Jesús kꞌapeenau jua hʌ̃ʌijem hed trigo pꞌierrtarr
12
Hich mag jaar biek hãb jua hʌ̃i nʌm hedcha maach hi dʌ̈i wënʌrraajerr kꞌʌʌn tꞌum hi hiek jaautꞌurwia deeu hi dʌ̈i narr haawai,
hich Jesuu trigo pꞌur wëjöm hee maar pꞌë wai dichjim.
Magbaawai maar hee hãaur kꞌʌʌnau chi bich tꞌʌrrëunaa,
jua heepai sigtꞌʌnaa kꞌö wënʌrrajim.
2 Maig hĩchab fariseonaanjã dʌ̈i narr haawai mag hoowi hich Jesuugta,
—Pʌdë hoobá,
jua hʌ̃i nʌm hed haawai bʌ̃ʌrjã pꞌidkꞌaju kꞌaba nʌmta,
pʌ kꞌapeenau jãg trigo pꞌierrnaa kꞌö wënʌrrʌm.
¿Pua chan kꞌaugba hab,
jãgpai pꞌierr nʌmjã nem pöm heeu nʌm dʌ̈i hãba sim?
hajierram hirig.
3 Magbaawaita jũrr Jesuu hamag,
—Mamʌ ¿kꞌani mʌ kꞌapeenau kꞌaigba habar?
hajim.
¿Magan pãrau chan Hẽwandam hiek pꞌã sim gaai tꞌʌ̃ʌrwai hooba haajeeb,
Daviiu hich dʌ̈i wënʌrrarr kꞌʌʌn dʌ̈imua hamach jãsöo pꞌöbaadeewai Hẽwandam hatꞌeem pan kꞌötarr?
4 Mag pan parhoobam kꞌʌʌnau kꞌöju kꞌaba,
hãba pꞌadnaanaupaita kꞌöju haai naajim.
Mamʌ pãrau kꞌapꞌʌ nʌm,
jãga hirua Hẽwandamag jëeujem deg dubwi Hẽwandam hatꞌeem pan nasãd gaai pꞌë sĩerr hauwi kꞌöjĩ.
Mamʌ mag kꞌötarr paarjã Hẽwandamau hi chig habajim.
5 ¿Wa pãrau Moiseeu ley pꞌã pʌatarr gaai tꞌʌ̃ʌrwai hooba haajẽwa?
Jua hʌ̃ʌijem hed hawiajã pꞌadnaan Haai hi jëeujem deg pꞌidkꞌaawai pekau kꞌabam ha sim.
6 Mag Haai hi jëeujem deg pꞌidkꞌaju haai sim kꞌai,
¿jãgwi mʌ mag Haai hi jëeujem di kꞌãaijã hich Jöoiraucha pʌ̈itarrauta sabarhed hawi mʌch kꞌapeenag trigo pꞌierr kꞌöpi jaauju kꞌaba chirʌ́?
7 Wajapcharan jãg Hẽwandam hiek pꞌã sim gaai jaau sim pãrau kꞌaugbata naabahab,
Hẽwandamau hich hiek gaai “Nemchaain tꞌõonaa mʌrʌg jëeuwai hʌ̈u sĩeb mamʌ,
muan pãach kꞌapeenta hʌ̃rcha dau haug kꞌaug paraa hapim kꞌõsi chirʌm” ha sim.
Pãrau hirua mag sim wajapꞌa kꞌapꞌʌ naakꞌiin,
jãg hõor hiekkꞌõr chukꞌum kꞌʌʌndampa pãrau kꞌaigba nʌm ha jaaubajugui hajim.
8 Maimua ham jʌ̃gdaar mag hiekꞌapʌ̈iwia deeu hichdëupai, ’
Mʌʌn Hẽwandam Hiewaa Hemkꞌooirau.
Muata tꞌumaam kꞌʌʌnag kꞌan nemta wauju haai nʌ wa wauju kꞌaba nʌ ha jaauju haai chirʌmgui hajim,
jua hʌ̃ʌijem hed hawiajã.
Woun hãb jua jʌser kꞌitarr Jesuu monaaupʌ̈itarr
9 Mag trigodö hee fariseonaan dʌ̈i hijẽjẽb sĩewi petaau,
haigmua dakꞌa maach meeun Hẽwandam hiek jaaujem di sĩerr hee dubimajim.
