Ñayóꞌo kúu to̱ꞌon ñasondíꞌí ni̱ka̱ꞌa̱n ta̱Jacob xíꞌin nata̱a sa̱ꞌya ra
49
Ta saá ta̱Jacob ka̱na ra nata̱a sa̱ꞌya ra va̱xi na no̱o̱ ra,
ta ki̱xaa̱ nayóꞌo ta ni̱ka̱ꞌa̱n ra xíꞌin na,
káchí ra saá:
―Naꞌa yatin ndó no̱o̱ i̱,
ta vitin ka̱ꞌa̱n i̱ xíꞌin ndó yukía̱ koo xíꞌin ndó kui̱ya̱ ña va̱xi.
2 Ndóꞌó nasa̱ꞌya mi̱i i̱,
kuyatin ndó no̱o̱ i̱,
ña koni̱ so̱ꞌo ndó ña ka̱ꞌa̱n yi̱ꞌi̱ yivá ndó xíꞌin ndó.
3 Yóꞌó,
ta̱Rubén,
sa̱ꞌya i̱ ta̱no̱ó kúu ún,
ndee̱ i̱ kúu ún;
yóꞌó kúu ta̱a ta̱ sánáꞌa ndí yi̱ꞌi̱ kúu ta̱a ta̱ ndeé.
Nani̱vi kísa káꞌno na yóꞌó,
ta síkón ní ñato̱ꞌó kómí ún,
ta ña káꞌno ní kúu ndee̱ ún.
4 Nda̱tán ndeé xíno ndoso takuií kua̱ꞌa̱ ní,
ta o̱n ki̱ví koo ya̱a̱ rá,
saá yóo yóꞌó;
chi o̱n vása ní‑kisa to̱ꞌó ún yi̱ꞌi̱,
yi̱ꞌi̱ ta̱a ta̱ kúu yivá ún,
ta nda̱a ún no̱o̱ xi̱to i̱,
ta ni̱ki̱si̱n ún xíꞌin ñii ñásíꞌí i̱.
Ña ke̱ꞌé ún saá ki̱sa kini xíꞌin mi̱i ún,
ta o̱n vása kuu ka̱ ún sa̱ꞌya i̱ ta̱no̱ó.
5 Ta ndóꞌó,
ta̱Simeón xíꞌin ta̱Leví,
ñii ñani kúu ndó;
ndíso ndó espada si̱i̱n,
ta kama sándiꞌi ndó xa̱ꞌa̱ inka̱ ni̱vi.
6 Ndiꞌi ña káꞌa̱n ndó ta nákoo yuꞌú ndó kasa ndivi ndó,
o̱n vása kóni i̱ koni̱ so̱ꞌo i̱ ña,
ni o̱n vása yóo níma̱ i̱ xíꞌin ndó.
Saá chi xa̱ꞌa̱ ña ndasaá ni̱saa̱ kuiti ndó,
ta xa̱ꞌni ndó ni̱vi,
ta xa̱ꞌa̱ ña kúsii̱ kuiti ini ndó,
ta ni̱xaꞌno ndó xa̱ꞌa̱ kua̱ꞌa̱ ní si̱ndi̱ki̱.
7 Ña ni̱tavi chiꞌña kúu ñasáa̱ ndó,
chi ndiva̱ꞌa ní kini sáa̱ ndó.
Yi̱ꞌi̱ káꞌa̱n i̱ kui̱ta̱ níꞌnó ndiꞌi sa̱ꞌya ñani síkuá ndó ndiꞌi saá xiiña no̱o̱ ñoꞌo̱ Israel.
8 Ta yóꞌó,
ta̱Judá,
kundeé ún no̱o̱ ndiꞌi ni̱vi na sáa̱ ini xíni yóꞌó.
Ndiꞌi nañani ún kasa káꞌno na yóꞌó,
ta kuxítí na no̱o̱ ún.
9 Yóꞌó,
ta̱Judá,
sa̱ꞌya mi̱i i̱,
nda̱tán yóo ñii tíleón loꞌo,
saá yóo ún,
ta saá kutaku̱ nasa̱ꞌya ñani síkuá ún.
