Pablo Bernabé dʌ̈i Iconio hee
14
Mag pꞌöbör Iconio hanʌm hee naaimawia Pablo Bernabé dʌ̈i hamach numwe hãba dubjierram haajem,
judionaan Hẽwandam hiek jaaujem deg.
Mag dubwi maach Pör hiek hiek kꞌẽgkꞌa jaaupꞌöbaadeewai judionaan pöm griegonaan dʌ̈imua Hẽwandam hiek hʌ̈kꞌajierram haajem.
2 Mamʌ hãaur judionaan chi hʌ̈kꞌaba narr kꞌʌʌnau jũrr judionaan kꞌabam kꞌʌʌn wawí pꞌöbaadëjim hanʌm,
tag ham hiek hʌ̈kꞌaba warag hamach hipierrta ham hëugar kꞌaigba hiekꞌamkꞌĩir.
3 Mag gaaimua mag hamachdëu jaau nʌmjã hʌ̈kꞌamapꞌa haawai warag hajapcha hamag jawaag hawi haigmua da wëtbajierram haajem.
Chi Pabloou Bernabé dʌ̈imua maach Pör hamach dʌ̈i sim kꞌapꞌʌ narr haawai warag tꞌãar pꞌĩiuwi högkꞌaba hõrag jaaumajierram haajem,
jãga Hẽwandamau hamjã kꞌõsi sĩerrʌ́.
Maagwai hamau jaau wënʌrrʌm hõrau sëukꞌaawai ham hugua,
ham hiek hich Jöoiraujã hich jua tꞌeeg hamag deejim haajem,
hag na hõrau hooba haajem nempa maach dauderraa ham dakꞌĩir waumamkꞌĩir.
4 Maagwai chi pꞌöbörpien hãaur kꞌʌʌn judionaan higar tꞌʌnaawai tagam kꞌʌʌn jũrr Jesuu hich hi jaaumkꞌĩir jʌr hautarr kꞌʌʌn higar naajeejim haajem.
5 Mamʌ judionaanau hamach pörnaan dʌ̈imua hãaur kꞌʌʌn judionaan kꞌabam kꞌʌʌnpa bëewi,
mokou bar wai nʌmua hamach tꞌõopäain wëdurum ha hũrbaawai
6 deeum durr Licaonia hanʌmʌg dʌr wëtjierram haajem,
chi Pablo Bernabé dʌ̈i.
Mag wëtwi pꞌöbör Listra hanʌm hee naawi hërëubaadeeu jũrr hagjö pꞌöbör Derbe hanʌm hee naaimajim haajem.
7 Mag wënʌrrʌmua hag bigaau pꞌöbördam nʌnʌidʌm hee hamach barmampierr jãga Hẽwandamau maach peerdʌajẽ ha jaaumajierram haajem.
Pablo mokou bar wai nʌmua peer tꞌõotarr
8 Mag Listra pꞌöbör hee woun hãb bʌ̈ hãkꞌãraa kꞌitʌm sĩejim haajem.
Mag woun hich bi heewe bʌ̈ hãkꞌãraa tꞌaabawi sĩi jup kꞌëraajeejim haajem,
pöd dʌrdʌr haju kꞌaba haawai.
9 Hich mag wounau Pablo hijẽjẽbkꞌamʌg bʌ̃ʌrjã dau tꞌõba hũr hoo sĩejim haajem.
Pabloou mag kꞌitʌmʌg hoowai,
hich hödegpain “Magʌm Hẽwandamaun chadcha mʌ monaaupʌ̈iju haai sim” ha simjöo hoobaawai,
hirig heerpanaa kꞌĩesir,
10 —Pꞌiidʌwia bʌ̈ hubʌ dʌnʌisí hajim hanʌm.
Magbaawai chadcha pꞌuddʌ dʌnʌisiwia warag dʌr nʌnʌʌu kꞌabaadëjim haajem.
