Jesuu nem wajapꞌamta waupi jaautarr
6
’Sĩi pãach hö wajaug pꞌëmkꞌĩirpai chan hoob chikꞌam dakꞌĩir nem waumiet hajim hanʌm.
Bigaaum kꞌʌʌnag magamkꞌĩirpaita pãrau mag nem wau nʌm paar chan,
maach Haai hʌ̃gtꞌar simua pãar wajapꞌa hig hiyʌ̈ʌ habaju,
ya mʌig heegarwe hõrau pãar wajapꞌa hig hiyʌ̈ʌ nʌmua ya hamau pãrag pꞌag nʌmjöta naawai.
2 ’Magam huguata,
dau hapꞌʌʌm kꞌʌʌndamag nemdam deewaijã hoob tꞌumaam kꞌʌʌnag kꞌakꞌapdö hapimiet,
sĩi jãg hamach hëugar wajapꞌa hig hiyʌ̈ʌ hamkꞌĩirpai culto hee wa kaaijã hee kꞌãijã hõor kꞌapanag dakꞌĩir haajem kꞌʌʌn dënjö.
Har jãg hamach hëugar wajapꞌa hig hiyʌ̈ʌ hamkꞌĩirta hapꞌʌʌm kꞌʌʌndam dʌ̈i hö wajapꞌa haajem kꞌʌʌnan,
ya hõrau hamag pꞌagbarmjöta nʌmgui hajim hanʌm,
ham hëugar wajapꞌa hiekꞌa nʌmua.
Jãgʌm kꞌʌʌnag kꞌanii Hẽwandamau tag pꞌagbarju.
3 Dau hapꞌʌʌm kꞌʌʌndamag nem hinagdam deewai hoob pãach kꞌapeen pãach dʌ̈i chi wajapcharam kꞌʌʌnagjã jaaumiet.
4 Magju kꞌãai warag pãach kꞌaugpimapꞌamjö meraata deebat hajim hanʌm.
Pãrau mag meraa deewiajã,
pãar Haai hʌ̃gtꞌarmua pãar hoo sim haawai,
hichdëujã pãar heeg hoob kꞌaba heeg hooju ha jaaujim hanaabá.
Jesuu jãgata maadëu Hẽwandamag jëeuju haai nʌ ha jaautarr
5 Mag nem jajawagmamua hich Jesuu magjim hanʌm: ’
Pãach Hẽwandamag jëeuwai,
hoob jãg sĩi chadcha magba nʌmta Hẽwandamag jëeu nʌm hamkꞌĩir jãg hõor dakꞌĩirpai jëeujem kꞌʌʌnjö hamiet hajim hanʌm.
Jãkꞌʌʌnan sĩi hõrag hamach hoomkꞌĩirpaita culto hee maimua sĩi kaaijã heejã hagjö Hẽwandamag jëeu nʌm hanʌmua bʌ̈jãaupaita hijẽjẽb haajerramgui hajim hanaabá.
Jãg hamach hëugar wajapꞌa hig hiyʌ̈ʌ hamkꞌĩirta jãg nʌm kꞌʌʌnan,
ya hõrau hamag pꞌagbarmjöta nʌmgui hajim hanʌm,
ham hëugar wajapꞌa hiekꞌa nʌmua.
6 Pari pãrag mua jaaukꞌim:
Hẽwandamag jëeuwai,
ham dënjö kꞌaba,
pãach kꞌãaijem tꞌuur wai nʌm kꞌai,
haar dubnaata pãach happai hirig jëeubat.
Mag pãach happai nʌmjö naab mamʌ,
maig pãar dʌ̈i sim pãar Haai.
Mag pãar Hayau pãrau pãach happai hichig jëeu nʌm hoobaawai pãrag hirua pãachdëu nem jëeu nʌmjã deeb kꞌaba deejugui hajim hanʌm.
7 ’Mag hirig jëeuwaijã hoob jãg par hiiupai Hẽwandam hiek hʌ̈kꞌa nʌm hanʌm kꞌʌʌn dënjö parhoobam hiek maadëu higbaju hayaampata hiekꞌa nʌʌ hamiet hajim hanaabá.
Hamachigan jãg jëeubaadëm pʌa chʌuu haawaita Hẽwandamau hʌ̃rcha hamach hiek hũurjempii haajerram hajim hanʌm.