Saá chi ñii tíleón sándiꞌi rí xáxi rí tí xa̱ꞌni rí,
ta kándúꞌu̱ rí a̱nda̱ no̱o̱ ñoꞌo̱.
Ta saá nda̱ ñii ni̱vi o̱n vása kua̱ꞌa̱n na sandiꞌi na tíyóꞌo.
10 A̱nda̱ ñii ni̱vi o̱n kuchiño kindaa na ndee̱ ndaꞌa̱ yóꞌó ta̱Judá,
ni ndaꞌa̱ nasa̱ꞌya ñani síkuá ún,
o̱n kóo na kuchiño kindaa ta̱to̱n tón níꞌi ndó,
chi kúu nó tón sánáꞌa ndí kómí ndó nda̱yí;
saá koo a̱nda̱ ki̱vi̱ kixaa̱ mi̱i ta̱káꞌno ta̱ kómí ndiꞌi nda̱yí,
ta ndiꞌi ni̱vi kuyatin na no̱o̱ ra ña kasa ndivi na ña kóni ra.
11 Ta o̱n kundiꞌi ini ta̱yóꞌo xa̱ꞌa̱ ña koni̱ ñóꞌó ra,
ta ki̱vi̱ ña va̱xi katón ndaa ra tíburro loꞌo sa̱na̱ ra yito̱n tón uva,
no̱o̱ kóon tíuva tí va̱ꞌa ní livi,
ta nda̱ kuchiño nakata ra tiko̱to̱ ra xíꞌin nduta̱ tíuva,
saá chi kui̱na̱ ní tíuva no̱o̱ ñoꞌo̱ ra.
12 Ta nduchu̱ no̱o̱ ra,
to̱ón ní ña,
nda̱tán yóo ña kuáꞌá to̱ón nduta̱ tíuva,
saá yóo nduchu̱ no̱o̱ ra.
Ta no̱ꞌo ra,
yaa ní ka̱ yóo ña no̱o̱ ña yaa ní leche.
13 Ta yóꞌó,
ta̱Zabulón,
nasa̱ꞌya ñani síkuá ún kuu na kutaku̱ yatin yuꞌu̱ takuií mi̱ni,
no̱o̱ va̱ꞌa kivi kuita barco tón náꞌno.
Ta no̱o̱ xáꞌñó ñoꞌo̱ na,
xaa̱ ña a̱nda̱ ñoo Sidón.
14 Ta yóꞌó,
ta̱Isacar,
nda̱tán yóo ñii burro tí ndeé ní,
ta kándúꞌu̱ rí kísi̱n rí no̱o̱ kísi̱n tíkiti̱,
saá kutaku̱ nasa̱ꞌya ñani síkuá ún.
15 Tá kúnda̱a̱ ini rí ndí ña nakindée kúu ñava̱ꞌa,
ta va̱ꞌa ní no̱o̱ ñoꞌo̱ no̱o̱ kíndo̱o rí,
ta saá taxi rí mi̱i rí ña kuiso rí ñaveé
ta chikaa̱ ini rí kasa chiño rí chiño veé no̱o̱ nanáꞌno,
saá kutaku̱ nasa̱ꞌya ñani síkuá ún.
16 Ta yóꞌó,
ta̱Dan,
kaꞌnda chiño ún xíꞌin ñanda̱a̱ no̱o̱ naveꞌe mi̱i ún,
na kúu ñii tiꞌvi ni̱vi ti̱xin na u̱xu̱ o̱vi̱ tiꞌvi kúu naIsrael.
17 Ta yóꞌó,
ta̱Dan,
nasa̱ꞌya ñani síkuá ún kutaku̱ na nda̱tán yóo ñii ko̱o̱ tí xati̱,
tí kándúꞌu̱ yuꞌu̱ yichi̱,
ta kaxi rí xa̱ꞌa̱ tíkuáyí,
ta tíkuáyí yóꞌo sanakava rí ta̱a ta̱ yóso ñaꞌá
―káchí ta̱Jacob.
18 Ta ni̱ka̱ꞌa̱n ta̱Jacob xíꞌin Ndios,
káchí ra saá:
“Tata Ndios,a
yóo i̱ ndáti ka̱ i̱ ña saka̱ku ún yi̱ꞌi̱.”
