―Tata,

vitin ndinoꞌo ini ún chináꞌa ún ña ndixa kasa ndivi ún ña ndukú i̱ no̱o̱ ún,

3 ta no̱o̱ i̱ chináꞌa ún Ndios,

ta̱a ta̱ xáꞌnda chiño no̱o̱ ñoyívi ni̱no xíꞌin ñoyívi yóꞌo,

ña o̱n taxi ún tonda̱ꞌa̱ sa̱ꞌya i̱ ta̱Isaac xíꞌin ñii ñaꞌa̱ ñáCanaán yóꞌo.

4 Ta ko̱ꞌo̱n ún ñoo i̱ no̱o̱ ka̱ku i̱,

no̱o̱ táku̱ ka̱ naveꞌe i̱,

ta ka̱xin ún ñii ñáloꞌo ñá tonda̱ꞌa̱ xíꞌin sa̱ꞌya i̱ ta̱Isaac,

ta kixi ñá xíꞌin ún ―káchí ta̱Abraham.

5 Ta nda̱kuii̱n ta̱ kísa chiño no̱o̱ ra:

―Tata,

tá ñáloꞌo yóꞌo o̱n kuaꞌa ñá kixi ñá xíꞌin i̱,

ta,

¿yukía̱ keꞌé i̱?

¿Án ndikó i̱ xíꞌin sa̱ꞌya ún a̱nda̱ ñoo ún no̱o̱ ki̱xi ún?

―káchí ra.

6 Ta ta̱Abraham ni̱ka̱ꞌa̱n ra:

―O̱n taxi ún ko̱ꞌo̱n sa̱ꞌya i̱ ñoo kán.

7 Chi Ndios,

ta̱a ta̱ yóo ñoyívi ni̱no,

xa ta̱va ra yi̱ꞌi̱ veꞌe yivá i̱,

ta̱va ra yi̱ꞌi̱ ñoo naveꞌe i̱,

ta ni̱ka̱ꞌa̱n ra xíꞌin i̱ ña taxi ra ñoꞌo̱ yóꞌo ndaꞌa̱ nasa̱ꞌya ñani síkuá i̱.

Ta Ndios yóꞌo tiꞌví ra ñaángel ko̱ꞌo̱n siꞌna ña no̱o̱ ún ña chindeé ña yóꞌó naníꞌi ún ñásíꞌí sa̱ꞌya i̱.

8 Ta tá naníꞌi ún ñáloꞌo yóꞌo ta o̱n xi̱in ñá kixi ñá xíꞌin ún,

ta saá yóꞌó sa̱ña̱ ndíka̱ ún no̱o̱ ña chi̱náꞌa ún Ndios,

ta o̱n kundiꞌi ka̱ ini ún xa̱ꞌa̱ ñayóꞌo.

Ta nda̱ loꞌo o̱n taxi ún sa̱ꞌya i̱ ko̱ꞌo̱n ra ñoo kán ―káchí ta̱Abraham xíꞌin ta̱ kísa chiño no̱o̱ ra.

9 Ta saá ta̱a ta̱ kísa chiño no̱o̱ ta̱Abraham ndinoꞌo ini ra chi̱náꞌa ra Ndios,

ña ndixa kasa ndivi ra to̱ꞌon ña ni̱ka̱ꞌa̱n ta̱patrón ra xíꞌin ra.

10 Ta ta̱ kísa chiño ni̱xa̱ꞌa̱n ra ti̱in ra u̱xu̱ tícamello sa̱na̱ ta̱patrón ra,

ta ni̱xa̱ꞌa̱n ra na̱ka̱xin ra ña va̱ꞌa ka̱ no̱o̱ ndiꞌi ña kómí ta̱patrón ra,

ña saníꞌi ra ni̱vi veꞌe no̱o̱ ko̱ꞌo̱n ra,

ta ke̱e ra kua̱ꞌa̱n ra ñoo no̱o̱ táku̱ ta̱Nacor,

ña nákaa̱ no̱o̱ ñoꞌo̱ Mesopotamia.

11 Ta ki̱xaa̱ ra yatin no̱o̱ ñoo ta ki̱xáꞌá kua̱ꞌa̱n kunaa.

Ta hora yóꞌo kúu ña kíxaa̱ násíꞌí kiꞌin ná takuií pozo.

