Ñayóꞌo káꞌa̱n xa̱ꞌa̱ nasa̱ꞌya ñani síkuá ta̱Abraham xíꞌin ñáCetura
25
Ta ni̱xi̱yo inka̱ ñásíꞌí ta̱Abraham,
na̱ní ñá Cetura.
2 Sa̱ꞌya ra xíꞌin ñáyóꞌo xi̱kuu ta̱Zimram,
ta̱Jocsán,
ta̱Medán,
ta̱Madián,
ta̱Isbac,
inka̱ ta̱Súa.
3 Ta̱Jocsán xi̱kuu yivá ta̱Seba xíꞌin inka̱ ta̱Dedán.
Sa̱ꞌya ñani síkuá ta̱Dedán kúu naAsur,
naLetus xíꞌin naLeum.
4 Sa̱ꞌya ta̱Madián xi̱kuu ta̱Efa,
ta̱Efer,
ta̱Hanoc,
ta̱Abida xíꞌin ta̱Elda.
Ndiꞌi nayóꞌo xi̱kuu sa̱ꞌya ñani síkuá ñáCetura.
5-6 Tá táku̱ ka̱ ta̱Abraham,
sa̱níꞌi ra ñava̱ꞌa ndaꞌa̱ sa̱ꞌya ra na ka̱ku xíꞌin inka̱ náñaꞌa̱ ná xi̱kuu násíꞌí ra,
ta ti̱ꞌví ra sa̱ꞌya ra yóꞌo kua̱ꞌa̱n na kutaku̱ na inka̱ xiiña ña yóo chí no̱o̱ va̱xi kana ño̱ꞌo,
ta ki̱ndo̱o ta̱Isaac xíꞌin yivá ra.
Ta̱Abraham ni̱ka̱ꞌa̱n ra ndí táná kixaa̱ ki̱vi̱ kivi̱ ra,
ta sa̱ꞌya ra ta̱Isaac nakiꞌin ra ndiꞌi ñakuíká xi̱komí ra.
Ñayóꞌo káꞌa̱n xa̱ꞌa̱ ndasaá ni̱xiꞌi̱ ta̱Abraham ta ni̱ndu̱xu̱n ra
7 Ta ndiꞌi kui̱ya̱ xi̱taku̱ ta̱Abraham xi̱kuu ña ñii ciento u̱ni̱ si̱ko̱ xa̱ꞌo̱n kui̱ya̱,
ta ni̱xiꞌi̱ ra.
8 Ta̱Abraham xi̱kuu ra ta̱a ta̱ o̱n ko̱ó kue̱ꞌe̱ ní‑xikomí,
ta ni̱to̱nda̱a ra xi̱kuu ra ta̱a ta̱xi̱kua̱ꞌa̱ ní,
ta ni̱xiꞌi̱ ra.
9 Ta nasa̱ꞌya ra ta̱Isaac xíꞌin ta̱Ismael sa̱ndúxu̱n na ra ini kavua̱ ña nákaa̱ no̱o̱ ñoꞌo̱ na̱ní Macpela ña nákaa̱ yatin ñoo Mamre,
ta ñoꞌo̱ yóꞌo xi̱kuu ñoꞌo̱ ta̱Efrón,
sa̱ꞌya ta̱Zohar ta̱ kúu sa̱ꞌya ñani síkuá ta̱Het.
10 Ta ñoꞌo̱ yóꞌo kúu ña sa̱ta ta̱Abraham ndaꞌa̱ nasa̱ꞌya ñani síkuá ta̱Het.
Ta kavua̱ yóꞌo ni̱ndu̱xu̱n ta̱Abraham yatin sii̱n ñásíꞌí ra ñáSara ñá ni̱xiꞌi̱ tá siꞌna.
11 Ni̱yaꞌa ña ni̱xiꞌi̱ ta̱Abraham,
ta Ndios ke̱ꞌé ra ñava̱ꞌa xíꞌin ta̱Isaac,
ta ki̱ndo̱o ra xi̱taku̱ ra no̱o̱ yóo pozo na̱ní Pozo Ndios,
ta̱a ta̱ táku̱ ta xíto ra yi̱ꞌi̱.
Ñayóꞌo káꞌa̱n xa̱ꞌa̱ nasa̱ꞌya ñani síkuá ta̱Ismael
12 Nayóꞌo xi̱kuu nasa̱ꞌya ta̱Ismael,
ta̱ xi̱kuu sa̱ꞌya ta̱Abraham xíꞌin ñáAgar ñáñoo Egipto,
ñá xi̱kuu ñá ki̱sa chiño no̱o̱ ñáSara.
