Ananiaau Safira dʌ̈imua sëukꞌatarr
5
Mamʌ hĩchab woun hãb sĩejim haajem,
Ananías ha tꞌʌ̃r sĩerr.
Mag wounaujã hich hʌʌi Safira hanʌm dʌ̈imua hamach jẽb wai narr përpʌ̈iwia,
2 hamach kꞌaugbaju hawi,
chi pꞌatkꞌon heem hãaur hamach hatꞌee hauwia,
hagjö hãaurpai chi hemkꞌooirau deen majim haajem,
hich Jesuu jʌr hautarr kꞌʌʌn haar.
Mamʌ mag hich jayau pꞌatkꞌon tꞌum deen maba harrjã chi hʌʌirau kꞌapꞌʌ sĩejim hanaabá.
3 Mag hamach haar deebaimaawai Pedroou chi Ananiaag magjim hanʌm:
—Ananías,
¿Jãgwi jẽb përtarr param pꞌatkꞌon pua tꞌum deechëba,
hag heem pãach hatꞌee hautarrta,
“Tꞌum deechëjim” ha chirʌ́?
hajim hanʌm.
Pʌch jãg sëukꞌa simua Hẽwandam Hakꞌaarpata pua kꞌũgur hauju hẽkꞌa sĩebahab hajim hanʌm.
4 ¿Pua hoowai chi jẽb pʌch dën kꞌabajĩ?
Mag chi jẽb pʌch dën harr haawai,
¿chi pꞌatkꞌonjã pʌch dën kꞌabajieb?
Mag simta,
¿kꞌan jãgwi jãg sëukꞌaju kꞌĩirjubaadëjĩma?
hajim hanʌm.
Jãg sim haiguin Hẽwandampata pua kꞌũgur hauju hẽkꞌa sĩebahab hajim haajem Ananiaag.
5 Pedroou mag hiekꞌabaawai warre chi meemta Ananías jẽkꞌʌt di bäjä haimajim haajem.
Mag sëukꞌatarr gaaimua Ananías meetarr hũrwia tꞌum chi hũrmam kꞌʌʌn tꞌãar paraa nʌisijim haajem.
6 Mag hoobaawai hẽwannaan haig narr kꞌʌʌnau put hee pʌrëunaa warre haukꞌëraan harrjierram haajem.
7 Maimua magtarr kꞌur hora tꞌãrjupjö nʌm hee,
chi hʌʌirau hich jaai magbarmjã kꞌaugba,
Pedro sim di haar majim haajem.
8 Mag mawia barbaimaawai Pedroou chi jayau hichig pꞌatkꞌon deeimatarr hoopinaa chi Safiraag,
—Safira,
¿chadchata pãar jẽb hich mʌgʌm gaaipaita përjierrá?
ha jëeujim hanʌm.
Magbaawai Safiraau,
—Chadcha jãgpaim gaaita përbajieb hajim hanʌm.
9 Magbaa Pedroou deeu hirig,
—Safira,
¿kꞌantꞌeeta pua jãg pʌch jaai hiek hʌ̈kꞌawia dʌ̈i hi hipierr pãach numiim kꞌʌʌnau maach Pör Hẽwandam Hakꞌaar kꞌũgurju hẽkꞌa pꞌöbaadëjĩma?
hajim hanʌm.
Magnaa hichdëupai,
Pʌdë hũrbá hajim hanʌm.
Pʌ jaai haukꞌëraan wëttarr kꞌʌʌn deeu barchëwi puertdi haig bʌ̈ heseserkꞌam.
Cha mʌ hiekꞌa chirʌm hiekꞌau nau pʌjã hich jãkꞌʌʌnaupai pʌ haukꞌëraan harrjugui hajim hanʌm.
10 Maimua hirua magbarm bʌ̈rre chadcha Safirata di bäjä ha hi bʌ̈kꞌʌrr jẽer sĩeimajim hanʌm,
warre chi meemta.
Magbarm hee chi hẽwannaan hujã haar narr kꞌʌʌn dubchëwia chadcha ya maach chi meemta werba tꞌʌnʌm hoobaicheewai,
hĩchab harrwia hich jaai haukꞌërtarr bigaau dʌ̈i hãba haukꞌërjierram haajem.
11 Magtarr hũrwia tꞌum Hẽwandam hiek hʌ̈kꞌa narr kꞌʌʌn jãpꞌierrwia bigaaum kꞌʌʌnpa tꞌãar paraa nʌisijim haajem.
Nem maadëu hooba haajem pöm waaujerr
12 Hich Jesuucha hich hi jaaumkꞌĩir jʌr hautarr kꞌʌʌn gaaimua Hẽwandamau hag na hõrau nem hooba haajem pöm waumaajeejim haajem,
hõor dakꞌĩir.
