Ñayóꞌo káꞌa̱n, Ndios ni̱ka̱ꞌa̱n ra ñava̱ꞌa xa̱ꞌa̱ ta̱Jacob ñoo Bet‑el
35
Ta Ndios ni̱ka̱ꞌa̱n ra xíꞌin ta̱Jacob:
―Nakundichi ún ta ko̱ꞌo̱n ún kutaku̱ ún ñoo Bet‑el.
Ta ñoo yóꞌo kasa va̱ꞌa ún ñii na̱ma̱ yu̱u̱ no̱o̱ kasa to̱ꞌó ún yi̱ꞌi̱,
ta̱a ta̱ kúu Ndios ta̱ na̱ti̱vi no̱o̱ ún ki̱vi̱ ke̱e ún xi̱no ún no̱o̱ ñani ún ta̱Esaú ―káchí Ndios.
2 Ta saá ta̱Jacob ni̱ka̱ꞌa̱n ra xíꞌin ndiꞌi naveꞌe ra ta xíꞌin ndiꞌi na ndóo xíꞌin ra,
káchí ra saá:
―Tava ndiꞌi ndó ndios válí ña ndíso ndó ña kísa to̱ꞌó ni̱vi na inka̱ ñoo,
ta ndasa ndii xíꞌin mi̱i ndó,
ta nasama ndó tiko̱to̱ ndíxin ndó.
3 Ta kama koꞌyo̱ ndaa yó a̱nda̱ ñoo Bet‑el,
chi kán kasa va̱ꞌa i̱ ñii na̱ma̱ yu̱u̱ ña kasa to̱ꞌó i̱ Ndios,
ta̱a ta̱ chi̱ndeé yi̱ꞌi̱ ki̱vi̱ xi̱nakaa̱ tondóꞌó káꞌno ní xíꞌin i̱,
ta ni̱xi̱yo ra xíꞌin i̱ ndiꞌi yichi̱ no̱o̱ ni̱xika i̱,
ta yóo ra xíꞌin i̱ vitin ―káchí ta̱Jacob xíꞌin natáꞌan ra.
4 Ta saá na̱taxi na ndiꞌi ndios válí ña ndíso na ndaꞌa̱ ta̱Jacob,
ta na̱taxi na ndaꞌa̱ ra ndiꞌi síki so̱ꞌo na ña xáni si̱ni̱ na ndí kómí ña ndee̱ ndáa ña na,
ta ta̱Jacob sa̱ndúxu̱n ra ndiꞌi ñayóꞌo xa̱ꞌa̱ ñii yito̱n káꞌno tón na̱ní tatá tón ñíndichi yatin ñoo Siquem.
5 Ta saá ke̱e na kua̱ꞌa̱n na,
ta Ndios ke̱ꞌé ra ña ki̱xi ña ni̱yi̱ꞌví ní ndiꞌi ni̱vi na táku̱ kua̱ꞌa̱ ní ñoo yatin,
ta ni̱vi yóꞌo ni̱‑xiin na ko̱ꞌo̱n na sa̱ta̱ naveꞌe ta̱Jacob ña keꞌé na ña o̱n váꞌa xíꞌin nayóꞌo.
6 Ta ta̱Jacob xíꞌin ndiꞌi ni̱vi na kua̱ꞌa̱n xíꞌin ra ni̱xaa̱ na ñoo na̱ní Luz,
ta inka̱ ki̱vi̱ ñoo yóꞌo kúu Bet‑el,
ña nákaa̱ no̱o̱ ñoꞌo̱ Canaán.
7 Ta ki̱sa va̱ꞌa ra ñii na̱ma̱ yu̱u̱,
ta xiiña no̱o̱ ke̱ꞌé ra ñayóꞌo sa̱kunaní ra ña El‑bet‑el,
chi yóꞌo na̱ti̱vi Ndios no̱o̱ ra ki̱vi̱ ke̱e ra xi̱no ra no̱o̱ ñani ra.
8 Ta saá ni̱xiꞌi̱ ñáDébora ñaꞌa̱ ñá xi̱ndaa ñáRebeca xi̱kuu ñá,
ta sa̱ndúxu̱n na ñá xa̱ꞌa̱ ñii yito̱n tón na̱ní tatá tón ñíndichi chí ni̱no̱ ñoo Bet‑el.
