―Vitin kee ún ndikó ún noꞌo̱ ún ñoo yivá ún no̱o̱ táku̱ naveꞌe ún,

ta yi̱ꞌi̱ ko̱ꞌo̱n i̱ xíꞌin ún ―káchí Ndios.

4 Ta ti̱ꞌví ta̱Jacob na kísa chiño no̱o̱ ra ña kana na ñáRaquel xíꞌin ñáLea kixi ná no̱o̱ ra.

Ta ki̱xaa̱ náyóꞌo no̱o̱ yóo ra ndáa ra ndikachi xíꞌin ti̱súꞌu̱ sa̱na̱ ra,

5 ta ni̱ka̱ꞌa̱n ra xíꞌin náyóꞌo,

káchí ra saá:

―Xíto i̱ ndí tata yivá ndó o̱n vása va̱ꞌa xíto ra no̱o̱ i̱ nda̱tán va̱ꞌa ni̱xi̱yo no̱o̱ ra táꞌan ya̱chi̱.

Ta saá ni,

xíni̱ i̱ ndí Ndios ta̱ kúu Ndios no̱o̱ yivá i̱,

xa yóo ra xíꞌin i̱ ndiꞌi saá ki̱vi̱.

6 Vitin mi̱i ndó xíni̱ va̱ꞌa ndó ndí xíꞌin ndiꞌi ndee̱ i̱ ki̱sa chiño i̱ no̱o̱ tata yivá ndó,

7 ta ta̱yóꞌo kua̱ꞌa̱ ní yichi̱ sa̱ndáꞌví ra yi̱ꞌi̱,

chi u̱xu̱ yichi̱ na̱sama ra ña cháꞌvi ra yi̱ꞌi̱.

Ta Ndios o̱n vása ní‑taxi ra yivá ndó keꞌé ra ña o̱n váꞌa xíꞌin i̱.

8 Ta ki̱vi̱ ni̱ka̱ꞌa̱n yivá ndó xíꞌin i̱:

“Chaꞌvi i̱ yóꞌó xíꞌin kiti̱ tí kuíín”,

ka̱chí ra,

ta ndiꞌi ti̱súꞌu̱ siꞌí xíꞌin ndikachi siꞌí ka̱ku sa̱ꞌya rí nina tí kuíín.

Tá ni̱ka̱ꞌa̱n tuku ra xíꞌin i̱:

“Chaꞌvi i̱ yóꞌó xíꞌin kiti̱ tí kómí chi̱chi sa̱ta̱”,

ka̱chí ra,

ta ndiꞌi ti̱súꞌu̱ siꞌí xíꞌin ndikachi siꞌí ka̱ku sa̱ꞌya rí nina tí kómí chi̱chi sa̱ta̱.

9 Siꞌa ke̱ꞌé Ndios ki̱ndaa ra sa̱na̱ yivá ndó,

ta ta̱xi ra rí ndaꞌa̱ i̱.

10 ’Ki̱vi̱ ki̱xaa̱ ña nákutáꞌan tíkiti̱ siꞌí xíꞌin tíkiti̱ chée,

ta ñii ñoó ni̱xa̱ní i̱ ñii xa̱ni,

ta xi̱ni i̱ ti̱súꞌu̱ chée tí nákutáꞌan xíꞌin ti̱súꞌu̱ siꞌí,

ta tíchée yóꞌo nina tí kuíín xíꞌin tí kómí chi̱chi sa̱ta̱ kúu ndiꞌi rí.

11 Xíꞌin xa̱ni yóꞌo ñaángel ña xíka chiño no̱o̱ Ndios ni̱ka̱ꞌa̱n ña kána ña yi̱ꞌi̱ xíꞌin ki̱vi̱ i̱,

ta saá nda̱kuii̱n i̱:

“Yóꞌo yóo i̱,

tata.”

12 Ta ni̱ka̱ꞌa̱n ñaángel saá xíꞌin i̱:

“Saá káchí Ndios xíꞌin ún:

Koto ún,

ta kunda̱a̱ ini ún,

ndiꞌi saá tíkiti̱ tíchée tí nákutáꞌan xíꞌin tíkiti̱ tísiꞌí kúu tí kuíín án tí kómí chi̱chi sa̱ta̱,

chi yi̱ꞌi̱ kúnda̱a̱ ini i̱ xa̱ꞌa̱ ndiꞌi ña ke̱ꞌé ta̱Labán xíꞌin ún.