8 Pãrau hichig jëeuju nawe pãar Hayau ya pãrau nem hig nʌmjã kꞌapꞌʌ sim haawai,
hoob ham dënjö hatcha hiekꞌa nʌʌ hamiet.
9 Magju kꞌãai pãachdëu hirig jëeuwai mʌgta jëeubat hajim hanʌm:
“Hẽwandam,
pʌʌta maar Haai hʌ̃gtꞌar chiraajemʌu.
Pʌch happaita chadcha pekau chukꞌu chitʌm.
10 Pʌrʌgta marau maach dʌ̈i pʌchdëu hampierr hapinaa pʌchta tꞌumaam kꞌʌʌn Pörkꞌapim kꞌõsi nʌm.
Hʌ̃gtꞌarjã jãg pʌchdëu nem waupi jaau nʌm happai waaujemjö,
mʌig heegarjã tꞌum pʌchdëu jaau simjöta hapim kꞌõsi nʌm.
11 Hed hëepierr pua marag hich jãg kꞌöjudam deebarju.
12 Hẽwandam,
maar pekau tꞌum chugpaabapʌ̈i,
maimua har marau maach dʌ̈i kꞌaigba habarm kꞌʌʌn dʌ̈i tag magʌm hiek higba hich mag kꞌĩir hokꞌoopäaijemjö,
maar dënjã kꞌĩir hokꞌoobapʌ̈i.
13 Hoob pua hʌdʌraa chan maar pekau hee burrpi chiram.
Mag kꞌãai warag maar tꞌʌa wai chirsí,
pꞌitꞌurg chukꞌu dösãtau maar hichig paa haum hugua.
[Hẽwandam,
pʌchdëuta nem tꞌʌnʌmʌn tꞌum kꞌap chirʌm.
Pʌchta chi jua tꞌierriu,
maagwai pʌchpaita tꞌumaam kꞌʌʌnau tꞌö hiekꞌaju haai nʌm,
mʌg hatag pawiajã hich mag.]”
’Magta jëeubat hajim hanaabá hich Jesuu.
14 Magnaa hĩchab,
Chikꞌamnau pãach dʌ̈i kꞌaigba haawai,
pãrau ham dʌ̈i magʌm hiekjã higba sĩi kꞌĩir hokꞌoopʌ̈imʌn,
magan maach Haai hʌ̃gtꞌar chiraajemuajã hĩchab pãar pekau chugpaapʌ̈iwia tag magʌm hiek higba hich mag kꞌĩir hokꞌoopʌ̈ijugui hajim hanʌm.
15 Mamʌ pãrauta pãach kꞌapeen wir haig perdonaabam chan,
maach Haai Hẽwandamaujã pãar pekau chugpaabamgui ha jaaumajim haajem.
Jesuu sʌrkꞌapi jaautarr
16 ’Pãach Hẽwandamag jëeu kꞌëwaag tꞌach kꞌöba sʌrkꞌaawai,
hoob jãg sĩi hamach hëugar wajapꞌa hig hiyʌ̈ʌ hamkꞌĩirpai nem waaujem kꞌʌʌnjö jãsogau hökꞌĩirjuumjö hamiet hajim hanʌm,
mag hoowi bigaaum kꞌʌʌnau “Jãan Hẽwandamag jëeu nʌmua sʌrkꞌa naawaita jãg nʌm” ham hugua.
Jãg hamach sʌrkꞌa nʌm kꞌap hamkꞌĩirpaita hökꞌĩirjuumjö haajem kꞌʌʌnan,
ya hõrau hamag chi pꞌagamjöta nʌmgui hajim hanaabá,
ham higwi chadcha sʌrkꞌaajem kꞌʌʌnau hanʌm gaaimua.
17 Magju kꞌãai Hẽwandamag jëwaag sʌrkꞌaawai,
warag wajapꞌa pãach kꞌĩir sũgpʌ̈inaa pör megbapʌ̈it,
18 bigaaum kꞌʌʌnau mag pãach sʌrkꞌa nʌm ni hãbmuajã kꞌap ham hugua.
Pãrau magta hamʌn,
hãba maach Haai pãar dʌ̈i simuapaita kꞌap haju;
maagwai hichdëuta hĩchab pãar heeg hoojugui hajim hanaabá.