11 Hõor haig narr kꞌʌʌnau Pabloou magbarm hoobaawai sereubaadëwi Licaoniapien meúata,
—Keena,
jãkꞌʌʌnan hẽwandamnaanta hõor kꞌĩir tꞌegwia maach hee naaichëmgui hajierram hanʌm jũrr hamach kꞌapeenag.
12 Mag hamach hẽwandam hanʌmua,
Bernabé Zeus gaai tꞌʌ̃rnaa Pablo jũrr Hermes gaai tꞌʌ̃r wai naajim haajem,
hichta hʌ̃rcha hijẽjẽb kꞌaajerr haawai.
13 Mag pꞌöbör hee dub nʌm haigcha ham hẽwandam mag Zeus hanʌmʌg jëeujem di dʌnaajim haajem.
Magpꞌöbaadee hag heem pꞌadëu pꞌak hemkꞌooinpa pamaar dën pörsirkꞌa sĩsidʌm puertdi haig pꞌëbëewi pꞌaamamua hamagta Hẽwandamagamjö jëwam hig sĩejim haajem,
hõor kꞌapan tꞌʌnʌwe ham dʌ̈i hãba.
14 Pabloou Bernabé dʌ̈imua hũurwai pꞌadëu mag hamach hëugar mamagkꞌam hũrbaawai gaai machgau hamach kꞌajũa mor gayam tꞌʌrrëunaa hõor hee hähäag kꞌapꞌig wëtumua,
15 —Keena,
¿kꞌantꞌeeta pãrau maar dʌ̈i jãg nʌma?
hajierram hanʌm.
Maach wounaan hãba tꞌʌnaabahab;
maar chan Hẽwandam kꞌabam.
Maraun sĩita jãg hẽwandam hanʌmjã maadëu nem higab simʌg jëeuju kꞌãyau,
maach Hẽwandam chaar hʌ̃gtꞌar simʌg jëeumkꞌĩirta pãrag marau jaau wënʌrrabahab hajierram hanʌm,
hichdëuta mʌg hedaujã wauwia,
mʌg jẽbjã wauwia,
pꞌũas dʌ̈i hag hee nem tꞌʌnʌmpa tꞌum hãba wautarr haawai.
16 Warrgarin chadcha tꞌumaam kꞌʌʌnau hamachdëu nem kꞌõsimʌg jëeu nʌmjã Hẽwandamau magʌm haba haajeejimgui hajim hanʌm,
hamau wajappai hich kꞌaugba narr haawai.
17 Mamʌ magʌm hãba,
hõrau hichigcha jëeumkꞌĩirjö,
hich jua hoopiejeejimgui hajim hanʌm,
ham heeg hoo simua.
Mag,
hichdëuta maach honee wënʌrramkꞌĩir,
maach hatꞌee nosegjã chëpinaa maach nemjĩirjã hajapꞌa höbeerpi nʌm dʌ̈i hĩchab maachig tꞌach kꞌöjujã hed hëepierr deejemgui ha jaaumajierram haajem hamach numiim kꞌʌʌnau,
jũrr jaaupʌ̈pʌ̈igmamua.
18 Pabloou Bernabé dʌ̈imua par mag jaau durrajieb mamʌ,
hichiita tꞌetꞌe deejierram haajem,
mag pꞌak kꞌëchnaa pꞌaa nʌmua hamachig Hẽwandamagamjö jëeum hig narr jëeupiba haag.
19 Mamʌ hamau mag nʌm hãba,
judionaan bëejierram haajem,
Antioquiamua Iconiomuajã hagjö.
Mag bëewi hõor wawí pꞌöbaadee,
hamachig paa hauwi,
Pablo mokou barpꞌöbaadëjim hanaabá.
Mag jũrram kꞌʌʌnau bar wai nʌʌ hawia chi meemjö haadee,
meebaadëmpii hawia pꞌöbör higaau hëudʌ deetꞌurjierram haajem.
