4 ―Tata,

yi̱ꞌi̱ ta̱a ta̱ inka̱ ñoo kúu i̱ no̱o̱ ndó,

ta táku̱ i̱ no̱o̱ ñoꞌo̱ ndó,

ta vitin xáku ndáꞌví i̱ no̱o̱ ndó,

keꞌé ndó ñava̱ꞌa xíꞌin i̱ si̱kó ndó ñii ñoꞌo̱ no̱o̱ sandúxu̱n i̱ ñásíꞌí i̱ ñá ni̱xiꞌi̱ ―káchí ra.

5 Ta nda̱kuii̱n naHet,

káchí na saá:

6 ―Tata,

koni̱ so̱ꞌo ún ña ka̱ꞌa̱n ndi̱ xíꞌin ún.

Yóꞌó kúu ta̱a ta̱káꞌno,

saá yóo ún no̱o̱ ndi̱.

Ta ka̱xin ún kavua̱ ña va̱ꞌa ní ka̱ ta sandúxu̱n ún yi̱kí ko̱ñu ñásíꞌí ún,

chi nda̱ ñii ndi̱ o̱n ka̱ꞌa̱n ndi̱ xíꞌin ún ndí o̱n vása kúchiño sandúxu̱n ún yi̱kí ko̱ñu ñásíꞌí ún yóꞌo ―káchí na.

7 Ta saá na̱kundichi ta̱Abraham,

ta chi̱ndee ra no̱o̱ ra ña kísa to̱ꞌó ra naHet yóꞌo,

8 ta káchí ra saá xíꞌin na:

―Tata,

tá ndixa kóni ndó ña ndu̱xu̱n yi̱kí ko̱ñu ñásíꞌí i̱ no̱o̱ ñoꞌo̱ yóꞌo,

ta ka̱ꞌa̱n ndó xa̱ꞌa̱ i̱ no̱o̱ ta̱Efrón,

sa̱ꞌya ta̱Zohar kúu ra,

9 ña si̱kó ra kiꞌin i̱ kavua̱ ña nákaa̱ no̱o̱ na̱ní Macpela,

kavua̱ ña nákaa̱ yatin xíꞌin ñoꞌo̱ ra.

Yi̱ꞌi̱ chaꞌvi i̱ ndiꞌi ña kúu yaꞌvi kavua̱ no̱o̱ ndu̱xu̱n yi̱kí ko̱ñu naveꞌe i̱,

ta saá nduu ña kavua̱ mi̱i i̱ ña kukomí i̱ no̱o̱ ñoꞌo̱ ndó yóꞌo ―káchí ra.

10 Ta ta̱Efrón yóo ra xíni̱ so̱ꞌo ra xíꞌin na,

ta nda̱kuii̱n ra ni̱ka̱ꞌa̱n ra xíꞌin ta̱Abraham,

ta ndeé ní nda̱níꞌi ra ta̱chi̱ ra ka̱ꞌa̱n ra,

ña koni̱ so̱ꞌo ndiꞌi na ndóo yóꞌo xíꞌin ndiꞌi na va̱xi ki̱ꞌvi yéꞌé na̱ma̱ ña xíno nduu ñoo yóꞌo,

ta káchí ra saá:

11 ―Óꞌon,

tata.

Saníꞌi i̱ yóꞌó ñoꞌo̱ xíꞌin kavua̱ ña yóo no̱o̱ ña.

Ta natáꞌan i̱ kúu na ndakuii̱n xa̱ꞌa̱ i̱ ña saníꞌi i̱ ña yóꞌó.

Ta va̱ꞌa sandúxu̱n ún yi̱kí ko̱ñu ñásíꞌí ún ini kavua̱ yóꞌo ―káchí ra.

12 Ta ta̱Abraham tuku chi̱ndee ra no̱o̱ ra ña kísa to̱ꞌó ra ni̱vi ñoo yóꞌo,

13 ta no̱o̱ ndiꞌi na,

nda̱kuii̱n ra ni̱ka̱ꞌa̱n ra xíꞌin ta̱Efrón,

káchí ra saá:

―Tata,

koni̱ so̱ꞌo loꞌo ún ña ka̱ꞌa̱n i̱ xíꞌin ún.

Xáku ndáꞌví i̱ no̱o̱ ún ña kiꞌin ún si̱ꞌún xa̱ꞌa̱ ñoꞌo̱ yóꞌo,

ta saá sandúxu̱n i̱ yi̱kí ko̱ñu ñásíꞌí i̱ ―káchí ra xíꞌin ta̱Efrón.

14 Ta saá nda̱kuii̱n ta̱Efrón:

15 ―Va̱ꞌa tata,

ñoꞌo̱ yóꞌo yáꞌvi ña ko̱mi̱ ciento si̱ꞌún ñaplata ña na̱ní siclo.

Loꞌo ní kúu si̱ꞌún yóꞌo ta o̱n ka̱ꞌa̱n ka̱ yó xa̱ꞌa̱ ña,

ta sandúxu̱n ún yi̱kí ko̱ñu ñásíꞌí ún ―káchí ra.

16 Ta ki̱ndo̱o ini ta̱Abraham chaꞌvi ra si̱ꞌún ña ndu̱kú ta̱Efrón no̱o̱ ra,

ta ñii ki̱ꞌva nda̱tán kéꞌé ni̱vi na síkó xíꞌin na sáta ñoo yóꞌo,

saá cho̱ꞌon ra ko̱mi̱ ciento si̱ꞌún ñaplata yóꞌo,

ta xi̱to ndiꞌi naHet yíta na yóꞌo.

17-18 Saá ni̱yaꞌa ñoꞌo̱ ta̱Efrón,

ña kómí kavua̱ xíꞌin ndiꞌi yito̱n xíꞌin ndiꞌi inka̱ ña kómí ña,

ta ndu̱u ña ñoꞌo̱ ta̱Abraham;

ñoꞌo̱ yóꞌo nákaa̱ ña no̱o̱ na̱ní Macpela sii̱n Mamre no̱o̱ va̱xi kana ño̱ꞌo.

NaHet yóꞌo xíꞌin ndiꞌi inka̱ na va̱xi ki̱ꞌvi yéꞌé na̱ma̱ ña xíno nduu ñoo yóꞌo xi̱ni na ña sa̱ta ta̱Abraham ñoꞌo̱ ndaꞌa̱ ta̱Efrón.

19 Ta saá sa̱ndúxu̱n ta̱Abraham yi̱kí ko̱ñu ñáSara ini kavua̱ ña nákaa̱ no̱o̱ na̱ní Macpela,

sii̱n Mamre no̱o̱ va̱xi kana ño̱ꞌo,

ta inka̱ ki̱vi̱ ñoo yóꞌo kúu Hebrón,

ña nákaa̱ no̱o̱ ñoꞌo̱ Canaán.

20 Ta saá kuenda ta̱Abraham ndu̱u ñoꞌo̱ xíꞌin kavua̱ ña yóo no̱o̱ ñoꞌo̱ yóꞌo,

ña ni̱si̱kó naHet ndaꞌa̱ ra ña ndu̱xu̱n yi̱kí ko̱ñu naveꞌe ra.