―¡Kee ndiꞌi ndó ta kuáꞌa̱n ndó ke̱ꞌe!

―káchí ra.

Ta saá nda̱ ñii na kísa chiño no̱o̱ ra o̱n ko̱ó ka̱ na ni̱‑ndoo xíꞌin ra,

ta saá ta̱xi ra ku̱nda̱a̱ ini nañani ra yu kúu ra.

2 Ta ki̱xáꞌá ra ñii ndáꞌyi koꞌo ra xáku ra,

ta naEgipto na kísa chiño no̱o̱ ra xíni̱ so̱ꞌo na ña xáku ra,

ta nda̱to̱ꞌon na ndasaá xáku ra ña kúnda̱a̱ ini inka̱ naEgipto na ndóo veꞌe chiño ta̱Faraón.

3 Ta ni̱ka̱ꞌa̱n ta̱José xíꞌin nañani ra,

káchí ra saá:

―¡Yi̱ꞌi̱ kúu ta̱José!

¿Án táku̱ ka̱ yivá i̱?

―káchí ra.

Ta nata̱a yóꞌo ndeé ní yíꞌví na ndóo na no̱o̱ ra,

ta ni̱‑kuchiño na ndakuii̱n na yuꞌu̱ ta̱José.

4 Ta ni̱ka̱ꞌa̱n ta̱José xíꞌin na,

káchí ra saá:

―Naꞌa yatin ndó no̱o̱ i̱.

Ta saá ki̱xaa̱ yatin na no̱o̱ ra,

ta ni̱ka̱ꞌa̱n ra xíꞌin na,

káchí ra:

―Yi̱ꞌi̱ kúu ñani ndó ta̱José,

ta̱a ta̱ ni̱si̱kó ndó ndaꞌa̱ naEgipto yóꞌo;

5 ta vitin o̱n kuchuchú ini ndó,

ni o̱n saa̱ ini ndó xíꞌin táꞌan mi̱i ndó xa̱ꞌa̱ ña ni̱si̱kó ndó yi̱ꞌi̱,

chi Ndios ti̱ꞌví siꞌna ra yi̱ꞌi̱ ki̱xaa̱ i̱ ñoo yóꞌo no̱o̱ ndóꞌó,

ña saka̱ku i̱ kua̱ꞌa̱ ní ni̱vi.

6 Xa o̱vi̱ kui̱ya̱ kúu ña nákaa̱ so̱ko no̱o̱ ñoꞌo̱ yóꞌo,

ta kúmáni̱ ka̱ inka̱ o̱ꞌo̱n kui̱ya̱ ña o̱n kívi ka̱ chiꞌi ni̱vi,

ni o̱n kívi nakaya na trigo.

7 Ta Ndios ti̱ꞌví siꞌna ra yi̱ꞌi̱ ki̱xaa̱ i̱ ñoo yóꞌo no̱o̱ ndóꞌó ña saka̱ku i̱ ndóꞌó,

ta kuchiño kui̱na̱ ndó ta kua̱ꞌa̱ ní kuu sa̱ꞌya ñani síkuá ndó ñoyívi yóꞌo.

8 Ña̱kán Ndios kúu ta̱ ti̱ꞌví yi̱ꞌi̱ ki̱xaa̱ i̱ ñoo yóꞌo,

ta o̱n si̱ví ndóꞌó kúu na ti̱ꞌví yi̱ꞌi̱,

saá chi Ndios sa̱kuiso chiño ra yi̱ꞌi̱ ña taxi i̱ to̱ꞌon ndíchí si̱ni̱ ta̱Faraón,

ta Ndios ta̱xi ra ña kúu i̱ ta̱káꞌno veꞌe ta̱Faraón,

ta ndu̱u i̱ ta̱a ta̱ xáꞌnda chiño no̱o̱ ndiꞌi naEgipto.

9 Vitin kama ní noꞌo̱ ndó no̱o̱ yóo veꞌe yivá i̱ ta ka̱ꞌa̱n ndó xíꞌin ra,

kachí ndó saá:

“Tata,

ni̱ka̱ꞌa̱n sa̱ꞌya ún ta̱José,

káchí ra saá:

Ndios sa̱kuiso chiño ra yi̱ꞌi̱ kúu i̱ ta̱a ta̱káꞌno ta̱ xáꞌnda chiño no̱o̱ naEgipto.

