4 Tá ni̱xi̱no̱ u̱ni̱ si̱ko̱ u̱xu̱ ki̱vi̱ yóꞌo,

ta ta̱José ni̱ka̱ꞌa̱n ra xíꞌin na veꞌe chiño ta̱Faraón,

káchí ra saá:

―Mi̱i ndóꞌó tata,

tá va̱ꞌa kóni ini ndó xíni ndó yi̱ꞌi̱,

ta ndúkú i̱ no̱o̱ ndó keꞌé ndó ñava̱ꞌa xíꞌin i̱ ka̱ꞌa̱n ndó xíꞌin ta̱Faraón.

5 Kachí ndó saá xíꞌin ra:

“Tata Faraón,

ta̱José káchí ra saá xíꞌin ún:

Tata Faraón,

tá o̱n ta̱ꞌán ka̱ kivi̱ yivá i̱,

ta ni̱ka̱ꞌa̱n ra xíꞌin i̱ ña chi̱náꞌa i̱ no̱o̱ ra ña sandúxu̱n i̱ yi̱kí ko̱ñu ra ti̱xin kavua̱ ña ki̱sa ndivi mi̱i ra ña yóo no̱o̱ ñoꞌo̱ Canaán.

Xáku ndáꞌví i̱ no̱o̱ ún ña taxi ún ko̱ꞌo̱n i̱ sandúxu̱n i̱ yivá i̱;

tá ndi̱ꞌi sa̱ndúxu̱n i̱ yi̱kí ko̱ñu ra ta ndikó i̱ xíꞌin ún,

káchí ta̱José”,

kachí ndó xíꞌin ta̱Faraón ―káchí ta̱José xíꞌin na veꞌe chiño.

6 Nda̱tán yóo ña ni̱ka̱ꞌa̱n ta̱José xíꞌin na veꞌe chiño,

saá ni̱ka̱ꞌa̱n na xíꞌin ta̱Faraón.

Ta nda̱kuii̱n ta̱Faraón,

káchí ra:

―Saá ka̱ꞌa̱n ndó xíꞌin ta̱José:

“Tata,

va̱ꞌa kuáꞌa̱n ún sandúxu̱n ún yi̱kí ko̱ñu yivá ún,

nda̱tán yóo ña ndu̱kú ra ña chi̱náꞌa ún no̱o̱ ra” ―káchí ra.

7 Ta saá ta̱José ke̱e ra kua̱ꞌa̱n ra ña sandúxu̱n ra yivá ra,

ta na kua̱ꞌa̱n xíꞌin ra kúu ndiꞌi na kísa chiño xíꞌin ta̱Faraón,

xíꞌin ndiꞌi nanáꞌno no̱o̱ ñoꞌo̱ Egipto,

8 xíꞌin ndiꞌi na kísa chiño veꞌe ta̱Jacob,

xíꞌin naveꞌe ta̱José ta xíꞌin naveꞌe nata̱a ñani ra,

kua̱ꞌa̱n ndiꞌi na xíꞌin ra.

Ndasaá kuiti naválí ni̱ndo̱o no̱o̱ ñoꞌo̱ Gosén xíꞌin kiti̱ tí kúu si̱ndi̱ki̱ ta xíꞌin ndikachi ta xíꞌin ti̱súꞌu̱.

9 Ta kua̱ꞌa̱n na xíꞌin ta̱José,

ni̱vi xíꞌin carreta,

ta ni̱vi na yóso kuáyí,

ta ndiꞌi nayóꞌo kua̱ꞌa̱ ní ni̱vi xi̱kuu na.

10 Ta ni̱xaa̱ na ñii xiiña no̱o̱ kísa ndivi ni̱vi trigo,

ta xiiña yóꞌo na̱ní Atad,

ta ñayóꞌo nákaa̱ ña yatin yu̱ta Jordán.

Ta saá na̱kutáꞌan ndiꞌi na yóꞌo,

ta ki̱xáꞌá ta̱José kúchuchú ní ini ra ta xáku ní ra.

Ñii ki̱ꞌva saá kúchuchú ini ndiꞌi na yóo xíꞌin ra ta xáku ndiꞌi na,

ta u̱xa̱ ki̱vi̱ ni̱xi̱yo na saá xa̱ꞌa̱ ña ni̱xiꞌi̱ ta̱Jacob.

