
Hoob pãach dënjö kꞌaugba nʌm hawi magʌm gaaimua warag ham dʌ̈i hijẽjẽb hamiet.
2 Mua pãrag mag chirʌmʌn mʌgau:
Pogkꞌa hõrau jaauwai nem tꞌum kꞌöju haai nʌm haajem;
pari hãaur kꞌʌʌnau mag jaauba haajem.
Mua kꞌapꞌʌ chirʌm,
hãaur kꞌʌʌn Hẽwandam hiek hamachdëu hʌ̈kꞌatarr gaai hubʌ kꞌaba nʌm gaaimua nemek modjã kꞌöba haajem,
sĩi parhooba juau wautarrta hõrau hamach hẽwandam hawi hagʌmʌg jëeu narr nemek mod kꞌãijã kꞌöbaawai pekau haju hawi.
3 Mag,
nem tꞌum kꞌöwiajã,
chi mag kꞌö simua jũrr parhooba nem kꞌöba haajem kꞌʌʌn jaauju kꞌaba sim.
Maagwai jũrr chi parhooba nem kꞌöba haajem garmuajã parhoob kꞌoojem hëugar,
“Jãguan nem kꞌöju kꞌabampata kꞌö sĩerrʌm” haju kꞌaba sim,
mag nem parhooba kꞌö sĩeb mamʌ,
Hẽwandamau magʌmjã higba hijã hĩchab hich chogkꞌa wai sĩewai.
4 Mag Hẽwandam chogkꞌa simta,
kꞌantꞌee pua hi jaau sĩ.
Hí pʌ chog kꞌabam.
Hich chi patronauta hich chog haawai jaauju haai sim,
hʌ̈u sĩ wa hʌ̈u kꞌaba sĩ hirua nem wau sim.
Mag sĩewai maach Pör Cristota jua tꞌeeg sĩebahab,
mag nem parhoob kꞌö sĩewiajã hich mag hubʌ hi wai nʌrraag.
5 Jũrr deeum ejemplo pãrag jaaukꞌim:
Hee pogkꞌa maach kꞌapeenau jaauwai,
Hẽwandamag jëeuju hed sim haajem;
mag hedta hʌ̃rcha hirig jëeuju haai nʌm haajem.
Pari jũrr hagjö warm kꞌʌʌnau mag kꞌaba,
Hẽwandamag jëwaagan parhoobam hed hawiajã tꞌum hich hagjöpai sim haajem.
Pari jãiguin wajapcharan pua kꞌĩirjuawai chadcha magta haju haai sim kꞌai,
magan kꞌan gaaimuata magju haai nʌmjã kꞌapꞌʌ haju haai sĩ.
6 Mag sĩewai,
parhoobam hed hawiajã,
Hẽwandam kꞌõsi haawai hirig jëwaag mag hedta hʌ̃rcha hʌʌrkꞌa nʌmʌn magan hʌ̈u sim.
[Pari mag hedpai kꞌaba,
hed hëepierr Hẽwandamag jëeukꞌiinjã,
hagjö nem wajaug sim,
hi kꞌõsi haawaita hirig jëeu naawai.]
Hich hagjöta sim tꞌach kꞌö nʌm haigjã:
Chi parhooba kꞌö simua Hẽwandamag jëeunaata kꞌömʌn hʌ̈u sim,
hich Hẽwandamau hoowai hichig jëeunaata kꞌö sĩewai.
Pari chi nem parhooba kꞌöba simuajã mag Hẽwandamau kꞌõsi simjö haag hawiata mag kꞌöba simʌn,
magan hich hagjö nem wajaug sim,
hirua mag nemek kꞌöbahab mamʌ deeum nem hichdëu kꞌö sim paar hagjö Hẽwandamag hʌ̈u hajim haajeewai.
7 Mag nʌm haig maach chi hʌ̈kꞌa nʌm kꞌʌʌn kꞌĩirjug kꞌĩet naawiajã maach tꞌumaam kꞌʌʌn Hẽwandam gaaimuata wënʌrrʌm.
Magua,
maach chan mʌg nʌm haig sĩi ya maach juau pawi nʌm hawia,
dich wënʌrram haig wënʌrranaa dich tꞌõm haig tꞌõju kꞌaba nʌm.