Ta ta̱ kísa chiño yóꞌo ta̱xi ra nakindée tícamello sa̱na̱ ra yatin yuꞌu̱ pozo.

12 Ta ki̱xáꞌá ra káꞌa̱n ra xíꞌin Ndios,

káchí ra saá:

―Tata Ndios,

ta̱a ta̱ kísa to̱ꞌó ta̱patrón i̱ ta̱Abraham kúu ún,

chindeé ún yi̱ꞌi̱ ña keta va̱ꞌa chiño va̱xi i̱,

ta keꞌé ún ñava̱ꞌa xíꞌin ta̱patrón i̱.

13 Koto ún,

yóꞌo yóo i̱ yatin yuꞌu̱ pozo no̱o̱ kíxaa̱ násíꞌí sa̱ꞌya nata̱a ñoo yóꞌo kiꞌin ná takuií.

14 Táná ka̱ꞌa̱n i̱ xíꞌin ñii ñáloꞌo kachí i̱ siꞌa xíꞌin ñá:

“Ñáloꞌo,

xáku ndáꞌví i̱ no̱o̱ ún,

sanoo loꞌo ún yoo ndíso ún ña koꞌo i̱ takuií”,

ta ndakuii̱n ñá yuꞌu̱ i̱,

kachí ñá saá:

“Koꞌo ún takuií yóꞌo,

tata,

ta̱nda̱ taxi i̱ takuií koꞌo ndiꞌi tícamello sa̱na̱ ún”,

ta xíꞌin ña kachí ñáloꞌo yóꞌo saá,

kunda̱a̱ ini i̱ ndí ñáloꞌo yóꞌo kúu ñá na̱ka̱xin ún kuu ñásíꞌí ta̱Isaac.

Tá kasa ndivi ún ña ndúkú i̱ no̱o̱ ún yóꞌo,

saá kunda̱a̱ ini i̱ ndí ke̱ꞌé ún ñava̱ꞌa xíꞌin ta̱patrón i̱ ―káchí ta̱ kísa chiño yóꞌo.

15 O̱n ta̱ꞌán ka̱ sandiꞌi ra káꞌa̱n ra saá xíꞌin Ndios,

ta xi̱to ra ki̱xaa̱ ñii ñáloꞌo,

kánóo ñii yoo so̱ko̱ ñá.

ÑáRebeca kúu ñá,

sa̱ꞌya ta̱Betuel kúu ñá.

Ta ta̱Betuel kúu sa̱ꞌya ñáMilca xíꞌin ta̱Nacor,

ta̱ kúu ñani ta̱Abraham.

16 Ta ñáRebeca livi ní ñá,

ta nda̱ ñii ta̱a o̱n ta̱ꞌán to̱nda̱a ñaꞌá.

Ta no̱o ñá pozo kiꞌin ñá takuií,

ta sa̱kutú ñá yoo ndíso ñá,

ta saá ki̱xáꞌá ñá kua̱ꞌa̱n ndaa ñá ña kua̱ꞌa̱n noꞌo̱ ñá,

17 ta ta̱ kísa chiño yóꞌo xíno ra ni̱xaa̱ ra na̱kutáꞌan ra xíꞌin ñá,

ta káchí ra saá:

―Ñáloꞌo,

xáku ndáꞌví i̱ no̱o̱ ún,

taxi loꞌo ún takuií ñóꞌo yoo ún koꞌo i̱ ―káchí ra xíꞌin ñá.

18 ―Tata,

va̱ꞌa koꞌo ún takuií ―káchí ñá,

nda̱kuii̱n ñá.

Ta kama sa̱noo ñá yoo ñá no̱o̱ ndaꞌa̱ ñá,

ta ta̱xi ñá takuií koꞌo ra.

19 Ta ndi̱ꞌi xi̱ꞌi ra takuií,

ta ni̱ka̱ꞌa̱n ñá xíꞌin ra,

káchí ñá saá:

―Tata,

ko̱ꞌo̱n i̱ kiꞌin i̱ takuií koꞌo ndiꞌi tícamello sa̱na̱ ún nda̱ ná xaa ini rí ―káchí ñá.