10 Mag Haai hi jaaujem deg woun hãb jua jʌser kꞌitʌmjã sĩejim.
Hamach chi fariseonaanau Jesús hipeerdʌwi nem hagcha kꞌaba jaaubarm gaaimua hi himeraa pʌr hauju hẽkꞌaajerr haawai,
juau hogtꞌom hirig,
—¿Jua hʌ̃ʌijem hed hawiajã,
hõor mor masim kꞌʌʌn monaauju haai sĩ?
ha jëeujierram.
11 Magbaawai hichdëu hamag magjim:
—Pãar mʌg nʌm haig pãar ovejadam dau hãb kꞌãijã jẽbdeg buudimaawai,
¿kꞌaíuta jua hʌ̃ʌijem hed hawia jẽu hawaan maba haajẽ?
Mag sim,
¿pãrau hoowai maach wounaanta nemchaain kꞌãaijã hʌ̃rcha balee naabá?
hajim.
12 Mag sim haawai jua hʌ̃ʌijem hed hawiajã hichiita muan hõor dau haug kꞌaugju haai nʌm ha chirʌm hajim hamag.
13 Magnaa hich Jesuupai chi woun mag jua jʌser kꞌitarragta,
—Dayag jua hʌabá hajim.
Magbaa chadcha jua hʌabaa jua monakkꞌa warm chi wajapꞌa sĩerr dʌ̈i hãba sĩsijim.
14 Mamʌ jua hʌ̃ʌijem hedta magbarm hoobaawai,
haigmua höbëraau,
chi fariseonaanau Jesús tꞌõopʌ̈yaag jãga hakꞌiina ha kꞌĩirju nʌisijim hanaabá.
Jesús higwia warrgarwe jaautarr
15 Mag hich tꞌõopʌ̈iju kꞌĩirju pꞌöbaadëm hich Jesuu kꞌaug hatꞌaawai hichta warag haigmua petajim.
Mag hi petaawai hõor pöm dʌ̈i hi hẽudee wëtjim.
Jesuu mor masim kꞌʌʌn tꞌum hich haig waibëe nʌm monaaupʌ̈i maajeejim.
16 Mamʌ hichdëu mag hõor monaau simjã sĩi kꞌapanag hee parhooba hich jaaupiba haajeejim.
17 Pari magtarran,
Hẽwandam hi jaaumie jöoi Isaías kꞌararrau hich Jesús higwia jaautarrjö hamkꞌĩir hajim.
Chi Hẽwandam hiek gaai hi higwia mag sim:
18 “Hachá sim mʌ chog” ha sim Hẽwandamau,
“mʌchdëu jʌr hautarr mʌchdëu kꞌõsim.
Hi gaaimuata mʌ honee chirʌm.
Hi gaai,
mua mʌch Hakꞌaarta pꞌẽs deeju.
Magbaawai hirua jaauju,
jãga hõor mʌ dʌ̈i wënʌrraju haai nʌ.
19 Hí chan hõor dʌ̈ijã meeurraunaa kꞌĩesir hijẽjẽbjã haba,
ni kaaijã hee hõor dʌ̈i meeukꞌarrjã chukꞌu haju.
20 Mag hi pʌ̈ibarm chan hõor dau hapꞌʌʌ kꞌitꞌëem kꞌʌʌn warag dau haug waupiegjã kꞌaba,
ni hich hiek gaai hubʌ kꞌaba kꞌitꞌëem kꞌʌʌn hokꞌoopiegjã kꞌaba,
warag hich meebarm gaaimua hõor hʌ̈u peerdʌju hayaa hapiegta pʌ̈iju.
21 Magbaawai durrpierram kꞌʌʌnau hi higwia,
‘Jãguata chadcha hʌ̈u maach peerdʌ hauju kꞌabahab’ hajurau” ha sim Hẽwandamau hich hiek gaai. (Is 42:1-4)
Fariseonaan hiek meperauta Jesuug juapá dee sĩejim haajem
22 Biek hãb woun hãb dösãt bënëu sim Jesús haig haibëejierram.
Mag woun hich hag bënëu meu meraanaa daujã kꞌĩsu kꞌitajim.
Mag hich haig haipierrwai Jesuu hi dau monaaupʌ̈iwia mag meu meraa sĩerrjã wajapꞌa hiekꞌapijim.
23 Mag hoowi hõor dauderraa nʌm hiekꞌau hamach wir haigpai,
“¿Keena,
mʌg woun jöoi David kꞌararr chaain hewagam kꞌʌʌn heem maach peerdʌ haumkꞌĩir pʌ̈iju haajerr kꞌabam kꞌai?”
haajeejim,
Jesús higwia.
