6 Ta ni̱yaꞌa kua̱ꞌa̱ kui̱ya̱,

ta ta̱Judá ndu̱kú ra ñásíꞌí ta̱Er,

sa̱ꞌya ra ta̱no̱ó,

ta ta̱Er to̱nda̱ꞌa̱ ra xíꞌin ñii ñaꞌa̱ na̱ní ñá Tamar.

7 Ta Ndios^a o̱n vása ní‑kusii̱ ini ra xíni ra kua̱ꞌa̱ ní ña o̱n váꞌa kéꞌé ta̱Er,

ta Ndios ta̱xi ra ña ni̱xiꞌi̱ ra.

8 Ta saá ta̱Judá ni̱ka̱ꞌa̱n ra xíꞌin sa̱ꞌya ra ta̱Onán,

káchí ra saá:

―Va̱ꞌa tonda̱ꞌa̱ ún xíꞌin ñaꞌa̱ ñá xi̱kuu ñásíꞌí ñani ún,

ta saá kasa ndivi ún nda̱yí ña kivi koo sa̱ꞌya ta̱Er ñani ún ―káchí ra.

9 Ta ta̱Onán kúnda̱a̱ ini ra,

nda̱tán káchí nda̱yí naIsrael,

ndí ta̱a sa̱ꞌya no̱ó ñá kaku xíꞌin ra,

o̱n sívi sa̱ꞌya mi̱i ra kuu ra,^b

ta sa̱ꞌya ta̱Er kuu ra.

Ña̱kán ndiꞌi saá yichi̱ tá kísi̱n ra xíꞌin ñáñaꞌa̱ ñá xi̱kuu ñásíꞌí ñani ra,

ta ndu̱kú ra ndasaá ku̱su̱n ra xíꞌin ñá ña o̱n kee sa̱ꞌya ñá ta saá o̱n kóo sa̱ꞌya ta̱Er.

10 Ta Ndios o̱n vása ní‑kusii̱ ini ra xíni ra ña o̱n váꞌa yóꞌo ke̱ꞌé ta̱Onán,

ta Ndios ta̱xi ra ña ni̱xiꞌi̱ tuku ta̱yóꞌo.

11 Ta saá ta̱Judá ni̱ka̱ꞌa̱n ra xíꞌin xa̱no ra ñáTamar,

káchí ra saá:

―Va̱ꞌa o̱n tonda̱ꞌa̱ ka̱ ún ta kutaku̱ ún veꞌe yivá ún a̱nda̱ ná kuaꞌno sa̱ꞌya i̱ ta̱Sela ta kuu ra ñii ta̱káꞌno,

ta tonda̱ꞌa̱ ra xíꞌin ún ―káchí ra xíꞌin ñá.

Chi ta̱Judá xáni si̱ni̱ ra tuku ta̱Sela yi̱yo ní kivi̱ ra nda̱tán ni̱xiꞌi̱ nañani ra.

Ña̱kán ñáTamar kua̱ꞌa̱n noꞌo̱ ñá kutaku̱ ñá veꞌe yivá ñá.

12 Ni̱yaꞌa kui̱ya̱ ta ni̱xiꞌi̱ ñásíꞌí ta̱Judá,

ñá kúu sa̱ꞌya ta̱Súa.

Tá ni̱yaꞌa kua̱ꞌa̱ ní ki̱vi̱,

ta̱Judá sa̱ndakoo ra ña kúchuchú ini ra,

ta xa ndu̱va̱ꞌa ini ra,

ta ñii ki̱vi̱ ke̱e ra kua̱ꞌa̱n ra ñoo Timnat,

no̱o̱ ndóo na ndáa ndikachi sa̱na̱ ra chi ki̱vi̱ yóꞌo xátá na yisi̱ rí,

ta ta̱a ta̱ va̱ꞌa nátaꞌan xíꞌin ra ta̱Hira,

ta̱ñoo Adulam,

kua̱ꞌa̱n ra xíꞌin ra.

13 Tá ñáTamar xi̱ni̱ so̱ꞌo ñá ndí ta̱si̱so ñá kua̱ꞌa̱n ra Timnat ña xa̱tá ra yisi̱ ndikachi sa̱na̱ ra,

14 ta na̱sama ñá si̱yo ñá ña kúu ña ndíxin náñaꞌa̱ ná ni̱xiꞌi̱ yii̱,

ta na̱kundixin ñá inka̱ tiko̱to̱,

ta xíꞌin ñii tiko̱to̱ na̱kasi ñá si̱ni̱ ñá,

ta̱nda̱ na̱kasi ñá sava no̱o̱ ñá,

ta ni̱xaa̱ ñá xi̱koo ñá yéꞌé no̱o̱ kíꞌvi ni̱vi ñoo Enaim,

yichi̱ ña kua̱ꞌa̱n ñoo Timnat kúu ña.