11 Tá ni̱vi naCanaán na táku̱ yatin yóꞌo xi̱ni na ñayóꞌo,

ta ni̱ka̱ꞌa̱n na xíꞌin táꞌan na,

káchí na saá:

―Ndeé ní chúchú xáku naEgipto xa̱ꞌa̱ ñii ni̱vi ni̱xiꞌi̱ ―káchí na.

Ta saá ni̱vi naCanaán yóꞌo sa̱kunaní na xiiña yóꞌo Abel‑mizraim,^b

ta nákaa̱ ña yatin yu̱ta Jordán.

12 Nasa̱ꞌya ta̱Jacob ki̱sa ndivi na xíꞌin yivá na ndiꞌi ña ndu̱kú ra no̱o̱ na.

13 Ndíso na yi̱kí ko̱ñu ra ni̱xa̱ꞌa̱n na nda̱ no̱o̱ ñoꞌo̱ Canaán,

ta sa̱ndúxu̱n na ña ti̱xin kavua̱ ña nákaa̱ ñii xiiña na̱ní Macpela,

ña sa̱ta ta̱Abraham no̱o̱ sa̱ꞌya ñani síkuá ta̱Het ta̱ na̱ní Efrón ña ndu̱xu̱n yi̱kí ko̱ñu naveꞌe ra.

Ñoꞌo̱ yóꞌo xíꞌin kavua̱ ña yóo no̱o̱ ña,

nákaa̱ ña yatin ñoo Mamre.

14 Tá ndi̱ꞌi sa̱ndúxu̱n na yi̱kí ko̱ñu yivá na,

ta ta̱José ndi̱kó ra no̱o̱ ñoꞌo̱ Egipto xíꞌin ndiꞌi nañani ra ta xíꞌin ndiꞌi inka̱ na ni̱xa̱ꞌa̱n xíꞌin ra.

15 Ta vitin ña o̱n vása táku̱ ka̱ yivá na ta̱Jacob,

ta nañani ta̱José xáni si̱ni̱ na,

ta káꞌa̱n na xíꞌin táꞌan na:

―Vitin ta̱José kusaa̱ ini ra koni ra mi̱i yó,

ta yi̱yo ní kixáꞌá ra saxo̱ꞌvi̱ ra mi̱i yó xa̱ꞌa̱ ndiꞌi ña o̱n váꞌa ke̱ꞌé yó xíꞌin ra.

16 Ta saá ti̱ꞌví na to̱ꞌon ña ka̱ꞌa̱n na xíꞌin ta̱José,

káchí na saá:

―Tata,

siꞌna tá o̱n ta̱ꞌán ka̱ kivi̱ yivá yó,

xa̱ꞌnda chiño ra no̱o̱ ndi̱ ña ka̱ꞌa̱n ndi̱ xíꞌin ún to̱ꞌon mi̱i ra,

ña ka̱chí saá:

17 “Xáku ndáꞌví i̱ no̱o̱ ún,

ña kasa káꞌno ini ún xa̱ꞌa̱ kua̱chi nañani ún ña kúu ña o̱n váꞌa ke̱ꞌé na xíꞌin ún”,

ka̱chí yivá yó.

Ta saá xáku ndáꞌví ndi̱ no̱o̱ ún,

ná kasa káꞌno ini ún xa̱ꞌa̱ ña o̱n váꞌa ke̱ꞌé ndi̱ xíꞌin ún,

chi ndi̱ꞌi̱ kúu na kísa chiño no̱o̱ Ndios,

ta̱a ta̱káꞌno no̱o̱ yivá yó ―saá káꞌa̱n to̱ꞌon ti̱ꞌví na.

Tá mií xi̱ni̱ so̱ꞌo ta̱José ñayóꞌo,

ta ki̱xáꞌá ra kúchuchú ini ra ta xáku ní ra.

18 Ta saá ki̱xaa̱ ndiꞌi nañani mi̱i ta̱José no̱o̱ ra,

ta xi̱kuxítí na a̱nda̱ ni̱to̱nda̱a ta̱ꞌya̱ na no̱o̱ ñoꞌo̱,

ta ni̱ka̱ꞌa̱n na xíꞌin ra,

káchí na saá:

―Koto,

tata,

ndi̱ꞌi̱ kúu nata̱a na kísa chiño no̱o̱ ún ―káchí na xíꞌin ra.

