Pedro Juan dʌ̈i chi tꞌetꞌemnaan na
4
Pedroou Juan dʌ̈imua hagtꞌa hõor pöm mag wëjömʌg hijẽjẽbkꞌam hee,
ham haig pꞌadnaan bëejierram haajem,
Haai hi jëeujem di tꞌʌajem kꞌʌʌn pör dʌ̈i saduceonaanpa.
Mag saduceonaanau jaauwai,
maach meewai maach hakꞌaar hiiuba haajem haajem.
2 Mag bëewi makꞌʌʌnau ham dʌ̈i meeukꞌabaichëjierram haajem,
Pedroou Juan dʌ̈imua jãg Jesús hiiu pꞌiidʌtarrjöta maachin tꞌum hiiu pꞌiidʌtkꞌaju ha jaau nʌm hũrchëwia.
3 Mag warag ham pʌrkꞌa hauwia cárcel deg pꞌë harrjierram haajem.
Mamʌ ya kꞌeeuraa pam heeta mag pʌrkꞌa deetꞌurtarr haawai hich mam hãspagkꞌajierram haajem.
4 Mamʌ mag hamach pʌrkꞌa harrju nawe jaau durrarrdam hõor pöm mag tꞌʌnarr kꞌʌʌnau hũrtarr haawai hĩchab chi hʌ̈kꞌa narr kꞌʌʌn kꞌapanag hemkꞌooin happai cinco miljö naajim haajem,
hʌʌin dʌ̈i chaainjã beerba.
5 Maimua hag noram hãspaau chadcha Jerusalén pꞌöbör hee hãba podpajierram haajem:
Judionaan pörkꞌa nʌm kꞌʌʌn,
Hẽwandamag jëeujem degam kꞌʌʌn jöoin,
maimua Hẽwandam hi jawaag chi machnaanpa,
tꞌum hãba.
6 Mag tag naajim haajem:
pꞌadnaan tꞌumaam kꞌʌʌn pör Anás hanʌm,
Caifás,
Juan,
Alejandro,
maimua hĩchab mag pꞌadnaan pörkꞌa nʌm kꞌʌʌn kꞌodnaanjã hagjö.
7 Maimua Pedro Juan dʌ̈i cárcel deg narr pꞌë hawaan mamkꞌĩir hawi hõor pʌ̈ijierram haajem.
Mag pʌ̈iwi pꞌë hau pierrwai hamach jãrrcha dʌnʌʌutkꞌapinaa,
—¿Kꞌaíu jãg pãar jua tꞌeeg hapijĩ ha jëeujierram haajem hamag,
jãg woun bʌ̈ hãkꞌãraa sĩerr monaaupäaig?
8 Magbaawai Pedroou Hẽwandam Hakꞌaar hich gaai pꞌẽs wai sĩerr haawai hamag magjim hanʌm:
—Keena,
pãar har mʌg pꞌöbör hee chi pörkꞌa nʌm kꞌʌʌn maimua hĩchab mʌg Israel durr Hẽwandamag jëeujem degam jöoin,
mʌ hiek hũrbat,
mua pãrag magkꞌimgui hajim hanʌm.
9 Har woun hãb mʌig bʌ̈ hãkꞌãraa kꞌitarr monaautarrta pãrau marag jëeu naabma,
jãgata marau hi monaaupʌ̈ijĩ ha kꞌap haag.
10 Mʌg Israel durr hee tꞌumaam kꞌʌʌnau kꞌakꞌapdö hamkꞌĩir,
mua pãrag jaaupʌ̈ikꞌimgui hajim hanʌm.
Jãan mʌgta hajimgui hajim hanʌm.
Chadcha Jesús Nazaretpierr jua tꞌeegauta mʌg woun cha pãrau monakꞌa hoo nʌmʌn monaau sĩsim.
Hich hag Jesús kꞌabajieb hajim hanʌm,
har pãrau pakuls gaai meerpꞌë tꞌõotarr.
Mamʌ Hẽwandamau deeu hi pꞌiriu haujimgui hajim hanʌm.
11 Magtarr Jesús higwi kꞌabahab,
har Hẽwandam hiek pꞌã sim gaai “Di hëu narr kꞌʌʌnau hisegtarr dibigta jũrr chi di hãd jãrramkꞌa sĩsim” ha jaau sim.
12 Magtarr haawai deeum woun mʌg jẽb gaai maach peerdʌju hayaam chan tag chukꞌumgui hajim hanʌm.
Mag Hẽwandamau maach peerdʌ haumkꞌĩir deeum kꞌʌʌnagjã jaauba harr haawai hãba hich Jesuupai kꞌabam chan pöd hõor hamach pekau heemua peerdʌbamgui hajim haajem Pedroou.
13 Hamachdëu mag Pedro Juan dʌ̈i bʌ̃ʌrjã nem hökag chukꞌu mag hiekꞌa nʌm hũrwia jʌ̃gderraa naajim haajem,
mag estudio pömjã kꞌaba sĩsidʌmta mag hiekꞌa nʌm hũrwia.