13 Yi̱ꞌi̱ kúu Ndios ta̱ na̱ti̱vi no̱o̱ ún ñoo Bet‑el,

no̱o̱ sa̱kuchu ún aceite sa̱ta̱ yu̱u̱ ta ki̱ndo̱o ún ñii ñava̱ꞌa xíꞌin i̱.

Vitin nakundichi ún ta kee ún ñoo yóꞌo;

ta ndikó ún noꞌo̱ ún ñoo no̱o̱ ka̱ku ún,

káchí Ndios xíꞌin ún”,

ka̱chí ñaángel xíꞌin i̱ ―káchí ta̱Jacob xíꞌin násíꞌí ra.

14 Ta saá ñáRaquel xíꞌin ñáLea nda̱kuii̱n ná,

káchí ná saá xíꞌin ta̱Jacob:

―Va̱ꞌa va,

chi mi̱i ndi̱ o̱n vása ndáti ka̱ ndi̱ nakiꞌin ndi̱ ñakuíká ndaꞌa̱ yivá ndi̱.

15 Tata yivá ndi̱ nda̱tán kéꞌé ra xíꞌin ni̱vi na o̱n vása xíni̱ ra,

saá kéꞌé ra xíꞌin ndi̱.

Ni̱si̱kó ra ndi̱ꞌi̱,

ta va̱ꞌa táku̱ ra,

chi ndasaá mi̱i ra kuiti na̱kiꞌin ra ndiꞌi yaꞌvi ña ki̱sa chiño ún no̱o̱ ra xa̱ꞌa̱ ndi̱.

16 Ta ñakuíká ña ki̱ndaa Ndios ndaꞌa̱ tata yivá ndi̱,

ndixa ñakuíká mi̱i ndi̱ xíꞌin nasa̱ꞌya ndi̱ kúu ndiꞌi ña.

Ta va̱ꞌa kasa ndivi ún ndiꞌi ña ni̱ka̱ꞌa̱n Ndios xíꞌin ún ―káchí násíꞌí ta̱Jacob xíꞌin ra.

17 Ta saá na̱kundichi ta̱Jacob ta naválí sa̱ꞌya ra xíꞌin násíꞌí ra,

chi̱so ra na yóso na sa̱ta̱ kua̱ꞌa̱ tícamello.

18 Ta ndiꞌi kiti̱ sa̱na̱ ra kua̱ꞌa̱n rí xíꞌin ra,

kiti̱ tí ki̱ꞌin ra ña ki̱sa chiño ra ñoo Padan‑aram.

Ta kua̱ꞌa̱n ndiꞌi ña kómí ra xíꞌin ra,

ta ke̱e ra kua̱ꞌa̱n noꞌo̱ ra no̱o̱ ñoꞌo̱ Canaán no̱o̱ yóo yivá ra ta̱Isaac.

19 Ta ta̱Labán o̱n ko̱ó ra veꞌe ra chi xa ke̱e ra kua̱ꞌa̱n ra ñii xiiña no̱o̱ xátá ra yisi̱ tíndikachi sa̱na̱ ra.

Ta saá ñáRaquel ki̱sa kuíꞌná ñá ña kúu ndios válí ña ni̱xi̱yo veꞌe yivá ñá.

20 Ta̱Jacob o̱n vása ní‑ndato̱ꞌon ra xíꞌin ta̱Labán ta̱ kúu ta̱táꞌan naAram,

ña ke̱e ra kua̱ꞌa̱n noꞌo̱ ra,

ta ndiꞌi naveꞌe ra kua̱ꞌa̱n na xíꞌin ra;

siꞌa ke̱e seꞌé na kua̱ꞌa̱n na.

21 Ta saá ta̱Jacob xíꞌin naveꞌe ra xíno na kua̱ꞌa̱n na ni̱ka̱ku na xíꞌin ndiꞌi ña kómí na.

Ni̱yaꞌa na yu̱ta Éufrates,

ta na̱kiꞌin na kua̱ꞌa̱n na no̱o̱ yóo yuku̱ Galaad.

22 Ta saá ni̱yaꞌa u̱ni̱ ki̱vi̱ ta ta̱Labán ku̱nda̱a̱ ini ra xa kua̱ꞌa̱n ta̱Jacob xíꞌin ndiꞌi naveꞌe ra.

23 Ta saá ke̱e ra xíꞌin natáꞌan ra xi̱kundiko̱n ra sa̱ta̱ ta̱Jacob,

ta ni̱yaꞌa u̱xa̱ ki̱vi̱ ta na̱níꞌi ra ta̱Jacob no̱o̱ yóo yuku̱ Galaad.

