28
Ta saá ta̱Isaac ka̱na ra ta̱Jacob,
ta ki̱xaa̱ ra no̱o̱ ra,
ta ni̱ka̱ꞌa̱n ra ñava̱ꞌa xíꞌin ra,
ta xa̱ꞌnda chiño ra no̱o̱ ra,
káchí ra saá:
―O̱n váꞌa tonda̱ꞌa̱ ún xíꞌin nda̱ ñii ñaꞌa̱ ñáCanaán yóꞌo.
2 Ta ko̱ꞌo̱n ún nda̱ ñoo Padan‑aram,
ko̱ꞌo̱n ún veꞌe ta̱Betuel ta̱ kúu yivá siꞌí ún,
ta tonda̱ꞌa̱ ún xíꞌin ñii ñaꞌa̱ sa̱ꞌya ta̱Labán ta̱ kúu ki̱ꞌva̱ siꞌí ún.
3 Ta Ndios ta̱ Kómí Ndiꞌi Ndee̱,
ná chindeé ra yóꞌó,
ná taxi ra kua̱ꞌa̱ ní sa̱ꞌya ñani síkuá ún ña nduu ún yivá kua̱ꞌa̱ ní ñoo.
4 Ná taxi ra ndaꞌa̱ ún xíꞌin ndaꞌa̱ ndiꞌi sa̱ꞌya ñani síkuá ún nda̱tán yóo ndiꞌi ña ni̱ka̱ꞌa̱n ra xíꞌin ta̱Abraham.
Ta saá ñoꞌo̱ no̱o̱ táku̱ yó yóꞌo vitin o̱n vása yóo ña nda̱tán yóo ñoꞌo̱ mi̱i yó.
Ta ñii ki̱vi̱ kixaa̱ ña kuu ña ñoꞌo̱ mi̱i ndó,
chi ñoꞌo̱ ña ki̱ndo̱o Ndios taxi ra ndaꞌa̱ ta̱Abraham kúu ña ―káchí ta̱Isaac xíꞌin ta̱Jacob.
5 Ta saá ta̱Isaac ti̱ꞌví ra ta̱Jacob kua̱ꞌa̱n ra ñoo Padan‑aram.
Ta ta̱Jacob na̱kiꞌin ra kua̱ꞌa̱n ra veꞌe ta̱Labán,
ta̱ kúu sa̱ꞌya ta̱Betuel,
ñii ta̱táꞌan naAram.
Ta ki̱ꞌva̱ ta̱Labán yóꞌo kúu ñáRebeca,
ñá kúu siꞌí ta̱Jacob xíꞌin ta̱Esaú.
6 Ta ta̱Esaú xi̱ni̱ so̱ꞌo ra ndí ta̱Isaac ni̱ka̱ꞌa̱n ra ñava̱ꞌa xíꞌin ta̱Jacob ta xa̱ꞌnda chiño ra no̱o̱ ta̱Jacob ña o̱n tonda̱ꞌa̱ ra xíꞌin nda̱ ñii ñaꞌa̱ ñáCanaán,
ta va̱ꞌa ka̱ ti̱ꞌví ñaꞌá ra kua̱ꞌa̱n ra tonda̱ꞌa̱ ra ñoo Padan‑aram,
7 ta saá ta̱Jacob ki̱sa ndivi ra ña ni̱ka̱ꞌa̱n yivá ra ta siꞌí ra xíꞌin ra,
ta ke̱e ra kua̱ꞌa̱n ra ñoo Padan‑aram.
8 Ta ta̱Esaú ku̱nda̱a̱ ini ra ndí o̱n vása kúsii̱ ini yivá ra ndí náñaꞌa̱ náCanaán tonda̱ꞌa̱ ná xíꞌin nda̱ ñii sa̱ꞌya ra.
9 Ta saá ta̱Esaú ni̱xa̱ꞌa̱n ra veꞌe ta̱Ismael,
sa̱ꞌya ta̱Abraham,
ta to̱nda̱ꞌa̱ ra xíꞌin ñáMahalat sa̱ꞌya ta̱Ismael,
ta ki̱ꞌva̱ ta̱Nebaiot kúu ñá.
Ta ki̱vi̱ to̱nda̱ꞌa̱ ra xíꞌin ñáyóꞌo,
ta̱Esaú xa kómí ra inka̱ násíꞌí ra.
Ñayóꞌo káꞌa̱n, na̱ti̱vi Ndios no̱o̱ ta̱Jacob
10 Ta saá ta̱Jacob ki̱vi̱ ke̱e ra ñoo Beerseba,
kua̱ꞌa̱n ra yichi̱ ña kua̱ꞌa̱n ñoo Harán.
11 Ta ni̱xaa̱ ra yuku̱ ta xa ni̱ke̱tá ño̱ꞌo kúu ña,
ta ki̱ndo̱o ra yóꞌo ku̱su̱n ra ñoó.
Chi̱ndúꞌu̱ ra ñii yu̱u̱ ña kanóo si̱ni̱ ra sa̱ta̱ ña,
ta xi̱kandúꞌu̱ ra kísi̱n ra.