19 Ta ta̱José nda̱kuii̱n ra,

káchí ra xíꞌin na:

―Ndóꞌó nañani i̱,

o̱n kuyi̱ꞌví ndó no̱o̱ i̱.

O̱n si̱ví chiño no̱o̱ mi̱i i̱ kúu ña kasa nani i̱ xa̱ꞌa̱ kua̱chi ndó.

Saá chi ñii la̱á Ndios kómí nda̱yí kasa nani ra xa̱ꞌa̱ kua̱chi ni̱vi.

20 Xi̱na̱ꞌá ndóꞌó xa̱ni si̱ni̱ ndó ña o̱n váꞌa,

ta ke̱ꞌé ndó ña o̱n váꞌa xíꞌin i̱,

ta Ndios sa̱ma ra ña o̱n váꞌa yóꞌo,

ta nda̱sa ra ña ñii ñava̱ꞌa ña xíto yó vitin.

Ta ñava̱ꞌa yóꞌo kúu ña sa̱ka̱ku ra kua̱ꞌa̱ ní ni̱vi ta o̱n vása ní‑xiꞌi̱ na xíꞌin so̱ko.

21 Ta saá vitin o̱n kuyi̱ꞌví ndó no̱o̱ i̱.

Yi̱ꞌi̱ kundaa i̱ ndóꞌó,

ta taxi i̱ ña kuxu ndó xíꞌin sa̱ꞌya ndó ―káchí ra.

Ta saá ta̱José sa̱ndúva̱ꞌa ra ini nata̱a ñani ra,

chi xíꞌin ndinoꞌo ini ra ni̱ka̱ꞌa̱n ra to̱ꞌon yóꞌo xíꞌin na.

22 Ta ta̱José xíꞌin naveꞌe yivá ra ki̱ndo̱o na táku̱ na no̱o̱ ñoꞌo̱ Egipto.

Ta̱José xi̱taku̱ ra ñii ciento u̱xu̱ kui̱ya̱,

23 ta ku̱chiño ra ni̱to̱nda̱a ra xi̱ni ra sa̱ꞌya ñani síkuá ta̱Efraín.

Ta ta̱José,

nda̱tán sa̱ꞌya mi̱i ra ndu̱u nasa̱ꞌya ta̱Maquir,

ta̱ kúu sa̱ꞌya ta̱Manasés.

24 Ñii ki̱vi̱ ta̱José ni̱ka̱ꞌa̱n ra xíꞌin nañani ra,

káchí ra saá:

―Ndá saloꞌo kuiti kúmáni̱,

ta kivi̱ i̱,

ta ndixa Ndios koo ra xíꞌin ndó ta chindeé ra ndóꞌó,

ta tava ra ndóꞌó ñoo yóꞌo ña ko̱ꞌo̱n ndó xíꞌin ra ta xaa̱ ndó no̱o̱ ñoꞌo̱ ña ni̱ka̱ꞌa̱n ra ki̱ndo̱o ra taxi ra ndaꞌa̱ ta̱Abraham,

ta ndaꞌa̱ ta̱Isaac,

ta ndaꞌa̱ ta̱Jacob ―káchí ta̱José xíꞌin na.

25 Ta ta̱José ndu̱kú ra no̱o̱ nañani ra ña chináꞌa na no̱o̱ ra,

ña kasa ndivi na ña ndukú ra no̱o̱ na,

ta káchí ra saá xíꞌin na:

―Ndóꞌó nañani i̱,

ndixa Ndios koo ra xíꞌin ndó ta chindeé ra ndóꞌó ña kee ndó ñoo yóꞌo.

Tá ki̱vi̱ saá,

ná ko̱ꞌo̱n yi̱kí ko̱ñu i̱ xíꞌin ndó no̱o̱ ñoꞌo̱ Canaán ―káchí ra xíꞌin na.

26 Ta saá ni̱xiꞌi̱ ta̱José no̱o̱ ñoꞌo̱ Egipto,

ta ña xi̱taku̱ ra xi̱kuu ñii ciento u̱xu̱ kui̱ya̱,

ta ki̱sa ta̱ta̱n na yi̱kí ko̱ñu ra ña o̱n ta̱ꞌyi̱ ña,

ta saá chi̱kaa̱ na yi̱kí ko̱ñu ra ini ñii xa̱to̱n.