Naꞌa koto ún yi̱ꞌi̱.

Kama ní kixi ún.

10 Tá kixaa̱ ún ta kutaku̱ ún no̱o̱ ñoꞌo̱ na̱ní Gosén xíꞌin ndiꞌi sa̱ꞌya ún,

xíꞌin ndiꞌi sa̱ꞌya ñani ún,

ta xíꞌin ndiꞌi ndikachi ta xíꞌin ndiꞌi ti̱súꞌu̱ sa̱na̱ ún,

ta xíꞌin ndiꞌi si̱ndi̱ki̱ sa̱na̱ ún,

ta xíꞌin ndiꞌi ña kómí ún,

ta saá va̱ꞌa kutaku̱ yatin ún xíꞌin i̱.

11 Ta yi̱ꞌi̱,

taxi i̱ ndiꞌi ña kuxu ún ta taxi i̱ ña kuxu ndiꞌi naveꞌe ún,

ta taxi i̱ ña kuxu ndiꞌi na ndóo xíꞌin ún,

ta o̱n kumáni̱ nda̱ ñii ña xíni̱ ñóꞌó no̱o̱ ndó;

chi va̱xi ka̱ o̱ꞌo̱n kui̱ya̱ ña ndeé ní kunakaa̱ so̱ko,

káchí sa̱ꞌya ún”,

kachí ndó xíꞌin yivá i̱.

12 Ñani i̱ ta̱Benjamín xíꞌin ndóꞌó kúu na ndakuii̱n xa̱ꞌa̱ i̱ ndí yi̱ꞌi̱ kúu ta̱a ta̱ ni̱ka̱ꞌa̱n to̱ꞌon yóꞌo.

13 Ndato̱ꞌon ndó xíꞌin yivá i̱ xa̱ꞌa̱ ndiꞌi ña xi̱to ndó yóꞌo,

ndí yi̱ꞌi̱ kúu ta̱a ta̱ xáꞌnda chiño no̱o̱ naEgipto.

Kama ní ko̱ꞌo̱n ndó nakiꞌin ndó yivá i̱ ná kixaa̱ ra yóꞌo ―káchí ta̱José xíꞌin nañani ra.

14 Ta ta̱José ki̱xáꞌá ra nómi ra ñani ra ta̱Benjamín,

ta xáku tuku ra.

Ta saá tuku ta̱Benjamín xáku ra nómi ra ñani ra ta̱José.

15 Ta ta̱José ni̱chi̱to ra no̱o̱ ñii ñii nañani ra,

ta xáku ra nómi ra na.

Ta nda̱ saá ndiꞌi nata̱a ñani ra ki̱xáꞌá na káꞌa̱n na xíꞌin ra.

16 Ta nda̱ veꞌe chiño no̱o̱ yóo ta̱Faraón ni̱xaa̱ to̱ꞌon ña xi̱ni̱ so̱ꞌo na ndí ki̱xaa̱ nañani ta̱José,

ta ta̱Faraón xíꞌin nanáꞌno na kísa chiño xíꞌin ra kúsii̱ ní ini na xa̱ꞌa̱ to̱ꞌon xi̱ni̱ so̱ꞌo na.

17 Ta ni̱ka̱ꞌa̱n ta̱Faraón xíꞌin ta̱José,

káchí ra saá:

―Ka̱ꞌa̱n ún xíꞌin nañani ún ña sakuiso na kiti̱ sa̱na̱ na ta ná ndikó na noꞌo̱ na no̱o̱ ñoꞌo̱ Canaán,

18 ta saá ná sandakoo na ñoo Canaán ta ná kee na kixi na yóꞌo,

ta kixi yivá ún xíꞌin ndiꞌi naveꞌe nañani ún xíꞌin ra,

ta kixaa̱ na yóꞌo.

Ta yi̱ꞌi̱ taxi i̱ ndaꞌa̱ na ñoꞌo̱ ña va̱ꞌa ní ka̱ no̱o̱ ñoꞌo̱ Egipto,

ta kuxu na ña va̱ꞌa ní ka̱ yóo no̱o̱ ñoꞌo̱ ñoo yóꞌo.