20 Ta xa̱ndi̱ko̱n kama ta̱an ñá ndiꞌi takuií ñóꞌo yoo ndíso ñá no̱o̱ xíꞌi kiti̱,

ta xi̱no ñá ni̱xa̱ꞌa̱n tuku ñá pozo xa̱ꞌa̱ takuií,

ta ta̱va ñá kua̱ꞌa̱ ka̱ takuií,

ta ta̱xi ñá xíꞌi ndiꞌi tícamello nda̱ ni̱xaa ini rí.

21 Ta ta̱ kísa chiño xíto ra ña ke̱ꞌé ñáloꞌo yóꞌo,

ta o̱n vása ní‑kaꞌa̱n ra nda̱ ñii to̱ꞌon,

tási̱ín yóo ra,

chi kóni ra kunda̱a̱ ini ra án ndixa ki̱sa ndivi Ndios ña va̱ꞌa ke̱ta chiño ta̱patrón ra.

22 Ta ndi̱ꞌi xi̱ꞌi tícamello takuií,

ta ta̱va ra ñii seꞌe̱ ñaoro ña veé i̱ño̱ gramo^b xíꞌin o̱vi̱ ñanáꞌno ñaoro ña veé ñii ciento gramo ña kunakaa̱ si̱ko̱n ndaꞌa̱ ñá,

ta sa̱níꞌi ra ña ñáloꞌo yóꞌo,

23 ta káchí ra saá xíꞌin ñá:

―Ñáloꞌo,

ka̱ꞌa̱n ún xíꞌin i̱,

¿ndasaá na̱ní yivá ún?

¿Án yóo loꞌo ñii xiiña no̱o̱ kindo̱o i̱ xíꞌin natáꞌan i̱ ñoó vitin veꞌe yivá ún?

―káchí ra xíꞌin ñá.

24 Ta nda̱kuii̱n ñá,

káchí ñá saá:

―Sa̱ꞌya ta̱Betuel kúu i̱,

ta ta̱Betuel kúu sa̱ꞌya ñáMilca xíꞌin ta̱Nacor.

25 Ndixa yóo no̱o̱ kivi kindo̱o ndó ñoó vitin veꞌe ndi̱,

ta yóo yita ña kaxaꞌan tícamello sa̱na̱ ndó ―káchí ñá.

26 Ta saá ta̱ kísa chiño chi̱ndee ra no̱o̱ ra,

ta ki̱sa káꞌno ra Ndios,

27 káchí ra saá:

―Ndios,

ta̱a ta̱ kísa káꞌno ta̱patrón i̱ ta̱Abraham,

¡ná nakiꞌin ún ñato̱ꞌó,

chi ke̱ꞌé ún ñava̱ꞌa xíꞌin ta̱patrón i̱,

ta ki̱sa ndivi ún to̱ꞌon ña ni̱ka̱ꞌa̱n ún xíꞌin ra,

ta sa̱náꞌa ún yi̱ꞌi̱ yichi̱ ña ki̱xaa̱ i̱ no̱o̱ táku̱ naveꞌe ta̱patrón i̱!

―káchí ra.

28 Ta ñáRebeca xi̱no ñá kua̱ꞌa̱n noꞌo̱ ñá veꞌe ñá,

ta na̱xaa̱ ñá ta nda̱to̱ꞌon ñá xíꞌin naveꞌe ñá ndiꞌi ña ndo̱ꞌo ñá.

29-30 Yóo ñii ki̱ꞌva̱ ñáRebeca na̱ní ra Labán,

ta xi̱ni ra seꞌe̱ xíꞌin inka̱ o̱vi̱ ñanáꞌno ña ñóꞌo si̱ko̱n ndaꞌa̱ ñáki̱ꞌva̱ ra,

ta xi̱ni̱ so̱ꞌo ra ña nda̱to̱ꞌon ñá ta yu kúu ndiꞌi ña ni̱ka̱ꞌa̱n ta̱ kísa chiño.

