Woun hãbmua nemjĩir dau pꞌötarr hag nem hĩgkꞌaa
13
Kꞌãai hãb Jesús hich jẽer sĩerr degmua mawia tꞌʌrrdö higaau hoo sĩsijim.
2 Maigmua hich bigaau hõor pöm pꞌʌʌrbaadeewai hichta warag bote hee waaidʌwi döjãrraa barjöisijim.
Maagwai chi hõran durr mos gaaipaita pos tꞌʌnaajim.
3 Mag mam barjopnaata ejemplodam jaaumamua nem kꞌĩir pogkꞌe jaaumajim.
Mag jajawagmamua magjim:
—Woun hãb nemjĩir dau pꞌoon majim haajem.
4 Mag sĩi pꞌömam hatarr haawai hãaurag chi nemjĩir daudam bʌ̈ diichjem hee burrjim haajem.
Magbaa nemchaain bëewia sĩi kꞌökꞌʌʌipʌ̈ijim hanaabá.
5 Maimua hãaur kꞌʌʌn sĩi mok pör jojoodög heeta burrjim haajem,
wajappai jẽb chukꞌu sĩerr hee.
Makꞌʌʌnan chi tꞌarrpꞌëen hʌ̈u jöpcha tꞌarrpꞌë höbërjim haajem.
6 Pari hedau pechag wʌʌbaadeeu sĩi hënanauk haadëmua pꞌuabaadëjim hanaabá,
mokdau kꞌurau pöd hierr kꞌaar jẽrkꞌaba hʌ̃rʌʌta kꞌaarkꞌa kꞌitꞌëe harr haawai.
7 Maimua hĩchab tagam pꞌötarr miudö harr hee burrwia,
chi miuta nemjĩir kꞌãaijã bãau kꞌapꞌí bãauwia,
sĩi chi nemjĩirdam hichdëuta pör pʌrëu haujim haajem.
8 Mamʌ tagam hʌ̈u jẽb wajaug hee burrtarran,
wajapꞌa höbërwia hʌ̈u nem wajaug pꞌur jopjim hanaabá,
nem bich dapag maimuajã bich tꞌʌʌ,
maimua pogkꞌa bich daii;
mamʌ mag sĩsidʌm chan bʌ̃ʌrjã chi vano chukꞌu.
9 Mag nem hĩgkꞌaadam jaau höpʌ̈iwi haig narr kꞌʌʌnag, ’
Keena,
jʌ̃g hʌ̃rʌʌnaa chamʌg nem hĩgkꞌaadam mua jaau chirʌm wajapꞌa hũrbatgui hajim hich Jesuupai.
Kꞌan jãgwi ejemplodamauta Jesuu hõrag nem jaaujeejĩ
10 Mag hi nem hĩgkꞌa höpinaa maach chi kꞌapeenauta hirig,
—¿Jãgwiata pua jãg ejemplodam jaaumamuata hõrag nem jaaujẽ?
ha jëeu naajim.
11 Magbaawai hichdëu marag magjim:
—Pãrau kꞌaugam kꞌõsi hũr naawai warre mʌchdëuta pãrag kꞌapꞌʌ hapi chirʌmgui hajim,
jãgata Hẽwandam hõor tꞌãar hee sĩeicheejẽ.
Pari warm kꞌʌʌnag mag kꞌaugpibamgui hajim,
hamau kꞌaugam kꞌõsi hũrba naawai.
12 Mag kꞌãai har chi tꞌãar honee hũrm kꞌõsi hũr nʌm kꞌʌʌnagta Hẽwandamau warag kꞌĩirjug deeju,
hich hiek kꞌapcha hamkꞌĩir.
Mamʌ har mag nem waumapꞌa nʌm kꞌʌʌnag chan deeba,
warag ham jua heem kꞌecheu haumaju hajim.
13 Maguata mua sĩi ejemplo jaaumamuata hamag nem jaauba haajeeb,
mua nem wau chitʌm hamau hoo nʌmta hoobamjönaa mua nem jaau chitʌmjã hũr nʌmta hũrbamjö naawai.
14 Hamach jãg nʌm gaaimua ham gaaita pa sĩebahab Hẽwandamau hich hiek gaai jöoi Isaías kꞌararrag pꞌãpitarr.
Hirua pꞌãtarr mag sim:
“Par hamau hũrwiajã hũrbamjö kꞌaugbajurau.
