―Tata yivá i̱,

xáku ndáꞌví i̱ no̱o̱ ún,

kuáꞌa̱n ún ndukú ún ñáloꞌo yóꞌo no̱o̱ yivá ñá,

ña koo ñá ñásíꞌí i̱ ―káchí ra.

5 Tá xi̱ni̱ so̱ꞌo ta̱Jacob ndasaá ni̱ndoꞌo sa̱ꞌya ra ñáDina,

ta nda̱ ñii to̱ꞌon ni̱‑kaꞌa̱n ra xa̱ꞌa̱ ña o̱n váꞌa ke̱ꞌé ta̱Siquem a̱nda̱ ki̱vi̱ ndi̱kó nata̱a sa̱ꞌya ra veꞌe ra,

chi xi̱ndo̱o na yuku̱ xi̱ndaa na kiti̱ sa̱na̱ ra.

6 Ta saá ta̱Hamor,

xíꞌin sa̱ꞌya ra ta̱Siquem,

kua̱ꞌa̱n na ta ni̱xaa̱ na ña ka̱ꞌa̱n ta̱Hamor xíꞌin ta̱Jacob ña ndukú ra ñáDina tonda̱ꞌa̱ ñá xíꞌin sa̱ꞌya ra.

7 Tá mií saá nata̱a sa̱ꞌya ta̱Jacob nde̱e na yuku̱ ndi̱xaa̱ na veꞌe na,

ta xi̱ni̱ so̱ꞌo na ña ni̱ndoꞌo ñáki̱ꞌva̱ na,

ta kúchuchú ní ini na,

ta ni̱saa̱ ní na chi kua̱chi kini ní kúu ñayóꞌo no̱o̱ nañoo Israel,

chi ta̱Siquem ni̱ki̱ꞌvi ra kua̱chi xíꞌin ñása̱ꞌya ta̱Jacob.

¡Nda̱ loꞌo o̱n vása va̱ꞌa ni̱keꞌé ra saá!

8 Ta ta̱Hamor ni̱ka̱ꞌa̱n ra xíꞌin ta̱Jacob ta xíꞌin nata̱a sa̱ꞌya ra,

káchí ra saá:

―Tata Jacob,

káꞌa̱n i̱ xíꞌin ún xa̱ꞌa̱ sa̱ꞌya i̱ ta̱Siquem,

saá chi xa ni̱ki̱ꞌvi ñáDina sa̱ꞌya ún táku̱ ñá níma̱ ra.

Ta vitin xáku ndáꞌví i̱ no̱o̱ ún taxi ún ñá ná koo ñá ñásíꞌí sa̱ꞌya i̱.

9 Va̱ꞌa nduu ndó naveꞌe mi̱i ndi̱,

taxi ndó náñaꞌa̱ sa̱ꞌya ndó tonda̱ꞌa̱ ná xíꞌin ta̱a sa̱ꞌya ndi̱,

ta nakiꞌin ndó náñaꞌa̱ sa̱ꞌya ndi̱ tonda̱ꞌa̱ ná xíꞌin nata̱a sa̱ꞌya ndó.

10 Ta kindo̱o ndó kutaku̱ ndó no̱o̱ ñoꞌo̱ yóꞌo xíꞌin ndi̱.

Ta ñoꞌo̱ yóꞌo yóo ña ndaꞌa̱ ndó,

ta kómí ndó nda̱yí ña kasa chiño ndó no̱o̱ ña,

ta yóo nda̱yí ndaꞌa̱ ndó ña sata ndó ñoꞌo̱ ña kóni mi̱i ndó yóꞌo ―káchí ta̱Hamor.

11 Ta saá ta̱Siquem ni̱ka̱ꞌa̱n ra xíꞌin yivá ñáDina ta xíꞌin nata̱a ki̱ꞌva̱ ñá,

káchí ra saá:

―Ndóꞌó tata,

xáku ndáꞌví i̱ no̱o̱ ndó ña taxi ndó ñáDina tonda̱ꞌa̱ ñá xíꞌin i̱,

ta yi̱ꞌi̱ taxi i̱ ndiꞌi ña ndukú ndó no̱o̱ i̱ xa̱ꞌa̱ ñá.

12 Ta va̱ꞌa ndukú ndó víꞌí va̱ꞌa yáꞌvi ñá no̱o̱ i̱,

ta yi̱ꞌi̱ taxi i̱ ndiꞌi ña ndukú ndó.

Ta va̱ꞌa taxi ndó ñáloꞌo tonda̱ꞌa̱ ñá xíꞌin i̱ ―káchí ra.