Ta ta̱Jacob sa̱kunaní ra no̱o̱ ni̱ndu̱xu̱n ñáyóꞌo Alón‑bacut.a
9 Ta kua̱ꞌa̱ kui̱ya̱ ni̱xi̱yo ta̱Jacob ñoo Padan‑aram,
ta saá sa̱ndakoo ra ñoo yóꞌo.
Ta ndi̱kó ra ta ndi̱xaa̱ ra ñoo ra,
ta Ndios na̱ti̱vi ra inka̱ yichi̱ no̱o̱ ra,
ta ni̱ka̱ꞌa̱n ra ñava̱ꞌa xa̱ꞌa̱ ra,
10 káchí ra saá:
Yóꞌó vitin na̱ní ún Jacob,b
ta o̱n kunaní ka̱ ún saá;
ta vitin kunaní ún Israel,c
káchí Ndios xíꞌin ra.
Yi̱ꞌi̱ kúu Ndios Ta̱a ta̱ Kómí Ndiꞌi Ndee̱;
ná koo kua̱ꞌa̱ ní sa̱ꞌya ún
ta ná koo kua̱ꞌa̱ ní sa̱ꞌya ñani síkuá ún.
Ta ti̱xin nayóꞌo kaku ñii ñoo káꞌno,
ta xa̱ꞌa̱ ñoo káꞌno yóꞌo kaku kua̱ꞌa̱ ní ka̱ ñoo náꞌno,
ta ti̱xin nasa̱ꞌya ñani síkuá ún kaku kua̱ꞌa̱ ní narey.
12 Ñoꞌo̱ ña ta̱xi i̱ ndaꞌa̱ xi̱i̱ ún ta̱Abraham ta ta̱xi i̱ ña ndaꞌa̱ yivá ún ta̱Isaac,
ta tuku taxi i̱ ña ndaꞌa̱ yóꞌó,
ta ndaꞌa̱ nasa̱ꞌya ñani síkuá ún taxi tuku i̱ ña,
káchí Ndios xíꞌin ta̱Jacob.
13 Tá Ndios ndi̱ꞌi ni̱ka̱ꞌa̱n ra xíꞌin ta̱Jacob ta ke̱e ra kua̱ꞌa̱n ra.
14 Ta ta̱Jacob ti̱in ra ñii yu̱u̱ káꞌno ta ka̱ni ndichi ra ña no̱o̱ ni̱ka̱ꞌa̱n Ndios xíꞌin ra;
ta saá sa̱kuchu ra sa̱ta̱ ña xíꞌin aceite ta xíꞌin vino ña ki̱sa yi̱i̱ ra ña.
15 Ta saá sa̱kunaní ra xiiña no̱o̱ ñíndichi ra yóꞌo Bet‑el,d
chi yóꞌo ni̱ka̱ꞌa̱n Ndios xíꞌin ra.
Ñayóꞌo káꞌa̱n xa̱ꞌa̱ ña ni̱xiꞌi̱ ñáRaquel
16 Ta saá ke̱e na ñoo Bet‑el,
ta kúmáni̱ ka̱ xaa̱ na ñoo Efrata,
ta ñáRaquel ki̱xáꞌá káku sa̱ꞌya ñá,
ta xóꞌvi̱ ní ñá káku sa̱ꞌya ñá.
17 Ta xa̱ꞌa̱ ña xóꞌvi̱ ní ñá,
ñaꞌa̱ ñá sákaku sa̱ꞌya ñá ni̱ka̱ꞌa̱n ñá xíꞌin ñá saá:
―Nana,
o̱n kuyi̱ꞌví ún,
saá chi xa ka̱ku inka̱ ta̱a sa̱ꞌya ún ―káchí ñá.