Par wajap hoo nʌʌ hawiajã hoobamjö hajurau.
15 Mʌkꞌʌʌn wounaan kꞌĩirjugan sĩita hãr sim;
kachjã kꞌĩnaa daupata kꞌĩ sĩsidʌm.
Mag naawai pöd hũrjã hũrba ni hoojã hooba,
ni mʌrʌgjã hamach pekau chugpaapi jëeuba nʌm,
hamach peerdʌ haumkꞌĩir.” (Is 6:9-10)
16 Mag hiekꞌapʌ̈inaa deeu maragta, ’
Pari pãar honee habat hajim;
pãrau pãach daúacha mua nem wau chitʌm hoonaa pãach jʌ̃gʌucha mʌ hiekjã hũurjeewai makꞌʌʌn jöoi Isaiaau jaautarrjö kꞌaba nʌmgui hajim.
17 Magnaa,
Chadcha mʌch himeerba pãrag mag chirʌmgui hajim:
Warrgar kꞌapan Hẽwandam hi jaaujerr kꞌʌʌnau cha mua nem wau chitʌm pãar dënjö hamach daúacha hoom kꞌõsi hatarrjã pöd hoobajierram.
Cha pãrau hũr nʌmjã hamach jʌ̃gʌucha hũrm kꞌõsi hatarrjã pöd hũrba durrajimgui hajim.
Kꞌani jaau sĩ nemjĩir dau pꞌötarr hag nem hĩgkꞌaau
18 Maimuan chadau hich Jesuu, ’
Hũrbat,
mua pãrag jaaukꞌimgui hajim,
kꞌani jaau sĩ chaig mʌchdëu nemjĩir dau jaau chirarr hag ejemploou.
19 Har mʌg Hẽwandam hiek jaau nʌm hũr nʌmjã pöd kꞌaugbam kꞌʌʌnan,
chi nemjĩir daudam kꞌʌdjã hee burrwia nemchaainau kꞌöpʌ̈itarrjöta nʌmgui hajim:
Meperau bëewia,
sĩi kꞌũgurbaicheewai,
Hẽwandam hiek hʌ̈kꞌatarrdam deeu hũrba harrjö hapäaijem.
20 Maimua har Hẽwandam hiek jaau nʌm hũrbaawai hʌ̈kꞌam kꞌõsi hʌ̈kꞌatarr kꞌʌʌn,
jũrr nemjĩir daudam mok pör jojoodög hee burrtarrjöta nʌmgui hajim.
21 Mamʌ jẽb chukag gaaimua chi nemjĩirdam wajap kꞌaarkꞌaba harrjö,
hĩchab mag hũrm kꞌõsi hũrnaa hʌ̈kꞌatarrjã wajappai hubʌ kꞌaba nʌm.
Mag kꞌukꞌurpai naawai,
mag hiek wajapꞌam gaaimua chikꞌamnau kꞌaigbanaa pꞌitꞌurg haawaijã,
deeu Hẽwandam hiekta hisegwi,
warr hamach naajerrjöta wënʌrram kꞌõsi nʌm.
22 Maagwai maach kꞌapeen hihãsisisdöm kꞌʌʌn,
jũrr mag nemjĩir dau miu hee burrwia chi miúa pör pʌrëu hautarrjöta nʌmgui hajim.
Hamau Hẽwandam hiek hũrm kꞌõsi hũurjem,
mamʌ deeu hamach kꞌĩirjug heepai,
“Jãgʌm gaaimua pöd mʌ pꞌatkꞌon hauba kꞌãijã chitaju,”
wa magbam kꞌai,
“Mua chadcha hʌ̈kꞌakꞌiinjã,
pöd parhooba mʌchdëu hampierr habaju” ha kꞌĩirjuajem.
Mag gaaimua mag nemjĩirdam hapꞌʌʌ bãauwia pöd chëba harrjö,
Hẽwandam hatꞌee nem wajapꞌa wawaagjã pödba,
sĩi serbiibata nʌmgui hajim.
23 Magarrau har Hẽwandam hiek hũrwia tꞌãraucha hʌ̈kꞌaajem kꞌʌʌnan chad,
jũrr mag nemjĩir jẽb wajaug hee burrtarrjöta nʌmgui hajim.