24 Pari hõordamau sĩi mag nʌm hũrbaawai fariseonaanau jũrr ham hichaaur,
—Dösãtnaan pör Beelzebú dʌ̈i bën dötarr haawaita hag juapaauta jãg hõor mor heem mepeenjã dau daau jʌrkꞌʌʌi nʌrrʌm haajeejim.
25 Pari hamau hamach heepai mag nʌmjã Jesuu kꞌapꞌʌ sĩerr haawai jũrr hich garmua hamag magjim:
—Pãrau hoowai,
gobiernoou hich higar nʌm kꞌʌʌn jãrrcha tꞌöonaa hamach wir haigpai wërbʌpikꞌiin,
¿mag gobierno warre kꞌʌt mabaju kꞌai?
Wa hãbmua kꞌãijã hich chaain dʌ̈ipai meeukꞌawi hamach wir haigpai wërbʌkꞌiin,
¿warag haaidʌbaju kꞌai?
26 Pãar hiek mag mʌjã dösãt dʌ̈ita chirʌm hanaawai,
dösãtauta wir haig dösãtpai jʌr wërpkꞌiin,
pöd hich mag jua tꞌeeg sĩerrabajugui hajim.
27 Chadcha mag dösãtnaan pör Beelzebuuta mʌrʌg hich jua tꞌeeg dee sim kꞌai,
magan har pãach higar tꞌʌnʌm kꞌʌʌnaujã hagjö hi juapaauta mepeen jʌr wërp nʌm.
Mag nʌmta ¿jãgwi pãrau makꞌʌʌnag chan bʌ̃ʌrjã magʌm haba nʌ?
¿Chadcha hich Hẽwandamauta hamag magamkꞌĩir hich juapá dee sim pãachdëu kꞌapꞌʌ naawai kꞌabá?
Pãar hiek mag chi dösãtaupaita wir haig hich kꞌaibag waaujem hanʌpí,
magan jãg chi mʌ dënjö dau daau mepeen jʌr wërp nʌm kꞌʌʌnagchata jëeu hoobat,
daau hamau chadcha dösãt juapaauta jãg jʌr wërp nʌm habarju.
Pãach chi mʌrʌg mag hiekꞌa nʌm kꞌʌʌnta hag heyaajã kꞌaba hiekꞌa naabahab.
28 Muan chadcha Hẽwandam jua tꞌeegauta mepeenjã jãg jʌr wërp chitʌmgui hajim.
Mag mepeen mua jʌr wërp chirʌm gaaimua pãrau kꞌapꞌʌ haju haai nʌm,
ya hich Hẽwandam chi jua tꞌierrta mʌig pãar hee sĩeichëm.
Mamʌ magʌmjã pãrau kꞌaugba nʌmgui hajim.
29 ’Pãadë kꞌĩirjubat.
Ni hãbmuajã mʌg nʌm haig sĩi hãb jierrnem wajapꞌam dʌ̈i hich di tꞌʌa sim haig dubwi hi nem jĩgkꞌabaju.
Sĩi kꞌapanaam kꞌʌʌnau wa hi kꞌãai hʌ̃rʌʌcharamua hi hibʌʌr hauwi kꞌabam chan,
pöd hi nem jĩgkꞌabamgui hajim.
Hich hagjöta simgui hajim mepeerjã.
Mʌ hi kꞌãai jua tꞌeeg hʌ̃r kꞌaba chirakꞌiin,
muajã pöd hõor mor heem mepeen jãg dau daau jʌr wërpbaju.
Mamʌ mua chadcha Hẽwandam juapaauta mʌg nem wau chitaawai meperaujã mʌ jua jʌmba haajem.
30 Magua,
mua mag chirʌm:
Har chi mʌ higar kꞌaba sim wounan hichta dösãt higar sim;
maimua Hẽwandam hiek hʌ̈kꞌapi hawaag mʌ hipierr hõor hãbamʌg jʌr pꞌëba simuan waragta jʌr wërp simjö simgui hajim.
31 ’Magua,
mua mag chirabma hajim hich Jesuupai:
Hẽwandamaun chadcha hõor kꞌaibag tꞌumaa chugpaaju,
ham parhoob hiekꞌamatarrpa tꞌum.
Mamʌ pekau hãb sim,
maan mua Hẽwandam Hakꞌaar jua tꞌeegau nem wau chitʌm hoo nʌmta warag mepeer gaai tꞌʌ nʌmʌu.
Mag pekau chan Hẽwandamau bʌ̃ʌrjã kꞌĩir hokꞌoobamgui hajim.