20 Mam mag hëudʌ deebatꞌuurwai,
tagam kꞌʌʌn hagjö Jesús hiek hʌ̈kꞌa narr kꞌʌʌnau bëewi hich hʌ̃r pos haicheewai,
pꞌiidʌbaadëwi deeu pꞌöbör hee sĩeichëjim hanʌm,
hich Pablo.
Maimua hag noram Derbeeg petajim haajem,
Bernabé dʌ̈i.
21 Mag pꞌöbör Derbe hanʌm hee maach peerdʌajem hiek jaau wënʌrrʌmua hõor pöm Hẽwandam higar hʌ̈kꞌapiwia deeu hamach bʌ̈ heepai hewag Listraag bëejierram haajem:
mag Listramua,
Iconioog;
mag Iconiomua,
jũrr Antioquiaag.
22 Makꞌʌʌn pꞌöbördam hee chi hʌ̈kꞌa durrum kꞌʌʌn kꞌĩir honee hapieg,
ham hoo pꞌʌʌrdʌ wënʌrrʌmua hamachdëu maach Pör hiek hʌ̈kꞌatarr hiekta warag hogdʌba hʌ̈kꞌapi jaaujeejim haajem hamag.
Mag nʌm dʌ̈i hĩchab,
“Hẽwandam sim haar mawia,
hi dʌ̈i hich mag wënʌrraagan,
hichiita hich jãg hi gaaimua maach dau hapꞌʌʌ wënʌrrajugui” haajeejim haajem.
23 Mag wënʌrrʌmua hĩchab iglesiapierr jöoin jʌr haumaajeejim haajem,
makꞌʌʌnta chi pörkꞌamkꞌĩir.
Magnaa tꞌach kꞌöba sʌrkꞌa nʌmua oraawia maach Pör Jesuugta hamach nʌnʌidʌmpierr tꞌʌapaar hamkꞌĩir hirigta jaaujeejim haajem,
hamachdëujã hi hiekta hʌ̈kꞌa narr haawai.
Pablo Bernabé dʌ̈i deeu Siria durram pꞌöbör Antioquía hanʌmʌg bëetarr
24 Maimua Pisidia durr dichwia jũrr deeum durr Panfilia hanʌm barjierram haajem,
Pablo Bernabé dʌ̈i.
25-26 Maig pꞌöbör Perge hanʌm hee Hẽwandam hiek jaau naawia,
jũrr Ataliaag wëtwi,
hamachig pꞌidag jaautarr tꞌum wau haaipabaadee,
hich haarpaimua jap hee paaukꞌawia,
deeu Antioquiaag bëejierram haajem,
warrjã mag pꞌöbör heemuata chi hʌ̈kꞌa durrum kꞌʌʌn pörnaanau ham pʌ̈itarr haawai.
Mag Antioquía pꞌöbör heemua hajim haajem,
warrjã ham pʌ̈yaagpaawai Hẽwandam hiek högkꞌaba jaau wënʌrramkꞌĩir ham hʌ̃r jua hausĩunaa ham kõit hirig jëeu nʌʌ hawi pʌ̈itarr.
27 Mag bëewi,
chadcha deeu Antioquía barchëwia,
chi hʌ̈kꞌa durrarr kꞌʌʌn tꞌum hãbam haig biirdʌnaa,
hamag jaaupꞌöbaadëjim haajem,
jãga Hẽwandamau ham dʌ̈i hajĩ,
maimua jãga maach Pör Jesuu judionaan kꞌabam kꞌʌʌnagjã hĩchab hich hiek hʌ̈kꞌam kꞌõsi hʌ̈kꞌapijĩ,
hamachpa peerdʌmamkꞌĩir.
28 Maimua Pablo Bernabé dʌ̈i warag haigmua da wëtba,
chi hʌ̈kꞌa durrum kꞌʌʌn dʌ̈i nʌʌ hajierram haajem.