18 Ta ñáRaquel xa̱ꞌa̱ ña yo̱ꞌvi̱ ní ni̱xo̱ꞌvi̱ ñá xa yatin kivi̱ ñá,
ta sa̱kunaní ñá ta̱loꞌo ka̱ku Benoni,e
ta saá ni̱xiꞌi̱ ñá;
ta yivá ta̱loꞌo yóꞌo sa̱kunaní ñaꞌá ra Benjamín.f
19 Saá ni̱xi̱yo ña ni̱xiꞌi̱ ñáRaquel,
ta sa̱ndúxu̱n na ñá yuꞌu̱ yichi̱ ña kua̱ꞌa̱n ñoo Efrata,
ta vitin na̱ní ñoo yóꞌo Belén.
20 Ta ta̱Jacob ti̱in ra ñii yu̱u̱ káꞌno ta ka̱ni ndichi ra ña no̱o̱ ni̱ndu̱xu̱n ñáRaquel,
ta a̱nda̱ ki̱vi̱ vitin ñíndichi ka̱ yu̱u̱ yóꞌo sánáꞌa ña no̱o̱ ni̱ndu̱xu̱n yi̱kí ko̱ñu ñá.
21 Ta ta̱Jacobg na̱kiꞌin ra kua̱ꞌa̱n ra,
ta kua̱ꞌa̱n ndiꞌi naveꞌe ra xíꞌin ra,
ta ni̱xaa̱ na ñii xiiña ña xíká ka̱ no̱o̱ na̱ní Migdal‑edar.
Ta ka̱ta ndichi ra yito̱n ta ka̱tón ra veꞌe mandiado ra xiiña yóꞌo.
Ñayóꞌo káꞌa̱n xa̱ꞌa̱ nasa̱ꞌya ta̱Jacob
22 Tá táku̱ ta̱Jacob mi̱i no̱o̱ ñoꞌo̱ yóꞌo,
ta ta̱Rubén sa̱ꞌya ra ni̱ki̱ꞌvi ra kua̱chi ña ni̱ki̱si̱n ra xíꞌin ñáBilha ñá kúu ñii ñásíꞌí ta̱Jacob.
Ta xi̱ni̱ so̱ꞌo ta̱Jacob yukía̱ ke̱ꞌé sa̱ꞌya ra yóꞌo.
U̱xu̱ o̱vi̱ xi̱kuu ta̱a sa̱ꞌya ta̱Jacob.
23 Sa̱ꞌya ra na ni̱xi̱yo xíꞌin ñáLea xi̱kuu ta̱Rubén ta̱no̱ó;
saá ndíko̱n ta̱Simeón,
ta̱Leví,
ta̱Judá,
ta̱Isacar xíꞌin ta̱Zabulón.
24 Sa̱ꞌya ra na ni̱xi̱yo xíꞌin ñáRaquel xi̱kuu ta̱José xíꞌin ta̱Benjamín.
25 Ta sa̱ꞌya ra na ni̱xi̱yo xíꞌin ñáBilha,
ñá kísa chiño no̱o̱ ñáRaquel,
xi̱kuu ta̱Dan xíꞌin ta̱Neftalí.
26 Sa̱ꞌya ra na ni̱xi̱yo xíꞌin ñáZilpa,
ñá kísa chiño no̱o̱ ñáLea,
xi̱kuu ta̱Gad xíꞌin ta̱Aser.
Ndiꞌi nayóꞌo xi̱kuu sa̱ꞌya ta̱Jacob na ka̱ku ñoo Padan‑aram.
Ñayóꞌo káꞌa̱n xa̱ꞌa̱ ña ni̱xiꞌi̱ ta̱Isaac
27 Ta saá ta̱Jacob ndi̱xaa̱ ra no̱o̱ yóo veꞌe yivá ra ta̱Isaac ñoo Mamre yatin ñoo Arba,
ta yóo inka̱ ki̱vi̱ ñoo Arba yóꞌo na̱ní ña Hebrón.
Ñoo yóꞌo ni̱xi̱yo ta̱Abraham xi̱na̱ꞌá xíꞌin ta̱Isaac.
28 Ta ta̱Isaac xi̱taku̱ ra ñii ciento ko̱mi̱ si̱ko̱ kui̱ya̱.
29 Ta ni̱xiꞌi̱ ra,
ta̱a ta̱xi̱kua̱ꞌa̱ ní xi̱kuu ra,
ta sa̱ꞌya ra ta̱Esaú xíꞌin ta̱Jacob sa̱ndúxu̱n na ra.