Maagwai chará waragta chi hʌ̈kꞌa narr kꞌʌʌnan Haai hi jëeujem di bigaau dijãjö wëu wëjöm “Pórtico de Salomón” ha tꞌʌ̃r sim hee biirdʌdʌ haajeejim haajem.
13 Mamʌ chi hʌ̈kꞌa nʌm kꞌʌʌn hamach hap mag poposkꞌamjã,
jũrr chi hʌ̈kꞌaba narr kꞌʌʌnaun warag ham kꞌa jõiju högkꞌa naajeejim hanaabá,
heeu dëgölp hamachdëujã Ananiaau Safira dʌ̈imua harrjö habaawai hich hagjö kꞌëchju kꞌĩirjuwia.
Mag ham kꞌa jõiju hökꞌö naajieb mamʌ,
kꞌajapꞌa ham hig hiyʌ̈ʌ haajeejim haajem.
14 Mag hãaur kꞌʌʌnau högkꞌa nʌm hãba,
warm kꞌʌʌnau jũrr pogkꞌa maach Pör hiek hʌ̈kꞌakꞌag wëtumua warag kꞌapaana hapꞌöbaadëjim haajem,
hʌʌinpa.
15 Hamach daúa mag hoo nʌm dʌ̈i hich Jesuucha hich hi jaaumkꞌĩir jʌr hautarr kꞌʌʌnau hõor dakꞌĩir hag na maadëu nem hooba haajempa mag dau daau wau nʌm hoowai,
waragta haaunaan kꞌapan pa bʌʌrkꞌam gaai dawag pꞌë haumaajeejim haajem,
Pedro dichmamua hi hakꞌaraupai kꞌãijã chi haaunaan hʌ̃r kꞌĩsu dichdimaawai magbarmuapai monaaumamkꞌĩir.
16 Mamagkꞌam hũrwia hĩchab Jerusalén dakꞌa pꞌöbördam nʌnʌidʌm heem kꞌʌʌnaupa warag Jerusalén pꞌöbör hee ham nʌm haig hamach haaunaan haubëemaajeejim haajem.
Mag hamach haig haaunaan bën kꞌaigbamua sĩi tꞌõtꞌõrrsö sĩsidʌmpa haubëemarr kꞌʌʌnan tꞌum monaaupʌ̈i maajeejim haajem chi Hẽwandam hi jaaumkꞌĩir hich Jesuucha jʌr hautarr kꞌʌʌnau.
Hõrau Pedro hẽudee hẽkꞌanaa hĩchab Juan hẽudeejã hẽkꞌaajerr
17 Hẽwandam hi jaaumkꞌĩir jʌr hautarr kꞌʌʌnau mag hamach dakꞌĩir hõor monaaupʌ̈pʌ̈ikꞌam hoowia,
pꞌadnaan tꞌumaam kꞌʌʌn pöröu saduceonaan dʌ̈imua hamachdëu pöd hagjö haba haawai,
hiekkꞌõr wauwia,
18 hich Jesuucha jʌr hautarr kꞌʌʌn pʌrkꞌanaa,
cárcel deg pꞌãarkꞌa sĩujierram haajem.
19 Mamʌ ya hedaar pabaadeewai Hẽwandam chog hʌ̃gtꞌarmua bëewia,
chi cárcel degam puertdi weeukꞌanaa,
Pedro Juan dʌ̈i dawag höbërpinaa hamag,
20 —Jãigmua Haai hi jëeujem deg wëtwi tꞌumaam kꞌʌʌnag Hẽwandamau maach hʌ̃gtꞌarcha höbeerpiejem hiekta jaaubaimat hajim hanʌm.
21 Hamachig Hẽwandam chogau mag jaautarr haawai chadcha hag noram hoo hãspapinaa,
Haai hi jëeujem deg wëtwia,
Hẽwandam hiek jaaupꞌöbaadëjim haajem.
Ham mag Haai hi jëeujem deg nʌm hee,
jũrr tꞌoomgar pꞌadnaan pöröu hich haig narr kꞌʌʌn dʌ̈i hãba biirdʌnaa cárcel di haar guardianaan pʌ̈ijierram haajem,
hamachdëu Pedro Juan dʌ̈i pꞌãarkꞌapitarr hamach haig pꞌë haubëemkꞌĩir.
Mag ham biirdʌ tꞌʌnʌm hee naajim haajem Israel durram kꞌʌʌn ham Asamblea heem chi pörnaan,
hamach tꞌum.
22 Mamʌ mag wëtwi chi guardianaanau hooimaawai,
Pedro Juan dʌ̈i cárcel deg chukkꞌu tꞌʌnaajim hanaabá.
