Ñayóꞌo káꞌa̱n xa̱ꞌa̱ ta̱José xíꞌin ñásíꞌí ta̱Potifar
39
Tá ni̱xaa̱ ta̱José no̱o̱ ñoꞌo̱ Egipto,
ta ñii ta̱Egipto na̱ní ra Potifar sa̱ta ra ta̱José no̱o̱ naMadián.a
Ta ta̱Potifar kúu ñii ta̱a ta̱ kísa chiño xíꞌin ta̱rey Faraón,
ta xáꞌnda chiño ra no̱o̱ natropa na ndáa veꞌe chiño ta̱Faraón.
2 Ta Ndiosb yóo ra xíꞌin ta̱José,
ta va̱ꞌa ní yóo ndiꞌi chiño ña kéꞌé ra;
ta ta̱José táku̱ ra veꞌe ta̱patrón ra ta̱Egipto.
3 Ta ta̱patrón ra kúnda̱a̱ ini ra ndí ndixa yóo Ndios xíꞌin ta̱José,
ta chíndeé Ndios ta̱José ña va̱ꞌa ní kéta ndiꞌi chiño kísa ndivi ra.
4 Ña̱kán kúsii̱ ini ta̱Potifar xíni ra ta̱José xa̱ꞌa̱ ndiꞌi chiño va̱ꞌa kéꞌé ta̱yóꞌo,
ta ta̱Potifar sa̱kuiso chiño ra ta̱José ña kasa ndivi ra ndiꞌi chiño veꞌe ta̱patrón ra.
Ta saá ta̱José kúu ta̱ ndíso chiño no̱o̱ ndiꞌi ña kómí ta̱patrón ra.
5 Ta nda̱ ki̱vi̱ ki̱xáꞌá ta̱Potifar sa̱kuiso chiño ra ta̱José xíꞌin veꞌe ra ta xíꞌin ndiꞌi ña kómí ra,
ta Ndios táxi ra ñava̱ꞌa ndaꞌa̱ ta̱Potifar ña yóo va̱ꞌa ndiꞌi veꞌe ra,
ta Ndios táxi ra ña kéta va̱ꞌa ndiꞌi ña kísa chiño ra no̱o̱ ñoꞌo̱ ra.
6 Chi ta̱José vivíi ndáa ra ndiꞌi ña kómí ta̱Potifar,
ta saá ta̱Potifar yóꞌo o̱n vása ndíꞌi ka̱ ini ra xa̱ꞌa̱ nda̱ ñii chiño;
ndasaá kuiti ña kuxu ra ndíꞌi ini ra xa̱ꞌa̱.
Ta ta̱José livi ní ta̱a kúu ra,
ta va̱ꞌa ní náꞌa ra.
7 Ta saá ni̱yaꞌa ki̱vi̱,
ta ñásíꞌí ta̱patrón ra ta̱Potifar xíto ní ñá no̱o̱ ta̱José,
ta ñii ki̱vi̱ ni̱ka̱ꞌa̱n ñá xíꞌin ra,
káchí ñá saá:
―Naꞌa,
ku̱su̱n ún xíꞌin i̱ ―káchí ñá.
8 Ta ni̱‑xiin ta̱José kasa ndivi ra ña káꞌa̱n ñá ndúkú ñá no̱o̱ ra,
ta nda̱kuii̱n ra,
káchí ra saá:
―Koto ún,
nana,
ta̱patrón i̱ sa̱kuiso chiño ra yi̱ꞌi̱ ndiꞌi chiño ta xíꞌin ndiꞌi ña kómí ra.
Ta ndiꞌi ñayóꞌo yóo ña ndaꞌa̱ i̱,
ta o̱n vása ndíꞌi ka̱ ini ra xa̱ꞌa̱ chiño,
ni xa̱ꞌa̱ ña kómí ra.
9 Yi̱ꞌi̱ kúu ta̱ xáꞌnda chiño veꞌe yóꞌo,
o̱n ko̱ó inka̱ ta̱káꞌno ka̱ no̱o̱ i̱.
Ta ta̱patrón i̱ ta̱xi ra nda̱yí ndaꞌa̱ i̱ no̱o̱ ndiꞌi ña kómí ra veꞌe yóꞌo,
ta no̱o̱ ñii la̱á yóꞌó kuiti,
nana,
kúu ña ni̱‑taxi ra nda̱yí ndaꞌa̱ i̱,
chi ñásíꞌí ra kúu ún.
Ña̱kán,
¿nda̱chun ví ki̱ꞌvi i̱ kua̱chi káꞌno ní xíꞌin ún no̱o̱ Ndios?
―káchí ta̱José xíꞌin ñá.
10 Ta ndiꞌi saá ki̱vi̱ káꞌa̱n ñá kéꞌé ñá ra,
ta kísa ndu̱xa̱ ñá xíꞌin ra ña ku̱su̱n ra xíꞌin ñá.
Ta ni̱‑xiin ra ku̱su̱n ra xíꞌin ñá,
ta ni ni̱‑xiin ra koo yatin ra no̱o̱ yóo ñá.
