Ñayóꞌo káꞌa̱n xa̱ꞌa̱ ndasaá xi̱to ndoso Ndios ta̱Abraham
22
Ni̱yaꞌa kua̱ꞌa̱ ní kui̱ya̱,
ta xi̱to ndoso Ndios ta̱Abraham,
xíto ra án ndixa kándixa ñaꞌá ra.
Ta ka̱na Ndios ni̱ka̱ꞌa̱n ra ki̱vi̱ ra,
ta nda̱kuii̱n ta̱Abraham,
káchí ra saá:
―Yóꞌo yóo i̱,
Tata ―káchí ra.
2 Ta ni̱ka̱ꞌa̱n Ndios xíꞌin ra:
―Nakiꞌin ún ta̱Isaac ta̱ kúu ñii la̱á sa̱ꞌya ún,
ta̱loꞌo ta̱ kíꞌvi ní ini ún xíni ún,
ta ko̱ꞌo̱n ra xíꞌin ún nda̱ no̱o̱ ñoꞌo̱ Moriah.
Ta no̱o̱ xi̱ki̱ ña sanáꞌa i̱ yóꞌó,
kán xaa̱ ra xíꞌin ún ta kaꞌni ún ra ta kaꞌmi ún ra,
saá so̱ko̱ ún ra no̱o̱ i̱ ―káchí Ndios xíꞌin ta̱Abraham.
3 Inka̱ ki̱vi̱ xita̱a̱n ní,
nda̱koo ta̱Abraham,
xa̱ꞌnda ra tito̱n tón ko̱ko̱ ñoꞌo̱,
sa̱kaa ra táyi̱ burro sa̱na̱ ra,
ta ke̱e ra kua̱ꞌa̱n ra no̱o̱ ni̱ka̱ꞌa̱n Ndios xíꞌin ra,
ta ni̱vi na kua̱ꞌa̱n xíꞌin ra kúu sa̱ꞌya ra ta̱Isaac xíꞌin o̱vi̱ nata̱a kísa chiño no̱o̱ ra.
4 Ki̱vi̱ u̱ni̱ kua̱ꞌa̱n ra yichi̱,
na̱koto ta̱Abraham nda̱ xíká ka̱ yóo xiiña ña ni̱ka̱ꞌa̱n Ndios xíni̱ ñóꞌó xaa̱ ra,
5 ta ni̱ka̱ꞌa̱n ra xíꞌin nata̱a kísa chiño no̱o̱ ra:
―Kindo̱o ndó yóꞌo xíꞌin burro sa̱na̱ i̱.
Ta̱loꞌo xíꞌin yi̱ꞌi̱,
ko̱ꞌo̱n ndi̱ nda̱ kaa̱ kasa to̱ꞌó ndi̱ Ndios,
ta ndi̱ꞌi ki̱sa to̱ꞌó ndi̱ ta ndikó ndi̱ xíꞌin ndó ―káchí ra xíꞌin na.
6 Ki̱ꞌin ta̱Abraham tito̱n tón ko̱ko̱ ñoꞌo̱ ta sa̱kuiso ra nó ta̱Isaac;
ki̱ꞌin ra cuchillo ta ki̱ꞌin ra ñoꞌo̱ xíxi̱ níꞌi ra kua̱ꞌa̱n ra xíꞌin sa̱ꞌya ra.
7 Tá kua̱ꞌa̱n na yichi̱,
ta ni̱ka̱ꞌa̱n ta̱Isaac xíꞌin ta̱Abraham:
―Tata mi̱i i̱ ―káchí ra.
―¿Yukía̱ kóni ún?,
sa̱ꞌya i̱ ―nda̱kuii̱n ta̱Abraham.
Ta káchí ta̱Isaac saá:
―Tata,
koto ún yóꞌo yóo tito̱n xíꞌin ñoꞌo̱ xíxi̱,
ta,
¿mí yóo ndikachi tí so̱ko̱ yó?
―káchí ra.
8 Ta nda̱kuii̱n ta̱Abraham:
―Sa̱ꞌya mi̱i i̱,
o̱n kundiꞌi ini ún,
Ndios taxi ra koo ndikachi xa̱ꞌa̱ ña so̱ko̱ yó ―káchí ra.
Ta kua̱ꞌa̱n o̱vi̱ na saá yichi̱ yóꞌo.
