Ñayóꞌo káꞌa̱n xa̱ꞌa̱ ta̱Jacob, na̱kutáꞌan va̱ꞌa ra xíꞌin ñani ra ta̱Esaú
33
Tá ta̱Jacob xi̱ni ra va̱xi ta̱Esaú xíꞌin ko̱mi̱ ciento ta̱a,
ta saá na̱taꞌví ra naválí ko̱ꞌo̱n na xíꞌin siꞌí ñii ñii mi̱i na,
ná kúu ñáLea,
ñáRaquel xíꞌin o̱vi̱ náñaꞌa̱ kísa chiño no̱o̱ ra.
2 Chi̱ndoo va̱ꞌa ra siꞌna náñaꞌa̱ kísa chiño no̱o̱ ra xíꞌin sa̱ꞌya ná,
ta saá ndíko̱n ñáLea xíꞌin sa̱ꞌya ñá,
ta sondi̱ꞌi ñáRaquel xíꞌin ta̱José.
3 Ta ta̱Jacob ni̱yaꞌa siꞌna ra no̱o̱ naveꞌe ra yóꞌo,
ña kua̱ꞌa̱n ra nakutáꞌan ra xíꞌin ñani ra,
ta xi̱ni ra va̱xi ñani ra ta chi̱ndee ra no̱o̱ ra ña kísa to̱ꞌó ra ñani ra,
ta tuku loꞌo kua̱ꞌa̱n ra ta tuku ke̱ꞌé ra saá,
ta u̱xa̱ yichi̱ ke̱ꞌé ra saá ta̱nda̱ ni̱xaa̱ yatin ra no̱o̱ yóo ñani ra.
4 Ta saá ta̱Esaú xíno ra va̱xi ra nakutáꞌan ra xíꞌin ñani ra,
ta ki̱xaa̱ ra no̱o̱ ñani ra ta no̱mi ra si̱ko̱n ñani ra,
ta ni̱chi̱to ra no̱o̱ ra.
Ta o̱vi̱ ra saá xáku ra nómi táꞌan ra.
5 Ta saá xi̱ni ta̱Esaú náñaꞌa̱ yóꞌo xíꞌin naválí,
ta ni̱nda̱ka̱ to̱ꞌon ra ta̱Jacob:
―Ñani i̱,
ta nayóꞌo,
¿yukú na?
―káchí ra.
―Nayóꞌo kúu na ta̱xi Ndios ndaꞌa̱ yi̱ꞌi̱,
yi̱ꞌi̱ ta̱a ta̱ kísa chiño no̱o̱ ún,
ñani i̱ ―káchí ta̱Jacob.
6 Ta saá náñaꞌa̱ ná kísa chiño no̱o̱ ta̱Jacob xíꞌin sa̱ꞌya ná ni̱to̱nda̱a yatin na no̱o̱ ta̱Esaú,
ta chi̱ndee na no̱o̱ na.
7 Ta ñáLea xíꞌin sa̱ꞌya ñá ni̱to̱nda̱a yatin na,
ta ñii ki̱ꞌva saá chi̱ndee na no̱o̱ na no̱o̱ ra.
Ta sondi̱ꞌi ni̱to̱nda̱a yatin ñáRaquel xíꞌin ta̱José,
ta tuku nayóꞌo chi̱ndee na no̱o̱ na no̱o̱ ra.
8 Ta ni̱nda̱ka̱ to̱ꞌon ta̱Esaú:
―¿Nda̱chun siꞌna ti̱ꞌví ún ndiꞌi kiti̱ no̱o̱ i̱,
tí na̱kutáꞌan xíꞌin i̱ yichi̱ kaa̱?,
ñani i̱ ―káchí ra.
―Xa̱ꞌa̱ ña nakiꞌin va̱ꞌa ún yi̱ꞌi̱ kúu ña ti̱ꞌví i̱ rí xaa̱ rí no̱o̱ ún,
ñani i̱,
tí sa̱níꞌi i̱ yóꞌó kúu rí ―káchí ta̱Jacob.
9 ―O̱n vása va̱ꞌa saá,
ñani mi̱i i̱,
yóo kua̱ꞌa̱ ní kiti̱ sa̱na̱ mi̱i i̱.
Va̱ꞌa ná kindo̱o tí sáníꞌi ún yi̱ꞌi̱ koo rí kuenda mi̱i ún ―káchí ta̱Esaú.
10 Ta ta̱Jacob ni̱ka̱ꞌa̱n ra,
káchí ra saá:
―O̱n ki̱ví saá,
ñani i̱.
Xáku ndáꞌví i̱ no̱o̱ ún,
nakiꞌin ún kiti̱ sáníꞌi i̱ yóꞌó,
chi kúsii̱ ní ini i̱ ña tuku xíto i̱ no̱o̱ ún vitin;
nda̱tán yóo ña xíto i̱ no̱o̱ Ndios,
saá yóo ña xíto i̱ no̱o̱ ún,
saá chi va̱ꞌa ní nákiꞌin ún yi̱ꞌi̱ vitin.
