―¡Jacob!

¡Jacob!

Ta saá nda̱kuii̱n ta̱Jacob,

káchí ra:

―Yóꞌo yóo i̱,

Tata.

3 Ta ni̱ka̱ꞌa̱n Ndios xíꞌin ra,

káchí ra saá:

―Yi̱ꞌi̱ kúu Ndios,

ta̱a ta̱káꞌno no̱o̱ yivá ún.

O̱n kuyi̱ꞌví ún ko̱ꞌo̱n ún no̱o̱ ñoꞌo̱ Egipto,

chi kán taxi i̱ ña nduu nasa̱ꞌya ñani síkuá ún ñii ñoo káꞌno.

4 Ko̱ꞌo̱n i̱ xíꞌin ún no̱o̱ ñoꞌo̱ Egipto,

ta yi̱ꞌi̱,

ñii ki̱vi̱ va̱xi tava i̱ ndiꞌi nasa̱ꞌya ñani síkuá ún ndikó na no̱o̱ ñoꞌo̱ Canaán yóꞌo.

Ta kixaa̱ ki̱vi̱ kivi̱ ún,

ta ta̱José koo ra xíꞌin ún mi̱i ki̱vi̱ yóꞌo ―káchí Ndios.

5 Ta nasa̱ꞌya ta̱Jacob sa̱ndaa na yivá na xíꞌin sa̱ꞌya na,

ta xíꞌin náñaꞌa̱ násíꞌí na ini carreta tón ti̱ꞌví ta̱Faraón ko̱ꞌo̱n na.

Ta saá ta̱Jacob ke̱e ra ñoo Beerseba,

ta kua̱ꞌa̱n ra yichi̱.

6 Ta saá ta̱Jacob xíꞌin ndiꞌi naveꞌe ra kua̱ꞌa̱n na no̱o̱ ñoꞌo̱ Egipto,

ta kua̱ꞌa̱n ndiꞌi kiti̱ sa̱na̱ na,

ta kua̱ꞌa̱n xíꞌin na ndiꞌi ñakuíká xi̱komí na no̱o̱ ñoꞌo̱ Canaán.

7 Ndiꞌi sa̱ꞌya ra,

ta̱a xíꞌin ñaꞌa̱,

xíꞌin sa̱ꞌya ñani ra,

ta̱a xíꞌin ñaꞌa̱,

kua̱ꞌa̱n na xíꞌin ra.

8 Ñayóꞌo kúu ki̱vi̱ nasa̱ꞌya ta̱Jacob xíꞌin nasa̱ꞌya ñani ra,

na kua̱ꞌa̱n xíꞌin ra no̱o̱ ñoꞌo̱ Egipto.

Ta̱Rubén kúu sa̱ꞌya ta̱Jacob ta̱no̱ó.

9 Nasa̱ꞌya ta̱Rubén kúu ta̱Hanoc,

ta̱Falú,

ta̱Hezrón xíꞌin ta̱Carmi.

10 Nasa̱ꞌya ta̱Simeón kúu ta̱Jemuel,

ta̱Jamín,

ta̱Ohad,

ta̱Jaquín,

ta̱Zohar xíꞌin ta̱Saúl;

sa̱ꞌya ñii ñaꞌa̱ ñáCanaán kúu ta̱sondíꞌí yóꞌo.

11 Nasa̱ꞌya ta̱Leví kúu ta̱Gersón,

ta̱Coat xíꞌin ta̱Merari.

12 Nasa̱ꞌya ta̱Judá kúu ta̱Er,

ta̱Onán,

ta̱Sela,

ta̱Fares xíꞌin ta̱Zara.

Ta ta̱Er xíꞌin ta̱Onán xa ni̱xiꞌi̱ na no̱o̱ ñoꞌo̱ Canaán.

Nasa̱ꞌya ta̱Fares kúu ta̱Hezrón xíꞌin ta̱Hamul.