13 Ta nata̱a sa̱ꞌya ta̱Jacob nda̱kuii̱n na yuꞌu̱ ta̱Siquem ta yuꞌu̱ yivá ra ta̱Hamor,

ni̱ka̱ꞌa̱n na to̱ꞌon vatá ña sandáꞌví ñaꞌá na,

saá chi ta̱Siquem ki̱ndaa ra ñato̱ꞌó ñáDina,

14 káchí na saá:

―O̱n váꞌa taxi ndi̱ ki̱ꞌva̱ ndi̱ ndaꞌa̱ ñii ta̱a ta̱ o̱n ta̱ꞌán kasa ndivi costumbre na̱ní circuncisión.^a

Saá chi tá keꞌé ndi̱ saá,

ta ña kini ní ni̱yaꞌa kaꞌan kúu ña no̱o̱ ndi̱.

15 Ta saá tá ndixa ndiꞌi ndó kasa ndivi ndó circuncisión yóꞌo,

ta va̱ꞌa koo viko̱ tónda̱ꞌa̱;

ta saá ñii ñii ta̱a ñoo ndó xíni̱ ñóꞌó kasa ndivi nda̱yí yóꞌo,

nda̱tán ñii ki̱ꞌva ki̱sa ndivi ndi̱ ña.

16 Ta saá kuchiño koo yichi̱ tonda̱ꞌa̱ ndó xíꞌin náñaꞌa̱ sa̱ꞌya ndi̱,

ta mi̱i ndi̱ tonda̱ꞌa̱ ndi̱ xíꞌin náñaꞌa̱ sa̱ꞌya ndó;

ta va̱ꞌa kutaku̱ ndi̱ xíꞌin ndó,

ta nduu yó ñii ñoo.

17 Tá o̱n xi̱in ndó kasa ndivi ndó nda̱yí yóꞌo,

ta kee ndi̱ ko̱ꞌo̱n ndi̱ inka̱ ñoo,

ta ñáloꞌo ki̱ꞌva̱ ndi̱ ko̱ꞌo̱n ñá xíꞌin ndi̱ ―káchí nasa̱ꞌya ta̱Jacob.

18 Ta ta̱Hamor xíꞌin sa̱ꞌya ra ta̱Siquem ki̱ndo̱o ini ra xíꞌin to̱ꞌon ña ni̱ka̱ꞌa̱n na xíꞌin ra.

19 Ta nda̱ loꞌo ni̱‑xiin ta̱Siquem kundati ra,

ta xa̱ndi̱ko̱n ke̱e ra kua̱ꞌa̱n ra kasa ndivi ra ña ni̱ka̱ꞌa̱n na xíꞌin ra,

chi kúsii̱ ní ini ra xíni ra ñáDina sa̱ꞌya ta̱Jacob.

Ta síkón ní kánóo ñato̱ꞌó ta̱Siquem no̱o̱ ndiꞌi nañoo ra.

20 Ta saá kua̱ꞌa̱n ra xíꞌin yivá ra ta̱Hamor,

ta ni̱xaa̱ o̱vi̱ ta̱yóꞌo no̱o̱ nákutáꞌan ndiꞌi ni̱vi no̱o̱ yóo yéꞌé káꞌno ñoo na,

ta ni̱ka̱ꞌa̱n ta̱Hamor xíꞌin ndiꞌi ta̱a ndóo yóꞌo,

káchí ra saá:

21 ―Káꞌa̱n i̱ xíꞌin ndóꞌó nata̱a yóꞌo,

ndí ta̱Jacob xíꞌin nata̱a sa̱ꞌya ra va̱ꞌa ní to̱ꞌó ni̱vi kúu na xíꞌin yó,

va̱ꞌa ná kutaku̱ na xíꞌin yó ta kasa chiño na no̱o̱ ñoꞌo̱ ñoo yó,

chi ndíka̱ ní no̱o̱ ñoꞌo̱,

ta nata̱a sa̱ꞌya yó va̱ꞌa tonda̱ꞌa̱ na xíꞌin náñaꞌa̱ sa̱ꞌya na,

ta náñaꞌa̱ sa̱ꞌya yó taxi yó ná tonda̱ꞌa̱ ná xíꞌin nata̱a sa̱ꞌya nayóꞌo.

22 Ta ña kuchiño kuu yó ñii la̱á ñoo xíꞌin na,

xíni̱ ñóꞌó kasa ndivi yó ñii costumbre na̱ní circuncisión,

nda̱tán yóo ña kéꞌé mi̱i na.

