―Sakutú ndaa ún trigo tindaa̱ ndiꞌi nata̱a yóꞌo,

nda̱tán yóo ña kundeé na kuiso na noꞌo̱ na,

ta taan ún si̱ꞌún ña cha̱ꞌvi na yuꞌu̱ tindaa̱ ñii ñii na.

2 Ta chikaa̱ ún copa i̱ ñaplata yuꞌu̱ tindaa̱ ñani na ta̱loꞌo,

ñii káchí saá kunakaa̱ ña xíꞌin si̱ꞌún ña xa cha̱ꞌvi mi̱i ra xa̱ꞌa̱ trigo ―káchí ra.

Ta ta̱a ta̱ ndíso chiño xíꞌin veꞌe ra ki̱sa ndivi ra nda̱tán yóo ña xa̱ꞌnda chiño ta̱José.

3 Ta inka̱ ki̱vi̱ tá ke̱ta ño̱ꞌo xita̱a̱n,

ta ta̱ ndíso chiño yóꞌo ni̱nda̱yi ra nata̱a kua̱ꞌa̱n noꞌo̱ na,

ta kua̱ꞌa̱n tíburro sa̱na̱ na xíꞌin na.

4 O̱n ta̱ꞌán koo xíká ní no̱o̱ kua̱ꞌa̱n na,

ta ni̱ka̱ꞌa̱n ta̱José xíꞌin ta̱ ndíso chiño xíꞌin veꞌe ra,

káchí ra saá:

―Kama kuáꞌa̱n ún sa̱ta̱ nata̱a na kua̱ꞌa̱n noꞌo̱;

tá naníꞌi ún na ta ka̱ꞌa̱n ún xíꞌin na,

kachí ún saá:

“¿Nda̱chun cha̱ꞌvi ndó xíꞌin ña o̱n váꞌa no̱o̱ ñava̱ꞌa?

¿Nda̱chun ki̱sa kuíꞌná ndó copa ñaplata?

5 ¿Án o̱n si̱ví copa yóꞌo kúu ña xíni̱ ñóꞌó ta̱ xáꞌnda chiño no̱o̱ i̱ ña koꞌo ra nduta̱ ñóꞌo ini ña?

Ta,

¿án o̱n si̱ví copa yóꞌo kúu ña xíni̱ ñóꞌó ra ña nandaxin ra xa̱ꞌa̱ ña yóo seꞌé?

Ndixa o̱n váꞌa ke̱ꞌé ndó xíꞌin ra”,

kachí ún xíꞌin na ―káchí ta̱José xíꞌin ta̱ ndíso chiño xíꞌin veꞌe ra.

6 Ta saá ta̱ ndíso chiño xíꞌin veꞌe ra kama ke̱e ra kua̱ꞌa̱n ra ta na̱níꞌi ra nata̱a yóꞌo,

ta nda̱tán yóo to̱ꞌon ña ni̱ka̱ꞌa̱n ta̱José,

saá ni̱ka̱ꞌa̱n ra xíꞌin na.

7 Ta nda̱kuii̱n nata̱a yóꞌo,

káchí na saá:

―¿Nda̱chun káꞌa̱n ún xíꞌin ndi̱ to̱ꞌon yóꞌo?

A̱nda̱ ñii yichi̱ o̱n vása ní‑keꞌé ndi̱ ña o̱n váꞌa káꞌa̱n ún xa̱ꞌa̱.

8 ¿Ama ví keꞌé ndi̱ ña o̱n váꞌa saá?

¿Án o̱n si̱ví ñandixa kúu ña,

ndí si̱ꞌún ña na̱níꞌi ndi̱ yuꞌu̱ tindaa̱ ndi̱,

ta sa̱ndikó ndi̱ ña ndaꞌa̱ ndó?

¿Ndasaá ví keꞌé ndi̱ ña o̱n váꞌa kasa kuíꞌná ndi̱ ñaplata án ñaoro veꞌe ta̱ xáꞌnda chiño no̱o̱ ún?

