Ñayóꞌo káꞌa̱n xa̱ꞌa̱ ña kua̱ꞌa̱n ta̱Isaac ñoo Gerar
26
Ta kui̱ya̱ yóꞌo nákaa̱ ní so̱ko ndiꞌi saá no̱o̱ ñoꞌo̱ yóꞌo,
nda̱tán yóo ña ni̱ndoꞌo na ki̱vi̱ xi̱taku̱ ta̱Abraham,
saá yóo ña.
Ña̱kán ta̱Isaac ke̱e ra kua̱ꞌa̱n ra ñoo Gerar no̱o̱ ni̱xi̱yo ta̱Abimelec,
ta̱rey no̱o̱ naFilistea.
2 Ta na̱ti̱vi Ndiosa no̱o̱ ta̱Isaac,
ta ni̱ka̱ꞌa̱n ra xíꞌin ra,
káchí ra saá:
―O̱n ko̱ꞌo̱n ka̱ ún no̱o̱ ñoꞌo̱ Egipto.
Ta va̱ꞌa ka̱ kutaku̱ ún no̱o̱ ñoꞌo̱ no̱o̱ ka̱ꞌa̱n i̱ xíꞌin ún.
3 Ta vitin kindo̱o ún kutaku̱ ún no̱o̱ ñoꞌo̱ yóꞌo ña o̱n ta̱ꞌán kuu ñoꞌo̱ mi̱i ún.
Ta yi̱ꞌi̱ yóo i̱ xíꞌin ún ta keꞌé i̱ ñava̱ꞌa xíꞌin ún.
Chi taxi i̱ ñoꞌo̱ yóꞌo ta taxi i̱ ndiꞌi ñoꞌo̱ ña yóo yatin xíꞌin ña ndaꞌa̱ mi̱i ún ta ndaꞌa̱ nasa̱ꞌya ñani síkuá ún.
Ta saá kasa ndivi i̱ ndiꞌi to̱ꞌon ña chi̱ndúꞌu̱ i̱ ki̱ndo̱o i̱ xíꞌin yivá ún ta̱Abraham.
4 Taxi i̱ ña koo kua̱ꞌa̱ ní sa̱ꞌya ñani síkuá ún nda̱tán yóo kua̱ꞌa̱ ní ki̱mi ñoyívi síkón,
saá koo na.
Ta taxi i̱ ndiꞌi ñoꞌo̱ yóꞌo ndaꞌa̱ ndó.
Ta keꞌé i̱ ñava̱ꞌa xíꞌin ndiꞌi saá ni̱vi ñoyívi no̱o̱ ñoꞌo̱ xa̱ꞌa̱ nasa̱ꞌya ñani síkuá ún,
5 chi ta̱Abraham ka̱ndixa ra yi̱ꞌi̱,
ta ki̱sa ndivi ra ndiꞌi nda̱yí i̱ xíꞌin ndiꞌi ña ni̱ka̱ꞌa̱n i̱ xíꞌin ra ―káchí Ndios xíꞌin ta̱Isaac.
6 Ta saá ta̱Isaac ki̱ndo̱o ra táku̱ ra ñoo Gerar.
7 Ta nata̱a táku̱ ñoo yóꞌo ni̱nda̱ka̱ to̱ꞌon na ra xa̱ꞌa̱ ñásíꞌí ra ñáRebeca,
ta ni̱ka̱ꞌa̱n ra xíꞌin na ndí ki̱ꞌva̱ ra kúu ñá,
chi yíꞌví ra ndato̱ꞌon ra xíꞌin na ndí kúu ñá ñásíꞌí ra.
Saá chi livi ní ñáRebeca,
ta xáni ini ta̱Isaac nata̱a ñoo yóꞌo kivi kaꞌni na ra xa̱ꞌa̱ ñá.
8 Ta ni̱yaꞌa kua̱ꞌa̱ ní ki̱vi̱,
ta saá ñii ki̱vi̱ ta̱rey Abimelec no̱o̱ yóo ventana veꞌe ra ñíndichi ra xíto ra,
ta xi̱ni ra ta̱Isaac nómi ra ñásíꞌí ra ñáRebeca.
