Ñayóꞌo káꞌa̱n, ta̱Jacob ndu̱kú ra ñava̱ꞌa no̱o̱ Ndios xa̱ꞌa̱ ta̱Efraín ta xa̱ꞌa̱ ta̱Manasés
48
Loꞌo ki̱vi̱ ni̱yaꞌa,
ta ta̱José xi̱ni̱ so̱ꞌo ra ndí ndeé ní ndóꞌo yivá ra.
Ta saá ta̱José kua̱ꞌa̱n ra koto ra yivá ra,
ta kua̱ꞌa̱n o̱vi̱ sa̱ꞌya ra ta̱Manasés xíꞌin ta̱Efraín xíꞌin ra,
ta ni̱xaa̱ na no̱o̱ ta̱Jacob.
2 Ta na ndóo xíꞌin ta̱Jacob nda̱to̱ꞌon na xíꞌin ra,
káchí na saá:
―Xa ki̱xaa̱ sa̱ꞌya ún ta̱José ña koto ra yóꞌó,
tata ―káchí na.
Ta saá ta̱Jacoba chi̱kaa̱ ra ndee̱ ña ndaníꞌi xíꞌin mi̱i ra,
ta ku̱ndeé ra xi̱koo ra no̱o̱ xi̱to ra.
3 Ta nda̱to̱ꞌon ra xíꞌin ta̱José,
káchí ra saá:
―Tata Ndios ta̱ Kómí Ndiꞌi Ndee̱,
ñii ki̱vi̱ xi̱na̱ꞌá na̱ti̱vi ra no̱o̱ i̱ ñii ñoo na̱ní Luz,
ña nákaa̱ no̱o̱ ñoꞌo̱ Canaán,
ta ni̱ka̱ꞌa̱n ra ñava̱ꞌa xíꞌin i̱,
4 ka̱chí ra to̱ꞌon yóꞌo:
“Yi̱ꞌi̱ taxi i̱ ña koo kua̱ꞌa̱ ní sa̱ꞌya ún,
ta sa̱ꞌya ñani síkuá ún to̱nda̱a na kuu na kua̱ꞌa̱ ní ñoo náꞌno.
Ta taxi i̱ ñoꞌo̱ yóꞌo ndaꞌa̱ nasa̱ꞌya ñani síkuá ún ña kuu ña ñoꞌo̱ mi̱i na ndiꞌi saá kui̱ya̱ ña va̱xi”,
ka̱chí Ndios xíꞌin i̱.
5 Ta vitin káꞌa̱n i̱ xíꞌin yóꞌó,
sa̱ꞌya i̱ ta̱José,
ndí sa̱ꞌya ún ta̱Efraín xíꞌin ta̱Manasés na ka̱ku no̱o̱ ñoꞌo̱ Egipto yóꞌo ki̱vi̱ o̱n ta̱ꞌán ka̱ kixi i̱ nakutáꞌan yó,
ta o̱vi̱ nasa̱ꞌya yóꞌo vitin kúu na kuenda mi̱i i̱,
ta nda̱tán yóo sa̱ꞌya mi̱i i̱,
saá yóo na no̱o̱ i̱,
ta ñii ki̱ꞌva nda̱tán yóo sa̱ꞌya i̱ ta̱Rubén xíꞌin ta̱Simeón,
saá yóo na.
6 Táná koo nasa̱ꞌya ún na kaku ki̱vi̱ va̱xi,
nayóꞌo kuu sa̱ꞌya mi̱i ún,
ta nayóꞌo nakiꞌin na ñii táꞌví ñoꞌo̱ ña nakiꞌin ta̱Efraín xíꞌin ta̱Manasés.
7 Saá chi ñii ki̱vi̱ xi̱na̱ꞌá ke̱e i̱ ñoo Padan‑aram ta kua̱ꞌa̱n noꞌo̱ i̱,
ta ni̱xiꞌi̱ ñásíꞌí i̱ ñáRaquel no̱o̱ ñoꞌo̱ Canaán,
ñii xiiña ña yóo yatin ñoo Efrata.
Ta sa̱ndúxu̱n i̱ ñáyóꞌo yuꞌu̱ yichi̱ ña kua̱ꞌa̱n ñoo Efrata,
ta vitin ñoo yóꞌo na̱ní ña Belén ―káchí ta̱Jacob xíꞌin ta̱José.