24 Tá xa ku̱naa ñoó yóꞌo,

ta ni̱ki̱si̱n ta̱Labán ta ni̱xa̱ní ra ndí Ndios na̱ti̱vi ra no̱o̱ ra,

ta ni̱ka̱ꞌa̱n Ndios xíꞌin ra saá:

“Vitin koto va̱ꞌa ún ña o̱n ka̱ꞌa̱n ún to̱ꞌon yo̱ꞌvi̱ xíꞌin ta̱Jacob,

ta ni o̱n ka̱ꞌa̱n ún to̱ꞌon ña kasa káꞌno ún ra”,

káchí ra.

25 Ta ni̱xaa̱ ta̱Labán yatin no̱o̱ yóo ta̱Jacob yuku̱ Galaad,

no̱o̱ xa yíta veꞌe mandiado ta̱Jacob no̱o̱ kíndo̱o ra xíꞌin naveꞌe ra.

Ta saá ta̱Labán ka̱ta ndichi ra yito̱n ta ka̱tón ra veꞌe mandiado ra no̱o̱ kindo̱o ra xíꞌin natáꞌan ra.

26 Tá ndi̱ꞌi ki̱sa ndivi ra chiño yóꞌo,

ta ni̱xaa̱ ra no̱o̱ ta̱Jacob ta ni̱ka̱ꞌa̱n ta̱Labán xíꞌin ra:

―¿Yukía̱ ke̱ꞌé ún?

¿Nda̱chun sa̱ndáꞌví ún yi̱ꞌi̱?

Chi ti̱in ún nása̱ꞌya i̱ va̱xi ná xíꞌin ún,

ta nda̱tán yóo ni̱vi na ti̱in ún xíꞌin ndaꞌa̱ ún no̱o̱ na ka̱ni táꞌan xíꞌin ún,

ta ndu̱u na preso vitin,

saá yóo náñaꞌa̱ sa̱ꞌya i̱ no̱o̱ ún.

27 ¿Nda̱chun sa̱ndáꞌví ún yi̱ꞌi̱?

Chi ke̱e seꞌé ún no̱o̱ i̱,

ni ni̱‑kaꞌa̱n ún xíꞌin i̱ ndí kóni ún sandakoo ún yi̱ꞌi̱.

Tá ní kunda̱a̱ ini i̱ ndí ta̱ kee ko̱ꞌo̱n kuu ún,

níkúu,

ta nda̱yi i̱ yóꞌó xíꞌin ñii viko̱ ña si̱i̱ ini yó,

ta xíꞌin ña xíta na yaa livi,

ta xíꞌin ña sákáꞌa na tón caja ta xíꞌin arpa,

níkúu.

28 ¿Nda̱chun ni̱‑taxi ún nda̱yí i̱ xíꞌin ña chi̱to i̱ no̱o̱ náñaꞌa̱ sa̱ꞌya i̱ xíꞌin nasa̱ꞌya ñani i̱?

Ta yóꞌó ke̱ꞌé ún xíꞌin i̱ nda̱tán kéꞌé ñii ta̱a ta̱ naa ini.

29 Yi̱ꞌi̱ kuchiño keꞌé i̱ ña o̱n váꞌa xíꞌin ndó,

ta ñoó ndiveꞌe Ndios ta̱káꞌno no̱o̱ yivá ún na̱ti̱vi ra no̱o̱ i̱,

ta ni̱ka̱ꞌa̱n ra xíꞌin i̱,

ka̱chí ra saá:

“Koto va̱ꞌa ún ña o̱n ka̱ꞌa̱n ún to̱ꞌon yo̱ꞌvi̱ xíꞌin ta̱Jacob,

ta ni o̱n ka̱ꞌa̱n ún to̱ꞌon ña kasa káꞌno ún ra”,

ka̱chí ra xíꞌin i̱.

30 Tata,

kúnda̱a̱ ini i̱ ndí ndixa káchí ní ini ún noꞌo̱ ún veꞌe yivá ún,

ta o̱n vása kúnda̱a̱ ini i̱ nda̱chun ki̱sa kuíꞌná ún ñandios válí ña kísa to̱ꞌó i̱ ―káchí ta̱Labán.