12 Ta ni̱xa̱ní ra xi̱ni ra ñíndichi ñii ndiyo síkón ní ña,
ta kíxáꞌá ña nda̱ no̱o̱ ñoꞌo̱ ta̱nda̱ ñoyívi ni̱no xáa̱ ña,
ta naángel na xíka chiño no̱o̱ Ndios kua̱ꞌa̱n ndaa na ta va̱xi noo na no̱o̱ ndiyo yóꞌo.
13 Ta saá xi̱ni ra Ndiosa ñíndichi ra nda̱ no̱o̱ síkón no̱o̱ xáa̱ ndiyo,
ta ni̱ka̱ꞌa̱n Ndios xíꞌin ra saá:
Yi̱ꞌi̱ kúu Ndios ta̱káꞌno no̱o̱ xi̱i̱ ún ta̱Abraham ta ta̱káꞌno no̱o̱ yivá ún ta̱Isaac.
Ndiꞌi ñoꞌo̱ Canaán xíꞌin no̱o̱ kándúꞌu̱ ún vitin,
taxi i̱ ña ndaꞌa̱ ún xíꞌin ndaꞌa̱ nasa̱ꞌya ñani síkuá ún ña kutaku̱ ndó no̱o̱ ña.
14 Koo kua̱ꞌa̱ ní sa̱ꞌya ñani síkuá ún,
nda̱tán yóo kua̱ꞌa̱ ní yaa̱ no̱o̱ ñoꞌo̱ saá koo na,
ña kui̱ta̱ níꞌnó na kutaku̱ na ndiꞌi saá xiiña no̱o̱ ñoꞌo̱.
Ta ndiꞌi saá ni̱vi ñoyívi no̱o̱ ñoꞌo̱ keꞌé i̱ ñava̱ꞌa xíꞌin na,
xa̱ꞌa̱ yóꞌó xíꞌin xa̱ꞌa̱ nasa̱ꞌya ñani síkuá ún.
15 Ndixa yi̱ꞌi̱ yóo i̱ xíꞌin ún,
ta kundaa i̱ yóꞌó nda̱ mí ko̱ꞌo̱n ún,
ta saá taxi i̱ ña nandikó ún ndixaa̱ ún no̱o̱ ñoꞌo̱ yóꞌo.
O̱n sandakoo i̱ yóꞌó,
ta kasa ndivi ndiꞌi i̱ to̱ꞌon yóꞌo ña káꞌa̱n i̱ xíꞌin ún,
káchí Ndios xíꞌin ra ña ni̱xa̱ní ra.
16 Ta ta̱Jacob ndi̱ꞌi ni̱xa̱ní ra ta na̱káxín ini ra,
ta xa̱ni si̱ni̱ ra saá:
“Mi̱i ñandixa Ndios yóo ra yóꞌo,
ta o̱n vása ní‑nakoni yó ta saá yóo ña.”
17 Ta ni̱yi̱ꞌví ní ra ta xa̱ni ini ra saá:
“Mi̱i yóꞌo kúu ñii xiiña no̱o̱ yi̱i̱ ní.
¡Yóꞌo kúu veꞌe Ndios!
¡Yóꞌo yóo yéꞌé ñoyívi ni̱no!”,
káchí ra.
18 Ta ni̱ti̱vi inka̱ ki̱vi̱,
ta ta̱Jacob nda̱koo ra xita̱a̱n ní,
ta ki̱ꞌin ra yu̱u̱ no̱o̱ xi̱nóo si̱ni̱ ra,
ta ka̱ni ndichi ra ña,
ta sa̱kuchu ra ña xíꞌin aceite.
19 Ta mi̱i yóꞌo ni̱xi̱yo ñii ñoo xi̱naní ña Luz,
ta ta̱Jacob na̱sama ra ki̱vi̱ ñoo yóꞌo,
ta chi̱nóo ra ki̱vi̱ ña Bet‑el.b
20 Ta ta̱Jacob ni̱ka̱ꞌa̱n ra to̱ꞌon ña ndixa kasa ndivi ra,
káchí ra saá:
Tá ko̱ꞌo̱n Ndios xíꞌin i̱
ta kundaa ra yi̱ꞌi̱ no̱o̱ kua̱ꞌa̱n i̱ vitin,
ta taxi ra ña kuxu i̱,
ta taxi ra ña kundixin i̱,
21 ta va̱ꞌa ndikó i̱ veꞌe yivá i̱,
ta saá nduu ra Ndios mi̱i i̱
ta kasa káꞌno i̱ ñii la̱á mi̱i ra.
22 Yu̱u̱ ña ka̱ni ndichi i̱ yóꞌo nda̱tán yóo ñii seña saá yóo ña,
chi yóꞌo kasa to̱ꞌó ni̱vi Ndios;
ta kíndo̱o i̱ xíꞌin Ndios keꞌé i̱ saá:
ndí ndiꞌi ña taxi Ndios ndaꞌa̱ i̱,
taꞌví i̱ ndiꞌi ña u̱xu̱ koꞌndo,
ta ñii koꞌndo yóꞌo sandikó i̱ ña ndaꞌa̱ Ndios,
káchí ta̱Jacob.