8 Ta ta̱Jacob xi̱ni ra sa̱ꞌya ta̱José,
ta ni̱nda̱ka̱ to̱ꞌon ñaꞌá ra:
―Ta nayóꞌo,
¿yu kúu na?
―káchí ra.
9 ―Tata yivá i̱,
nayóꞌo kúu sa̱ꞌya i̱ na ta̱xi Ndios ndaꞌa̱ i̱ no̱o̱ ñoꞌo̱ Egipto ―nda̱kuii̱n ta̱José.
Ta saá ni̱ka̱ꞌa̱n yivá ra xíꞌin ra,
káchí ra:
―Ná kixi yatin na no̱o̱ i̱ ña ndukú i̱ ñava̱ꞌa no̱o̱ Ndios xa̱ꞌa̱ na.
10 Ta ta̱Jacob ta̱ xa xi̱kua̱ꞌa̱ ní kúu ra,
ta saá loꞌo ní tívi nduchu̱ no̱o̱ ra koto ra,
ta saá ta̱José sa̱kuyatin ra na o̱vi̱ ta̱a sa̱ꞌya ra no̱o̱ yivá ra,
ta ta̱Jacob ni̱chi̱to ra no̱o̱ na ta no̱mi ra na.
11 Ta ni̱ka̱ꞌa̱n ra xíꞌin ta̱José,
káchí ra saá:
―Sa̱ꞌya i̱ José,
o̱n vása ka̱ ní‑xani si̱ni̱ i̱ koni i̱ no̱o̱ ún,
ta vitin Ndios ta̱xi ra ña va̱ꞌa xíni i̱ no̱o̱ sa̱ꞌya ún ta no̱o̱ mi̱i ún ―káchí ra.
12 Ta ta̱José sa̱kutaꞌa loꞌo ra na o̱vi̱ ta̱a sa̱ꞌya ra no̱o̱ kándúꞌu̱ yivá ra,
ta xi̱kuxítí ra a̱nda̱ ni̱to̱nda̱a ta̱ꞌya̱ ra no̱o̱ ñoꞌo̱.
13 Ta saá na̱kundichi ta̱José ta ti̱in ra ndaꞌa̱ o̱vi̱ saá sa̱ꞌya ra;
xíꞌin ndaꞌa̱ kuaꞌá ra ti̱in ra ta̱Efraín,
ta xíꞌin ndaꞌa̱ yitin ra ti̱in ra ta̱Manasés,
ta tuku sa̱kuyatin ra nayóꞌo no̱o̱ yivá ra.
Ta ta̱Efraín ki̱ndo̱o ra ndaꞌa̱ yitin ta̱Jacob,
ta ta̱Manasés ki̱ndo̱o ra chí ndaꞌa̱ kuaꞌá ta̱Jacob.
14 Ta sa̱nakaa̱ ta̱Jacob ndaꞌa̱ ra,
ta na̱sama táꞌan o̱vi̱ saá ndaꞌa̱ ra,
ta chi̱nóo ra ndaꞌa̱ kuaꞌá ra si̱ni̱ ta̱Efraín ta̱ kúu ta̱o̱vi̱,
ta ndaꞌa̱ yitin ra chi̱nóo ra si̱ni̱ ta̱Manasés vará ta̱no̱ó kúu ta̱yóꞌo.
15 Ta saá ta̱Jacob ndu̱kú ra ñava̱ꞌa no̱o̱ Ndios xa̱ꞌa̱ ta̱José,
káchí ra saá:
Tata Ndios,
ta̱káꞌno no̱o̱ xi̱i̱ i̱ ta̱Abraham,
ta ta̱káꞌno no̱o̱ yivá i̱ ta̱Isaac,
ta yóꞌó kúu ta̱a ta̱ ndáa yi̱ꞌi̱ nda̱ ki̱vi̱ ka̱ku i̱ ta̱nda̱ ki̱vi̱ vitin.
16 Nda̱tán náꞌa ñii ñaángel,
saá xi̱naꞌa ún na̱ti̱vi ún no̱o̱ i̱,
ta chíndeé ún yi̱ꞌi̱ ña káku i̱ no̱o̱ ndiꞌi ña o̱n váꞌa.
Ta vitin ndúkú i̱ no̱o̱ ún ña ná keꞌé ún ñava̱ꞌa xíꞌin o̱vi̱ ta̱yóꞌo.