11 Xáku ndáꞌví i̱ no̱o̱ ún nakiꞌin ún kiti̱ ki̱xaa̱ xíꞌin i̱ ta sáníꞌi i̱ rí yóꞌó,
chi Ndios ki̱sa kuíká ra yi̱ꞌi̱,
ta o̱n ko̱ó ña kúmáni̱ ndaꞌa̱ i̱ ―káchí ta̱Jacob.
Ñii toon káꞌa̱n ta̱Jacob ta̱nda̱ ni̱to̱nda̱a ra sa̱noo ra ini ta̱Esaú ña na̱kiꞌin ra kiti̱ yóꞌo.
12 Ta nda̱kuii̱n ta̱Esaú,
ni̱ka̱ꞌa̱n ra xíꞌin ra:
―Ñani i̱,
ñii káchí ná koꞌyo̱ vitin,
ta yi̱ꞌi̱ ko̱ꞌo̱n i̱ siꞌna no̱o̱ ún ―káchí ra.
13 Ta nda̱kuii̱n ta̱Jacob:
―Ñani mi̱i i̱,
xíni̱ ún ndí naválí vitá ní na,
ta ndixa ndíꞌi ini i̱ xa̱ꞌa̱ ndikachi xíꞌin ti̱súꞌu̱ xíꞌin si̱ndi̱ki̱ xíꞌin sa̱ꞌya rí tí válí;
saá chi xa ndeé ní ku̱naa rí,
ta tá inka̱ ki̱vi̱ ko̱ꞌo̱n xáꞌá rí ta yi̱yo ní kivi̱ ndiꞌi rí xíꞌin ña kunaa rí.
14 Ñani i̱,
va̱ꞌa ka̱ ko̱ꞌo̱n siꞌna ún no̱o̱ i̱,
ta yi̱ꞌi̱ ta̱ kísa chiño no̱o̱ ún,
ta kuee kuee xaa̱ i̱ nda̱tán ñii ki̱ꞌva kuee kua̱ꞌa̱n naválí ta kuee kua̱ꞌa̱n kiti̱,
saá xaa̱ i̱ nakutáꞌan i̱ xíꞌin ún ñoo Seir ―káchí ta̱Jacob.
15 Ta ni̱ka̱ꞌa̱n ta̱Esaú:
―Va̱ꞌa va.
Taxi ún ná sandakoo i̱ ni̱vi na kísa chiño no̱o̱ i̱ ña chindeé na yóꞌó,
ñani i̱ ―káchí ra.
―O̱n keꞌé ún saá,
ñani i̱.
¿Nda̱chun sandiꞌi ka̱ i̱ yóꞌó?
Xa ke̱ꞌé ún ñava̱ꞌa xíꞌin i̱ chi na̱kiꞌin va̱ꞌa ún yi̱ꞌi̱ ―káchí ta̱Jacob.
16 Tá mií ki̱vi̱ yóꞌo ta̱Esaú na̱kiꞌin ra yichi̱ ndi̱kó ra kua̱ꞌa̱n noꞌo̱ ra ñoo Seir.
17 Ta ta̱Jacob na̱kiꞌin ra inka̱ yichi̱ ta kua̱ꞌa̱n ra inka̱ xiiña na̱ní Sucot.a
Tá ni̱xaa̱ ra xiiña yóꞌo,
ta ki̱sa va̱ꞌa ra ñii veꞌe koo ra xíꞌin naveꞌe ra,
ta ki̱sa va̱ꞌa ra kua̱ꞌa̱ tia̱ꞌva no̱o̱ kundo̱o kiti̱ sa̱na̱ ra,
ta xa̱ꞌa̱ ñayóꞌo xiiña yóꞌo na̱ní ña Sucot.
18 Ta saá ke̱e ta̱Jacob xiiña na̱ní Sucot ta va̱ꞌa ni̱xaa̱ ra ñoo Siquem ña nákaa̱ no̱o̱ ñoꞌo̱ Canaán,
ta ña ni̱xaa̱ ra yóꞌo kúu ña sa̱ndiꞌi ra yichi̱ ra,
no̱o̱ siꞌna ke̱e ra ñoo Padan‑aram ta ndi̱kó ra ndi̱xaa̱ ra ñoo ra.
Ta yatin no̱o̱ yóo ñoo Siquem ta̱Jacob ka̱ta ndichi ra yito̱n ta ka̱tón ra veꞌe mandiado ra,
ta ki̱ndo̱o ra xíꞌin naveꞌe ra yóꞌo.
19 Ñii ciento si̱ꞌún ka̱a kúu yaꞌvi cha̱ꞌvi ra xa̱ꞌa̱ ñoꞌo̱ yóꞌo ndaꞌa̱ nasa̱ꞌya ta̱Hamor,
ta̱ kúu yivá ta̱Siquem.
Ta no̱o̱ ñoꞌo̱ sa̱ta ra yóꞌo yíta veꞌe mandiado ra no̱o̱ ki̱ndo̱o ra xíꞌin naveꞌe ra.
20 Ta saá ta̱Jacob ki̱sa va̱ꞌa ra ñii na̱ma̱ yu̱u̱ ña kasa to̱ꞌó ra Ndios,
ta sa̱kunaní ra na̱ma̱ yu̱u̱ yóꞌo El‑Elohe‑Israel.b