Jesuu hich kꞌapeen kõit Hẽwandamag jëeutarr
17
Maimua mag jaau dichwia hʌ̃gtꞌaag heerpanaa hich Hayag magjim:
“Tata,
ya hag hora pabaadëm.
Mʌg pʌch hipierraa chirʌm gaaimua chadcha pʌch Hiewaakꞌa chirʌm hõrag kꞌapꞌʌ hapibá hajim,
magbaawai muajã hĩchab pʌchta hamag tꞌö hiekꞌapieg.
2 Mʌ pʌch Hiewaa haawai pʌchdëuta mʌrʌg mʌg durr gaai tꞌumaam kꞌʌʌn kꞌãaijã hiek tꞌeeg hʌ̃rpai hapinaa,
pʌchdëu mʌch hiek hʌ̈kꞌapimam kꞌʌʌnjã hĩchab mʌch dʌ̈i hich mag wënʌrraju haai hapieg hʌ̈u pua mʌrʌg pʌch jua tꞌeegjã deejimgui hajim.
Jesús ora por sus seguidores (Juan 17.1-26)
3 Mag ham hich mag mʌ dʌ̈i wënʌrraagan,
hamau pʌjã kꞌapꞌʌnaa mʌjã kꞌapꞌʌ haju haai nʌmgui hajim:
hãba pʌʌta Hẽwandam charau,
maagwai mʌ Jesucristo,
pʌchdëu pʌ̈itarr.
4 ’Pua mʌchig pꞌidag deetarr tꞌum mʌg jẽb gaai waubarmua mua hõrag kꞌapꞌʌ hapibarmgui hajim,
pʌʌta chadcha Hẽwandam chi jua tꞌierriu.
5 Nau mʌgtarr kꞌur deeu mʌ pʌch haar pabaimaawai,
warr mʌg durr hompaaju nawe mʌchta pʌch dʌ̈i hãba nem hiek tꞌeeg chi Pörkꞌa chirarrjö,
hũwaai mʌrʌg hagjö hiek tꞌeeg hapinaa chi Pörkꞌapibá ha jëeumajim hich kõitpai.
6 Maimua jũrr maar kõit hich mag Hẽwandamag jëeumamua magjim: ’
Sĩi mʌg durr gaai parhooba tꞌʌnʌm kꞌʌʌn heemua pʌchdëucha jʌr hauwia pʌch hiek hʌ̈kꞌapi hautarr kꞌʌʌnagan ya mua jaaujimgui hajim,
pʌ jãga sĩerrʌ́.
Warrgarwe pʌch dënkꞌa hauju harr kꞌʌʌn haawai pua mʌrʌg deejimgui hajim,
mʌ dʌ̈i mʌg hogdʌba wënʌrramkꞌĩir.
Pua mʌrʌg hamag jaaupitarr mua jaauwi,
hʌ̈kꞌawi,
hĩsin hʌ̈u pʌchdëu kꞌõsimjöta wënʌrrʌmgui hajim,
maar higwia.
7 Ya hĩsin hamau kꞌapꞌʌ nʌmgui hajim,
nem tꞌum mua waunaa jaaujerr pʌchdëu mʌchig jaaumampierr mua wau chitarr.
8 Pua jaaupitarr hiek ya mua hamag jaaujim;
mag jaaubaawai hamachdëujã hʌ̈kꞌam kꞌõsi hʌ̈kꞌajierramgui hajim.
Magnaa hich Hayag maar kõit hiekꞌamamua,
Ya hamau hʌ̈kꞌa nʌmgui hajim,
chadcha pʌ haarmuata mʌ bëejim,
pʌchdëu mʌ pʌ̈iwia.
9 Mag hiekꞌakꞌagmamua warag, ’
Tata,
mʌg mʌch dʌ̈i durrum kꞌʌʌn kõitta muan pʌrʌg jëeu chirʌmgui hajim.
Mua chan sĩi mʌg durr gaai sĩi mʌch hiekjã hʌ̈kꞌaba nʌm kꞌʌʌn kõit jëeuba,
pʌchdëu mʌrʌg deewia pʌch hiek hʌ̈kꞌapi hautarr kꞌʌʌn kõitta jëeu chirʌmgui hajim,
hamjã hĩchab pʌ dënkꞌa durraawai.