Magʌm kꞌʌʌn Hẽwandam hatꞌee nem waum kꞌõsi wau naawai,
hamachdëu nem wauju hayagpierr waaujemgui hajim:
hãaur kꞌʌʌnau nemjĩir chi chëmiejö dʌ̈rrcha,
hãaur kꞌʌʌnau hagpierrpai maimua hãaur kꞌʌʌnau bʌchkꞌunpai.
Mamʌ tꞌumaam kꞌʌʌnau hichiita hichdëu kꞌõsimjö haajemgui hajim.
Pꞌũak dau kꞌaigbam trigo heeu jĩir wëjöm hee pꞌötarr
24 Mag jaauwia,
deeu hichdëupai mʌg ejemplodam jaaumamua magjim: ’
Hĩs mua pãrag jaaukꞌimgui hajim,
Hẽwandamau hichdëu hõor hi hagkꞌam hed jãga kꞌaigbam kꞌʌʌn chi wäjäaun heemua hisegju.
Maan mʌgaugui hajim:
Woun hãbmua trigo jĩirjim haajem.
25 Mamʌ mag trigo hapꞌa sĩerrta,
hõor tꞌum kꞌãipꞌöbaadëmich,
mag chi nemjĩir pap kꞌa hukꞌurm bëewia jũrr hi nemjĩir hee pꞌũak dau kꞌaigbam hagjö trigojöo simta pꞌötꞌurjim hanaabá.
26 Maimua chi trigo bich baupa haadeewai chi pꞌũakjã hagjöo dʌ̈i bich baupa jöisijim hanʌm.
27 Magbaadëm chi chognaanau hoo hatꞌaawai hamach patrón haar wëtwi hirig,
“Patrón,
pua jĩirwai trigo happai jĩirtarrta,
¿jãga hĩs jãg pꞌũak kꞌaigbampata hag hee bich baupa wëjö?”
hajim hanʌm.
28 Magbaawai chi papkꞌʌʌu,
“Jã,
maach dʌ̈i hiekkꞌõr paraam kꞌʌʌnau kꞌãijã hag hee pꞌũak dau pꞌöwia kꞌabahab” hajim hanʌm.
Magbaa chi chognaanau deeu pʌaba hirig,
“¿Pua hoowai marau hag happai chi kꞌaarpa jẽu wërpꞌoon maju haai nʌ?”
hajierram hanʌm.
29 Mamʌ magbaa chi nemjĩir kꞌʌ jöoirau,
“Hoob jẽwaan wëtmiet” hajim hanʌm,
“magba hakꞌiin heeu pãrau chi trigo kꞌaardampa kꞌãijã tꞌʌrrëudukꞌam.
30 Magju kꞌãai hidëu warag hãba bãaupibat” hajim hanaabá.
“Maimua ya pꞌierr nʌm jaar paawaita mua hag hatꞌee hõor pʌ̈ijugui hajim hanʌm,
nacha hag happai tꞌʌrrpꞌënaa,
kꞌõorjʌ̃naa hörpʌ̈imkꞌĩir.
Maimuan chadau hagjö chi trigo happai pꞌierrwia chi hausĩiujem hee hausĩujugui” hajim hanaabá.
Magtarr haawai hichdëu jaautarrjö hidëu bãaupiwia,
pꞌierr jaar paawaita hich mag chi pꞌũak tꞌʌrrpꞌënaa,
hag happai kꞌĩet hörpʌ̈ijim hanaabá.
Maagwai hõor hi hagkꞌam hedjã hich magta haju Hẽwandamaujã hich hiek hʌ̈kꞌabam kꞌʌʌn dʌ̈i.
Mamʌ hich hiek hʌ̈kꞌa nʌm kꞌʌʌnan,
mag trigo wajap hãkꞌa sĩutarrjö hich haarchata pꞌë hauwi hich dʌ̈i hich mag wai sĩsiju ha jaaumajim,
hich Jesuucha.
Mostaza dën nem hĩgkꞌaadam
31 Mag nem kꞌĩir pogkꞌe jaaumamua hich Jesuupai hĩchab mʌg nem hĩgkꞌaadamjã jaaujim,
mostaza daudam bʌ̃rʌʌ kꞌitʌm higwi: ’
Pãrau kꞌapꞌʌ nʌ,
jãga sim habarí Hẽwandam hiek mua jaau chitʌm,
maimua kꞌanjöta sim ha mua pãrag jaaubarkꞌiin hajim.