13 Nasa̱ꞌya ta̱Isacar kúu ta̱Tola,

ta̱Fúa,

ta̱Job xíꞌin ta̱Simrón.

14 Nasa̱ꞌya ta̱Zabulón kúu ta̱Sered,

ta̱Elón xíꞌin ta̱Jahleel.

15 Nayóꞌo kúu sa̱ꞌya ñáLea xíꞌin ta̱Jacob kui̱ya̱ xi̱taku̱ na ñoo Padan‑aram,

ta yóo inka̱ sa̱ꞌya na ñáDina.

Ta ndiꞌi sa̱ꞌya na xíꞌin sa̱ꞌya ñani na kúu na o̱ko̱ u̱xu̱ u̱ni̱ ni̱vi,

ta̱a xíꞌin ñaꞌa̱.

16 Nasa̱ꞌya ta̱Gad kúu ta̱Zifión,

ta̱Hagui,

ta̱Ezbón,

ta̱Suni,

ta̱Eri,

ta̱Arodi xíꞌin ta̱Areli.

17 Nasa̱ꞌya ta̱Aser kúu ta̱Imna,

ta̱Isúa,

ta̱Isúi,

ta̱Bería,

xíꞌin ki̱ꞌva̱ na na̱ní ñá Sera.

Nasa̱ꞌya ta̱Bería kúu ta̱Heber xíꞌin ta̱Malquiel.

18 Nayóꞌo kúu sa̱ꞌya ñáZilpa xíꞌin ta̱Jacob.

ÑáZilpa yóꞌo kúu ñá ta̱xi ta̱Labán ndaꞌa̱ sa̱ꞌya ra ñáLea ki̱sa chiño ñá no̱o̱ ñá.

Nasa̱ꞌya na xíꞌin sa̱ꞌya ñani na kúu xa̱ꞌo̱n ñii ni̱vi.

19 Nasa̱ꞌya ñáRaquel,

ñásíꞌí ta̱Jacob kúu ta̱José xíꞌin ta̱Benjamín.

20 Nasa̱ꞌya ta̱José xíꞌin ñásíꞌí ra ñáAsenat kúu ta̱Manasés xíꞌin ta̱Efraín,

na ka̱ku no̱o̱ ñoꞌo̱ Egipto.

ÑáAsenat kúu sa̱ꞌya ta̱Potifera,

ta̱su̱tu̱ ñoo na̱ní On xi̱kuu ra.

21 Nasa̱ꞌya ta̱Benjamín kúu ta̱Bela,

ta̱Bequer,

ta̱Asbel,

ta̱Gera,

ta̱Naamán,

ta̱Ehi,

ta̱Ros,

ta̱Mupim,

ta̱Hupim xíꞌin ta̱Ard.

22 Nayóꞌo kúu sa̱ꞌya ñáRaquel xíꞌin ta̱Jacob ta sa̱ꞌya ñani na,

ta u̱xu̱ ko̱mi̱ ni̱vi kúu na.

23 Sa̱ꞌya ta̱Dan kúu ta̱Husim.

24 Nasa̱ꞌya ta̱Neftalí kúu ta̱Jahzeel,

ta̱Guni,

ta̱Jezer xíꞌin ta̱Silem.

25 Nayóꞌo kúu sa̱ꞌya ñáBilha xíꞌin ta̱Jacob.

ÑáBilha yóꞌo kúu ñá ta̱xi ta̱Labán ndaꞌa̱ sa̱ꞌya ra ñáRaquel ki̱sa chiño ñá no̱o̱ ñá,

ta sa̱ꞌya na xíꞌin sa̱ꞌya ñani na kúu u̱xa̱ ni̱vi.

26 Ta yóo ndiꞌi na ni̱xaa̱ xíꞌin ta̱Jacob no̱o̱ ñoꞌo̱ Egipto,

ñii ni̱i̱ kúu ndiꞌi na xíꞌin ra,

ta kúu na u̱ni̱ si̱ko̱ i̱ño̱ ni̱vi,

ta yóo ka̱ inka̱ náñaꞌa̱ ná kúu násíꞌí nata̱a sa̱ꞌya ta̱Jacob.

