Hamach juag hoomkꞌĩir hemkꞌooin hapꞌa siete jʌr hautarr
6
Mag jaar hĩchab chi hʌ̈kꞌa durrum kꞌʌʌnjã warag kꞌapan paaukꞌamatarr haawai griegonaanau hebreonaan hëugar hiekkꞌõr waupꞌöbaadëjim haajem,
hed hëepierr kꞌoopaa hʌʌinag nem jig nʌm haig griegonaanau hoowai ham meeun hʌʌinag hebreonaa hʌʌinag dee nʌmjö deeba narr gaaimua.
2 Magbaawai mag doce hich Jesuucha jʌr hautarr kꞌʌʌnau Hẽwandam hiek hʌ̈kꞌa durrum kꞌʌʌn tꞌum tꞌʌ̃rkꞌanaa hamag magjierram haajem:
—Keena hajierram hanʌm,
hõrag tꞌach jigam kꞌõchgaupai chan pöd marau mʌg maachdëu Hẽwandam hiek jaau wënʌrrʌm tag jaauba sĩi werba sĩuju kꞌaba nʌmgui hajierram hanʌm.
3 Maimua hamachdëupai,
Kꞌodamnaan,
har mʌig pãach hee hõor hagpierraanaa chikꞌamnau ham hëugar bʌ̃ʌrjã kꞌaigba jaau nʌm hũrba haajem kꞌʌʌn hemkꞌooin hapꞌa siete jʌr hatꞌat hajierram hanʌm,
har pãachdëu hoowai hamach gaai Hẽwandam Hakꞌaar pꞌẽs paraanaa hĩchab kꞌĩirjugdamjã kꞌapꞌʌm kꞌʌʌn.
Magbaawai makꞌʌʌnag jũrr marau mʌg pꞌidag jaau pʌajugui hajierram haajem,
4 mag hamag jaau pʌabajeewai marau jũrr hich jãg Hẽwandamag jëeu durrumua hãba hi hiek jaau nʌm gaaipai nʌisieg.
5 Hamau mag hiekꞌabarm hĩchab warm kꞌʌʌn kꞌapan haig tꞌʌnarr kꞌʌʌnaujã tꞌumaam kꞌʌʌnau jʌ̃gaagaa hũrjierram haajem.
Magbaawai woun hãb Esteban ha tꞌʌ̃r sĩerr jʌr haujierram haajem.
Mag wounau Hẽwandam Hakꞌaar hich gaai pꞌẽsnaa nem waauwaijã hãba Hẽwandam gaaipai kꞌĩirjunaata waaujeejim haajem.
Mag tag hi dʌ̈i hãba jʌr hautarr kꞌʌʌn tꞌʌ̃r mʌkꞌʌʌn hajim haajem:
Felipe,
Prócoro,
Nicanor,
Timón,
Parmenas maimua Nicolás.
Chamʌg Nicolás hanʌm deeum durram pꞌöbör Antioquía hanʌm hee tꞌaabatarrta Jesús hiek hʌ̈kꞌaju nawe judionaan higar tꞌeerbawi sĩejim haajem.
6 Makꞌʌʌn siete jʌr hauwia,
Jesuu hich hi jaaumkꞌĩir jʌr hautarr kꞌʌʌn haar pꞌë harrwi,
“Cha nʌm pãrau hõor jʌr haupitarr” hajierram haajem hamag.
Magbaawai chi Jesuu jʌr hautarr kꞌʌʌnau ham hʌ̃r jua hausĩunaa,
ham dʌ̈i hãba Hẽwandamag jëeuwia,
warre hamach pꞌidkꞌaju pꞌidag jaaujierram haajem.
7 Magtarr haigmua warag Hẽwandam hiek haaidʌmam dʌ̈i hĩchab chi hʌ̈kꞌa durrum kꞌʌʌnjã Jerusalén pꞌöbör hee waragta kꞌapaana paaukꞌamajim haajem.