9 Ta xa̱ndi̱ko̱n ta̱Abimelec ka̱na ra ta̱Isaac,
ta ki̱xaa̱ ta̱yóꞌo no̱o̱ ra,
káchí ra saá xíꞌin ra:
―Tata,
ndixa ñásíꞌí ún kúu ñáRebeca.
Ta,
¿nda̱chun ni̱ka̱ꞌa̱n ún xíꞌin ndi̱ ndí ki̱ꞌva̱ ún kúu ñá?
―káchí ra xíꞌin ta̱Isaac.
Ta nda̱kuii̱n ta̱Isaac,
káchí ra saá:
―Tata,
xa̱ꞌa̱ ña yíꞌví i̱ kaꞌni ndó yi̱ꞌi̱ xa̱ꞌa̱ ñásíꞌí i̱ kúu ña ni̱ka̱ꞌa̱n i̱ saá ―káchí ra.
10 Ta ni̱ka̱ꞌa̱n ta̱Abimelec xíꞌin ra:
―¿Nda̱chun ke̱ꞌé ún ñayóꞌo xíꞌin ndi̱?
Saloꞌo ní níkúu,
ta ku̱su̱n ñii ta̱ñoo yóꞌo xíꞌin ñásíꞌí ún,
ta saá yóꞌó kuu ta̱a ta̱ taxi nakava ndi̱ kua̱chi,
níkúu ―káchí ra.
11 Ta ta̱Abimelec xa̱ꞌnda chiño ra no̱o̱ ndiꞌi nañoo yóꞌo,
káchí ra saá xíꞌin na:
―Tá ñii ndóꞌó satáꞌan ndó ta̱yóꞌo án ñásíꞌí ra,
ta ndixa kivi̱ ndó ―káchí ta̱rey.
12 Ta kui̱ya̱ yóꞌo chi̱ꞌi ta̱Isaac no̱o̱ ñoꞌo̱ yóꞌo,
ta va̱ꞌa ní ni̱kee ra xíꞌin ña chi̱ꞌi ra,
chi Ndios chi̱ndeé ñaꞌá ra ña kua̱ꞌa̱ ní na̱kiꞌin ra no̱o̱ ñii ñii ña chi̱ꞌi ra.
13 Ta ku̱kuíká ní ra,
ta ni̱to̱nda̱a ra xi̱komí ra kua̱ꞌa̱ ní ñava̱ꞌa,
ta xi̱kuu ra ta̱káꞌno ní no̱o̱ ni̱vi.
14 Ta yóo kua̱ꞌa̱ ní ndikachi sa̱na̱ ra,
ta kua̱ꞌa̱ ní ti̱súꞌu̱ sa̱na̱ ra,
xíꞌin si̱ndi̱ki̱ sa̱na̱ ra,
xíꞌin na kísa chiño no̱o̱ ra,
ta saá naFilistea ki̱xáꞌá kísa kuíni̱ ini na xíni na ra.
15 Kui̱ya̱ ni̱yaꞌa táꞌan xi̱taku̱ ka̱ yivá ra ta̱Abraham,
ni̱vi na ki̱sa chiño no̱o̱ ta̱yóꞌo ki̱sa va̱ꞌa na kua̱ꞌa̱ ní pozo takuií.
Ta vitin xíꞌin ña kísa kuíni̱ ini na xíni na ta̱Isaac,
naFilistea na̱kasi na ndiꞌi pozo yóꞌo xíꞌin ñoꞌo̱.
16 Ta saá ni̱ka̱ꞌa̱n ta̱Abimelec xíꞌin ta̱Isaac:
―Tata,
vitin kee ún no̱o̱ ñoꞌo̱ ndi̱,
chi yóꞌó ni̱to̱nda̱a ún kúu ún ñii ta̱a ta̱ kómí kua̱ꞌa̱ ní ka̱ ndee̱ no̱o̱ ndiꞌi ndi̱ na táku̱ yóꞌo ―káchí ra.
17 Ta saá ke̱e ta̱Isaac kua̱ꞌa̱n ra,
ta ni̱xaa̱ ra yoso̱ ña yóo yatin ñoo Gerar,
ta ki̱ndo̱o ra táku̱ ra yóꞌo.
