Ta saá xa kua̱ꞌa̱ ní ki̱vi̱ ñóꞌo na ini veꞌe ka̱a.

5 Ta ñii ñoó o̱vi̱ saá napreso yóꞌo ni̱xa̱ní na,

ta síín káꞌa̱n ñii ñii xa̱ni ni̱xa̱ní ñii ñii na.

6 Ta ni̱ti̱vi xita̱a̱n ki̱xaa̱ ta̱José koto ra na,

ta na̱níꞌi ra na ndíꞌi ní ini na,

ta kúchuchú ní ini na ndóo na;

7 ta saá ni̱nda̱ka̱ to̱ꞌon ra na,

káchí ra saá xíꞌin na:

―¿Nda̱chun chúchú ní xíto no̱o̱ ndó?

―káchí ra.

8 Ta nda̱kuii̱n na,

káchí na saá:

―Ni̱xa̱ní ndi̱ xa̱ni,

ta ndíꞌi ní ini ndi̱ chi kóni ndi̱ kunda̱a̱ ini ndi̱ yukía̱ kóni kachí ña ni̱xa̱ní ndi̱,

ta o̱n vása xíni̱ ndi̱ yukú na kuchiño nandaxin xa̱ni yóꞌo no̱o̱ ndi̱ ―káchí na,

nda̱kuii̱n na.

―¿Án o̱n si̱ví Ndios kúu ta̱ nándaxin ndiꞌi xa̱ni?

Va̱ꞌa vitin kivi ndato̱ꞌon ndó xíꞌin i̱ yukía̱ ni̱xa̱ní ndó ―káchí ta̱José.

9 Ta saá ta̱a ta̱ chi̱kaa̱ vino xi̱xiꞌi ta̱Faraón nda̱to̱ꞌon ra xíꞌin ta̱José ña ni̱xa̱ní ra,

káchí ra saá:

―Yi̱ꞌi̱ ni̱xa̱ní i̱ siꞌa:

xi̱ni i̱ ñii yito̱n tón uva,

10 ta yóo u̱ni̱ ndaꞌa̱ nó.

Ta yito̱n yóꞌo na̱ndisín nó ta xa̱ndi̱ko̱n va̱xi kana yita nó,

ta yita yóꞌo kama ndu̱u ña kua̱ꞌa̱ ní tíuva tí ni̱xi̱no̱.

11 Ta ti̱in i̱ copa ta̱Faraón,

ta ki̱ꞌin i̱ tíuva ta ko̱ꞌni i̱ rí ini copa yóꞌo,

ta saá ta̱xi i̱ copa ndaꞌa̱ ta̱Faraón koꞌo ra ―káchí ta̱ chi̱kaa̱ vino xi̱xiꞌi ta̱Faraón.

12 Ta ta̱José ni̱ka̱ꞌa̱n ra,

káchí ra saá:

―Ña xa̱ni ni̱xa̱ní ún kóni kachí ña saá:

u̱ni̱ ndaꞌa̱ yito̱n tón uva kúu u̱ni̱ ki̱vi̱,

13 ta ti̱xin ña u̱ni̱ ki̱vi̱ ta̱Faraón kasa nani ra kua̱chi ún,

ta tuku nataxi ra chiño ndaꞌa̱ ún ña chikaa̱ ún vino koꞌo ta̱Faraón,

nda̱tán ki̱sa ndivi ún táꞌan siꞌna.

14 Tá kixaa̱ ki̱vi̱ ña ku̱na̱ni̱ va̱ꞌa xa̱ꞌa̱ ñayóꞌo,

ta nakáꞌán ún yi̱ꞌi̱,

ta xáku ndáꞌví i̱ no̱o̱ ún keꞌé ún ñava̱ꞌa xíꞌin i̱,

ka̱ꞌa̱n ún xa̱ꞌa̱ i̱ xíꞌin ta̱Faraón ña tava ra yi̱ꞌi̱ ini veꞌe ka̱a yóꞌo.

15 Saá chi ta̱ñoo hebreo kúu i̱,

ta tá ni̱xi̱yo i̱ ñoo i̱ ta ni̱vi ti̱in na yi̱ꞌi̱,

ta ni̱si̱kó kuíꞌná na yi̱ꞌi̱ ki̱xaa̱ i̱ ñoo Egipto yóꞌo,

ta o̱n ko̱ó kua̱chi ndíso i̱ xa̱ꞌa̱ ña nákaa̱ i̱ ini veꞌe ka̱a yóꞌo ―káchí ta̱José xíꞌin ta̱ chi̱kaa̱ vino xi̱xiꞌi ta̱Faraón.