Mʌg Hẽwandam hiek mua jaau chitʌmʌn,
mostaza daudam jẽb hee jĩir sĩubarmjöta simgui hajim.
32 Hiin chadcha tagam nemjĩir dau kꞌãaijã hichta bʌ̃rʌʌcha kꞌitʌm.
Mamʌ mag kꞌitʌmʌn nem bãau kꞌapꞌí bãauwia,
nem bʌ̈ pöm hãdëe haadeewai,
sĩi nemchaaindam bëewi hag gaai di hëucheejemgui hajim.
Hich hagjöta sĩebahab hajim hĩchab mʌg Hẽwandam hiek mua pãrag jaau chitʌmjã:
Mʌʌgwaiwe chan kꞌapan kꞌabata hʌ̈kꞌa durrum;
pari mag durrumuata warag nem pöm haaidʌbapäaiwai hõor kꞌapankꞌam kꞌʌʌnau hʌ̈kꞌajugui hajim.
Levadura dën nem hĩgkꞌaa
33 Mag jaaumamua hich Jesuupai, ’
Hẽwandamau hich hiiu haawai mag hich hiek haaidʌpi nʌmʌn,
hʌʌi hãbmua harin dʌ̈rrcha sim hee levadura pʌ̈itarrjöta simgui hajim.
Pãrau kꞌapꞌʌ nʌmgui hajim,
levadura bʌ̃rʌʌ pʌ̈itarrjã haaidʌmam hooba simta,
harin tꞌum hʌrpi haaujem.
Hich hagjöta sĩebahab hajim hĩchab Hẽwandam hiek mʌg mua jaau chitʌmjã.
Mʌʌgwaiwe chan hõor pöm mʌg wëjöm hee hagtꞌa pömcha haaidʌba sim.
Mamʌ mʌg hatag paawaita durr warpꞌam magwe haaidʌbaadee tꞌumaam kꞌʌʌnau hũrab kꞌaba hũrjugui ha jaaumajim.
Jãgwi ejemplo jaaumamuata Jesuu nem jaaujeejĩ
34 Magta Jesuu nem kꞌĩir pogkꞌe jaaumajim,
ejemplodam deemamua.
Ejemplo chuk chan hõrag nem jaauba haajeejim.
35 Mamʌ mag ejemplooupai nem jaaujerran,
warrgar Hẽwandam hi jaaujerrau Jesús higwia jaautarrjö,
ejemplo deemamuata hõrag nem jaauju harr haawai hajim.
Mag hirua ejemploou nem jaaumaju hatarran,
warrgarwe Hẽwandamau hõrag kꞌaugpiba hich tꞌãar heepai wai sĩsierrta jũrr hewag pawi hõrag kꞌap hamkꞌĩir jaaumaju hajim.
Magtarr haawaita mag ejemplo jaaumam haigjã chadcha hag heyaa höbëbërgmajim.
Jesuu jaaujim, kꞌanta jaau sĩ mag pꞌũak kꞌaigbam trigo hee pꞌötarrau
36 Mag hõrag ejemploou nem jaau höbaadeewai hõrag wëtpi jaaujim.
Maimua tꞌum hërëubaadee hich jẽer sĩerr di haar majim.
Maig maach happai hapꞌöbaadee,
marau hirig maachig jaaupijim,
mag pꞌũak dau kꞌaigbam trigo heeu jĩir wëjöm hee pꞌötarr.
37 Magbaa hichdëu jaaubaadëwi magjim:
—Har mag chi nemjĩir dau wajapꞌam pꞌöjim ha chirarr,
jã mʌchpaíugui hajim,
mʌch chi Hemkꞌooi Hiewaa.
38 Maagwai hirua pꞌötarr jẽb,
jã mʌg hõor pöm wëjömta jaau sim.
Chi nemjĩir dau wajapꞌam,
hõor Hẽwandamagta hʌdʌraa hamach Pörkꞌapi nʌm kꞌʌʌnaugui hajim.
Maagwai chi pꞌũak kꞌaigbam,
har sĩi Hẽwandam higar kꞌaba mepeer higar nʌm kꞌʌʌnau.
39 Maagwai chi patrón kꞌa hukꞌur hi nemjĩir hee mag pꞌũak dau pꞌötꞌurtarr,
jã chi meperaugui hajim.