8 Wajapcharan maach chi Cristo dënkꞌa nʌm kꞌʌʌnta mʌig heegar hiiu wënʌrrʌm haiguin,
maachin maach Pör Cristoou jãga wënʌrraju haai nʌ ha jaaujeewaita hʌ̈u chadcha hichdëu kꞌõsimjö wënʌrrʌm;
wa mee kꞌãijã mee nʌmʌn hichdëu meepibarm haigta meejem.
Pari maachin monakꞌa naawia kꞌãijã wa meewia kꞌãijã,
hichiita maach Pör Cristo dënkꞌa nʌm.
9 Mag maach hich dënkꞌa hawaagta Cristo meewi deeu hiiu pꞌiidʌjim,
magbarmua hichta kꞌëchwi durrum kꞌʌʌn Pörkꞌanaa hĩchab hagtꞌa hiiu durrum kꞌʌʌn Pörkꞌaag.
10 Mag hichta chi Pörkꞌa simta,
kꞌantꞌee pua pʌch dënjö hʌ̈kꞌa durrum kꞌʌʌn jaaujẽ.
Wa jãgwi pua jãg ham kꞌa hisëemjö haajẽ.
¿Pua kꞌaugba sĩ,
maach tꞌumaam kꞌʌʌnta Cristo kꞌĩirpꞌee dʌnʌʌutkꞌaimaju,
maach mʌig heegar haajeewai nem wautarr jaaumam maach jʌ̃gʌucha hũraag?
Magua,
maadëu dich kꞌapeen jaauju kꞌaba nʌm,
Cristoouta maach tꞌumaam kꞌʌʌn jaauju haawai.
11 Maach Pör Cristoou maach dʌ̈i magju higwia,
Hẽwandamau hich hiek pꞌã sim gaai,
“Cha mʌ hiekꞌa chirʌm hiekꞌau tꞌumaam kꞌʌʌnta mʌ kꞌĩirpꞌee kanieu tꞌʌkꞌökꞌöod tꞌʌnʌmua chadcha mʌʌta Hẽwandam charau haju” ha hiekꞌajim hich maach Pör Hẽwandamaucha. (Is 45:23)
12 Hichdëucha magtarr haawai jãan chadcharau keena.
Mag hedan maach tꞌumaam kꞌʌʌnauta dichdëu nem waaujerr tꞌum hichigchata jaaumaju,
dich hidamaucha.
Hoob pãach kꞌapeen pekau hee burrpimiet
13 Mag Cristoouta tꞌumaam kꞌʌʌnag hichdëu kꞌap jaaumaju haawai maachdëu chan pöd dich kꞌapeen jaauju kꞌaba nʌm.
Mag kꞌãai warag bʌ̃ʌrjã dichdëu nem wau nʌm gaaimua dich kꞌapeen pekau waupijöjöom nem chan wauju kꞌaba nʌm.
Magba hakꞌiin maach hoowia hagjö habaawai jũrr chi parpemta maach gaaimua pekau wauju.
14 Mua mʌchdëupai pãrag mʌch jaaukꞌim:
Mʌ chadcha hich maach Pör Jesús dënkꞌa chiraawai mua wajapꞌa kꞌapꞌʌ chirʌm,
sĩi parhoobam nemek mod kꞌö nʌm wa dö dö nʌm kꞌãijã bʌ̃ʌrjã kꞌaigba kꞌaba sim.
Pari hãbmua kꞌãijã kꞌĩirjuawai mag nem parhooba kꞌöbaawai Hẽwandam na hich hãrju sim kꞌai,
magan chadcha hichigpain kꞌaigba sim.
15 Magua,
Cristo gaaimua pʌch kꞌodkꞌa sim daar pua nem parhoobam kꞌoowai hirig hʌ̈u kꞌaba sim kꞌai,
hoob tag hi dakꞌĩir magʌm nem kꞌöm.
Magba hakꞌiin pua hirigjã kꞌöpim kꞌõsimjöta sim.
Pari pua hi dʌ̈i mag sim haig,
pua chadcha hi daupii kꞌabata wai sim.
Pʌchdëu nem parhooba kꞌö sim gaaimua hoob bigaaum kꞌʌʌnta pekau hee burrpiwi hokꞌoopim.