32 Mʌch chi Hemkꞌooi Hiewaa higwiata kꞌaigba kꞌãijã hiekꞌa nʌm pekaun hʌ̈u chugpaaju;
mamʌ chaig pãrau mua mag Hẽwandam Hakꞌaar juapaau kꞌaba Beelzebú jua tꞌeegauta mepeenjã jʌr wërp chitʌm hanarr chan mʌig heegarjã chugpaaba,
ni mʌg hatag Hẽwandamau deeu jẽb hiiur hompaabarm gaaijã chugpaaba hich mag sĩsijugui hajim,
Hẽwandam Hakꞌaar higwiata mag hiekꞌa naawai.
Jãga hõor wajaug kꞌapꞌʌ haajẽ
33 Mag hiekꞌakꞌagmamua hĩchab hamag magjim Jesuu: ’
Pãadë mʌ sëu hawia nemjĩir jĩirwaijã wajap jarba sĩi hich jãg bãaupibat.
Mag nemjĩir wajap chëbajugui hajim.
Mamʌ wajapꞌata pꞌãichichagau bʌ̈ kꞌuanaa jar bãaumʌn,
mag nemjõ wajapꞌa chëju.
Wajapcharan hich chë sim gaaimuata kꞌapꞌʌ haajemgui hajim,
jãga sĩ mag nemjõ.
Hich jãgta naabahab hajim pãarjã hagjö.
Pãach nem wau nʌm gaaimuata pãachdëupai pãach jaau naabahab,
hõor wäjäauná wa hõor kꞌaigbam kꞌʌʌná.
34 Kꞌĩirjug chuknaan,
jãg pãar hö kꞌaibag sĩsidʌm kꞌʌʌnau,
¿jãga pãrau nem wajapꞌam hig hiyʌ̈ʌ habarju?
Nem dich kꞌĩirjug hee kꞌĩirju hahaukꞌamta dich hiiu jaauba haajeeb.
35 Hõor kꞌĩirjug wajapꞌam kꞌʌʌnau nem wajapꞌam nemta hiekꞌa nʌm,
hamau nem wajapꞌamta wauju kꞌĩirju naawai.
Mamʌ hö kꞌaigbam kꞌʌʌnaun,
hiekꞌaawaijã kꞌaigbata hiekꞌa nʌm,
ham hödi sĩi nem kꞌaigbamta wauju kꞌĩirju sĩsid haawai.
36 Pari mʌ cha hiekꞌa chirʌm hiekꞌau,
Hẽwandamau hõor hi hagkꞌam hedan,
mʌig heegar haawai pãach hiek kꞌaigbam hiekꞌaajerr tꞌumaa pãach hidamaucha hirig jaaujugui hajim,
kꞌan jãgwia mag hiekꞌaajeejĩ.
37 Wajapcharan mʌig heegar haawai pãach hiekꞌamaajerr hiekꞌaupaita wir haig pãach hiekkꞌõr chukꞌu nʌm ha jaaupiju,
wa warag pãach kꞌaibag kꞌãijã waupi jaaujugui ha jaaumajim chi fariseonaanag.
Fariseonaanau hamachdëu nem hooba haajem waupi jaautarr
38 Biek hãb fariseonaan heem kꞌʌʌnau maestronaan heem kꞌʌʌn dʌ̈imua Jesuug,
—Maestro,
maraun maach dakꞌĩirta pʌrʌg hag na bʌ̃ʌrjã maadëu hooba haajem nemta waupim kꞌõsi nʌmgui hajierram.
39 Magbaawai hich Jesuu hamag magjim:
—Pãran pãachdëu Hẽwandam hiseg nʌm gaaimua warag chi hajaugjã chukꞌu tꞌʌnaawaita warag pãachdëu nem hooba haajem nempata pãach dakꞌĩir waupi nʌm.
Mamʌ mua waubamgui hajim.
Mag kꞌãai warrgar jöoi Jonás haajerr nemmeeurrkꞌan buch hee kꞌãai tꞌãrjup sĩerr gaaimua Nínivepienau Hẽwandamau hi pʌ̈itarr kꞌaug hautarrjöta,
hĩchab mʌchjã Hẽwandamau pʌ̈itarr pãrag kꞌap hapijugui hajim,
mʌch hiiu pꞌiidʌbarm gaaimua.
40 Hich jãg Jonás nemmeeurrkꞌan bi hee hãsdawam kꞌãai tꞌãrjupnaa hedaramjã kꞌãai tꞌãrjup sĩerrjö,
hich hagjö mʌch chi Hemkꞌooi Hiewaajã hĩchab hãsdawam kꞌãai tꞌãrjupnaa hedaramjã kꞌãai tꞌãrjup chirajugui hajim,
jẽb hee.