Hʌ̃gtꞌar haugchëba naaimaag
19 ’Mʌig heegarwe chan hoob pꞌatkꞌon wa nem hinag pöm kꞌãijã paarpaju hẽkꞌamiet.
Mʌiguin nem tꞌum polieu hãrnaa kꞌukꞌungaujã jẽeumaajem;
mag nʌm dʌ̈i nem jĩgmienaujã sĩi dubwia jĩgkꞌamaajemgui ha jaaumajim hanʌm.
20 Magju kꞌãai nem wajapꞌa wau nʌmuata pꞌatkꞌon hãkꞌa pꞌiemam dʌ̈i nem hinag pöm paarpamamjö habat,
hʌ̃gtꞌar paimaawaijã chadcha paraa naaimaag.
Pãach jam paaukꞌaimaawaim hatꞌeeta pãrau pꞌatkꞌon pꞌie nʌmjö nem wajapꞌamta wau nʌmʌn hʌ̈u simgui hajim hanʌm.
Jam chan polieujã hãrba,
kꞌukꞌungaujã jẽeuba,
ni nem jĩgmienaujã pöd jĩgkꞌabam.
21 Mʌig jẽb gaai nʌweta nem tꞌum paraa haju kꞌĩirjuju kꞌãyau hʌ̃gtꞌar paawaita nem tꞌum paarpaju kꞌĩirju wënʌrrʌmʌn,
magan chadcha pãar kꞌĩirjug hãba Hẽwandam gaaita sim hajim hanʌm.
Jesús hiek maach daun hõtdaujöta sim haajem maach mor gaai
22 ’Maach daun hõtdaujöta sim maach mor gaai.
Maach daujãata wajapꞌa sim haiguin,
nem tꞌum dawaata hoojem.
Hich hagjöta sim maach tꞌãarjã.
Hẽwandam hiek hʌ̈kꞌanaa maach tꞌãarta wajapꞌa sim haiguin,
nem tꞌum Hẽwandamau kꞌõsimjöta waaujem.
Mag nʌm haiguin hararag hee nʌmjöta nʌmgui hajim hanʌm.
23 Mamʌ magba hagtꞌa pãach pekau hee nʌmʌn,
magan pãran sĩi hagtꞌa kꞌĩchag hee jʌrkꞌa jʌrkꞌa nʌmjöta nʌm.
Mag nʌm haig pöd Hẽwandam dʌ̈i naaju kꞌaba nʌmgui hajim hanaabá,
pekau heeta naawai.
Jesús hiek Hẽwandamag wʌrpanaa pöd pꞌatkꞌonagjã wʌrpaju kꞌaba nʌm haajem
(Lc 16:13)
24 ’Ni hãbmuajã pöd patronnaan numiim kꞌʌʌn chogkꞌaju kꞌaba simgui hajim hanʌm.
Patronnaan numí hakꞌiin,
hiwiir hãbpaita hʌ̃rcha kꞌa kꞌõsi haju.
Hich hagjöta sim hĩchab Hẽwandam dʌ̈ijã.
Pöd pãrau Hẽwandam kꞌĩrag wʌrpanaa,
pꞌatkꞌonag kꞌãijã wʌrpaju kꞌaba nʌm.
Pãar magta nʌm chan Hẽwandam hipierraa kꞌaba nʌmgui hajim hanaabá.
Kꞌani kꞌöju wa kꞌani jũaju kꞌĩirjupiba jaautarr
25 Mag nem kꞌĩir pogkꞌe jajawagmamua magjim hanʌm hich Jesuu: ’
Hoob pãrau “¿kꞌani kꞌöju wa kꞌanta döjuuta maach mʌg nʌma?”
ha kꞌĩirjumiet.
Wa magbam kꞌai,
ya kꞌajũa chukꞌu nʌm “¿Kꞌani jũajuuta mʌg nʌmua?”
ha kꞌãijã kꞌĩirjumiet hajim hanʌm.
Pãarta nem kꞌoojem nem kꞌãaijã wajapchanaa kꞌajũa kꞌãyaujã Hẽwandam dau na hʌ̃rʌʌcha balee sĩsid haawai,
hirua pãrag hoobamjöo habajugui hajim hanaabá.