Ke̱ꞌé ñá saá chi xa ku̱nda̱a̱ ini ñá ndí ta̱káꞌno kúu ta̱Sela,

ta ta̱Judá o̱n ta̱ꞌán taxi ra ta̱yóꞌo tonda̱ꞌa̱ ra xíꞌin ñá.

15 Ta saá ta̱Judá kua̱ꞌa̱n ra yichi̱ yóꞌo,

ta xi̱ni ra ñii ñaꞌa̱ ñá ndási̱ sava no̱o̱,

ta xáni si̱ni̱ ra ñá síkó xíꞌin mi̱i no̱o̱ ta̱a kúu ñá.

16 Ta saá ni̱xaa̱ yatin ra no̱o̱ ñá;

o̱n vása xíni̱ ra tá xa̱no ra kúu ñá,

ta ni̱ka̱ꞌa̱n ra xíꞌin ñá,

káchí ra saá:

―¿Án taxi ún ku̱su̱n i̱ xíꞌin ún?

―káchí ra.

Ta ñáyóꞌo nda̱kuii̱n ñá,

ni̱nda̱ka̱ to̱ꞌon ñá ra:

―¿Yukía̱ taxi ún ndaꞌa̱ i̱ ña ku̱su̱n ún xíꞌin i̱?

―káchí ñá.

17 ―Taxi i̱ ñii ti̱súꞌu̱ loꞌo sa̱na̱ i̱ ndaꞌa̱ ún ―káchí ta̱Judá,

nda̱kuii̱n ra.

―Va̱ꞌa va,

tá saá.

Ta vitin sandakoo ún ñii ñandáya̱ꞌví ndíso ún ndaꞌa̱ i̱ a̱nda̱ ná kixaa̱ ti̱súꞌu̱ no̱o̱ i̱ ―káchí ñá.

18 Ta ni̱nda̱ka̱ to̱ꞌon ra ñá:

―¿Yukía̱ kóni ún sandakoo i̱ ndaꞌa̱ ún?

―káchí ra.

―Taxi ún sello ún^c xíꞌin yiꞌva̱ ña tákaa̱ ndaa ña,

ta taxi ún ta̱to̱n tón níꞌi ún yóꞌo ndo̱o ña ndaꞌa̱ i̱ ―káchí ñá,

nda̱kuii̱n ñá.

Ta ta̱Judá ta̱xi ndiꞌi ra ña ndu̱kú ñá no̱o̱ ra,

ta ni̱ki̱si̱n ra xíꞌin ñá,

ta ni̱ke̱e sa̱ꞌya ñá.

19 Ta saá ñáTamar ke̱e ñá kua̱ꞌa̱n noꞌo̱ ñá ta na̱xaa̱ ñá veꞌe ñá,

ta ta̱va ñá tiko̱to̱ ña na̱kasi si̱ni̱ ñá xíꞌin ñii sava no̱o̱ ñá,

ta tuku na̱kundixin ñá si̱yo ñá ña kúu ña ndíxin náñaꞌa̱ ná ni̱xiꞌi̱ yii̱.

20 Ta saá ta̱Judá ndi̱xaa̱ ra veꞌe ra ta ta̱xi ra ti̱súꞌu̱ loꞌo ndaꞌa̱ ta̱a ta̱ va̱ꞌa nátaꞌan xíꞌin ra,

ta̱ñoo Adulam,

ña taxi ra rí ndaꞌa̱ ñáñaꞌa̱ ñá ni̱ki̱si̱n xíꞌin ta̱Judá,

ta saá kuchiño nataxi ñá ñandáya̱ꞌví sa̱ndakoo ra ndaꞌa̱ ñá.

Ta ta̱ñoo Adulam yóꞌo ke̱e ra kua̱ꞌa̱n ra nandukú ra ñá,

ta o̱n ko̱ó ka̱ ñáyóꞌo ní‑naníꞌi ra.

21 Ta saá ni̱nda̱ka̱ to̱ꞌon ra nata̱a ñoo yóꞌo:

―¿Míchí kuchiño naníꞌi i̱ ñáñaꞌa̱ ñá síkó xíꞌin mi̱i,

ñá yóo ndáti ta̱a ndiꞌi saá ki̱vi̱ yichi̱ yatin ñoo Enaim yóꞌo?

―káchí ra.

―O̱n ko̱ó nda̱ ñii ñaꞌa̱ ñá káꞌa̱n ún xa̱ꞌa̱ yóo yóꞌo ―káchí na,

nda̱kuii̱n na.

22 Ta saá ndi̱kó ra kua̱ꞌa̱n noꞌo̱ ra no̱o̱ yóo ta̱Judá,

ta káchí ra saá:

―O̱n ko̱ó ñáñaꞌa̱ ní‑naníꞌi i̱,

ta nata̱a ñoo kán nda̱to̱ꞌon na xíꞌin i̱ o̱n ko̱ó nda̱ ñii ñaꞌa̱ ñá síkó xíꞌin mi̱i no̱o̱ ta̱a yóo ñoo na,

ka̱chí na ―káchí ra xíꞌin ta̱Judá.