10 Pua kꞌapꞌʌ chirʌmgui hajim,
mʌ hõor tꞌum pʌ dënkꞌa tꞌʌnʌm;
maagwai tꞌum pʌ hõorkꞌa tꞌʌnʌm kꞌʌʌnjã mʌ dënkꞌa tꞌʌnʌm.
Maguata hamau pua kꞌõsimjö wënʌrrʌm gaaimua,
pʌ tꞌö hiekꞌamam dʌ̈i mʌjã hõrau wajapꞌa tꞌö hiekꞌaajemgui hajim.
11 Magnaa, ’
Tata,
mʌ chan tag mʌg durr gaai chitabajugui hajim,
deeu pʌ dʌ̈i hãba chiraag hũwaai pʌ haar maagpaawai.
Pari mʌ kꞌapeen chan wëtba,
hich mʌig heegar nʌisijugui hajim,
maar higwia.
Maagwai pʌrʌgta ham kõit mua jëeu chirʌmgui hajim,
pʌchpaita tꞌumaam kꞌʌʌnau hee haju haai naawai.
Pʌch hiekꞌau pua ham chig hapiba,
pʌchdëu mʌrʌg deetarr jua tꞌeegau ham tꞌʌa wai chirsí hajim,
hich jãg maach numijã hö hãba nʌmjö hamjã hich mag hö hãba wënʌrramkꞌĩir.
12 Mʌg jẽb gaai mʌchta ham kꞌa hogdʌba chitaawain pua mʌrʌg jua tꞌeeg deetarrau mua ham chig hapiba tꞌʌa wai chitajimgui hajim,
magamkꞌĩirta pua hamag mʌ hiek hʌ̈kꞌapitarr haawai.
Mag ham tꞌʌa wai chitaawai hãbjã hokꞌooba,
hãba ya hag nawe chi hokꞌoom harr happaita hokꞌoobarmgui hajim.
Dau hãb jãgbarmʌn,
jãan pʌch hiek pꞌã sim gaai jaau simjö hich jãgju harr haawai hajimgui hajim,
Judas higwia.
13 Mag hich Hayag jëeumamua, ’
Tata,
mʌ hũwaai deeu pʌ haar mam,
pari mua mag ham kõit jëeu chirʌmgui hajim,
hamach dakꞌĩircha.
Mʌig hagtꞌa ham dʌ̈i heegar chirʌwe mag jëeu chirʌmgui hajim,
hamach jʌ̃gʌucha hũr naawai mʌch honee chirʌmjö hĩchab hamjã honee nʌisimkꞌĩir.
14 Pua hamag pʌch hiek jaaupitarr ya mua hamag jaauwia hʌ̈kꞌatarr haawai ya ham maach dënëugui hajim.
Mag gaaimua pʌ hiek hʌ̈kꞌaba nʌm kꞌʌʌnau jũrr ham kꞌa kꞌõchkꞌaba wai nʌmgui hajim,
tag hamach higar kꞌaba naawai.
15 Mua chan pʌrʌg,
mʌg durr gaaimua warre ham chawag pꞌë hatꞌaad haba,
muan sĩita pʌrʌg,
ham tꞌʌabá ha chirʌmgui hajim,
dösãtau ham kꞌũgurwia hamachdëu hʌ̈kꞌatarr hiekta deeu hisegam hugua.
16 Tata,
pua kꞌapꞌʌ simgui hajim,
mʌ mʌig heegarm kꞌaba chirʌm.
Magua mʌ kꞌapeenjã ya sĩi mʌig heegar parhoobam kꞌʌʌnjö kꞌaba tꞌʌnʌm,
ham mʌ dʌ̈ita wënʌrraawai.
17 Magua mua pʌrʌgta ham kõit jëeu chirʌmgui hajim,
pʌch hiek jaau nʌm pꞌidag gaaita ham pꞌë wai chitamkꞌĩir.
Magnaa,
Tata,
hãba pʌch hiekta chadam hiekꞌaugui hajim.
18 Hich jãg pʌch hiekta mʌg durr gayam kꞌʌʌnag jaaumkꞌĩir pʌchdëu mʌ pʌ̈itarrjö,
hich hagjö pʌch hiek hʌ̈kꞌaba tꞌʌnʌm kꞌʌʌnag hich hag hiek jaaumkꞌĩirta muajã jũrr ham pʌ̈i chirʌmgui hajim.