Magbaawai deeu hamach pʌ̈itarr kꞌʌʌn haig bëewia,
23 —Chadcha cárcel di wajapꞌa pꞌãar dʌnʌm marau hooimajim,
maimua chi soldaaunjã daaugajãr puertdi haig hoo dʌnʌnʌid tꞌʌnaajim.
Mamʌ weeunaa hoowai,
hag hee hõor hãbjã marau hoobajimgui ha jaauchëjierram haajem.
24 Mag jaaubaichëm chi pꞌadnaan pöröu hũrwia,
Haai hi jëeujem degam guardianaan pöröujã pꞌadnaan pörkꞌa nʌm kꞌʌʌn dʌ̈imua hũrpꞌöbaadeewai,
hamach wir haigpai,
—Keena,
mag hooimaba habarm hanʌm chad kꞌai,
¿jãga haagauma?
hajierram hanʌm.
25 Mamʌ hamach wir haigpai mamagkꞌam hee,
woun hãb bëewia,
—Keena,
pãrau wounaan cárcel deg pꞌãarpitarr kꞌʌʌnjã bëewi chaggajãr Haai hi jëeujem deg hõrag jaau nʌmwai haichëjim hanʌm.
26 Magbaawai mag Haai hi jëeujem degam guardianaan pöröu hagjö guardianaan hich kꞌãai jua heegpaim kꞌʌʌn dʌ̈i mawia,
hõor pöm ham hiek hũr narr kꞌʌʌnag hamach mokou barm hugua,
bʌ̃ʌrjã ham chig haba pꞌë haubëejim haajem.
27 Mag pꞌë haubëewi chi tꞌetꞌem kꞌʌʌn hãba biirdʌ tꞌʌnʌm haig wai dubbaicheewai chi pꞌadnaan pöröu hamag jëeumamua,
28 —¿Pãrag kꞌabajĩ hajim hanʌm,
marau jãg Jesús higwia tag bʌ̃ʌrjã nem jaaupiba jaautarr?
Magtarrta ya Jerusalén pꞌöbör hee pãachdëu hʌ̈kꞌa nʌm hiekta tꞌum haaidʌ wai nʌmgui hajim hanʌm,
jãg marau jaautarrjã hũrba jaau wënʌrrʌm gaaimua.
Pãachdëu mag jaau wënʌrranaata jãgan jãg woun tꞌõotarrjã pãrau maar gaaita tꞌʌpʌ̈im hig naabma hajim hanʌm,
Jesús higwia.
29 Magbaawai Pedroou hagjö hich kꞌapeen Hẽwandam hi jaaumkꞌĩir jʌr hautarr kꞌʌʌn kõitpa hiekꞌamamua magjim haajem:
—Sĩi hõor hipierraa haju kꞌãyau,
Hẽwandamau nem jaau simta marau hagpierr wauju haai nʌmgui hajim hanʌm.
30 Warrgarwe maach jöoinau hʌ̈kꞌaajerr hag Hẽwandamauta Jesús pꞌiriu haujim.
Hich hag Jesús kꞌabajieb hajim hanʌm,
har pãachdëu pakuls gaai meerpꞌë tꞌõopʌ̈itarr.
31 Pãrau hi mag tꞌõopʌ̈ijieb mamʌ,
Hẽwandamau jũrr hichta tꞌumaam kꞌʌʌn kꞌãyaujã hʌ̃rʌʌcha hapiwia,
hĩchab chi Pörkꞌanaa hõor peerdʌajem kꞌapijimgui hajim hanʌm,
magbaawai hi gaaimua Israel durram kꞌʌʌnau hamach kꞌaibag hãsie hewag kꞌĩirjuwia Hẽwandamag chugpaapi jëeubaawai hirig warre mag kꞌaibag chugpaapʌ̈imkꞌĩir.
32 Mag pãrau hi meerpꞌë tꞌõotarr maach daúa hootarr haawaita marau chadcha tꞌum kꞌapꞌʌ jaau nʌmgui hajim hanʌm.
Mag nʌm dʌ̈i Hẽwandamau hich Hakꞌaarta har hich hipierraam kꞌʌʌnag deejeewai,
marau jaau nʌmʌn,
hich hag Hẽwandam Hakꞌarau maachig jajaaukꞌamta jaau nʌmgui hajim hanʌm.
33 Mamʌ chi pꞌadnaan pöröu haig narr kꞌʌʌn dʌ̈imua mag hũrbaawai meeukꞌa pꞌöbaadëwi warag ham kꞌëchpʌ̈imjã kꞌõsi hapꞌöbaadëjim haajem.