18 Na̱kuiná tuku ra ndiꞌi pozo no̱o̱ ñóꞌo takuií,
pozo ña ku̱va̱ꞌa kui̱ya̱ xi̱taku̱ ka̱ yivá ra kúu ña,
ta ni̱yaꞌa ni̱xiꞌi̱ ta̱Abraham ta naFilistea na̱kasi na pozo yóꞌo.
Ta ta̱Isaac sa̱kunaní ra ndiꞌi pozo yóꞌo nda̱tán yóo ki̱vi̱ ña sa̱kunaní yivá ra ña.
19 Ñii ki̱vi̱ ni̱vi na kísa chiño no̱o̱ ta̱Isaac xáta na kísa chiño na no̱o̱ ñoꞌo̱ yoso̱ yóꞌo,
ta na̱níꞌi na mi̱i no̱o̱ káku takuií va̱ꞌa.
20 Ta ni̱vi na ndáa ndikachi xíꞌin ti̱súꞌu̱ sa̱na̱ naFilistea na ndóo yoso̱ yóꞌo ka̱ni táꞌan na xíꞌin ni̱vi na ndáa ndikachi xíꞌin ti̱súꞌu̱ sa̱na̱ ta̱Isaac,
chi ni̱ka̱ꞌa̱n naFilistea xa̱ꞌa̱ takuií ndí takuií mi̱i na kúu rá.
Ña̱kán ta̱Isaac chi̱nóo ra ki̱vi̱ pozo yóꞌo,
na̱ní ña Esek,b
chi káni táꞌan na xa̱ꞌa̱ takuií pozo yóꞌo.
21 Ta na kísa chiño no̱o̱ ra ki̱sa va̱ꞌa na inka̱ pozo,
ta tuku naFilistea ki̱xáꞌá na káni táꞌan na xíꞌin nayóꞌo xa̱ꞌa̱ pozo,
ta saá ta̱Isaac chi̱nóo ra ki̱vi̱ pozo yóꞌo,
na̱ní ña Sitna.c
22 Ta saá ta̱Isaac ke̱e ra kua̱ꞌa̱n ra nda̱ xíká ka̱,
ta ni̱xaa̱ ra,
ta ki̱sa va̱ꞌa ra inka̱ pozo.
Ta o̱n vása ní‑kani táꞌan ni̱vi xíꞌin ra xa̱ꞌa̱ ña,
ta chi̱nóo ra ki̱vi̱ pozo yóꞌo,
na̱ní ña Rehobot,d
chi ni̱ka̱ꞌa̱n ra:
“Vitin Ndios táxi ra ñoꞌo̱ no̱o̱ xíka ndíka̱ yó,
ta no̱o̱ ñoꞌo̱ yóꞌo va̱ꞌa kutaku̱ yó”,
káchí ta̱Isaac.
23 Ta ta̱Isaac ke̱e ra kua̱ꞌa̱n ra yichi̱ kua̱ꞌa̱n ndaa ñoo Beerseba.
24 Ta xa ñoó kúu ña ta na̱ti̱vi Ndios no̱o̱ ra,
ta káchí Ndios saá xíꞌin ra:
Yi̱ꞌi̱ kúu Ndios ta̱a ta̱káꞌno no̱o̱ yivá ún ta̱Abraham.
O̱n kuyi̱ꞌví ún,
chi yóo i̱ xíꞌin ún.
Xa̱ꞌa̱ ña ka̱ndixa ta̱Abraham yi̱ꞌi̱,
keꞌé i̱ ñava̱ꞌa xíꞌin ún,
ta taxi i̱ ña koo kua̱ꞌa̱ ní sa̱ꞌya ñani síkuá ún,
káchí Ndios.
25 Ta saá ta̱Isaac ki̱sa va̱ꞌa ra ñii na̱ma̱ xíꞌin yu̱u̱ mi̱i xiiña yóꞌo,
ta ni̱ka̱ꞌa̱n ra xíꞌin Ndios ta ki̱sa to̱ꞌó ñaꞌá ra.
Ta ka̱tón ra veꞌe mandiado ra ta ka̱ni ndichi ra ña ña kindo̱o ra yóꞌo,
ta na kísa chiño no̱o̱ ra ki̱sa va̱ꞌa na inka̱ pozo.