19 Mʌchdëu mag pʌrʌg pʌch hiek jaau nʌm pꞌidag gaaita ham pꞌë wai chitapi chirʌmʌn,
mʌg pʌ hipierraa ham kõit hʌdʌraa mʌch tꞌõopi chirʌm gaaimuata magpi chirʌmgui hajim,
magbaawai hamaujã mʌchdëu hamag jaaupi chirʌmjö chadcha pʌ hiekta jaau wënʌrramkꞌĩir.
20 ’Tata,
mua mʌg pʌrʌg jëeu chirʌm chan sĩi cha mʌch dʌ̈i wënʌrrʌm kꞌʌʌn kõitpai kꞌaba,
mʌg hatag hamau jaau wëtum hũrwia mʌch hiek hʌ̈kꞌaju kꞌʌʌn kõitpata pʌrʌg jëeu chirʌmgui hajim.
21 Tata,
jãg maach numijã hö hãba naajemjö,
hich hagjö hĩchab hamjã maach dʌ̈i hö hãbata pꞌë wai chitapim kꞌõsi chirʌmgui hajim.
Mag hamʌn magan bigaaum kꞌʌʌnaujã mag hoowia kꞌapꞌʌ haju,
puata mʌ pʌ̈ijim.
22 Pʌchdëu mʌ pʌ̈iwia mau heegar chirʌmjã hagtꞌa pʌch dʌ̈i hãba hʌ̃gtꞌar chirʌmjö hapitarrjö,
ya hamjã mua mʌch dʌ̈i hõor hãbpaimjöta pꞌë wai chitʌmgui hajim,
maachjö hö hãba hich mag naamkꞌĩir.
23 Magua,
mʌ ham dʌ̈i chirʌm haig,
pʌjã mʌ dʌ̈i sim,
mag nʌmua maach tꞌum hö hãba naag.
Maagwai pʌ hiek hʌ̈kꞌaba nʌm kꞌʌʌnaujã kꞌapꞌʌ haju,
puata chadcha mʌ pʌ̈ijim.
Mag gaaimua hĩchab kꞌapꞌʌ hajugui hajim,
hich jãg pʌchdëu mʌ kꞌõsi simjö hamjã pua kꞌõsi chirʌm.
24 Magnaa deeu hũwaai, ’
Tata,
mua kꞌapꞌʌ chirʌmgui hajim,
mʌ hũwaai pʌ haar chiraimaawai hich jãg warr mʌg jẽb hompaaju nawe pua chadcha mʌ kꞌõsi pʌch dʌ̈i hãba chi jua tꞌierrkꞌa wai chirarrjö deeu pua mʌrʌg hich hag jua tꞌeeg deeju.
Pari mag pʌ haar chiraimaawai mʌch kꞌapeenjã hĩchab mʌch chirʌm haigta mʌch dʌ̈i pꞌë wai chitam kꞌõsi chirʌmgui hajim,
mag jua tꞌeeg pua deeu mʌrʌg deebarm hamag hoomkꞌĩir.
25 Tata,
puata tꞌumaam kꞌʌʌn dʌ̈i chadcha nem hagcha waaujeewai pʌrʌgta jëeu chirʌmgui hajim.
Har pʌ hiek hʌ̈kꞌaba nʌm kꞌʌʌnau chan pʌ kꞌaugba nʌm,
mag hamachdëu hʌ̈kꞌaba nʌm gaaimua.
Pari hõor pöm sĩi pʌ kꞌaugba tꞌʌnʌm daar,
muan pʌ kꞌapꞌʌ chitʌm;
maagwai cha mʌ dʌ̈i durrum kꞌʌʌnaujã puata mʌ pʌ̈itarr kꞌapꞌʌ nʌmgui hajim hĩchab.
26 Ya mua hamag jaaujim,
pʌ jãga sĩerrʌ́.
Pari hichiita warag mua hamag hich jãg jaau chitajugui hajim,
hich jãg pʌchdëu mʌ daupii wai simjö hamaujã jũrr hagdaujö hamach kꞌapeen kꞌa kꞌõsi hamkꞌĩir.
Hamag magamkꞌĩran,
mʌchta ham dʌ̈i chitajugui” ha hiekꞌamajim hich Hayag maar kõit.