31 Ta saá ta̱Jacob nda̱kuii̱n ra,

káchí ra saá xíꞌin ta̱Labán:

―Tata,

o̱n vása ní‑kaꞌa̱n i̱ xíꞌin ún ña kee i̱ noꞌo̱ i̱,

chi ta̱ ni̱yi̱ꞌví kúu i̱ ko̱to̱ xíꞌin ñandu̱xa̱ kindaa ún nása̱ꞌya ún ndaꞌa̱ i̱,

saá xa̱ni si̱ni̱ i̱.

32 Tata,

vitin tá ndaꞌa̱ ñii natáꞌan i̱ yóꞌo naníꞌi ún ñandios válí ña kísa to̱ꞌó ún,

ta va̱ꞌa ná kivi̱ na.

Ta saá natáꞌan yó na ndóo yóꞌo vitin xíto na,

tá naníꞌi ún ña xíni̱ ún kúu kuenda mi̱i ún ndíso i̱ ña,

ta va̱ꞌa nakiꞌin ún ña ―káchí ta̱Jacob.

Chi ta̱Jacob o̱n vása xíni̱ ra ndí ñáRaquel xa ki̱sa kuíꞌná ñá ñandios válí ña kísa to̱ꞌó yivá ñá.

33 Ta saá ni̱ki̱ꞌvi ta̱Labán ti̱xin veꞌe mandiado no̱o̱ yóo ta̱Jacob xíꞌin veꞌe mandiado no̱o̱ yóo ñáLea xíꞌin veꞌe mandiado no̱o̱ ndóo o̱vi̱ náñaꞌa̱ kísa chiño no̱o̱ na,

ta o̱n vása ní‑naníꞌi ra ñandios válí.

Ta sondi̱ꞌi ni̱ki̱ꞌvi ra ti̱xin veꞌe mandiado ñáRaquel.

34 Ta ñáRaquel xa ki̱ꞌin ñá ñandios válí,

ta ta̱an ñá ña ti̱xin táyi̱ tícamello ta xi̱koo ñá sa̱ta̱ táyi̱ yóꞌo.

Ta ta̱Labán ndiꞌi saá ti̱xin veꞌe mandiado yóꞌo na̱ndukú ra ñandios válí ña kísa to̱ꞌó ra,

ta o̱n vása ní‑naníꞌi ra ña.

35 Ta saá ni̱ka̱ꞌa̱n ñáRaquel xíꞌin ra:

―Tata yivá i̱,

o̱n kusaa̱ ini ún koni ún yi̱ꞌi̱ ña o̱n ki̱ví nakundichi i̱ no̱o̱ ún,

chi ki̱vi̱ vitin kúu ña ndeé ndóꞌo i̱ kue̱ꞌe̱ násíꞌí ―káchí ñá.

Ta ta̱Labán na̱ndukú ka̱ ra ndiꞌi saá xiiña ñandios válí,

ta o̱n vása ní‑naníꞌi ñaꞌá ra.

36 Ta ta̱Jacob ni̱saa̱ ní ra,

ta ni̱ka̱ꞌa̱n ra to̱ꞌon yóꞌo xíꞌin ta̱Labán:

―¿Yukú ña o̱n váꞌa ke̱ꞌé i̱?

¿Ndá kua̱chi ni̱ki̱ꞌvi i̱ ña ñii toon va̱xi ún sa̱ta̱ i̱?

37 Xa xi̱to ndiꞌi ún veꞌe i̱,

ta,

¿yukú kuenda ún na̱níꞌi ún veꞌe i̱?

Vitin chinóo ún ña na̱níꞌi ún kúu kuenda ún ña koto ndiꞌi natáꞌan ún xíꞌin natáꞌan i̱,

ta ñayóꞌo sanáꞌa án yóꞌó án yi̱ꞌi̱ kúu ta̱a ta̱nda̱a̱.

