Ñayóꞌo káꞌa̱n xa̱ꞌa̱ ña na̱kutáꞌan ta̱Jacob xíꞌin ta̱Esaú
32
Ta saá ta̱Jacob na̱kiꞌin ra kua̱ꞌa̱n tuku ra,
ta na̱kutáꞌan naángel na xíka chiño no̱o̱ Ndios xíꞌin ra.
2 Tá xi̱ni ta̱Jacob naángel,
ta ni̱ka̱ꞌa̱n ra saá:
“Nayóꞌo kúu natropa Ndios”,
káchí ra.
Ña̱kán sa̱kunaní ra Mahanaima xiiña no̱o̱ na̱kutáꞌan ra xíꞌin naángel.
3 Ta ta̱Jacob ti̱ꞌví ra na xíka chiño no̱o̱ ra kua̱ꞌa̱n na no̱o̱ ñani ra ta̱Esaú,
ta̱ yóo ñoo Seir ña nákaa̱ no̱o̱ ñoꞌo̱ Edom,
4 ta ni̱ka̱ꞌa̱n ra to̱ꞌon yóꞌo xíꞌin na:
―Ka̱ꞌa̱n ndó xíꞌin ñani i̱ ta̱Esaú saá:
“Tata,
ñani ún ta̱Jacob káchí ra ndí kúu ra ta̱ kísa chiño no̱o̱ ún,
ta káchí ra saá xíꞌin ún:
Ta ndiꞌi kui̱ya̱ ña ni̱‑xini táꞌan yó,
ta ni̱xi̱yo i̱ xíꞌin ta̱Labán.
5 Ta vitin yóo kiti̱ sa̱na̱ i̱:
si̱ndi̱ki̱,
burro,
ndikachi xíꞌin ti̱súꞌu̱.
Ta yóo kua̱ꞌa̱ ní ni̱vi na kísa chiño no̱o̱ i̱,
nata̱a xíꞌin náñaꞌa̱.
Tíꞌví i̱ to̱ꞌon yóꞌo xaa̱ ña no̱o̱ ún ña ndukú i̱ no̱o̱ ún ña va̱ꞌa nakiꞌin ún yi̱ꞌi̱,
chi yóꞌó kúu ta̱káꞌno no̱o̱ i̱,
tata”,
saá ka̱ꞌa̱n ndó xíꞌin ta̱Esaú ―káchí ta̱Jacob xíꞌin na xíka chiño no̱o̱ ra.
6 Ta saá ni̱xa̱ꞌa̱n ni̱vi na xíka chiño yóꞌo no̱o̱ ta̱Esaú ta ki̱sa ndivi na chiño,
ta na̱ndikó na no̱o̱ ta̱Jacob,
ta káchí na saá xíꞌin ra:
―Tata,
ni̱xa̱ꞌa̱n ndi̱ ni̱ka̱ꞌa̱n ndi̱ xíꞌin ñani ún ta̱Esaú,
ta xa va̱xi mi̱i ra nakutáꞌan ra xíꞌin ún,
ta va̱xi ko̱mi̱ ciento ta̱a xíꞌin ra ―káchí na xíꞌin ta̱Jacob.
7 Ta xi̱ni̱ so̱ꞌo ta̱Jacob ñayóꞌo,
ta ni̱yi̱ꞌví ní ra,
ta ki̱xáꞌá ndíꞌi ní ini ra.
Ta ni̱vi na ndóo xíꞌin ra,
na̱taꞌví ra na o̱vi̱ tiꞌvi,
ta o̱vi̱ tiꞌvi na̱taꞌví ra ñii ñii no̱o̱ kiti̱ sa̱na̱ ra tí kúu ndikachi,
ti̱súꞌu̱,
si̱ndi̱ki̱ xíꞌin tícamello,
8 chi xáni ini ra saá:
“Tá kixaa̱ ta̱Esaú no̱o̱ ñii tiꞌvi ni̱vi xíꞌin kiti̱ sa̱na̱ yó ta kani táꞌan ra xíꞌin ni̱vi,
ta inka̱ tiꞌvi ni̱vi xíꞌin kiti̱ kuchiño saka̱ku xíꞌin mi̱i na”,
saá xáni ini ra.