19 Ta tuku ni̱ka̱ꞌa̱n ra xíꞌin sa̱ꞌya ra,
káchí ra saá:
Ta yóꞌó,
ta̱Gad,
tiꞌvi náꞌno nata̱a nakuíꞌná kixaa̱ na kani na nasa̱ꞌya ñani síkuá ún,
ta nasa̱ꞌya ñani síkuá ún kundiko̱n na sa̱ta̱ na kani ñaꞌá yóꞌo,
ta taxín ñaꞌá na.
20 Ta yóꞌó,
ta̱Aser,
nasa̱ꞌya ñani síkuá ún kukomí na kua̱ꞌa̱ ní ñaxíxi,
ña va̱ꞌa ní ya̱si̱n nda̱tán yóo ña va̱ꞌa ní ya̱si̱n xíxi narey,
saá koo ña kuxu na.
21 Ta yóꞌó,
ta̱Neftalí,
nda̱tán yóo ñii yusu siꞌí tí xíka ndíka̱,
saá kutaku̱ nasa̱ꞌya ñani síkuá ún,
ta ka̱ꞌa̱n na kua̱ꞌa̱ ní to̱ꞌon ndíchí ña livi ní.
22 Ta yóꞌó,
ta̱José,
nda̱tán yóo ñii yito̱n tón uva tón ñíndichi no̱o̱ yóo takuií,
ta kóon ní kui̱ꞌi ndaꞌa̱ nó,
ta nda̱ nándoso̱ ndaa ndaꞌa̱ nó sa̱ta̱ na̱ma̱,
saá koo ún.
23 Ta nasa̱ꞌya ñani síkuá ún,
ni̱vi na sáa̱ ini xíni ñaꞌá,
kani táꞌan na xíꞌin na,
ta na sáa̱ ini yóꞌo xíꞌin kuxu̱n kiní na nasa̱ꞌya ñani síkuá ún,
ta ndiꞌi saá ki̱vi̱ sandiꞌi na ini nasa̱ꞌya ñani síkuá ún.
24 Ta nasa̱ꞌya ñani síkuá ún kukomí na ndaꞌa̱ ndeé ní,
ta ñii toon tiin na yito̱n tón kuxu̱n na,
chi kukomí na ndee̱ Ndios Ta̱a ta̱Káꞌno no̱o̱ i̱.
Chi Ndios kúu ta̱a ta̱ ndáa nañoo Israel,
nda̱tán ndáa ñii ta̱a ndikachi sa̱na̱ ra.
Nda̱tán yóo ñii yu̱u̱ káꞌno kútu̱ no̱o̱ kúchiño ko̱ꞌo̱n seꞌé ni̱vi no̱o̱ na kóni sandiꞌi xa̱ꞌa̱ na,
saá yóo Ndios no̱o̱ nañoo Israel.
25 Ta Ndios ta̱a ta̱káꞌno no̱o̱ i̱,
ná chindeé ra yóꞌó xíꞌin nasa̱ꞌya ñani síkuá ún,
ta mi̱i Ndios yóꞌo,
ta̱ Kómí Ndiꞌi Ndee̱,
ná taxi ra ñava̱ꞌa ndaꞌa̱ ndó.
Ná taxi ra ñava̱ꞌa ña kíxi ñoyívi ni̱no ndaꞌa̱ ndó,
ná taxi ra ñava̱ꞌa ña kíxi no̱o̱ kónó ní ndaꞌa̱ ndó,
ta ná kaku kua̱ꞌa̱ ní sa̱ꞌya ndó,
ta kiti̱ sa̱na̱ ndó ná kui̱na̱ kua̱ꞌa̱ ní sa̱ꞌya rí.
26 Ta yi̱ꞌi̱,
ta̱a ta̱ kúu yivá ún,
ni̱ka̱ꞌa̱n i̱ to̱ꞌon ña va̱ꞌa ní ka̱ xa̱ꞌa̱ ndó
no̱o̱ to̱ꞌon ña ni̱ka̱ꞌa̱n yivá i̱ xa̱ꞌa̱ mi̱i i̱.