26 Pãadë har nemchaaindam hedjã hee hũrr pꞌopꞌog haajem kꞌʌʌn hoobat.
Ham pꞌidkꞌajã pꞌidkꞌaba haajeewai hamach pꞌatꞌaudam hãkꞌaagjã di chukꞌu nʌm.
Mag pꞌidkꞌaba sĩi naajeeb mamʌ,
maach Haai hʌ̃gtꞌar chiraajemuata hamag pꞌatꞌaudam daumeraa dee wai simua ham kꞌee wai sĩejemgui hajim hanʌm.
Magʌm pãar chará nemchaain jãg tꞌʌnʌm kꞌãaijã hʌ̃rcha balee naawai,
¿jãga hirua bʌ̃ʌrjã pãrag hooba habarju?
ha jaaumajim hanaabá.
27 Hoob hatcha pãachdëu nem hig nʌmta kꞌĩirju nʌʌ hamiet.
Mag pãrau pãachdëu kꞌõsimta hig nʌʌ hakꞌiinjã,
¿kꞌaíuta mʌg nʌm haig mag hichdëu kꞌĩirju sim gaaimuapai hich meeju harr hʌ̃r horadam hãbpai kꞌãijã hich hiiupiju haai sĩ?
hajim hanʌm.
28 ’Mag nʌmta kꞌajũa chukꞌu haawaijã ¿kꞌantꞌee hatcha kꞌĩirju nʌʌ haajẽ?
Pãadë har pamaardam hooihmʌ tꞌʌnaajem kꞌĩirjubat.
Hamjã hĩchab bʌ̃ʌrjã pꞌidkꞌajã pꞌidkꞌaba,
ni hamach kꞌajũa jũaju kꞌĩirjuwia hẽkꞌakꞌa nʌʌjã haba haajem.
29 Mag naab mamʌ hõor hãbmuajã ham dʌ̈i barba haajem,
hooimʌg hatꞌee.
Warrgar rey Salomón kꞌararraujã pꞌatkꞌon pöm paraanaa nem wajapꞌam pöm paraa haajerraujã pamaardam hooimʌgjö chan pöd kꞌajũa jũaba haajeejimgui hajim hanʌm.
30 Pamaar jãg hooihmʌ tꞌʌnʌm hedau wʌʌbaadëmuapai kꞌiugpꞌëbaadeewai sĩi kꞌʌʌijemjã Hẽwandamau jãg hooihmʌ wai sĩejemta,
¿jãgwi pãar pamaar kꞌãai hʌ̃rcha balee nʌmua nem jëeu nʌmta hirua deeba habarju?
¿Wa pãachdëu jëeu nʌmjã pöd deebajupii haajẽwa?
hajim hanʌm.
31 Hoob hatcha “¿kꞌanta kꞌoogáwa?”
wa “¿kꞌanta doogáwa?”,
wa magbam kꞌai,
“¿kꞌandamta jũabaraag kꞌai?”
hamiet hajim hanaabá.
32 Pãrau kꞌapꞌʌ nʌmgui hajim hanʌm,
hõor Hẽwandam hiek hʌ̈kꞌabam kꞌʌʌnta magʌm nem tꞌum kꞌĩirju pꞌöbaadëmjã pʌaba sĩerrjëem.
Mamʌ pãar Haai hʌ̃gtꞌar chiraajemua pãrau nem hig nʌmjã tꞌum kꞌapꞌʌ sim haawai pãar chan warm kꞌʌʌnjö magbaju haai nʌmgui hajim hanʌm.
33 Hãba Hẽwandamau nem waupi jaau simpaita waunaa hirigpaita pãach dʌ̈i hichdëu hampierr hapibat.
Pãrau chadcha magta hamʌn,
tagam nem pãachdëu higbarmjã hirua deeb kꞌaba deejugui hajim hanʌm.
34 Hoob hatcha “¿Kꞌanta nan kꞌöbarju wa kꞌanta jũabarju?”
ha kꞌĩirjumiet.
Hag nawe kꞌĩirjuwiajã par kꞌabahab hajim hanʌm.
Pꞌitꞌurgan hãspapakꞌampierr hoojem.
Magua maadëu hag nawe kꞌĩirjuba hawiajã,
hichiita maadëu nem hig nʌm chan chuk kꞌabajugui hajim hanaabá,
magʌm kꞌĩirjuju haag.