9 Ta ki̱xáꞌá ta̱Jacob káꞌa̱n ra xíꞌin Ndios,
káchí ra saá:
―Tata Ndios,
ta̱káꞌno no̱o̱ xi̱i̱ i̱ ta̱Abraham,
ta ta̱káꞌno no̱o̱ yivá i̱ ta̱Isaac kúu ún,
yóꞌó kúu ún Ndiosb mi̱i i̱,
ta xa ni̱ka̱ꞌa̱n ún xíꞌin i̱ ña ndikó i̱ noꞌo̱ i̱ ñoo i̱ xíꞌin ndiꞌi naveꞌe i̱,
ta ni̱ka̱ꞌa̱n ún va̱ꞌa kasa ndivi ún xíꞌin i̱;
10 ta̱a ta̱ ni̱no̱ ní kúu i̱;
vará o̱n vása kómí i̱ nda̱yí keꞌé ún ñava̱ꞌa xíꞌin i̱,
ta táxi ún ñava̱ꞌa ndaꞌa̱ i̱ ndiꞌi saá ki̱vi̱.
Ta ki̱vi̱ ke̱e i̱ veꞌe i̱ ta ni̱yaꞌa i̱ yu̱ta Jordán,
ta o̱n ko̱ó nda̱ ñii ñava̱ꞌa ní‑xikomí i̱,
ñii la̱á ta̱to̱n xi̱niꞌi i̱,
ta vitin ni̱to̱nda̱a i̱ kómí i̱ o̱vi̱ tiꞌvi náꞌno ni̱vi xíꞌin kua̱ꞌa̱ ní kiti̱.
11 Ndúkú i̱ no̱o̱ ún ná saka̱ku ún yi̱ꞌi̱ no̱o̱ ñani i̱ ta̱Esaú.
Yíꞌví ní i̱ ña kixaa̱ ra kaꞌni ra yi̱ꞌi̱,
ta kaꞌni ra násíꞌí yóꞌo xíꞌin naválí.
12 Mi̱i ún kúu ta̱ ni̱ka̱ꞌa̱n ndí keꞌé ún ñava̱ꞌa xíꞌin i̱,
ta koo kua̱ꞌa̱ ní sa̱ꞌya ñani síkuá i̱,
nda̱tán yóo yo̱tí yuꞌu̱ mi̱ni,
saá koo na,
chi nda̱ ñii ni̱vi o̱n ki̱ví kaꞌvi na yo̱tí yóꞌo ―káchí ta̱Jacob xíꞌin Ndios.
13 Ta o̱n ta̱ꞌán ka̱ ku̱su̱n ta̱Jacob ñoó yóꞌo,
ta chi̱kaa̱ ini ra saníꞌi ra kua̱ꞌa̱ ñava̱ꞌa kómí ra ñani ra ta̱Esaú,
ta saá na̱ka̱xin ra ñava̱ꞌa saníꞌi ra,
ña kúu:
14 o̱vi̱ ciento ti̱súꞌu̱ siꞌí,
o̱ko̱ ti̱súꞌu̱ chée,
o̱vi̱ ciento ndikachi siꞌí,
o̱ko̱ ndikachi chée;
15 o̱ko̱ u̱xu̱ camello siꞌí xíꞌin sa̱ꞌya rí,
o̱vi̱ si̱ko̱ si̱ndi̱ki̱ siꞌí,
u̱xu̱ si̱ndi̱ki̱ chée,
xíꞌin o̱ko̱ burro siꞌí xíꞌin u̱xu̱ burro chée.
16 Ta saá na̱taxi ra rí ndaꞌa̱ na kísa chiño no̱o̱ ra,
ñii ñii tiꞌvi kiti̱ yóꞌo,
ta ni̱ka̱ꞌa̱n ra xíꞌin na saá:
―Vitin ko̱ꞌo̱n ndiꞌi tiꞌvi kiti̱ yóꞌo xíꞌin ndó.