16 Tá ta̱a ta̱ ki̱sa va̱ꞌa si̱ta̱ va̱ꞌa xi̱xixi ta̱Faraón ku̱nda̱a̱ ini ra ndí ña ni̱ka̱ꞌa̱n ta̱José na̱ndaxin ra xa̱ni kúu ñava̱ꞌa xa̱ꞌa̱ ta̱a ta̱ ki̱sa chiño veꞌe ta̱Faraón xíꞌin ra,

ta saá ni̱ka̱ꞌa̱n ra xíꞌin ta̱José,

káchí ra saá:

―Ta yi̱ꞌi̱,

ni̱xa̱ní i̱ siꞌa:

xi̱ni i̱ u̱ni̱ chikiva ta ñóꞌo si̱ta̱ va̱ꞌa ini nó,

ta nándoso̱ u̱ni̱ saá chikiva yóꞌo si̱ni̱ i̱.

17 Ta ini chikiva tón kánóo nda̱ síkón ni̱no ñóꞌo kua̱ꞌa̱ ní no̱o̱ si̱ta̱ va̱ꞌa visi ña kuxu ta̱Faraón,

ta va̱xi tísaa xáxi rí si̱ta̱ va̱ꞌa ñóꞌo ini chikiva yóꞌo ―káchí ta̱ ki̱sa va̱ꞌa si̱ta̱ va̱ꞌa xi̱xixi ta̱Faraón.

18 Ta saá nda̱kuii̱n ta̱José,

káchí ra xíꞌin ra:

―Xa̱ni ña ni̱xa̱ní ún kóni kachí ña saá:

ña u̱ni̱ chikiva kúu u̱ni̱ ki̱vi̱,

19 ta ti̱xin ña u̱ni̱ ki̱vi̱ ta̱Faraón kasa nani ra kua̱chi ún,

ta kaꞌnda chiño ra ña chikoꞌni na yoꞌo̱ si̱ko̱n ún,

ta katakaa̱ na yóꞌó ndaꞌa̱ yito̱n ña kua̱ꞌno ún a̱nda̱ kivi̱ ún,

ta kaxi kiti̱ tí ndáchí ko̱ñu ún ―káchí ta̱José xíꞌin ra.

20 Ta ti̱xin ña u̱ni̱ ki̱vi̱ ni̱to̱nda̱a ña ni̱xi̱no̱ ta̱Faraón kui̱ya̱ ra,

ta sa̱kana ra ñii viko̱ káꞌno ta na̱kutáꞌan ndiꞌi nanáꞌno na kísa chiño xíꞌin mi̱i ra.

Ta no̱o̱ xíto ndiꞌi ni̱vi na na̱kutáꞌan yóꞌo,

ta̱Faraón xa̱ꞌnda chiño ra no̱o̱ natropa ña ta̱va na o̱vi̱ nata̱a na ta̱an ra ini veꞌe ka̱a kua̱ꞌa̱ ní ki̱vi̱ ni̱yaꞌa.

21 Ta saá ta̱Faraón xa̱ꞌnda chiño ra ndí ta̱a ta̱ chi̱kaa̱ vino xi̱xiꞌi ra tuku nakiꞌin ra chiño xi̱komí ra ña chikaa̱ ra vino koꞌo ta̱Faraón,

nda̱tán ni̱xi̱yo ki̱sa ndivi ra táꞌan siꞌna;

22 ta ta̱Faraón xa̱ꞌnda chiño ra ña kivi̱ ta̱a ta̱ ki̱sa va̱ꞌa si̱ta̱ va̱ꞌa ña xi̱xixi ra,

ta katakaa̱ na ra ndaꞌa̱ yito̱n ña kua̱ꞌno ra.

Ta saá ku̱ndivi nda̱tán yóo ña ni̱ka̱ꞌa̱n ta̱José na̱ndaxin ra xa̱ni o̱vi̱ nata̱a yóꞌo.

23 Ta ta̱ chíkaa̱ vino xíꞌi ta̱Faraón o̱n vása ní‑nakáꞌán ka̱ ra xa̱ꞌa̱ ta̱José;

na̱ndoso ra xa̱ꞌa̱ ta̱yóꞌo.