26 Ñii ki̱vi̱ ta̱Abimelec ke̱e ra ñoo Gerar,
ña kua̱ꞌa̱n ra ka̱ꞌa̱n ra xíꞌin ta̱Isaac.
Ta kua̱ꞌa̱n ta̱Ahuzat ta̱ táxi si̱ni̱ ra xíꞌin ra,
ta kua̱ꞌa̱n inka̱ ta̱Ficol,
ta̱ ndíso chiño xíꞌin natropa ta̱Abimelec kúu ra,
ta ni̱xaa̱ na.
27 Ta ni̱ka̱ꞌa̱n ta̱Isaac xíꞌin na,
káchí ra saá:
―Tata,
¿nda̱chun ki̱xaa̱ ndó no̱o̱ i̱?,
chi ni̱‑xiin ndó koni ndó yi̱ꞌi̱,
ta ta̱xín ndó yi̱ꞌi̱ no̱o̱ ñoꞌo̱ ñoo ndó ―káchí ra xíꞌin na.
28 Ta nda̱kuii̱n na,
káchí na saá xíꞌin ra:
―Tata,
kúnda̱a̱ ini ndi̱ ndí Ndios yóo ra xíꞌin ún,
ta saá vitin xáni si̱ni̱ ndi̱ va̱ꞌa kindo̱o yó ñii ñava̱ꞌa.
Ta ñava̱ꞌa kindo̱o yó kúu ñayóꞌo:
29 O̱n keꞌé ún nda̱ ñii ña o̱n váꞌa xíꞌin ndi̱,
chi ndi̱ꞌi̱ o̱n vása ní‑satáꞌan ndi̱ yóꞌó.
Ndiꞌi saá ki̱vi̱ ni̱yaꞌa,
ndixa va̱ꞌa ni̱xi̱yo ndi̱ xíꞌin ún,
ta va̱ꞌa ni̱nda̱yi táꞌan ndi̱ xíꞌin ún ki̱vi̱ ke̱e ún,
ta vitin yóꞌó ta̱a ta̱ nákiꞌin ñava̱ꞌa no̱o̱ Ndios kúu ún ―káchí na xíꞌin ra.
30 Ta saá ta̱Isaac sa̱kana ra ñii viko̱ káꞌno xa̱ꞌa̱ na,
ta xi̱xi ndiꞌi na no̱o̱ viko̱ yóꞌo.
31 Ta ni̱ti̱vi inka̱ ki̱vi̱ ta nda̱koo na xita̱a̱n ní,
ta chi̱náꞌa na Ndios xíꞌin táꞌan na xa̱ꞌa̱ ñava̱ꞌa ki̱ndo̱o na.
Ta ta̱Isaac ni̱nda̱yi ra na,
ta saá nayóꞌo va̱ꞌa ni̱nda̱yi na ra ta ke̱e na kua̱ꞌa̱n noꞌo̱ na.
32 Tá mií ki̱vi̱ yóꞌo ni̱vi na kísa chiño no̱o̱ ta̱Isaac ki̱xaa̱ na nda̱to̱ꞌon na xíꞌin ra xa na̱níꞌi na takuií ini pozo ña na̱kuiná na.
33 Ta ta̱Isaac chi̱nóo ra ki̱vi̱ pozo yóꞌo,
na̱ní ña Seba.
Saá chi ki̱vi̱ ñoo yóꞌo kúu Beerseba a̱nda̱ ki̱vi̱ vitin.e
34 Ta ta̱Esaú kómí ra o̱vi̱ si̱ko̱ kui̱ya̱,
ta to̱nda̱ꞌa̱ ra xíꞌin ñáJudit,
ñá kúu sa̱ꞌya ta̱Beeri,
sa̱ꞌya ñani síkuá ta̱Het kúu ra.
Ta tuku to̱nda̱ꞌa̱ ta̱Esaú xíꞌin ñáBasemat,
sa̱ꞌya inka̱ sa̱ꞌya ñani síkuá ta̱Het ta̱ na̱ní Elón.
35 Ta ta̱Isaac xíꞌin ñáRebeca kúchuchú ní ini na chi násíꞌí ta̱Esaú o̱n váꞌa táku̱ ná xíꞌin nayóꞌo.