Xa̱ꞌa̱ o̱vi̱ ta̱yóꞌo va̱ꞌa ná nakáꞌán ni̱vi ki̱vi̱ i̱,
ta ná nakáꞌán na ki̱vi̱ xi̱i̱ i̱ ta̱Abraham,
ta ná nakáꞌán na ki̱vi̱ yivá i̱ ta̱Isaac.
Ná to̱nda̱a o̱vi̱ nata̱a yóꞌo kukomí na kua̱ꞌa̱ ní sa̱ꞌya na,
ta ná kutaku̱ sa̱ꞌya na ndiꞌi saá xiiña ñoyívi yóꞌo,
káchí ta̱Jacob,
ndu̱kú ra ñava̱ꞌa xa̱ꞌa̱ o̱vi̱ ta̱a sa̱ꞌya ta̱José.
17 Ta ta̱José o̱n vása ní‑kusii̱ ini ra ña chi̱nóo yivá ra ndaꞌa̱ kuaꞌá ra si̱ni̱ ta̱Efraín,
ta saá ti̱in ra ndaꞌa̱ yivá ra,
ta kóni ra chinóo ra ndaꞌa̱ yóꞌo si̱ni̱ ta̱Manasés,
18 ta káchí ra saá:
―Óꞌon,
tata,
o̱n váꞌa saá.
Ta̱yóꞌo kúu ta̱no̱ó.
Chinóo ún ndaꞌa̱ kuaꞌá ún si̱ni̱ ta̱yóꞌo ―káchí ra.
19 Ta yivá ra ni̱‑xiin ra kasa ndivi ra saá,
ta nda̱kuii̱n ra,
káchí ra:
―Xa xíni̱ va i̱,
sa̱ꞌya mi̱i i̱.
Xa xíni̱ va i̱.
Tuku ta̱Manasés yóꞌo to̱nda̱a ra kuu ra ñii ñoo ña xíni̱ ñóꞌó ní.
Ta saá ni,
ñani ra ta̱loꞌo kuu ra ta̱ ndeé ní ka̱ koni̱ ñóꞌó no̱o̱ ta̱yóꞌo,
ta sa̱ꞌya ñani síkuá ta̱loꞌo yóꞌo to̱nda̱a na kuu na kua̱ꞌa̱ ní ñoo náꞌno ―káchí ta̱Jacob.
20 Tá mií ki̱vi̱ yóꞌo ña kúu ki̱vi̱ ndu̱kú ta̱Jacob no̱o̱ Ndios ñava̱ꞌa xa̱ꞌa̱ na o̱vi̱ ta̱a yóꞌo,
saá tuku ni̱ka̱ꞌa̱n ra ñava̱ꞌa xa̱ꞌa̱ na,
káchí ra saá:
Ki̱vi̱ ña va̱xi tá nañoo Israel ndukú na ñava̱ꞌa no̱o̱ Ndios xa̱ꞌa̱ inka̱ ni̱vi,
ta kachí na saá:
“Ná keꞌé Ndios ñava̱ꞌa xíꞌin ndó,
nda̱tán ke̱ꞌé ra xíꞌin ta̱Efraín ta ke̱ꞌé ra xíꞌin ta̱Manasés”,
kachí na.
Saá ke̱ꞌé ta̱Jacob,
sa̱nduu ra ta̱Efraín ta̱ káꞌno ka̱ no̱o̱ ta̱Manasés.
21 Ta saá ni̱ka̱ꞌa̱n ra xíꞌin ta̱José,
káchí ra:
―Koto va̱ꞌa ún,
yi̱ꞌi̱ ndixa va̱xi kuyatin kivi̱ i̱;
ta Ndios koo ra xíꞌin ndó,
ta taxi ra ko̱ꞌo̱n ndó ñoo naxi̱i̱ síkuá yó.
22 Loꞌo ka̱ ñoꞌo̱ chínóo i̱ táxi i̱ ndaꞌa̱ yóꞌó no̱o̱ ña taxi i̱ ndaꞌa̱ nañani ún;
ndaꞌa̱ yóꞌó táxi i̱ ñoꞌo̱ ña ki̱ndaa i̱ ndaꞌa̱ naAmor ki̱vi̱ ka̱ni táꞌan i̱ xíꞌin na ―káchí ta̱Jacob xíꞌin ta̱José.