23 Ta saá ndiꞌi ña kómí na xíꞌin ndiꞌi kiti̱ sa̱na̱ na nduu ña kuenda mi̱i yó.

Ta va̱ꞌa kasa ndivi yó ña ndúkú na no̱o̱ yó,

ta saá kindo̱o na kutaku̱ na xíꞌin yó no̱o̱ ñoꞌo̱ ñoo yó ―saá káchí ta̱Hamor,

ñíndichi ra xíꞌin ta̱Siquem sa̱ꞌya ra no̱o̱ nañoo ra.

24 Ta ndiꞌi nata̱a na ndóo xíni̱ so̱ꞌo,

ni̱xi̱yo yuꞌú na kasa ndivi na ña ni̱ka̱ꞌa̱n o̱vi̱ ta̱yóꞌo xíꞌin na,

ta saá ndiꞌi nata̱a ñoo yóꞌo ki̱sa ndivi na costumbre ña na̱ní circuncisión.

25 Ta ni̱to̱nda̱a ki̱vi̱ u̱ni̱,

ta ndeé ní xóꞌvi̱ nata̱a ñoo yóꞌo ña kíꞌvi̱ ní no̱o̱ ni̱ta̱ꞌnda̱ na,

ta ta̱Simeón xíꞌin ta̱Leví,

sa̱ꞌya ta̱Jacob,

ki̱ꞌva̱ ñáDina kúu na,

ñii ñii ra ni̱tiin ra espada si̱i̱n va̱ꞌa,

ta kua̱ꞌa̱n nayóꞌo ta ni̱xaa̱ na ta ni̱ki̱ꞌvi na ñoo yóꞌo.

Ta xíꞌin espada yóꞌo xa̱ꞌni na ndiꞌi nata̱a,

chi nata̱a ñoo yóꞌo ni̱‑kuchiño na kani táꞌan na xíꞌin na.

26 Xa̱ꞌni na ta̱Hamor xíꞌin sa̱ꞌya ra ta̱Siquem,

ta saá ta̱va na ñáDina veꞌe ta̱Siquem,

ta kua̱ꞌa̱n noꞌo̱ na veꞌe ta̱Jacob.

27 Ta ki̱xaa̱ inka̱ nata̱a sa̱ꞌya ta̱Jacob ñoo yóꞌo no̱o̱ ni̱xiꞌi̱ nata̱a,

ta ta̱va na ndiꞌi ñakuíká nañoo yóꞌo xa̱ꞌa̱ ña o̱n váꞌa ke̱ꞌé ta̱Siquem xíꞌin ki̱ꞌva̱ na.

28 Ta ta̱va na ndiꞌi kiti̱ tí kúu ndikachi,

si̱ndi̱ki̱,

xíꞌin burro,

ta ta̱va na ndiꞌi ñakuíká ña yóo ñoo yóꞌo xíꞌin ña yóo yuku̱ yatin ñoo yóꞌo,

ta kua̱ꞌa̱n noꞌo̱ na xíꞌin ndiꞌi ña ta̱va na.

29 Ta na̱kiꞌin na ndiꞌi ñakuíká ña ñóꞌo ini veꞌe ni̱vi ñoo yóꞌo,

ta ti̱in na ndiꞌi nakuálí xíꞌin ndiꞌi násíꞌí kua̱ꞌa̱n na xíꞌin na.

30 Ta saá ni̱ka̱ꞌa̱n ta̱Jacob xíꞌin o̱vi̱ ta̱a sa̱ꞌya ra ta̱ kúu ta̱Simeón xíꞌin ta̱Leví,

káchí ra:

―Ndóꞌó,

káꞌno ní kua̱chi chi̱kaa̱ ndó yi̱ꞌi̱ xa̱ꞌa̱ ña ke̱ꞌé ndó.

Saá chi vitin na ñoo yatin yóꞌo na kúu naCanaán xíꞌin naFerez kusaa̱ ní ini na koni na yi̱ꞌi̱.

Tá nakaya táꞌan na ta kani táꞌan na xíꞌin i̱,

ta yi̱yo ní kaꞌni na yi̱ꞌi̱ xíꞌin ndiꞌi naveꞌe i̱,

chi loꞌo ní kúu nata̱a yóo xíꞌin mi̱i yó ―káchí ta̱Jacob.

31 Ta nda̱kuii̱n na yuꞌu̱ yivá na,

káchí na saá:

―¿Án va̱ꞌa yóo ña ke̱ꞌé ta̱ ñoo kán xíꞌin ki̱ꞌva̱ ndi̱?,

chi ke̱ꞌé ra xíꞌin ñá nda̱tán kéꞌé ta̱a xíꞌin ñii ñaꞌa̱ ñá kísi̱n xíꞌin ndiꞌi ta̱a ―káchí na xíꞌin yivá na.