Ta tiꞌvi no̱ó kiti̱ ko̱ꞌo̱n ta ni̱vi na ndáa rí kundiko̱n na sa̱ta̱ rí,
ta saá tá xa ku̱xíká loꞌo kua̱ꞌa̱n rí,
ta kundiko̱n inka̱ tiꞌvi kiti̱ ko̱ꞌo̱n rí,
ta ni̱vi na ndáa rí kundiko̱n na ko̱ꞌo̱n na sa̱ta̱ rí.
Ta saá tá xa ku̱xíká loꞌo kua̱ꞌa̱n tiꞌvi yóꞌo,
ta saá kundiko̱n inka̱ tiꞌvi a̱nda̱ xi̱no̱,
saá koo yaꞌa ndiꞌi tiꞌvi ―káchí ra.
17 Ni̱ka̱ꞌa̱n ta̱Jacob xíꞌin ta̱a ta̱ kua̱ꞌa̱n xíꞌin tiꞌvi no̱ó,
káchí ra saá:
―Tá nakutáꞌan ún xíꞌin ñani i̱ ta̱Esaú,
ta nda̱ka̱ to̱ꞌon ra yóꞌó,
kachí ra saá:
“¿Yukú ta̱ kísa chiño ún no̱o̱?,
ta,
¿mí ko̱ꞌo̱n ún?,
ta,
¿yo sa̱na̱ kúu kiti̱ kua̱ꞌa̱n xíꞌin ún?”,
18 ta ndakuii̱n ún,
kachí ún saá xíꞌin ra:
“Tata,
tíyóꞌo kúu kiti̱ sáníꞌi ñani ún ta̱Jacob yóꞌó,
ta̱ kísa chiño no̱o̱ ún kúu ra.
Ta ndixa va̱xi ra sa̱ta̱ ndi̱ vitin”,
saá kachí ún xíꞌin ta̱Esaú ―káchí ta̱Jacob.
19 Ta xa̱ꞌnda chiño ra no̱o̱ ta̱o̱vi̱ xíꞌin ta̱u̱ni̱ xíꞌin ndiꞌi inka̱ na tíꞌví ra kua̱ꞌa̱n xíꞌin kiti̱,
káchí ra saá xíꞌin na:
―Tá naníꞌi ndó ta̱Esaú,
ta ñii káchí ka̱ꞌa̱n ndó xíꞌin ra,
nda̱tán ka̱ꞌa̱n ta̱no̱ó,
saá ka̱ꞌa̱n ndó.
20 Ta tuku ka̱ꞌa̱n ndó:
“Ta̱Jacob ta̱ kísa chiño no̱o̱ ún,
va̱xi ra sa̱ta̱ ndi̱”,
kachí ndó ―káchí ta̱Jacob.
Chi ta̱Jacob xáni ini ra saá:
“Xíꞌin ña saníꞌi yó ndiꞌi kiti̱ tí kua̱ꞌa̱n siꞌna yóꞌo ñani yó ta̱Esaú,
ta sanoo yó ña sáa̱ ní ini ra xíni ra mi̱i yó,
ta saá ko̱ꞌo̱n mi̱i yó koto yó ra.
Ta kuiti kuchiño nakiꞌin va̱ꞌa ra mi̱i yó”,
saá xáni ini ra.
21 Ta kiti̱ tí saníꞌi ra ñani ra kua̱ꞌa̱n siꞌna rí,
ta ni̱ndo̱o ra ku̱su̱n ra yuku̱ ñoó yóꞌo.
Ñayóꞌo káꞌa̱n xa̱ꞌa̱ ta̱Jacob, ñii ñoó ka̱ni táꞌan ra xíꞌin ñii ta̱a
22 Tá mií ñoó yóꞌo ta̱Jacob nda̱koo ra ta na̱kiꞌin ra o̱vi̱ násíꞌí ra xíꞌin o̱vi̱ ná kísa chiño no̱o̱ ra xíꞌin u̱xu̱ ñii sa̱ꞌya ra,
ta sa̱yaꞌa ra ndiꞌi nayóꞌo no̱o̱ yásín takuií yu̱ta na̱ní Jaboc.