27 Nasa̱ꞌya ta̱José kúu o̱vi̱ ta̱a ka̱ku no̱o̱ ñoꞌo̱ Egipto.

Ta saá ni̱to̱nda̱a u̱ni̱ si̱ko̱ u̱xu̱ ni̱vi naveꞌe ta̱Jacob na ki̱ndo̱o no̱o̱ ñoꞌo̱ Egipto.

28 Ta ta̱Jacob ti̱ꞌví ra ta̱Judá kua̱ꞌa̱n siꞌna ra no̱o̱ ndiꞌi na yichi̱ ña ko̱ꞌo̱n ra koto ra ta̱José,

ña ka̱ꞌa̱n ra xíꞌin ra kixi ra nakiꞌin ra na no̱o̱ ñoꞌo̱ na̱ní Gosén.

Ta saá ni̱xaa̱ naveꞌe ta̱Jacob no̱o̱ ñoꞌo̱ Gosén.

29 Ta ta̱José xa̱ꞌnda chiño ra no̱o̱ nata̱a na kísa chiño no̱o̱ ra ña kasa ndivi na tón carreta ña ko̱ꞌo̱n ra nakiꞌin ra yivá ra nda̱ no̱o̱ ñoꞌo̱ Gosén.

Tá ta̱José ni̱xaa̱ ra no̱o̱ yivá ra,

ta nómi táꞌan o̱vi̱ ra saá,

ta ta̱José naꞌá ní xáku ra no̱o̱ so̱ko̱ yivá ra.

30 Ta saá ta̱Jacob ni̱ka̱ꞌa̱n ra xíꞌin ta̱José,

káchí ra:

―Vitin xa va̱ꞌa kivi̱ i̱,

chi xíꞌin nduchu̱ no̱o̱ i̱ xíni i̱ no̱o̱ ún ta kúnda̱a̱ ini i̱ táku̱ ún ―káchí ta̱Jacob.

31 Ta ta̱José ni̱ka̱ꞌa̱n ra xíꞌin nañani ra ta xíꞌin naveꞌe yivá ra,

káchí ra saá:

―Vitin ko̱ꞌo̱n i̱ koto i̱ ta̱Faraón ña ndato̱ꞌon i̱ xíꞌin ra ndí nañani i̱ xíꞌin naveꞌe yivá i̱ na xi̱taku̱ no̱o̱ ñoꞌo̱ Canaán xa ki̱xaa̱ na kutaku̱ na ñoo i̱;

32 ta ki̱xaa̱ ndikachi xíꞌin ti̱súꞌu̱ sa̱na̱ na,

xíꞌin si̱ndi̱ki̱ sa̱na̱ na xíꞌin ndiꞌi ña kómí na,

chi chiño no̱o̱ na kúu ña ndáa na ta sákui̱na̱ na kiti̱.

33 Ta saá tá ta̱Faraón kana ra ndóꞌó kixi ndó no̱o̱ ra,

ta nda̱ka̱ to̱ꞌon ra ndóꞌó,

kachí ra:

“Yukú chiño xíni̱ ndó kasa chiño ndó”,

34 ta ndakuii̱n ndó,

ka̱ꞌa̱n ndó xíꞌin ra:

“Tata,

xíni̱ ndi̱ ndasaá sakui̱na̱ ndi̱ tíndikachi xíꞌin ti̱súꞌu̱,

nda̱tán ni̱xi̱yo chiño ke̱ꞌé naxi̱i̱ síkuá ndi̱”,

kachí ndó xíꞌin ra.

Ta taxi ra kindo̱o ndó kutaku̱ ndó no̱o̱ ñoꞌo̱ na̱ní Gosén,

chi ni̱vi nañoo Egipto o̱n xi̱in na kutaku̱ na xíꞌin ni̱vi na ndáa ndikachi ―káchí ta̱José xíꞌin naveꞌe ra.