9 Vitin nandukú ún copa;

tá naníꞌi ún ña ndaꞌa̱ ñii ndi̱,

ta va̱ꞌa ka̱ ná kivi̱ ta̱yóꞌo,

ta mi̱i ndi̱ na ndo̱o,

ná nduu ndi̱ na kasa chiño no̱o̱ ta̱patrón ún ―káchí na.

10 Ta saá ta̱ ndíso chiño ni̱ka̱ꞌa̱n ra,

káchí ra:

―Va̱ꞌa,

kasa ndivi yó ña káꞌa̱n ndó.

Tá naníꞌi i̱ copa ndíso ñii ta̱táꞌan ndó,

ta ta̱yóꞌo nduu ra ta̱ kasa chiño no̱o̱ i̱,

ta inka̱ ndóꞌó ko̱ꞌo̱n ndíka̱ ndó chi o̱n ko̱ó kua̱chi ndíso ndó ―káchí ra.

11 Ta saá ñii ñii nayóꞌo kama ní sa̱noo na tindaa̱ na a̱nda̱ no̱o̱ ñoꞌo̱,

ta na̱kuiná na ña.

12 Ta ta̱ ndíso chiño na̱ndukú ra copa ini tindaa̱ nayóꞌo,

ta ki̱xáꞌá ra nándukú ra copa ini tindaa̱ ta̱no̱ó,

ta ndíko̱n ra nándukú ra ini tindaa̱ ñii ñii na a̱nda̱ ni̱xaa̱ ra tindaa̱ ta̱loꞌo ta̱sondíꞌí,

ta saá na̱níꞌi ra copa ini tindaa̱ ta̱Benjamín.

13 Ta nayóꞌo ki̱xáꞌá na yíꞌví ní na ta kúchuchú ní ini na,

ta nda̱ta na tiko̱to̱ ndíxin na.

Ta saá ñii ñii nata̱a yóꞌo sa̱kuiso na tindaa̱ tíburro sa̱na̱ na ta na̱ndikó tuku na kua̱ꞌa̱n na no̱o̱ ñoꞌo̱ Egipto.

14 Tá ta̱Judá xíꞌin nañani ra ni̱xaa̱ tuku na veꞌe ta̱José,

ta ta̱yóꞌo yóo ka̱ ra veꞌe ra,

ta saá xi̱kuxítí na a̱nda̱ ni̱to̱nda̱a ta̱ꞌya̱ na no̱o̱ ñoꞌo̱ no̱o̱ ra.

15 Ta ta̱José ni̱ka̱ꞌa̱n ra xíꞌin na,

káchí ra saá:

―¿Yu kúu tuku ña ke̱ꞌé ndó?

¿Án o̱n vása xíni̱ ndó yi̱ꞌi̱ kúu ñii ta̱a ta̱ nándaxin ña yóo seꞌé?

16 Ta nda̱kuii̱n ta̱Judá,

káchí ra saá:

―¿Yu kúu to̱ꞌon kuchiño ndakuii̱n ndi̱ yuꞌu̱ ún,

tata?

O̱n ko̱ó ña kuchiño ka̱ꞌa̱n ndi̱ án keꞌé ndi̱ xa̱ꞌa̱ ña kunda̱a̱ ini ún ndí o̱n ko̱ó kua̱chi ndíso ndi̱.

Saá chi Ndios xíni̱ ra ndí na ndíso kua̱chi kúu ndi̱.

Ta vitin yóꞌo yóo ndi̱ ndaꞌa̱ ún;

ta ndiꞌi ndi̱ xíꞌin ta̱a ta̱ xi̱nakaa̱ copa ini tindaa̱ nduu ndi̱ na kasa chiño no̱o̱ ún ―káchí ra.

17 Ta saá ni̱ka̱ꞌa̱n ta̱José,

káchí ra:

―O̱n kuchiño kasa ndivi i̱ ña káꞌa̱n ndó.