Ta saá ta̱Labán xi̱no ra kua̱ꞌa̱n ra nandukú ra ta̱ kísa chiño yóꞌo,

ta ta̱yóꞌo yóo ra xíꞌin ndiꞌi tícamello sa̱na̱ ra yatin yuꞌu̱ pozo,

ta ta̱Labán ni̱to̱nda̱a yatin ra no̱o̱ ta̱ kísa chiño,

31 ta ni̱ka̱ꞌa̱n ta̱Labán xíꞌin ta̱ kísa chiño,

káchí ra saá:

―Tata,

Ndios ke̱ꞌé ra ñava̱ꞌa xíꞌin ún,

naꞌa koꞌyo̱ xíꞌin i̱ veꞌe i̱.

¿Nda̱chun kíndo̱o ún yóꞌo?,

chi xa ki̱sa ndivi i̱ veꞌe mi̱i ndi̱ ña kindo̱o ún,

ta xa yóo no̱o̱ nakindée tícamello sa̱na̱ ún ―káchí ra.

32 Ta saá ta̱ kísa chiño ke̱e ra ta ni̱xaa̱ ra veꞌe ta̱Labán ta ni̱xaa̱ natáꞌan ra xíꞌin ra ta xíꞌin tícamello sa̱na̱ ra.

Ta ta̱Labán sa̱noo ra ña ndíso tícamello,

ta ta̱xi ra ña kaxaꞌan rí,

ta saá ta̱xi ra takuií ña ndoo xa̱ꞌa̱ ta̱ kísa chiño xíꞌin xa̱ꞌa̱ natáꞌan ra.

33 Ta saá naveꞌe ta̱Labán chi̱so na ña kuxu na ki̱xaa̱ yóꞌo,

ta ta̱ kísa chiño no̱o̱ ta̱Abraham ni̱ka̱ꞌa̱n ra xíꞌin na,

káchí ra saá:

―Tata,

siꞌna ndato̱ꞌon i̱ xíꞌin ndó ña xíni̱ ñóꞌó ka̱ꞌa̱n i̱,

ta saá kuxu i̱ ―káchí ra.

―Va̱ꞌa,

tata,

ka̱ꞌa̱n ún xíꞌin ndi̱ vitin ―káchí ta̱Labán.

34 Ta ta̱ kísa chiño káchí ra saá:

―Tata,

ta̱ kísa chiño no̱o̱ ta̱Abraham kúu i̱.

35 Ta Ndios xa ke̱ꞌé ra kua̱ꞌa̱ ní ñava̱ꞌa xíꞌin ta̱patrón i̱,

ta ki̱sa kuíká ñaꞌá ra.

Ta̱xi ra ndaꞌa̱ ra kua̱ꞌa̱ ní tíndikachi,

xíꞌin ti̱súꞌu̱,

xíꞌin tísi̱ndi̱ki̱,

xíꞌin tícamello xíꞌin tíburro,

xíꞌin ñaplata xíꞌin ñaoro,

xíꞌin na kísa chiño no̱o̱ ra,

nata̱a xíꞌin náñaꞌa̱.

36 Ta ñásíꞌí ra ñáSara ñáxi̱kua̱ꞌa̱ ní kúu ñá,

ta ka̱ku ñii ta̱loꞌo sa̱ꞌya ñá xíꞌin ta̱patrón i̱,

táná to̱nda̱a ña kivi̱ ta̱patrón i̱,

ta ta̱loꞌo yóꞌo nakiꞌin ra ndiꞌi ñakuíká kómí ta̱patrón i̱.

37 Ta ta̱patrón i̱ ke̱ꞌé ra xíꞌin i̱ ña ndinoꞌo ini i̱ chi̱náꞌa i̱ Ndios,

ña kasa ndivi i̱ to̱ꞌon ña ni̱ka̱ꞌa̱n ra xíꞌin i̱,

ka̱chí ra saá:

“Ndixa o̱n taxi ún tonda̱ꞌa̱ sa̱ꞌya i̱ xíꞌin ñii ñaꞌa̱ ñáCanaán yóꞌo.

38 Ta va̱ꞌa ka̱ ko̱ꞌo̱n ún ñoo i̱ no̱o̱ ka̱ku i̱,

no̱o̱ táku̱ ka̱ naveꞌe i̱,

ta ka̱xin ún ñii ñáloꞌo ñá kuu ñásíꞌí sa̱ꞌya i̱”,

ka̱chí ra.