Maimua chi trigo pꞌur jöisiewai tꞌʌʌju ha jaautarr,
Hẽwandamau mʌg durr hi hagkꞌajuuta jaau sim.
Chi trigo tꞌʌʌ nʌmjö hõor dajẽk haju kꞌʌʌn,
hich Hẽwandam chognaanaugui hajim,
angelnaan.
40 Pãrau kꞌapꞌʌ naabá,
pꞌũak pꞌʌnaa,
jʌʌupinaa hörpäaijem.
Hich jãgta haju hĩchab Hẽwandamaujã hõor dʌ̈i hichdëu mʌg durr hi hagkꞌabarm hed.
41 Mag hed mʌch chi Hemkꞌooi Hiewaau mua mʌch chognaan pʌ̈ijugui hajim,
sĩi bigaaum kꞌʌʌnagjã pekau waupinaa hamachdëupa nem kꞌaigbam wau sĩerrjëem kꞌʌʌn tꞌum hãbamʌg jʌr pꞌëmkꞌĩir.
42 Mag hãbamʌg jʌr pꞌënaa horno paa dʌnʌmjö sim heeta barkꞌʌʌiju.
Magbaawai mag heeta hicharaucha bĩenaa gaai machgau ham kꞌierr hujãkkꞌʌr habarjugui hajim.
43 Mamʌ warm kꞌʌʌn mamagkꞌam hee,
jũrr Hẽwandamagta hʌdʌraa hamach wajaug paapi nʌmua hi dënkꞌa narr kꞌʌʌnan maach Haai tꞌumaam kꞌʌʌn Pörkꞌa sim dʌ̈ita nʌisijugui hajim.
Magnaa hichdëupai,
Keena,
jʌ̃g hʌ̃rʌʌnaa cha mua nem jaau chirʌm wajapꞌa hũrbat hajim,
mag hiekꞌamamua.
Jesús dënkꞌaag jãga haju haai nʌ
44 Mag jajawagmamua hĩchab mʌg nem hĩgkꞌaadamjã jaaujim,
hich Jesuu: ’
Woun hãb chikꞌam jẽb gaai pꞌidkꞌa sĩejim haajem.
Mag pꞌidkꞌa simuata jẽb heem nem wajapꞌam hoobaadëjim hanaabá.
Magbaawai pöd hichdëu harrju kꞌaba haawai,
sĩi hoo pʌawia,
hich nemta warag hisegamjö tꞌumaa përkꞌʌʌipʌ̈iwia,
hag pꞌatkꞌonauta mag hichdëu nem hoo pʌatarr chi jẽbpa për haujim haajem.
Maimua hich Jesuupai mag hich nem hĩgkꞌa sim hũr narr kꞌʌʌnag magjim: ’
Chi mʌ dënkꞌaju kꞌʌʌnaun mag wounau mag pꞌĩr haum kꞌõchgau hich nem tꞌum përkꞌʌʌitarrjö hamach nem wai nʌmjã tꞌumta hiseg nʌmjö haju haai nʌmgui hajim,
mʌʌta jũrr mag nem hajapꞌam hamachdëu hig nʌmjö paarpaag.
45 ’Mag mʌʌta nem wajapꞌam hamachdëu hig nʌmjö paarpaagan,
chihöo chi hʌ̃rʌʌcha balee simta për hawaag jʌr wënʌrrʌmjö haju haai nʌmgui hajim.
46 Mag jʌr nʌmua chi baau hatꞌam kꞌʌʌu hich nem wai sim tꞌumaa përkꞌʌʌiwi jũrr mag chihöo mag hich nem përkꞌʌʌitarr kꞌãaijã hʌ̃rcha balee simta për hatꞌamjöta haju,
chadcha mʌ dënkꞌam kꞌõsi mʌ jʌrwia baau hatꞌaawai.
Hõor hi hagkꞌam hedan reeu dö hʌrëu nʌmjö haju jaautarr
47 Mag jajawagmamua, ’
Hẽwandamau hõor hi hagkꞌam hedan,
hãwarr pʌraag reeu döjãrr dö hʌrëu nʌmjöta hajugui hajim,
hich Jesuupai.