38 Yi̱ꞌi̱ o̱ko̱ kui̱ya̱ ki̱sa chiño i̱ no̱o̱ ún,

ta nda̱ ñii ndikachi sa̱na̱ ún ta nda̱ ñii ti̱súꞌu̱ sa̱na̱ ún o̱n vása ní‑noo sa̱ꞌya rí;

nda̱ ñii yichi̱ ni̱‑xixi i̱ ko̱ñu kiti̱ sa̱na̱ ún;

39 nda̱ ñii yichi̱ ni̱‑nataxi i̱ ndaꞌa̱ ún kiti̱ sa̱na̱ ún tí xa̱ꞌni tíyukú,

chi mi̱i i̱ ta̱xaꞌvi i̱ ndiꞌi tí nda̱ñóꞌó yóꞌo;

tá ni̱vi ki̱sa kuíꞌná na kiti̱ sa̱na̱ ún,

án ndiví kúu ña án ñoó kúu ña,

ta mi̱i ún na̱kiꞌin ún yaꞌvi rí ndaꞌa̱ i̱.

40 Ndiví xáꞌni ní kaꞌni̱ yi̱ꞌi̱,

ta ñoó xáꞌni ní kaxin yi̱ꞌi̱,

ta kua̱ꞌa̱ ní ñoó xíno maꞌná i̱ no̱o̱ i̱ xa̱ꞌa̱ ña vivíi xi̱ndaa i̱ kiti̱ sa̱na̱ ún.

41 O̱ko̱ kui̱ya̱ ni̱xi̱yo i̱ veꞌe ún;

ta u̱xu̱ ko̱mi̱ kui̱ya̱ ki̱sa chiño i̱ xa̱ꞌa̱ o̱vi̱ náñaꞌa̱ sa̱ꞌya ún,

ta i̱ño̱ kui̱ya̱ ki̱sa chiño i̱ xa̱ꞌa̱ kiti̱ sa̱na̱ i̱;

ta u̱xu̱ yichi̱ na̱sama ún ña cháꞌvi ún yi̱ꞌi̱.

42 Ta Ndios ta̱káꞌno no̱o̱ ta̱Abraham ta kúu ra ta̱káꞌno no̱o̱ yivá i̱ ta̱Isaac,

tá o̱n vása ní‑xiyo ra xíꞌin i̱,

níkúu,

ta taxín ún yi̱ꞌi̱ veꞌe ún ta nda̱ ñii ñava̱ꞌa o̱n taxi ún ndaꞌa̱ i̱ noꞌo̱ xíꞌin i̱ veꞌe i̱.

Ta Ndios xi̱to ra ndí ni̱xo̱ꞌvi̱ ní i̱ ta ndeé ní ki̱sa chiño i̱ no̱o̱ ún,

ta saá ñoó ndiveꞌe ni̱ka̱ꞌa̱n yo̱ꞌvi̱ ra xíꞌin ún ―káchí ta̱Jacob xíꞌin ta̱Labán.

43 Ta saá nda̱kuii̱n ta̱Labán,

káchí ra xíꞌin ta̱Jacob:

―Náñaꞌa̱ yóꞌo,

sa̱ꞌya mi̱i i̱ kúu ná.

Ta naválí yóꞌo,

sa̱ꞌya ñani mi̱i i̱ kúu na.

Ta ndikachi yóꞌo xíꞌin ti̱súꞌu̱ yóꞌo,

sa̱na̱ mi̱i i̱ kúu rí.

Ndiꞌi ña xíto ún yóꞌo kuenda mi̱i i̱ kúu ña.

Ta saá ni,

náñaꞌa̱ sa̱ꞌya i̱ ta naválí sa̱ꞌya ná,

o̱n ko̱ó ka̱ nda̱ ñii ña kúchiño keꞌé i̱ xa̱ꞌa̱ ña kindo̱o nayóꞌo xíꞌin i̱.

44 Ta vitin yóꞌó xíꞌin yi̱ꞌi̱,

ná kindo̱o yuꞌú yó ña ndasaá vivíi koni táꞌan yó.

Ñayóꞌo ndakuii̱n ña xa̱ꞌa̱ yó ―káchí ta̱Labán.

45 Ta saá ta̱Jacob ki̱ꞌin ra ñii yu̱u̱ káꞌno ta ka̱ni ndichi ra ña xa̱ꞌa̱ ña nakáꞌán na to̱ꞌon ña kindo̱o yuꞌú o̱vi̱ ra saá.

46 Ta ni̱ka̱ꞌa̱n ra xíꞌin natáꞌan ra,

káchí ra saá:

―Nakaya ndó kua̱ꞌa̱ ka̱ yu̱u̱ kundo̱o ña yóꞌo ―káchí ra.