Mamʌ mag hoobarmjã pãrau hʌ̈kꞌabajugui hajim hamachigcha.
41 Magua,
Hẽwandamau hõor hich haar pꞌë hauju wa pꞌë hauba kꞌãijã haju jaau nʌm hed,
Nínivepien pꞌiidʌtkꞌawi hamach hipaarmua pãar kꞌaibagta warag Hẽwandamag hĩgkꞌa tꞌʌnʌʌuju,
warag pãar kꞌaibag waumkꞌĩir.
¿Kꞌan jãgwi?
Jonaau Hẽwandam hiek hamach haar jaaubaimaawai hamau magʌmjã haba hʌ̈kꞌatarr haawaima.
Mamʌ hĩs mʌ Jonás kꞌãaijã hʌ̃rʌʌcha chirʌmuata Hẽwandam hiek jaau chitʌmjã pãrau bʌ̃ʌrjã hʌ̈kꞌamapꞌa nʌmgui hajim.
42 Mag Hẽwandamau ham pꞌiriutkꞌa hauwia chachbarm jaar hĩchab Sabá durrmua rey Salomón hoon bëetarr hʌʌiraujã hich hipaarmua hĩchab pãar kꞌaibagta Hẽwandamag hĩgkꞌa tꞌʌnʌʌujugui hajim,
hí pãar kꞌãaijã warpmuata Hẽwandamau Salomonag kꞌĩirjug deetarr hiekꞌa sim hũraan bëetarr haawai.
Mag kꞌãai mʌ Salomón kꞌãai hʌ̃rpai chirʌmuata mʌig pãach nʌm haig Hẽwandam hiek jaau chirʌmjã pãrau hũrmapꞌa nʌmgui hajim,
mag hamachdëu nem hooba haajemta hamach dakꞌĩir waupi narr kꞌʌʌnag.
Bën hãkꞌãar deeu hõor mor hee sĩeicheewai jãga haajẽ ha jaautarr
43 Mag hiekꞌakꞌagmamua, ’
Hĩs mʌg mʌ hiek hũrbarmjã hʌ̈kꞌaba habarm gaaimua warram kꞌãaijã warag Hẽwandam dʌ̈i hiekkꞌõr pöm nʌisim kꞌap hamkꞌĩir,
pãrag mʌg ejemplo jaaukꞌimgui hajim.
Magnaa hichdëupai,
Bën kꞌaigbam hõor mor heemua jʌrpäaiwain warp hõor chukag hee pꞌʌrëu nʌrraajem.
Mamʌ pöd hich sĩeimaju baauba habaawai kꞌĩirju sĩi hawia,
44 “Deeu mʌch chiraajerr deg chiraimaag majugui” hawia,
deeu hich hag woun jʌrmaajemgui hajim.
Mag mawia hooimaawai,
chadcha di chaarta wajap tꞌũapwi hãbamʌg nem jökꞌanaa hau sĩsidʌmjö dijã parii hooimaajem.
45 Mag hoobaimaawai,
deeu mawia,
hich daumaai hich kꞌapeen hich kꞌãaijã kꞌaigbacharam kꞌʌʌn siete jʌr pꞌë hauwia,
deeu mag woun mor hee naaicheejemgui hajim.
Magbarm haigmua chi wounjã warr hich sĩerr kꞌãai warag hatꞌuuchata kꞌaibag sĩsiejem.
Hĩsim kꞌʌʌn jãg kꞌaibag sĩsidʌm kꞌʌʌnjã hich magta hajugui hajim meperau ham dʌ̈i,
Hẽwandam hiek hũrtarrta hʌ̈kꞌaba harr gaaimua.
Jesús heeugpeenau hamach hãd dʌ̈imua hi dʌ̈i hiekꞌam hig narr
46 Hagtꞌa Jesuu hõrag hiekꞌa sim hee,
hi hãd hi heeugpeen dʌ̈i bardʌtkꞌachëwia hi dʌ̈i hiekꞌam hig naajim.
Mamʌ hi sim haar dubba daaugajãrpai naaichëtarr haawai
47 hãbmua chi Jesuug,
—Pʌ hãd pʌ heeugpeen dʌ̈i daaugajãr nʌmwai;
ham hiek pʌ dʌ̈i hiekꞌam kꞌõsi nʌm haajem ha jaaujim.
48 Magbaa jũrr hichdëu,
—¿Chijã hagá mag mʌ hãd,
maimua chijã kꞌʌʌn hagá mag mʌ heeugpeen?
hajim.