Ñii la̱á kuiti ta̱a ta̱ xi̱nakaa̱ copa ini tindaa̱ kuu ta̱ ndo̱o kasa chiño no̱o̱ i̱.

Ta ndiꞌi ndó va̱ꞌa ndikó ndó noꞌo̱ ndó veꞌe yivá ndó.

O̱n kundiꞌi ini ndó chi o̱n ko̱ó kua̱chi ndíso ndó ―káchí ra.

18 Ta ta̱Judá ni̱to̱nda̱a yatin ra no̱o̱ ta̱José,

ta ni̱ka̱ꞌa̱n ra xíꞌin ra,

káchí ra saá:

―Xáku ndáꞌví i̱ no̱o̱ ún,

tata,

taxi ún ná ka̱ꞌa̱n seꞌé loꞌo i̱ xíꞌin ún.

Xáku ndáꞌví i̱ no̱o̱ ún,

o̱n saa̱ ini ún koni ún yi̱ꞌi̱,

chi nda̱tán yóo ta̱rey Faraón,

saá yóo mi̱i ún.

19 Chi yóꞌó ni̱nda̱ka̱ to̱ꞌon ún ndi̱ꞌi̱,

¿án yóo yivá ndi̱?,

ta,

¿án yóo inka̱ ñani ndi̱?

20 Ta mi̱i ndi̱ nda̱kuii̱n ndi̱,

ka̱chí ndi̱,

ndí ndixa yóo yivá ndi̱ ta̱xi̱kua̱ꞌa̱,

ta yóo inka̱ ñani ndi̱ ta̱loꞌo,

ta ta̱loꞌo yóꞌo ka̱ku ra ki̱vi̱ tá ta̱xi̱kua̱ꞌa̱ ní kúu yivá ndi̱.

Ta xíꞌin ñásíꞌí ra ñáRaquel ka̱ku o̱vi̱ sa̱ꞌya ra.

Ñii ta̱loꞌo ni̱xiꞌi̱,

ta si̱ín ta̱loꞌo yóꞌo kúu ta̱ táku̱,

ña̱kán kíꞌvi ní ini yivá ndi̱ xíni ñaꞌá ra.

21 Ta mi̱i ún ni̱ka̱ꞌa̱n ún xíꞌin ndi̱ ná kixi ta̱loꞌo yóꞌo no̱o̱ ún,

chi kóni ún koni ún ra.

22 Ta ni̱ka̱ꞌa̱n ndi̱ xíꞌin ún ka̱chí ndi̱ saá,

ndí ñani ndi̱ ta̱loꞌo o̱n ki̱ví sandakoo ra yivá ra,

chi táná sandakoo ñaꞌá ra,

ta yivá ra kivi̱ ra xíꞌin ña kuchuchú ní ini ra.

23 Ta mi̱i ún ni̱ka̱ꞌa̱n ún xíꞌin ndi̱ tá o̱n kixi ta̱loꞌo ta o̱n taxi ún kixaa̱ tuku ndi̱ no̱o̱ ún.

24 ’Ta ki̱vi̱ ndi̱kó ndi̱ no̱o̱ yivá ndi̱,

ta nda̱to̱ꞌon ndi̱ xíꞌin ra ndiꞌi ña ni̱ka̱ꞌa̱n ún xíꞌin ndi̱.

25 Ta saá yivá ndi̱ xa̱ꞌnda chiño ra no̱o̱ ndi̱,

ka̱chí ra:

“Tuku ndikó ndó sata ndó loꞌo ka̱ trigo kuxu yó”,

ka̱chí ra.

26 Ta ni̱ka̱ꞌa̱n ndi̱ xíꞌin yivá ndi̱:

“Saá ni̱ka̱ꞌa̱n ta̱ xáꞌnda chiño no̱o̱ ñoꞌo̱ Egipto xíꞌin ndi̱:

Tá o̱n kixi ñani ndó ta̱loꞌo xíꞌin ndó,

ta o̱n kixi ka̱ ndó no̱o̱ i̱,

ka̱chí ra xíꞌin ndi̱.