Ta ndiꞌi ni̱vi yóꞌo na̱kaya na yu̱u̱ ta chi̱ndoo tiꞌvi na ña,

ta saá ndiꞌi na xi̱kundo̱o na ta xíxi na no̱o̱ ndóo tiꞌvi yu̱u̱ yóꞌo.

47 Ta ta̱Labán sa̱kunaní ra no̱o̱ ndóo yu̱u̱ yóꞌo to̱ꞌon mi̱i ra Jegar Sahaduta,

ta ta̱Jacob sa̱kunaní ra ña to̱ꞌon mi̱i ra Galaad.^b

48 Ta saá ni̱ka̱ꞌa̱n ta̱Labán:

―Vitin yu̱u̱ ña ndóo tiꞌvi yóꞌo kúu ña ndakuii̱n xa̱ꞌa̱ ña ki̱ndo̱o yuꞌú yó ―káchí ra.

Ña̱kán no̱o̱ ndóo yu̱u̱ yóꞌo na̱ní ña Galaad,

49 ta tuku na̱ní ña Mizpa,^c

chi ta̱Labán ni̱ka̱ꞌa̱n ra:

―Ta Ndios,

ná kundaa ra ña ki̱ndo̱o yuꞌú yó xa̱ꞌa̱,

ko̱to̱ yaꞌa ndoso yó ña,

chi vitin ta̱ꞌvi̱ táꞌan yó ta o̱n kuchiño kunda̱a̱ ini yó yukú ña keꞌé ñii ñii yó.

50 Táná saxo̱ꞌvi̱ ún náñaꞌa̱ sa̱ꞌya i̱,

án tonda̱ꞌa̱ ún xíꞌin inka̱ náñaꞌa̱,

vará nda̱ ñii ni̱vi o̱n vása xíto na ñayóꞌo,

ta Ndios kúu ta̱ xíto ndiꞌi ña kéꞌé ún ―káchí ra.

51 Ta ni̱ka̱ꞌa̱n ka̱ ta̱Labán xíꞌin ta̱Jacob,

káchí ra:

―Koto ún,

yóꞌo ndóo tiꞌvi yu̱u̱ yóꞌo xíꞌin yu̱u̱ ña ka̱ta ndichi i̱ xa̱ꞌa̱ ña káꞌa̱n yó.

52 Ta tiꞌvi yu̱u̱ ndóo yóꞌo xíꞌin yu̱u̱ káꞌno ñíndichi yóꞌo kúu ña taxi nakáꞌán yó xa̱ꞌa̱ ña ki̱ndo̱o yuꞌú yó yóꞌo.

Yi̱ꞌi̱ o̱n yaꞌa i̱ yu̱u̱ yóꞌo ña satakuéꞌe̱ i̱ yóꞌó,

ni yóꞌó o̱n yaꞌa ún yu̱u̱ yóꞌo ña satakuéꞌe̱ ún yi̱ꞌi̱.

53 Ndios,

ta̱ kúu ta̱káꞌno no̱o̱ naxi̱i̱ síkuá yó,

ta kúu ra ta̱káꞌno no̱o̱ xi̱i̱ ún ta̱Abraham,

ta kúu ra ta̱káꞌno no̱o̱ xi̱i̱ i̱ ta̱Nacor,

ná kasa nani ra xa̱ꞌa̱ yó ―káchí ra.

Ta saá ta̱Jacob chi̱náꞌa ra Ndios ta̱káꞌno no̱o̱ yivá ra ta̱Isaac.

54 Ta saá ta̱Jacob xa̱ꞌni ra kiti̱ ta ni̱so̱ko̱ ra rí no̱o̱ Ndios yuku̱ yóꞌo,

ta ka̱na ra natáꞌan ra kuxu na.

Ndiꞌi nayóꞌo xi̱xi na,

ta saá ku̱ñoó ta ni̱ki̱si̱n na yuku̱ yóꞌo.

55 Ta inka̱ ki̱vi̱ ni̱ti̱vi,

ta ta̱Labán nda̱koo ra ta ni̱chi̱to ra no̱o̱ naválí sa̱ꞌya ñani ra,

ta ni̱chi̱to ra no̱o̱ náñaꞌa̱ sa̱ꞌya ra;

ta ni̱ka̱ꞌa̱n ra ñava̱ꞌa xíꞌin nayóꞌo xa̱ꞌa̱ ña va̱ꞌa kutaku̱ na,

ta saá ndi̱kó ra kua̱ꞌa̱n noꞌo̱ ra ñoo ra.