39 Ta yi̱ꞌi̱ ni̱ka̱ꞌa̱n i̱ xíꞌin ra,

ka̱chí i̱ saá:

“Tata,

¿yukía̱ keꞌé i̱ tá o̱n xi̱in ñáloꞌo kixi ñá xíꞌin i̱?”

40 Ta nda̱kuii̱n ra yuꞌu̱ i̱:

“Yi̱ꞌi̱ kúu ta̱a ta̱ xíka yichi̱ no̱o̱ xáꞌnda chiño Ndios,

ta tiꞌví ra ñaángel ko̱ꞌo̱n ña xíꞌin ún,

ña keta va̱ꞌa chiño ún,

ta naníꞌi ún ñii ñásíꞌí sa̱ꞌya i̱ ñá kúu ñá veꞌe i̱ no̱o̱ táku̱ naveꞌe yivá i̱.

41 Tá o̱n xi̱in naveꞌe i̱ taxi na ñáloꞌo kixi ñá xíꞌin ún,

ta saá yóꞌó sa̱ña̱ ndíka̱ ún no̱o̱ ña chi̱náꞌa ún Ndios,

ta o̱n kundiꞌi ka̱ ini ún xa̱ꞌa̱ ñayóꞌo”,

ka̱chí ra xíꞌin i̱.

42 ’Ta saá ki̱vi̱ vitin ki̱xaa̱ i̱ no̱o̱ yóo pozo,

ta ni̱ka̱ꞌa̱n i̱ xíꞌin Ndios,

ta̱a ta̱káꞌno no̱o̱ ta̱patrón i̱,

ka̱chí i̱ saá xíꞌin ra:

“Tata Ndios,

tá ndixa taxi ún ña keta va̱ꞌa chiño yóꞌo,

43 ta xáku ndáꞌví i̱ no̱o̱ ún ña kundivi ña ndúkú i̱.

Yi̱ꞌi̱ yóo i̱ yatin yuꞌu̱ pozo takuií yóꞌo,

tá kixaa̱ ñii ñáloꞌo kiꞌin ñá takuií,

ta ka̱ꞌa̱n i̱ xíꞌin ñá:

Taxi ún koꞌo i̱ loꞌo takuií ñóꞌo yoo ndíso ún,

44 ta ndakuii̱n ñá,

kachí ñá saá xíꞌin i̱:

Koꞌo ún takuií,

tata,

ta̱nda̱ taxi i̱ takuií koꞌo ndiꞌi tícamello sa̱na̱ ún,

ta xíꞌin ña kachí ñáloꞌo yóꞌo saá kunda̱a̱ ini i̱ ndí ñáloꞌo yóꞌo kúu ñá na̱ka̱xin ún kuu ñásíꞌí sa̱ꞌya ta̱patrón i̱”,

ka̱chí i̱ xíꞌin Ndios.

45 O̱n ta̱ꞌán ka̱ sandiꞌi i̱ káꞌa̱n i̱ xíꞌin Ndios,

ta xi̱ni i̱ ki̱xaa̱ ñáRebeca,

kánóo yoo so̱ko̱ ñá.

Ta no̱o ñá pozo kiꞌin ñá takuií,

ta ni̱ka̱ꞌa̱n i̱ xíꞌin ñá:

“Ñáloꞌo,

taxi loꞌo ún takuií koꞌo i̱.”

46 Ta sa̱noo ñá yoo ndíso ñá no̱o̱ ndaꞌa̱ ñá,

ta ni̱ka̱ꞌa̱n ñá xíꞌin i̱:

“Koꞌo ún takuií,

tata,

ta̱nda̱ sakoꞌo i̱ takuií ndiꞌi tícamello sa̱na̱ ún”,

ka̱chí ñá xíꞌin i̱.

Ta ta̱xi ñá takuií xi̱ꞌi i̱ ta ta̱xi ñá takuií xi̱ꞌi ndiꞌi tícamello sa̱na̱ i̱.

47 Ta saá ni̱nda̱ka̱ to̱ꞌon i̱ ñá:

“¿Ndasaá na̱ní yivá ún?”

Ta nda̱kuii̱n ñá:

“Yivá i̱ kúu ta̱Betuel,

ta̱ kúu sa̱ꞌya ta̱Nacor xíꞌin ñáMilca.”