Mamʌ hamach wir haigpai,
“Jãkꞌʌʌn jãg nʌmʌn,
jãan Jesús dʌ̈i wënʌrraajerr haawaita jãg hiekꞌa nʌmgui” haajeejim hanʌm.
14 Mag nʌm dʌ̈i hamachdëu hoowai chi woun monaau sĩsierrjã hĩchab ham bigaau hoo dʌnarr haawai pöd jãan sëukꞌaawaita mag nʌm hajujã kꞌaba haajeejim hanaabá.
15 Mag hoobaawai hamach Asamblea heemua chi Pedro Juan dʌ̈i jöpcha dawag jʌrkꞌʌʌipʌ̈iwia hamach happai hiyʌ̈ʌ nʌmua,
16 —Keena,
¿mʌkꞌʌʌn wounaan dʌ̈i maadëu jãga hajuuta jãg nʌma?
haajeejim hanʌm.
Mʌg hõor monaau nʌm hooba haajem chadcha.
Hamau jãgtarr Jerusalén pꞌöbör hee tꞌumaam kꞌʌʌnau kꞌakꞌapdö tꞌʌnʌm,
pöd maadëu “Jãan sëukꞌaawaita jãg tꞌʌnʌm” haju kꞌaba nʌmgui hajim hanʌm.
17 Mamʌ cha hamachdëu jãg Jesús higwia jaau nʌm tag jaaupimaaugau,
maadëu ham hajap dakꞌãunaa tag magʌm hiek jaaupiba jaaujugui hajierram haajem,
mag jaau wënʌrrʌmua warag hõor hee mag hiek haaidʌpimaaugau.
18 Maimua mag kꞌĩirju hauwia,
deeu hamach haig tꞌʌ̃rkꞌa haunaa,
chadcha hamag tag bʌ̃ʌrjã Jesús higwia nem jaaupiba jaaujierram haajem.
19 Mamʌ hamachig magbaawai Pedroou Juan dʌ̈imua jũrr hamag,
—Pãrau kꞌĩirjuawai,
¿jãga hajapcha sĩ hajierram hanʌm,
Hẽwandam dau na?
¿Hẽwandamau nem jaau sim hipierraa haju kꞌãyau pãrau nem jaau nʌmta marau hʌ̃rcha hipierraa haju haai nʌwi?
hajierram hanʌm.
20 Marau maach daúa hoonaa maach jʌ̃gʌucha hũrtarr chan pöd sĩi hich jãg jaauba sĩuju haai kꞌaba nʌmgui hajierram haajem Pedroou Juan dʌ̈imua.
21 Magbaawai chi tꞌetꞌem kꞌʌʌnau sĩi ham hajap dakꞌãunaa chig haba pʌapʌ̈ijierram haajem,
hõor pöm tꞌʌnʌmuajã warag ham kõit hiekꞌamjö Hẽwandamta tꞌö hiekꞌa nʌrrjëe tꞌʌnarr haawai.
Mag bʌ̈ hãkꞌãraa kꞌitarr monaautarr paar,
tꞌumaam kꞌʌʌnau Hẽwandamag,
“Hẽwandam,
pʌjöm chan mʌg jẽb gaai chukꞌumgui” hanaajim haajem hirig.
22 Mag chi bʌ̈ hãkꞌãraa kꞌitarr Hẽwandam jua tꞌeegau monaauwai cuarenta años hatcha sĩejim haajem.
Chi hʌ̈kꞌa durrarr kꞌʌʌnau Hẽwandamag juapá jëeutarr
23 Mag hamach chig haba höbeerbapäaiwai hamach kꞌapeen nʌm haar wëtwia jaauwimajierram haajem,
tꞌum pꞌadnaan chi pörkꞌa nʌm kꞌʌʌnau judionaan Asamblea hee hagjö chi pörkꞌa nʌm kꞌʌʌn dʌ̈imua hamach dakꞌãu hiekꞌatarr.
24 Chi di garm kꞌʌʌnau mag hũrpꞌöbaadeewai hihãba Hẽwandamag jëeu nʌmua magjierram haajem:
—Hẽwandam,
pʌʌta maar Pöröugui hajierram hanʌm.
Pʌchdëuta mʌg jẽb wauwi,
mʌg pꞌũasjã waunaa hag hee nem sĩsidʌmjã hompaajim,
hedjãpa.
25 Warrgar maach dau nawe pʌch Hakꞌarau pʌch chog David kꞌararrag hiekꞌapibaawai,
hirua pʌ dʌ̈i kꞌĩircha hiekꞌa simjö pʌrʌg,
“¿Kꞌan jãgwi jãg durrpierr hõor meeukꞌapꞌöo tꞌʌnʌ́,
maimua par jãg maadëu nem higmapꞌamta wauju kꞌĩirju sĩsidʌ́?”
hajim hanʌm.