Vará nda̱ yuku̱ náꞌno ní kivi ndiꞌi xa̱ꞌa̱ ña,
ta to̱ꞌon va̱ꞌa yóꞌo koo ña xíꞌin yóꞌó ta̱José,
ta xíꞌin nasa̱ꞌya ñani síkuá ún ndiꞌi saá ki̱vi̱ va̱xi,
chi Ndios na̱ka̱xin ra yóꞌó ti̱xin nañani ún,
kúu ún ta̱a ta̱káꞌno.
27 Ta yóꞌó,
ta̱Benjamín,
nda̱tán yóo ñii ndiva̱ꞌyí tí kama ní ta tí kue̱ꞌe̱ ní,
ta ña xita̱a̱n xáxi rí tí xa̱ꞌni rí
ta xikuaa nátaꞌví rí ña kíndo̱o xáxi rí xíꞌin títáꞌan rí,
saá koo nasa̱ꞌya ñani síkuá ún
―káchí ta̱Jacob.
28 Ta ñayóꞌo kúu to̱ꞌon ni̱ka̱ꞌa̱n ta̱Jacob xíꞌin ñii ñii na u̱xu̱ o̱vi̱ sa̱ꞌya ra na nduu u̱xu̱ o̱vi̱ tiꞌvi ni̱vi nañoo Israel.
Ta ni̱ka̱ꞌa̱n ra to̱ꞌon ña nda̱to̱ꞌon xa̱ꞌa̱ nda̱tán yóo mi̱i níma̱ ñii ñii nasa̱ꞌya ra.
Ñayóꞌo káꞌa̱n xa̱ꞌa̱ ña ni̱xiꞌi̱ ta̱Jacob
29 Ta ta̱Jacob xa̱ꞌnda chiño ra no̱o̱ nasa̱ꞌya ra,
káchí ra saá:
―Nasa̱ꞌya i̱,
nda̱ saloꞌo kuiti kúmáni̱,
ta kixaa̱ ña kivi̱ i̱.
Ta káꞌa̱n i̱ xíꞌin ndó,
sandúxu̱n ndó yi̱ꞌi̱ mi̱i kavua̱ no̱o̱ ni̱ndu̱xu̱n naxi̱i̱ síkuá i̱.
30 Kavua̱ yóꞌo nákaa̱ ña no̱o̱ ñoꞌo̱ Canaán;
ta yóo ña ñii xiiña na̱ní Macpela,
ña xíto ndaa ñoo Mamre.
Ta ta̱Abraham ta̱ xi̱kuu xi̱i̱ mi̱i i̱,
no̱o̱ ta̱Efrón ta̱sa̱ꞌya ñani síkuá ta̱Het,
sa̱ta ra kavua̱ yóꞌo xíꞌin ñoꞌo̱ no̱o̱ yóo ña,
xa̱ꞌa̱ ña ndu̱xu̱n naveꞌe ra.
31 Ti̱xin kavua̱ yóꞌo ni̱ndu̱xu̱n ta̱Abraham xíꞌin ñásíꞌí ra ñáSara,
xíꞌin sa̱ꞌya ra ta̱Isaac yivá i̱,
ta xíꞌin ñásíꞌí ra ñá kúu siꞌí i̱ ñáRebeca,
ta kavua̱ yóꞌo yi̱ꞌi̱ sa̱ndúxu̱n i̱ ñásíꞌí i̱ ñáLea.
32 Ñoꞌo̱ yóꞌo xíꞌin kavua̱ ña yóo no̱o̱ ña kúu ña sa̱ta ta̱Abraham no̱o̱ nasa̱ꞌya ñani síkuá ta̱Het ―káchí ta̱Jacob xíꞌin nata̱a sa̱ꞌya ra.
33 Tá ta̱Jacob sa̱ndiꞌi ra ni̱ka̱ꞌa̱n ra to̱ꞌon yóꞌo xíꞌin nasa̱ꞌya ra,
ta na̱chiso ra xa̱ꞌa̱ ra no̱o̱ xi̱to,
ta ni̱xiꞌi̱ ra.