34 Mag chi tꞌierrnaan hapꞌa biirdʌ tꞌʌnʌm hee woun hãb Gamaliel ha tꞌʌ̃r sim sĩejim haajem,
Hẽwandamau Moiseeg hich hiek pꞌãpitarr hiek hajapcha hʌʌrkꞌaajem kꞌʌʌn heem.
Mag woun hĩchab Hẽwandam hiek jawaag chi mach hajim haajem.
Maagwai pꞌöbörpien tꞌumaam kꞌʌʌnaujã hĩchab hi hökꞌö haajeejim haajem.
Mag wounau chi Jesuu hich hi jaaumkꞌĩir jʌr hautarr kꞌʌʌn kꞌũchpai dawag pꞌë harrpi jaaujim hanʌm,
magʌmich hamach hap hiyʌ̈ʌ haag.
35 Maimua mag daau paaukꞌabaadee hich kꞌapeen hichjö chi tꞌetꞌem kꞌʌʌnag,
—Keena hajim hanʌm,
pãrau jãkꞌʌʌn wounaan dʌ̈i nem kꞌaigba haju hẽkꞌa nʌm kꞌai,
hajapꞌa kꞌĩirjunaata nem waubat hajim hanʌm.
36 Pãrau kꞌapꞌʌ nʌm,
har na woun Teudas hanarr hagjö jãg nʌrrarr.
Hich hiiupain,
woun tꞌetꞌem ha jaau nʌrrajimgui hajim hanʌm,
hich higwia.
Magbaawai hõor pöm cuatrocientojö hi dʌ̈i kꞌapeerkꞌajierram.
Mamʌ wërbʌ nʌm hee warm kꞌʌʌnau juau tꞌõobapäaiwai mag hi dʌ̈i wënʌrrarr kꞌʌʌn tꞌum sĩi haaidʌwia tagjã habajierramgui hajim hanʌm.
37 Magtarr kꞌur hõor kꞌapanag kꞌap haag hõor tꞌʌ̃r pꞌãkꞌa nʌm jaarjã,
Judas chi Galileapierr hagjö haadëwi pꞌöbörpien pöm hichig paa haujimgui hajim hanʌm.
Mamʌ mag nʌrrawia hagjö tꞌõobpäaiwai tꞌum hi dʌ̈i wënʌrraajerr kꞌʌʌn sĩi haaidʌjierramgui hajim hanʌm chi Gamalielau.
38 Magnaa hamag,
Mʌchdëu mag hootarr haawai,
hidëu jãg Jesús hiek jaau wënʌrrʌm kꞌʌʌn kꞌajapꞌa sĩubat ha chirʌmgui hajim hanʌm.
Cha hamau nem waunaa jaau wënʌrrʌmjã sĩi hamach kꞌĩirjug heemuapai kꞌai,
magan hich jãgpai wënʌrrawia deeu hũrnaa haadëjugui hajim hanʌm.
39 Mamʌ hich Hẽwandamauta hamag chadcha hich hiek mag jaaupi sim kꞌai,
pãrau ham kꞌëchpʌ̈iwiajã,
hoob magʌm hiek tag bʌ̃ʌrjã hũrba hich mag sĩsiju hamiet hajim hanʌm.
Hajapꞌa kꞌĩirjunaata nem waubat,
heeu pãach Hẽwandam dʌ̈i hiekkꞌõr jʌr nʌm kꞌãijã pãrau kꞌaugba naadukꞌam hajim hanaabá jũrr hamag chi Gamalielau.
40 Magbaawai chadcha Gamalielau jaau sĩerrjö hajierram haajem.
Maimua chadcha Pedro Juan dʌ̈i daaugajãr narr deeu hierrag tꞌʌ̃rkꞌa hauwia,
wʌkꞌanaa,
tag hamag bʌ̃ʌrjã Jesús higwia nem jaaupiba jaaujierram haajem.
Mag wʌkꞌanaan chadau ham wëtamkꞌĩir pʌapʌ̈ijierram haajem.
41 Mag Jesús hiek jaau wënʌrrʌm gaaimuata mag hamach wʌ tꞌʌnʌʌubarmjã,
hökꞌĩirjugjã chukꞌu,
warag haigmua honee hërëubaadëjim haajem,
mag Jesús gaaimua hamach hapꞌʌʌ hamkꞌĩirta Hẽwandamau hamach jʌr hatꞌamjã kꞌapꞌʌ narr haawai.
42 Maimua mag hërëuwia hed hëepierr hõrag jaau wënʌrrʌmua,
“Jesuuta chadcha hich Hẽwandamaucha jʌr hauwia maach peerdʌ haumkꞌĩir pʌ̈itarraugui” haajeejim haajem.
Hich mag hiek Haai hi jëeujem degjã jaaunaa sĩi dipierrjã hich mag jaau wënʌrraajeejim haajem.