Mag hamau jaau durrum hũrwia judionaan heem pꞌadnaanjã kꞌapan hĩchab Hẽwandam hiek gar tꞌeerbagkꞌa majierram haajem.
Esteban pʌr hautarr
8 Mag woun Esteban hanʌmua nem waauwai hich Hẽwandamauta nem tꞌum hʌ̈uu höbeerpipi haajeejim haajem.
Mag simua Hẽwandam jua tꞌeeg hich gaai wai sĩerr haawai hich Hẽwandamaujã hirig hõor hee hag na bʌ̃ʌrjã nem hooba haajempa waupimaajeejim haajem hĩchab.
9 Hirua mag nem wau nʌrrʌm hoowia,
judionaan Hẽwandam hiek jaaujem di “Chi peerdʌm kꞌʌʌn dën” ha tꞌʌ̃ʌrjerr heem kꞌʌʌn bëewi,
chi Esteban dʌ̈i bëbë kꞌabaichëjierram haajem.
Magpꞌöbaadëm hee warag ham haig bëe tꞌʌnʌisijim haajem:
Cirenepien,
Alejandríapien,
maimua hĩchab Ciliciapien dʌ̈i Asia durram kꞌʌʌnpa.
Mag bëewia dʌ̈i warm kꞌʌʌn higar ham hipierr hiekꞌa pꞌöbaadëjim haajem.
10 Mamʌ Esteban hiekꞌamam hich Hẽwandam Hakꞌarauta hiekꞌapi sĩerr haawai mag kꞌapan tꞌʌnaajieb mamʌ,
pöd hi dʌ̈i barba haajeejim haajem,
kꞌĩirjug kꞌapꞌʌ hiekꞌaag.
11 Mag hamachdëu hi dʌ̈i pödba habaawai hõrag pꞌagjierram haajem,
makꞌʌʌnau sëukꞌa hi hëugar jaaumamua chadamjö,
“Jãg wounaun chadcha maach jöoi Moisés higwia hiek kꞌaigba hiekꞌanaa Hẽwandam higwiajã hagjö kꞌaigba hiekꞌa sim marau hũrjimgui” ha jaaumkꞌĩir.
12 Magtarr haawai chadcha makꞌʌʌnaujã ham hipierr mag sëukꞌa nem hĩgkꞌabarm gaaimua waa hõor pꞌogueupʌ̈i.
Magbaawai judionaan Asamblea heem jöoinau Moisés hiek pꞌã pʌatarr jawaag chi machnaan dʌ̈imua Esteban pʌrpꞌöbaadëwi hamach pörnaan haar hatꞌaadëjierram haajem.
13 Magnaa hĩchab mam pawiajã waa sëukꞌa hi kꞌĩir hamach daúa mag nʌrrʌm hootarrjö jaaumkꞌĩir hõor jʌr hauwi wawikꞌa sĩujierram haajem.
Mag ya ham dën wawikꞌa wai narr haawai waa makꞌʌʌnau chadcha chi tꞌetꞌem kꞌʌʌn haar wëtwi hamachig jaautarrjö,
—Chamʌg wounau mʌg Haai hi jëeujem di higwia kꞌaigbata hiekꞌanaa Moiseeu Hẽwandam hiek pꞌã pʌatarr higwiajã pʌaba hich mag hiekꞌa nʌrraajemgui haimajierram haajem.
14 Hi hiek mag Jesús Nazaretpierrauta mʌg Haai hi jëeujem di magreupʌ̈iwia maach jöoin hi warrgarwe Moiseeu pꞌã pʌatarrjã mag warre deeumʌg paapʌ̈iju haajem hajierram hanʌm.
15 Ham hiek mag ham hijẽjẽbkꞌam hee chi tꞌetꞌemnaanau tꞌum haig narr kꞌʌʌn dʌ̈imua Esteban kꞌĩir hoowai sĩi Hẽwandam chog hʌ̃gtꞌarmua bëetarr kꞌĩir hajaugjöta hajappꞌa kꞌitajim hanaabá.