Ta saá,

tá o̱n taxi ún ko̱ꞌo̱n ñani ndi̱ ta̱loꞌo xíꞌin ndi̱,

ta o̱n kívi ko̱ꞌo̱n tuku ndi̱ no̱o̱ ta̱ xáꞌnda chiño no̱o̱ ñoꞌo̱ Egipto”,

ka̱chí ndi̱ xíꞌin yivá ndi̱.

27 Ta yivá ndi̱ ni̱ka̱ꞌa̱n ra xíꞌin ndi̱:

“Ndóꞌó xíni̱ va̱ꞌa ndó o̱vi̱ kuiti sa̱ꞌya i̱ kómí i̱ xíꞌin ñásíꞌí i̱ ñáRaquel;

28 ñii ra o̱n ko̱ó ka̱ ra táku̱ xíꞌin i̱,

a̱nda̱ ki̱vi̱ ke̱e ra ta̱nda̱ ki̱vi̱ vitin o̱n vása xíni̱ i̱ mí yóo ra.

Xáni si̱ni̱ i̱ va kuiti ñii kiti̱ yukú sa̱kuáchi rí ra ta xa̱xi rí ra.

29 Táná ko̱ꞌo̱n inka̱ sa̱ꞌya i̱ yóꞌo xíꞌin ndó,

tá tuku ta̱yóꞌo kundoꞌo ña o̱n váꞌa,

ta ndóꞌó kuu ndó na nakuiso kua̱chi xa̱ꞌa̱ ña xo̱ꞌvi̱ ní yi̱ꞌi̱ ta̱xi̱kua̱ꞌa̱,

ta̱nda̱ kivi̱ i̱ xíꞌin ña kuchuchú ní ini i̱”,

ka̱chí yivá ndi̱.

30 ’Chi xa̱ꞌa̱ ta̱loꞌo yóꞌo kúu ña táku̱ ka̱ yivá i̱,

tá o̱n ndikó ta̱loꞌo xíꞌin ndi̱,

31 ta yivá i̱ kivi̱ ra xa̱ꞌa̱ ña o̱n koni ka̱ ra ta̱loꞌo sa̱ꞌya ra.

Ta saá mi̱i ndi̱ nakuiso ndi̱ kua̱chi ña xo̱ꞌvi̱ ní yivá ndi̱ chi ta̱xi̱kua̱ꞌa̱ ní kúu ra,

ta kuchuchú ní ini ra a̱nda̱ kivi̱ ra.

32 Ni̱ka̱ꞌa̱n i̱ xíꞌin yivá i̱ ndí yi̱ꞌi̱ ndakuii̱n i̱ xa̱ꞌa̱ ta̱loꞌo yóꞌo,

ka̱chí i̱ saá:

“Tá o̱n kóo ta̱loꞌo ní ndikó xíꞌin i̱,

ta yi̱ꞌi̱ kuu ta̱ nakuiso kua̱chi no̱o̱ ún ndiꞌi saá ki̱vi̱”,

ka̱chí i̱ xíꞌin yivá i̱.

33 Ña̱kán xáku ndáꞌví i̱ no̱o̱ ún,

tata,

ña taxi ún ndo̱o i̱ no̱o̱ ta̱loꞌo,

ta kasa chiño i̱ no̱o̱ ún.

Ta vitin xáku ndáꞌví i̱ no̱o̱ ún,

taxi ún ná noꞌo̱ ra veꞌe ra xíꞌin nañani ra.

34 Chi o̱n kuchiño ndikó i̱ tá o̱n ko̱ó ta̱loꞌo kua̱ꞌa̱n noꞌo̱ xíꞌin i̱ veꞌe yivá i̱.

O̱n kundeé ini i̱ koto i̱ ndasaá xo̱ꞌvi̱ ní yivá i̱ tá o̱n ndikó ta̱loꞌo xíꞌin ndi̱ ―káchí ta̱Judá xíꞌin ta̱José.