Ta saá chi̱kaa̱ i̱ ñii seꞌe̱ si̱ti̱n ñá xíꞌin o̱vi̱ ñanáꞌno si̱ko̱n ndaꞌa̱ ñá,

48 ta chi̱ndee i̱ no̱o̱ i̱,

ta ki̱sa to̱ꞌó i̱ Ndios.

Ki̱sa káꞌno i̱ Ndios ta̱a ta̱ kísa káꞌno ta̱patrón i̱ ta̱Abraham,

chi sa̱náꞌa ra yi̱ꞌi̱ yichi̱ nda̱kú ña ki̱xaa̱ i̱ no̱o̱ yóo ñáloꞌo sa̱ꞌya naveꞌe ta̱patrón i̱ ñá kuu ñásíꞌí sa̱ꞌya ra ―káchí ta̱ kísa chiño.

Tá ndi̱ꞌi nda̱to̱ꞌon ra xíꞌin naveꞌe ñáRebeca,

ta ni̱ka̱ꞌa̱n ra xíꞌin na,

káchí ra saá:

49 ―Ta ndóꞌó,

vitin ka̱ꞌa̱n ndó xíꞌin i̱,

¿án kuchiño keꞌé ndó ñava̱ꞌa ña kundáꞌví ini ndó koni ndó ta̱patrón i̱?

Tá o̱n kívi keꞌé ndó ñava̱ꞌa yóꞌo xíꞌin ra,

ta saá ka̱ꞌa̱n ndó xíꞌin i̱,

ta kunda̱a̱ ini i̱ yukía̱ keꞌé i̱ ―káchí ra xíꞌin na.

50 Ta saá ta̱Labán xíꞌin ta̱Betuel nda̱kuii̱n na,

káchí na saá xíꞌin ta̱ kísa chiño:

―Tata,

ndiꞌi ña nda̱to̱ꞌon ún xíꞌin ndi̱,

Ndios xa ki̱sa ndivi ndiꞌi ra,

ta vitin mi̱i ndi̱ o̱n vása xíni̱ ka̱ ndi̱ to̱ꞌon va̱ꞌa án o̱n váꞌa ndakuii̱n ndi̱ yuꞌu̱ ún.

51 Koto ún,

yóꞌo ñíndichi ñáRebeca,

va̱ꞌa kiꞌin ún ñá,

ta ndikó ún noꞌo̱ ún,

ta ná ko̱ꞌo̱n ñá xíꞌin ún ta ná kuu ñá ñásíꞌí sa̱ꞌya ta̱patrón ún,

chi saá chi̱tóni̱ Ndios ―káchí na.

52 Tá xi̱ni̱ so̱ꞌo ta̱ kísa chiño ña ni̱ka̱ꞌa̱n na xíꞌin ra,

ta chi̱ndee ra no̱o̱ ra ña kísa to̱ꞌó ra Ndios.

53 Ta ta̱va ra kua̱ꞌa̱ ní ña̱ꞌa ndíso ra,

ñaplata xíꞌin ñaoro xíꞌin tiko̱to̱,

ta ta̱xi ra ña ndaꞌa̱ ñáRebeca.

Ta sa̱níꞌi ra ñakuíká yáꞌví ní ndaꞌa̱ ki̱ꞌva̱ ñá xíꞌin siꞌí ñá.

54 Ta saá xi̱xi ra xíꞌin natáꞌan ra,

ta ni̱ki̱si̱n na veꞌe yóꞌo.

Ta inka̱ ki̱vi̱ xita̱a̱n ní nda̱koo na,

ta ta̱ kísa chiño ni̱ka̱ꞌa̱n ra,

káchí ra saá xíꞌin naveꞌe ñáloꞌo:

―Va̱ꞌa vitin,

taxi ndó ndikó i̱ veꞌe ta̱patrón i̱ ―káchí ra.

55 Ta ta̱ki̱ꞌva̱ ñáRebeca xíꞌin siꞌí ñá ni̱ka̱ꞌa̱n na,

káchí na saá:

―Ná kindo̱o ñáloꞌo xíꞌin ndi̱ inka̱ u̱xu̱ ki̱vi̱,

ta saá ko̱ꞌo̱n ñá xíꞌin ún ―káchí na.