13 Ñayóꞌo kúu ki̱vi̱ nasa̱ꞌya ta̱Ismael,
ta ndasaá ka̱ku na nda̱ ta̱no̱ó ta̱nda̱ ta̱sondíꞌí:
ta̱Nebaiot xi̱kuu sa̱ꞌya ra ta̱no̱ó;
ta ka̱ku ta̱Cedar,
ta̱Adbeel,
ta̱Mibsam,
14 ta̱Misma,
ta̱Duma,
ta̱Massa,
15 ta̱Hadar,
ta̱Tema,
ta̱Jetur,
ta̱Nafis xíꞌin ta̱Cedema.
16 Ñayóꞌo kúu ki̱vi̱ na u̱xu̱ o̱vi̱ sa̱ꞌya ta̱Ismael,
ta ki̱vi̱ ñii ñii mi̱i na sa̱kunaní na ki̱vi̱ ñoo no̱o̱ xi̱taku̱ na.
Ta ñii ñii na xa̱ꞌnda chiño na no̱o̱ tiꞌvi ni̱vi nañoo mi̱i na.
17 Ta ndiꞌi kui̱ya̱ xi̱taku̱ ta̱Ismael xi̱kuu ña ñii ciento o̱ko̱ xa̱ꞌo̱n o̱vi̱ kui̱ya̱,
ta ni̱xiꞌi̱ ra ta sa̱ndúxu̱n na ra.
18 Ta nasa̱ꞌya ñani síkuá ra ki̱ndo̱o na no̱o̱ ñoꞌo̱ ña nákaa̱ ma̱ꞌñó ñoo Havila xíꞌin ñoo Shur,
ña xíto ndaa no̱o̱ ñoꞌo̱ Egipto,
yóꞌo yáꞌa yichi̱ ña kua̱ꞌa̱n chí ñoo Asiria.
Kán xi̱taku̱ na,
ta o̱n vása ní‑xiin na koni táꞌan na.a
Ñayóꞌo káꞌa̱n xa̱ꞌa̱ ña ka̱ku ta̱Jacob xíꞌin ta̱Esaú
19 Ñayóꞌo ndáto̱ꞌon ña xa̱ꞌa̱ ta̱Isaac,
sa̱ꞌya ta̱Abraham.
20 Ta ta̱Isaac kómí ra o̱vi̱ si̱ko̱ kui̱ya̱,
ta to̱nda̱ꞌa̱ ra xíꞌin ñáRebeca,
ñá kúu sa̱ꞌya ta̱Betuel,
ki̱ꞌva̱ ta̱Labán kúu ñá.
Ta̱Betuel yóꞌo kúu ñii ta̱a ta̱táꞌan naAram,
ta ta̱ñoo Padan‑aram kúu ra.
21 Ta ñáRebeca ñaꞌa̱ ñá o̱n ki̱ví koo sa̱ꞌya kúu ñá,
ta saá ta̱Isaac xa̱ku ndáꞌví ra no̱o̱ Ndiosb xa̱ꞌa̱ ñá.
Ta Ndios xi̱ni̱ so̱ꞌo ra ña ni̱ka̱ꞌa̱n ta̱Isaac xa̱ꞌa̱ ñáRebeca,
ta ni̱ke̱e sa̱ꞌya ñá.
22 Ta saá ku̱nda̱a̱ ini ñá ndí o̱vi̱ nakuálí ñóꞌo ti̱xin ñá ta káni táꞌan na ti̱xin ñá,
ta xa̱ni si̱ni̱ ñá saá:
“¿Nda̱chun ndóꞌo yó saá?”,
xa̱ni si̱ni̱ ñá.
Ta saá ni̱xa̱ꞌa̱n ñá ni̱nda̱ka̱ to̱ꞌon ñá Ndios xa̱ꞌa̱ ña ndóꞌo ñá,
23 ta nda̱kuii̱n Ndios,
káchí ra saá xíꞌin ñá:
Ñóꞌo o̱vi̱ nakuálí ti̱xin ún,
ta o̱vi̱ ñoo kuu na,
ta nda̱ ti̱xin ún kixáꞌá ñoo yóꞌo nata̱ꞌvi̱ táꞌan ña.
Ta ñii ñoo ndeé ka̱ koo ña no̱o̱ inka̱ ñoo,
ta ni̱vi sa̱ꞌya ñani síkuá ta̱no̱ó kasa chiño na no̱o̱ ni̱vi sa̱ꞌya ñani síkuá ta̱o̱vi̱,
káchí Ndios.
24 Ta ni̱to̱nda̱a ki̱vi̱ ña kaku sa̱ꞌya ñáRebeca,
ta ka̱ku sa̱ꞌya ñá,
o̱vi̱ ta̱a kúu na.