23 Ta saá sa̱yaꞌa ra ndiꞌi ña kómí ra.
24 Ta̱Jacob ndi̱kó ra ta ni̱ndo̱o matóꞌón ra,
ta xa ñoó ní kúu ña ta ñii ta̱a ki̱xaa̱ ra no̱o̱ ra ta káni táꞌan ra xíꞌin ra a̱nda̱ ni̱ti̱vi.
25 Tá ta̱yóꞌo kúnda̱a̱ ini ra o̱n vása kundeé ra no̱o̱ ta̱Jacob,
ta ka̱ni ra no̱o̱ si̱ꞌin ra,
ta ni̱yaꞌa no̱o̱ yi̱ki̱ xíꞌin tu̱chu ta ku̱vitá sa̱ꞌnda ta̱Jacob.
26 Ta saá ni̱ka̱ꞌa̱n ta̱a yóꞌo xíꞌin ta̱Jacob:
―Saña ún yi̱ꞌi̱ chi xa kóni ti̱vi va ―káchí ra.
―O̱n saña i̱ yóꞌó,
tá o̱n ka̱ꞌa̱n ún to̱ꞌon ñava̱ꞌa xa̱ꞌa̱ i̱ ―káchí ta̱Jacob xíꞌin ra.
27 Ta ni̱nda̱ka̱ to̱ꞌon ta̱a yóꞌo:
―¿Yukía̱ na̱ní ún?
―káchí ra.
―Jacob na̱ní i̱ ―nda̱kuii̱n ta̱Jacob.
28 Ta saá ni̱ka̱ꞌa̱n ta̱a yóꞌo,
káchí ra saá:
―O̱n kunaní ka̱ ún Jacob,
vitin kunaní ún Israel,c
chi xa ka̱ni táꞌan ún xíꞌin Ndios ta xíꞌin nata̱a,
ta ku̱ndeé ún ―káchí ra.
29 Ta ni̱nda̱ka̱ to̱ꞌon ta̱Jacob,
káchí ra saá:
―Vitin ka̱ꞌa̱n ún xíꞌin i̱,
¿yukía̱ na̱ní ún?
―káchí ta̱Jacob.
Ta nda̱kuii̱n ra,
káchí ra saá:
―¿Nda̱chun ndáka̱ to̱ꞌon ún ki̱vi̱ i̱?
―káchí ra.
Ta saá ta̱a yóꞌo ni̱ka̱ꞌa̱n ra to̱ꞌon ñava̱ꞌa xa̱ꞌa̱ ta̱Jacob mi̱i xiiña no̱o̱ yíta ra yóꞌo.
30 Ta ta̱Jacob sa̱kunaní ra xiiña no̱o̱ yíta ra yóꞌo Peniel,d
chi ni̱ka̱ꞌa̱n ra:
“Xi̱ni i̱ mi̱i no̱o̱ Ndios xíꞌin nduchu̱ no̱o̱ i̱,
ta saá ni,
táku̱ ka̱ i̱”,
káchí ra.
31 Tá ta̱Jacob ni̱yaꞌa ra Peniel yóꞌo ta xa va̱xi kana ño̱ꞌo kúu ña.
Chi si̱ꞌin ra ni̱yaꞌa táꞌan ña ta ku̱vitá sa̱ꞌnda ra,
ña̱kán káníꞌi ra kua̱ꞌa̱n ra.
32 Xa̱ꞌa̱ ñayóꞌo a̱nda̱ ki̱vi̱ vitin sa̱ꞌya ñani síkuá nañoo Israel o̱n vása xíxi na ko̱ñu si̱ꞌin kiti̱,
chi ta̱a yóꞌo ka̱ni ra no̱o̱ si̱ꞌin ta̱Jacob.