56 Ta ta̱ kísa chiño ni̱ka̱ꞌa̱n ra,

káchí ra saá xíꞌin na:

―Xáku ndáꞌví i̱ no̱o̱ ndó o̱n keꞌé ndó ña kundati ka̱ i̱.

Ndios ke̱ꞌé ra ña ku̱ndivi va̱ꞌa chiño ki̱xi i̱,

ta saá taxi ndó noꞌo̱ i̱ veꞌe ta̱patrón i̱ xíꞌin ñáRebeca ―káchí ra.

57 Ta nda̱kuii̱n na yuꞌu̱ ra:

―Va̱ꞌa ná kana ndi̱ ñáloꞌo,

ta ná koto yó yukía̱ ka̱ꞌa̱n ñá ―káchí na.

58 Ta ka̱na na ñáRebeca,

ta ki̱xaa̱ ñá ta ni̱nda̱ka̱ to̱ꞌon ñaꞌá na,

káchí na saá xíꞌin ñá:

―¿Án kóni ún ko̱ꞌo̱n ún xíꞌin ta̱yóꞌo vitin?

―káchí na.

―Va̱ꞌa va,

ko̱ꞌo̱n i̱ xíꞌin ra ―káchí ñá.

59 Ta saá ta̱xi na kua̱ꞌa̱n ñáRebeca xíꞌin ta̱ kísa chiño no̱o̱ ta̱Abraham xíꞌin natáꞌan ra.

Ta kua̱ꞌa̱n ñii ñaꞌa̱ ñá kísa chiño no̱o̱ ñáRebeca xíꞌin ñá.

Ñáyóꞌo kúu ñá sa̱kuaꞌno ñaꞌá,

ki̱vi̱ ni̱xi̱yo loꞌo ñá ta̱nda̱ xa̱ꞌno ñá.

60 Ta naveꞌe ñá ni̱ka̱ꞌa̱n na to̱ꞌon ñava̱ꞌa ní xa̱ꞌa̱ ñáRebeca,

káchí na saá:

61 Ta saá ñáRebeca xíꞌin ná kísa chiño no̱o̱ ñá na̱koso ná tícamello,

ta ndíko̱n ná sa̱ta̱ ta̱ kísa chiño no̱o̱ ta̱Abraham,

ta kua̱ꞌa̱n na.

62 Ta kui̱ya̱ yóꞌo ta̱Isaac táku̱ ra no̱o̱ ñoꞌo̱ na̱ní Neguev.

Ta ke̱e ra no̱o̱ yóo pozo na̱ní ña Pozo Ndios,

ta̱a ta̱ táku̱ ta xíto ra yi̱ꞌi̱.

63 Xa ni̱kuaa kúu ña,

ta kua̱ꞌa̱n ra yuku̱ kani si̱ni̱ ra.

Ta saá na̱koto ra ta xi̱ni ra va̱xi kua̱ꞌa̱ ní tícamello.

64 Ta ñáRebeca na̱koto ñá ta xi̱ni ñá ta̱Isaac,

ta no̱o ñá sa̱ta̱ tícamello,

65 ta ni̱nda̱ka̱ to̱ꞌon ñá ta̱ kísa chiño:

―Tata,

¿yu kúu ta̱kaa̱,

ta va̱xi ra no̱o̱ yó?

―káchí ñá.

―Sa̱ꞌya ta̱patrón i̱ kúu ra,

ñáloꞌo ―nda̱kuii̱n ta̱ kísa chiño.

Ta saá ti̱in ñá paño ñá,

ta na̱kasi ñá no̱o̱ ñá.

66 Ta ta̱ kísa chiño nda̱to̱ꞌon ra xíꞌin ta̱Isaac ndiꞌi ña ni̱ndoꞌo ra.

67 Ta saá ñáRebeca kua̱ꞌa̱n ñá xíꞌin ta̱Isaac veꞌe mandiado no̱o̱ xi̱taku̱ siꞌí ra ñáSara,

ta to̱nda̱ꞌa̱ ra xíꞌin ñá.

Ta kíꞌvi ní ini ra xíni ra ñáRebeca,

ta saá ndu̱va̱ꞌa ini ra no̱o̱ ña ni̱xiꞌi̱ siꞌí ra.