25 Ta ta̱no̱ó ka̱ku,
yóo ní yisi̱ kuáꞌá ñii̱ ra,
ta sa̱kunaní na ra Esaú.c
26 Ta saá ka̱ku ñani ra,
ta ndaꞌa̱ ta̱o̱vi̱ yóꞌo ti̱in kútu̱ ña xa̱ꞌa̱ ta̱Esaú,
ta saá sa̱kunaní na ta̱o̱vi̱ Jacob.d
Ta ta̱Isaac kómí ra u̱ni̱ si̱ko̱ kui̱ya̱ ki̱vi̱ ka̱ku nasa̱ꞌya ñáRebeca.
Ñayóꞌo káꞌa̱n, ni̱si̱kó ta̱Esaú ñava̱ꞌa nakiꞌin ra xa̱ꞌa̱ ña ka̱ku no̱ó ra
27 Ta ta̱kuálí yóꞌo xa̱ꞌno na,
ta̱Esaú ni̱to̱nda̱a ra xi̱kuu ra ta̱ xíka yuku̱,
ta va̱ꞌa ní kíní ra kiti̱;
ta ta̱Jacob ta̱a ta̱ ya̱a̱ ní xíka kúu ra,
ta saá kúsii̱ ini ra kuiti koo ra ini veꞌe mandiado.
28 Ta ta̱Isaac kúsii̱ ka̱ ini ra xíni ra ta̱Esaú chi kútoo ní ra kuxu ra ko̱ñu kiti̱ tí xa̱ꞌni ta̱yóꞌo,
ta ñáRebeca kúsii̱ ka̱ ini ñá xíni ñá ta̱Jacob.
29 Ñii ki̱vi̱ ta̱Jacob ki̱sa va̱ꞌa ra ña kuxu na,
ta ta̱Esaú ku̱naa ní ra ña ndi̱kó ra ni̱xa̱ꞌa̱n ra yuku̱,
30 ta saá ni̱ka̱ꞌa̱n ra xíꞌin ñani ra,
káchí ra saá:
―Taxi loꞌo ún kando kuáꞌá ki̱sa va̱ꞌa ún ná kuxu loꞌo i̱,
chi xíꞌi̱ ní i̱ so̱ko ―káchí ra.
Ña̱kán ta̱Esaú kómí ra inka̱ ki̱vi̱ ra na̱ní ra Edom.e
31 Ta nda̱kuii̱n ta̱Jacob,
káchí ra saá:
―Siꞌna si̱kó ún ndaꞌa̱ i̱ nda̱yí ña taxi nakiꞌin i̱ ñava̱ꞌa xa̱ꞌa̱ ña nduu i̱ ta̱no̱ó sa̱ꞌya yivá yó,
ta saá va̱ꞌa kuxu ún ―káchí ra.
32 Ta nda̱kuii̱n ta̱Esaú,
káchí ra saá:
―Koto ún,
xíꞌi̱ ní i̱ so̱ko a̱nda̱ xa kóni kivi̱ i̱ xíꞌin so̱ko.
Ta saá táná kivi̱ i̱ ta̱nda̱ loꞌo chíín o̱n vása ndáya̱ꞌví ñava̱ꞌa nakiꞌin i̱ xa̱ꞌa̱ ña kúu i̱ ta̱no̱ó sa̱ꞌya yivá yó ―káchí ra.
33 Ta tuku ni̱ka̱ꞌa̱n ta̱Jacob:
―Siꞌna chináꞌa ún Ndios no̱o̱ i̱ ña si̱kó ún ndaꞌa̱ i̱ nda̱yí ña taxi nakiꞌin i̱ ñava̱ꞌa xa̱ꞌa̱ ña nduu i̱ sa̱ꞌya ta̱no̱ó ―káchí ra.
Ta saá ta̱Esaú chi̱náꞌa ra Ndios ña ni̱si̱kó ra ndaꞌa̱ ñani ra nda̱yí ña taxi ña nduu ra ta̱no̱ó sa̱ꞌya yivá ra.
34 Ta ta̱Jacob ta̱xi ra si̱ta̱ va̱ꞌa xíꞌin kando kuáꞌá no̱o̱ ñóꞌo lenteja ndaꞌa̱ ta̱Esaú kuxu ra.
Ta ta̱Esaú,
tá sa̱ndiꞌi ra xi̱xi ra,
ta na̱kundichi ra ta kua̱ꞌa̱n ra,
chi ni̱xaa noo ra ndasaá ndáya̱ꞌví ña xi̱kuu ra ta̱no̱ó sa̱ꞌya yivá ra.