Ham kõitpa hĩchab Cristo meetarr haawai hamjã maadëu daupii haju haai nʌm,
hokꞌoopimapꞌa.
16 Pãach chi Hẽwandam hiek pãachdëu hʌ̈kꞌatarr gaai hubʌ nʌm kꞌʌʌnau nem wau nʌm bʌ̃ʌrjã kꞌaigba kꞌaba sim kꞌapꞌʌ hawiajã hoob hubʌ kꞌaba nʌm kꞌʌʌn daar parhooba nem waumiet.
Magba hakꞌiin pãach gaaimua ham pekau waubaawai hõrau pãach jaauju.
17 Wajapcharan Hẽwandamag dich Pörkꞌapi nʌm chan,
sĩi nem kꞌĩirpierr tꞌach kꞌö nʌm kꞌaba,
ni nem kꞌĩirpierr dö nʌmjã kꞌabam.
Hẽwandamag hʌdʌraa dich Pörkꞌapi nʌmʌn,
hirua nem kꞌõsimjö waunaa dich kꞌapeen dʌ̈ijã kꞌõinaa nʌm dʌ̈i hich Hẽwandam Hakꞌaar gaaimua honee wënʌrrʌmʌu.
18 Mag Cristo hipierraa chadcha dich kꞌapeen kꞌa kꞌõsi nʌmʌn chadau Hẽwandam daúgjã hʌ̈uunaa hõraujã hĩchab hʌ̈uu hoo nʌm.
19 Wajapcharan mag dichdëu nem wau nʌm gaaimua dich kꞌapeen dich dënjö hʌ̈kꞌa durrum kꞌʌʌnjã tꞌumaa kꞌõinaa wënʌrrapijuuta hẽkꞌaju keena,
mag nʌmua warag Hẽwandam hiek gaaita tꞌierr paaukꞌamaag.
20 Pari magba sĩi warm kꞌʌʌnau kꞌöju haai kꞌaba nʌm haajem kꞌöm kꞌõchgaupai chan har hagtꞌa wajappai hubʌ kꞌaba kꞌitꞌëem kꞌʌʌn Hẽwandamau peerdʌ haauwai wajaug paatarrta pekau waupibarmua sĩi hãrbapʌ̈imjö hapimiet.
Nem kꞌoojem nemen tꞌum wajapꞌa sĩsidʌm.
Hãba kꞌaigba simʌn,
dichdëu nem kꞌöbarm gaaimua jũrr chikꞌam pekau hee burrpi nʌmta chadcha kꞌaigba höbër sim.
21 Wajapcharan mag maach gaaimuata maachjö Cristo hiek hʌ̈kꞌa kꞌërʌmdam pekau hee burrpi sim kꞌai,
magan warag bʌ̃ʌrjã nemek kꞌöba,
nagjã döba,
ni parhooba nem waujujã kꞌaba nʌm.
22 Pãar chi hubʌ nʌm kꞌʌʌnau parhooba pãachdëu nem kꞌö nʌm Hẽwandam dakꞌĩir kꞌaigba kꞌaba sim kꞌapꞌʌ naawiajã hoob sĩi pãachjö hubʌ kꞌaba kꞌitꞌëem kꞌʌʌn dakꞌĩirjã hidawaa hamiet.
Magju kꞌãai sĩi pãach kꞌĩirjug heepaita mag kꞌapꞌʌ nʌmjã wai nʌisit.
Hẽwandamauta pãrau nem wajapꞌa wau nʌmjã kꞌapꞌʌ sĩebahab.
Har hichdëu nem wauju haai sim hawi waubarmjã naspawi deeu dau merag jãgbarjim ha kꞌĩirjuba nʌm kꞌʌʌnta chadcha honee nʌm kꞌʌʌnau.
23 Pari hajappai kꞌaugba har hichdëu kꞌĩirjuawai kꞌöju kꞌaba sim ha simta kꞌömʌn,
hichdëupaita hich kꞌaibag wau sim,
hichdëu kꞌĩirjuawai mag kꞌöju kꞌaba simta kꞌö sĩewai.
Maadëu nem wau nʌm Hẽwandam dau na hʌ̈u kꞌaba sim kꞌãijã hanaa waauwain pekauta wau nʌm.