19 Kaꞌnda chiño ún ná ko̱ꞌo̱n carreta xíꞌin nañani ún ña kuiso nó náñaꞌa̱ násíꞌí na xíꞌin naválí,

ta xíꞌin yivá ún,

ña kixaa̱ ndiꞌi na yóꞌo.

20 Ta o̱n kundiꞌi ini na xa̱ꞌa̱ ñava̱ꞌa sandakoo na ñoo kán,

chi ña va̱ꞌa ka̱ yóo no̱o̱ ñoꞌo̱ Egipto yóꞌo nduu kuenda mi̱i na ―káchí ta̱Faraón xíꞌin ta̱José.

21 Ta saá nata̱a sa̱ꞌya ta̱Jacob^a ki̱sa ndivi na ña ni̱ka̱ꞌa̱n ta̱Faraón.

Ta̱José ta̱xi ra carreta nda̱tán yóo ña xa̱ꞌnda chiño ta̱Faraón,

ta ta̱xi ra ña kuxu naveꞌe ra yichi̱;

22 ta ta̱xi ra ndaꞌa̱ ñii ñii ñani ra tiko̱to̱ xa̱á ña kundixin na,

ta ndaꞌa̱ ta̱Benjamín ta̱xi ra u̱ni̱ ciento si̱ꞌún ñaplata xíꞌin o̱ꞌo̱n tiko̱to̱ xa̱á ña kundixin ra.

23 Ta ndaꞌa̱ yivá ra ti̱ꞌví ra u̱xu̱ burro tí ndíso ña va̱ꞌa ka̱ ña yóo no̱o̱ ñoꞌo̱ Egipto,

xíꞌin inka̱ u̱xu̱ burro siꞌí tí ndíso trigo xíꞌin si̱ta̱ va̱ꞌa xíꞌin inka̱ ña kuxu yivá ra ña kixi ra yichi̱.

24 Tá mií ndáyi ka̱ ta̱José nañani ra,

ta ni̱ka̱ꞌa̱n ka̱ ra xíꞌin na:

―O̱n naa ndó xíꞌin táꞌan ndó kua̱ꞌa̱n ndó yichi̱ ―káchí ra.

Ta saá kua̱ꞌa̱n noꞌo̱ na.

25 Ke̱e na ñoo Egipto ta ndi̱kó na ndi̱xaa̱ na no̱o̱ ñoꞌo̱ Canaán no̱o̱ yóo yivá na ta̱Jacob.

26 Ta nda̱to̱ꞌon na xíꞌin ta̱Jacob,

káchí na saá:

―¡Tata,

táku̱ sa̱ꞌya ún ta̱José!

¡Ta vitin kúu ra ta̱a ta̱ xáꞌnda chiño no̱o̱ ndiꞌi naEgipto!

―káchí na.

Ta o̱n vása kúnda̱a̱ ini ta̱Jacob yukía̱ keꞌé ra ni yukía̱ ka̱ꞌa̱n ra,

chi o̱n vása ki̱ví kandixa ra ña káꞌa̱n na xíꞌin ra.

27 Ta nata̱a sa̱ꞌya ra yóꞌo nda̱to̱ꞌon ndiꞌi na xíꞌin ra nda̱tán yóo to̱ꞌon ni̱ka̱ꞌa̱n ta̱José xíꞌin na,

ta ki̱vi̱ xi̱ni ta̱Jacob tón carreta ti̱ꞌví ta̱José xa̱ꞌa̱ ña kuiso nó na ko̱ꞌo̱n na ñoo Egipto,

ta nda̱ saá na̱taku̱ níma̱ ra ta kúsii̱ ní ini ra.

28 Ta saá ni̱ka̱ꞌa̱n ra xíꞌin nasa̱ꞌya ra,

káchí ra:

―Vitin ndixa kándixa i̱ táku̱ ta̱José sa̱ꞌya i̱.

Ta ko̱ꞌo̱n i̱ koni i̱ ra siꞌna ka̱ no̱o̱ ña kivi̱ i̱ ―káchí ra.