48 ¿Pãrau hoowai mag hʌrëu wai jörröo hawia jiir haunaa,
chi hãkꞌãar tꞌeernaa barpʌ̈iwia,
chi wajapꞌam happaita hauba haajẽ?
hajim.
49 Hich jãgta hajugui hajim hĩchab Hẽwandamau pãar dʌ̈ijã,
mʌg durr hichdëu hi hagkꞌabarm hed.
Hẽwandamau hich chognaanag hõor kꞌaigbam kꞌʌʌn chi wäjäaun heemua kꞌĩet tꞌeerpi jaauju;
50 magnaa mag chi hãkꞌãraam kꞌʌʌn mag horno paa simjö sim hee barkꞌʌʌipʌ̈iju.
Mag barkꞌʌʌibapäaiwai mamta hicharaucha bĩenaa gaai machgau ham kꞌierr hujãkkꞌʌr hajugui hajim,
hamach kꞌaigba wënʌrrarr jũrr.
51 Mag jaau dichwia hich Jesuupai maach hich dʌ̈i wënʌrrarr kꞌʌʌnagta,
—¿Pãrau cha mua jaau chirʌm wajapꞌa kꞌapꞌʌ nʌ?
ha jëeujim.
Magbaawai marau,
—Hëera,
maraun kꞌapꞌʌ nʌmgui hanaajim.
52 Magbaa hichdëu marag magjim:
—Mʌg hiek hiiur mua jaau chirʌmjã pãrau chadcha kꞌapꞌʌ naawai deeum kꞌʌʌnag jawaagjã ya chi machnaankꞌa nʌmgui hajim.
Jãg nʌm haig hõor Hẽwandam higwia hi jʌr nʌm kꞌʌʌnag pãrau jaauju haai nʌmgui hajim,
chadcha pãachdëuta nawe Hẽwandamau hich hi jaaumienag pꞌãpitarrjã kꞌapꞌʌnaa mʌg hiek hiiur mua jaau chitʌmjã kꞌapꞌʌ naawai.
Jesús Nazaret pꞌöbör hee
53 Mag ejemplodamau nem jaau sĩewi jaau haaipabaadeewai haigmua mawia
54 jũrr Nazaret pꞌöbörög petajim,
hich bãautarr haar.
Mam pabaimaa,
Hẽwandam hiek jaau nʌm hũraag maach meeun biirdʌajem deg dubwi,
hõrag Hẽwandam hiek jaaubaadëjim.
Mag hirua jajawagmam hũrwia jʌ̃gderraa nʌm hiekꞌau warag hamach heepaita,
—¿Magʌm hichdëu jamta kꞌaugjimta mag jaaumáma?
¿Jãga hichdëu jãg hõor monaau nʌrrʌ́ma?
hanaa hĩchab,
55 Keena,
¿pãrau hoowai jãg woun José pa waumie hag hiewaa kꞌabá,
María dʌ̈ím?
¿Jã Santiago dʌ̈i kꞌod kꞌabá,
José dʌ̈i,
Simón dʌ̈i maimua Judas dʌ̈ijã hagjö?
56 Hi hʌ̃pꞌʌʌin tꞌum mʌig maach dʌ̈i hich mʌg pꞌöbör hee naajem;
maagwai hichjã maadëu kꞌapꞌʌ nʌmgui hajierram,
hich mʌiguim haawai.
Mag simta,
¿jam kꞌaugtꞌurwiata jãg nem jaau kꞌaauga hichdëu jaaumaajẽma?
haajeejim jũrram kꞌʌʌnau.
57 Hamachdëu mag nʌm gaaimua hirua nem jaau simjã hasekasba,
warag hi dʌ̈i kꞌĩir kꞌʌʌukꞌa pꞌöbaadëjim.
Pari magbaa hich Jesuu hamag,
—Chadcha deeum durram kꞌʌʌnaun mʌg Hẽwandam hiek jaau wënʌrrʌm kꞌʌʌnag heenaa ham dʌ̈i hajapꞌa haba haajeeb hajim.
Mamʌ mag sim,
jũrr dich di haig wa dich bãautarr durrpai chan magjã magba warag ham kꞌa hisëe haajerramgui hajim,
jũrr hamach kꞌĩircha.
58 Mag,
warag maig chan Jesuu hõor mor masim kꞌʌʌn pöm monaaubajim,
hamachdëu hi hiek hʌ̈kꞌamapꞌa narr haawai.