11 Ta ñii ki̱vi̱ ni̱ki̱ꞌvi ta̱José ini veꞌe ta̱Potifar ña kasa chiño ra,
ta nda̱ ñii ni̱vi na kísa chiño yóꞌo o̱n ko̱ó na yóo mi̱i ki̱vi̱ yóꞌo.
12 Ta ñásíꞌí ta̱patrón ra xa̱ndi̱ko̱n ti̱in ñá tiko̱to̱ ra,
ta ni̱ka̱ꞌa̱n ñá xíꞌin ra:
―Ku̱su̱n ún xíꞌin i̱ vitin ―káchí ñá.
Ta ta̱José kama xi̱no ra ke̱ta ra kua̱ꞌa̱n ra,
ta sa̱ndakoo ra ndaꞌa̱ ñá tiko̱to̱ ra ña ti̱in ñá.
13 Tá xi̱ni ñá ni̱ndo̱o ndasaá kuiti tiko̱to̱ ra ndaꞌa̱ ñá,
14 ta ni̱nda̱ꞌyi ñá ka̱na ñá na kísa chiño no̱o̱ ñá,
ta ni̱ka̱ꞌa̱n ñá xíꞌin na,
káchí ñá saá:
―Koto ndó,
ta̱ñoo hebreo ta̱a ta̱ sa̱ta yii̱ i̱,
ki̱xaa̱ ra yóꞌo ña kusiki ra mi̱i yó.
Ni̱ki̱ꞌvi ra no̱o̱ kísi̱n i̱ ta ki̱xaa̱ ra no̱o̱ i̱,
ta kóni ra ku̱su̱n ra xíꞌin i̱,
ta yi̱ꞌi̱ ndixa ndeé ní ni̱nda̱ꞌyi i̱.
15 Tá xi̱ni̱ so̱ꞌo ra ndí ndeé ní ni̱nda̱ꞌyi i̱ xíꞌin ndiꞌi ndee̱ i̱,
ta ni̱yi̱ꞌví ra ta kama ke̱ta ra xi̱no ra kua̱ꞌa̱n ra,
ta sa̱ndakoo ra tiko̱to̱ ra yóꞌo ―káchí ñá.
16 Ta ta̱xi va̱ꞌa ñá tiko̱to̱ ta̱José a̱nda̱ ndi̱kó yii̱ ñá ndi̱xaa̱ ra.
17 Ta saá kama nda̱to̱ꞌon ñá xíꞌin ra,
káchí ñá:
―Ta̱esclavo ún ta̱ñoo hebreo,
ta̱ ki̱xaa̱ xíꞌin ún yóꞌo,
ni̱ki̱ꞌvi ra no̱o̱ kísi̱n i̱,
ta ki̱xáꞌá ra kísa ndu̱xa̱ ra xíꞌin i̱ ña ku̱su̱n i̱ xíꞌin ra,
18 ta yi̱ꞌi̱ ndeé ní ni̱nda̱ꞌyi i̱ xíꞌin ndiꞌi ndee̱ i̱,
ta ni̱yi̱ꞌví ra ta ke̱ta ra xi̱no ra kua̱ꞌa̱n ra,
ta sa̱ndakoo ra tiko̱to̱ ra yóꞌo.
19 Saá ke̱ꞌé ta̱esclavo ún xíꞌin i̱ ―káchí ñá.
Ta ta̱patrón ta̱José ni̱saa̱ ní ra xa̱ꞌa̱ ña xi̱ni̱ so̱ꞌo ra to̱ꞌon nda̱to̱ꞌon ñásíꞌí ra xíꞌin ra.
20 Ta saá xa̱ꞌnda chiño ra ña tiin na ta̱José,
ta saá ti̱in na ra ta chi̱kaa̱ na ra ini veꞌe ka̱a,
no̱o̱ ñóꞌo napreso ta̱rey.
Ta ini veꞌe ka̱a yóꞌo,
21 Ndios yóo ra xíꞌin ta̱José,
chi kúndáꞌví ini Ndios xíni ñaꞌá ra,
ta ta̱xi Ndios ña sákusii̱ ta̱José ini ta̱a ta̱ xáꞌnda chiño no̱o̱ na ndáa napreso na ñóꞌo ini veꞌe ka̱a.
22 Ta ta̱yóꞌo sa̱kuiso chiño ra ta̱José ña kaꞌnda chiño ra no̱o̱ ndiꞌi nata̱a na ñóꞌo ini veꞌe ka̱a.
Ta ndíso chiño ra xíꞌin ndiꞌi chiño ña kísa ndivi na ñóꞌo ini veꞌe ka̱a.
23 Ta ta̱ xáꞌnda chiño no̱o̱ na ndáa napreso na ñóꞌo ini veꞌe ka̱a,
o̱n vása xíni̱ ñóꞌó kundiꞌi ka̱ ini ra xa̱ꞌa̱ ndiꞌi chiño ña xa sa̱kuiso ra ta̱José,
chi Ndios yóo ra xíꞌin ta̱José,
ta va̱ꞌa ní yóo ndiꞌi chiño ña kéꞌé ta̱yóꞌo.