26 “Mʌg durr gaai chi pörkꞌa nʌm kꞌʌʌn tꞌum hãba hiek deewi jũrr pʌ dʌ̈i wërbʌagjöta kꞌĩir kꞌaugpꞌöbaadëpꞌʌmgui” hajim hanʌm,
“sĩi warag maar Pör chi Mesías pʌchdëucha jʌr hautarr hichaau ham kꞌõchgau.” (Sal 2:1-2)
27 ’Hẽwandam,
magtarr haawai chadcha David kꞌararrau jaautarrjö hich mʌg pꞌöbör heeta hãba biirdʌjim:
Herodes,
Poncio Pilato,
hich mʌg Israelpien dʌ̈i deeum durram kꞌʌʌnpa;
mag hãba biirdʌnaa maach Pör Jesús bʌ̃ʌrjã pekau chukꞌu kꞌitʌm pʌchdëu jʌr hautarr kꞌaibag wawaag.
28 Magta chadcha warrgarwe pʌchdëu jaauwai mag hi dau hapꞌʌʌ haju ha jaautarrjö,
tꞌum hag hee höbërjimgui hajierram hanʌm Hẽwandamag jëeumamua.
29 Mag hirig jëeumamua,
Pua kꞌapꞌʌ chirʌmgui hajierram hanʌm,
maar mʌg pʌch hi jaaumkꞌĩir pʌchdëucha chogtarr kꞌʌʌn dakꞌãu wai nʌm.
Maar pʌ chognaanau.
Pua warag maar kꞌupꞌĩi hapibá,
högkꞌaba pʌch hiek jaau wënʌrraag ha jëeumajierram haajem.
30 Mor masim kꞌʌʌnjã monaaunaa pʌch Chaai pekau chukꞌu kꞌitʌm Jesús hag jua tꞌeegau nem maadëu hooba haajempa marag waupibá,
magʌm gaaimua hõrag pʌch jua tꞌeeg hoomkꞌĩir ha jëeumajierram haajem.
31 Maimua ya hamau mag Hẽwandamag jëeu höbaadëm hee,
hich Hẽwandamaupai ham narr di sĩi sõsõi hatꞌajim hanʌm.
Mag di sõsõi hatꞌam dʌ̈i Hẽwandam Hakꞌaar ham gaai pꞌẽs haicheewai magtarr haigmua hatagta warag bʌ̃ʌrjã högkꞌaba,
hich mag Hẽwandam hiek jaau nʌisijim haajem.
Nem tꞌʌnʌm chan hãbpaim dën kꞌabajim
32 Mag kꞌapan Hẽwandam hiek hʌ̈kꞌa tꞌʌnarr kꞌʌʌnan kꞌĩirjug hãbanaa hĩchab hö hãbata naajeejim haajem.
Hãbmuajã hich nem wai sim,
“Mʌch hatꞌeepaiujã” haba,
hante magju kꞌãyau,
“Nem tꞌum tꞌʌnʌmʌn maach tꞌumaam kꞌʌʌn dënëugui” haajeejim hanaabá.
33 Mag nʌm hee,
ham hiek warag hamach chi Jesuucha hich hiek jaaumkꞌĩir doce jʌr hautarr kꞌʌʌnaujã maach Pör Jesús hiiu pꞌiidʌtarr hiekta warag hiek kꞌẽgkꞌa jaaupꞌöbaadëjim haajem.
Maimua hich mag jaau wënʌrrʌm jaarjã Hẽwandamau tꞌumaam kꞌʌʌnag ham dʌ̈i hajapꞌa hapiejeejim hanaabá.
34 Ham hiek mag tꞌum jẽb wai narr kꞌʌʌnaujã hamach jẽb përpʌ̈inaa,
di numí wa numí hatcha kꞌãijã paraa harr kꞌʌʌnaujã warag hamach di përpʌ̈inaa,
chi pꞌatkꞌon Jesuu jʌr hautarr kꞌʌʌn haig jigamkꞌĩir haibeejerr haawai,
ham hee hatcha dau hapꞌʌʌ hichdëu nem hig simjã chukꞌum woun chan chukꞌu hajim haajem.
35 Mag haipierrwai chadcha hamau hagdaujöo chi chukꞌu durrum kꞌʌʌnag jigpäaijeejim haajem.
36 Cha jaau nʌmjö,
woun hãb sĩejim haajem,
Levinaan heem José ha tꞌʌ̃r sĩerr,
Chipre pꞌʌram gaai tꞌaabatarr.
Mag woun hibʌʌr wauwia Bernabé ha tꞌʌ̃r wai naajim haajem hich Jesuucha doce jʌr hautarr kꞌʌʌnau.
Bernabé haawai maach meúan “Hökꞌĩirjug meeupiejem” ha simʌu.
37 Mag wounaujã hich jẽb wai sĩerr përpʌ̈iwia,
chi pꞌatkꞌon haibëewi,
Hẽwandam hi jaaumkꞌĩir doce jʌr hautarr kꞌʌʌnag deechëjim haajem,
hagjö jigpʌ̈imkꞌĩir.