23 Ta nda̱kuii̱n ta̱Judá,

káchí ra saá:

―Va̱ꞌa,

ná kindo̱o ñandáya̱ꞌví sa̱ndakoo i̱ ndaꞌa̱ ñá,

xa̱ꞌa̱ ña o̱n kusiki nani̱vi ñoo kán mi̱i yó;

ta ndakuii̱n ún xa̱ꞌa̱ i̱ ndí ndixa ti̱ꞌví i̱ ñii ti̱súꞌu̱ ndaꞌa̱ ñá,

ta o̱n ko̱ó ñá ní‑naníꞌi ún,

saá kachí ún ―káchí ra.

24 Ta ni̱yaꞌa u̱ni̱ yo̱o̱,

ta ki̱xi ni̱vi nda̱to̱ꞌon na xíꞌin ta̱Judá,

káchí na saá:

―ÑáTamar,

xa̱no ún,

xa ke̱ꞌé ñá ña o̱n váꞌa chi ni̱ki̱si̱n ñá xíꞌin inka̱ ta̱a,

ta xa̱ꞌa̱ ñayóꞌo xa ni̱ke̱e sa̱ꞌya ñá ―káchí na.

―¡Tava ndó ñá ta kaꞌmi ndó ñá xíꞌin ñoꞌo̱ xíxi̱ ta ná kivi̱ ñá!

―káchí ta̱Judá,

chi ni̱saa̱ ní ini ra xa̱ꞌa̱ ña xi̱ni̱ so̱ꞌo ra.

25 Tá ki̱vi̱ ki̱xáꞌá ni̱vi táva na ñá ko̱ꞌo̱n ñá ko̱ko̱ ñá,

ta ti̱ꞌví ñá to̱ꞌon ña ndato̱ꞌon ñá xíꞌin ta̱si̱so ñá,

káchí ñá saá:

“Ta̱a ta̱ xíꞌin ta̱to̱n,

ta xíꞌin sello,

ta xíꞌin yiꞌva̱ ña tákaa̱ ndaa ña,

kúu yivá sa̱ꞌya i̱ ña ñóꞌo.

Vitin koto ún,

¿yukú na xíꞌin kuenda ñayóꞌo?”,

káchí ñá xíꞌin to̱ꞌon ti̱ꞌví ñá.

26 Tá na̱koni ta̱Judá ndí kuenda mi̱i ra kúu ña káꞌa̱n ñá xa̱ꞌa̱,

ta káchí ra saá:

―Ndixa va̱ꞌa ki̱sa ndivi ñáñaꞌa̱ yóꞌo,

ta yi̱ꞌi̱ o̱n váꞌa ni̱keꞌé i̱,

chi o̱n vása ní‑taxi i̱ tonda̱ꞌa̱ ñá xíꞌin sa̱ꞌya i̱ ta̱Sela ―káchí ra.

Ta ta̱Judá o̱n vása ka̱ ní‑ndikó ra ku̱su̱n ra xíꞌin ñáTamar.

27 Ta ni̱yaꞌa ki̱vi̱,

ta ka̱ku sa̱ꞌya ñáTamar,

ta ku̱nda̱a̱ ini ni̱vi ndí nakuátí kúu na ka̱ku.

28 Tá mií káku naválí yóꞌo,

ta̱loꞌo ta̱ siꞌna va̱xi kaku sa̱nakaa̱ ra ndaꞌa̱ ra.

Ta ñáñaꞌa̱ ñá sákaku ñaꞌá kama ka̱tón ñá ñii yiꞌva̱ kuáꞌá ndaꞌa̱ ra,

ta káchí ñá saá:

―Ta̱yóꞌo siꞌna ka̱ku ―káchí ñá.

29 Ta ni̱yaꞌa ñii káni̱ loꞌo,

ta ta̱ siꞌna va̱xi kaku yóꞌo tuku na̱sita ra ndaꞌa̱ ra,

ta inka̱ ñani ra ta̱ káku xíꞌin ra,

siꞌna ka̱ ka̱ku ta̱yóꞌo.

Ña̱kán ñáñaꞌa̱ sákaku naválí yóꞌo sa̱kunaní ñá Fares,^d

ta̱ ka̱ku no̱ó,

ta káchí ñá saá xíꞌin ta̱loꞌo yóꞌo:

―¡Ndixa na̱kuiná ún yichi̱ ún xíꞌin ndee̱ ún!

30 Ta saá ka̱ku inka̱ ta̱loꞌo ta̱ nóꞌni yiꞌva̱ kuáꞌá ndaꞌa̱,

ta sa̱kunaní ñá ra Zara.^e