9 Ta ni̱xaa̱ na no̱o̱ xa ni̱ka̱ꞌa̱n Ndios xíꞌin ra xaa̱ ra so̱ko̱ ra,
ta ta̱Abraham ki̱sa va̱ꞌa ra ñii na̱ma̱ xíꞌin yu̱u̱,
ta chi̱so ra tito̱n no̱o̱ na̱ma̱ yóꞌo,
ta saá ka̱tón ra sa̱ꞌya ra ta̱Isaac,
ta chi̱nóo ñaꞌá ra no̱o̱ tito̱n tón ndóso no̱o̱ na̱ma̱.
10 Ta ki̱ꞌin ra cuchillo,
ta sa̱nakaa̱ ra ndaꞌa̱ ra ña kaꞌni ra sa̱ꞌya ra.
11 Ta nda̱ ñoyívi ni̱no ñaángel no̱o̱ Ndiosa ni̱ka̱ꞌa̱n ña xíꞌin ra,
káchí ña saá:
―¡Tata Abraham!
¡Tata Abraham!
―Yóꞌo yóo i̱,
Tata ―káchí ra.
12 Ta ñaángel ni̱ka̱ꞌa̱n ña xíꞌin ra:
―Ndios káchí ra saá xíꞌin ún:
“O̱n kaꞌni ún sa̱ꞌya ún,
ni o̱n satakuéꞌe̱ ún ra,
saá chi vitin kúnda̱a̱ ini i̱ ndí ndixa kándixa ún yi̱ꞌi̱,
chi vará ñii la̱á kúu sa̱ꞌya ún no̱o̱ ún,
o̱n vása ní‑kaꞌa̱n ún xíꞌin i̱ ndí o̱n so̱ko̱ ún sa̱ꞌya ún no̱o̱ i̱”,
káchí Ndios xíꞌin ún ―káchí ñaángel xíꞌin ta̱Abraham.
13 Ta saá na̱koto ta̱Abraham,
ta xi̱ni ra ñíndichi ñii ndikachi chée ni̱tiin ndi̱ki̱ rí ndaꞌa̱ tón ñiño̱.
Ta ni̱xa̱ꞌa̱n ra ti̱in ra ndikachi,
ta xa̱ꞌni ra rí ta ni̱so̱ko̱ ra rí no̱o̱ Ndios,
ta o̱n vása ní‑soko̱ ka̱ ra sa̱ꞌya ra.
14 Ta saá chi̱nóo ra ki̱vi̱ yuku̱ yóꞌo Ndios táxi ña xíni̱ ñóꞌó.
Ña̱kán a̱nda̱ vitin káꞌa̱n ni̱vi saá:
“Ndios táxi ra ña xíni̱ ñóꞌó ni̱vi no̱o̱ yuku̱ yóꞌo.”
Siꞌa ni̱ka̱ꞌa̱n Ndios xíꞌin ún:
“Xa̱ꞌa̱ ña chi̱kaa̱ so̱ꞌo ún ña ni̱ka̱ꞌa̱n i̱ xíꞌin ún,
ta ki̱sa ndivi ún ña ni̱so̱ko̱ ún no̱o̱ i̱ sa̱ꞌya ún ta̱ ñii la̱á,
ndixa kasa ndivi i̱ ña káꞌa̱n i̱ xíꞌin ún,
17 keꞌé i̱ kua̱ꞌa̱ ní ñava̱ꞌa xíꞌin ún.
Koo kua̱ꞌa̱ ní sa̱ꞌya ñani síkuá ún,
nda̱tán yóo kua̱ꞌa̱ ní ki̱mi ñoyívi síkón saá koo na,
nda̱tán yóo kua̱ꞌa̱ ní yo̱tí yuꞌu̱ mi̱ni saá koo na.
Ta ndiꞌi saá yichi̱ ndixa kundeé na no̱o̱ ndiꞌi ni̱vi na kani táꞌan xíꞌin na.
18 Ta chindeé i̱ ndiꞌi ni̱vi ñoyívi no̱o̱ ñoꞌo̱,
ta keꞌé i̱ ñava̱ꞌa xíꞌin ni̱vi yóꞌo xa̱ꞌa̱ nasa̱ꞌya ñani síkuá ún,
chi chi̱kaa̱ so̱ꞌo ún ta ki̱sa ndivi ún ña ni̱ka̱ꞌa̱n i̱ xíꞌin ún”,
ka̱chí Ndios xíꞌin ún,
káchí ñaángel xíꞌin ta̱Abraham.
19 Ta ndi̱kó ta̱Abraham ki̱xaa̱ ra no̱o̱ ni̱ndo̱o na kísa chiño no̱o̱ ra.
Ta saá na̱kiꞌin ndiꞌi na kua̱ꞌa̱n noꞌo̱ na Beerseba,
chi yóꞌo xi̱taku̱ ta̱Abraham.
Ñayóꞌo káꞌa̱n xa̱ꞌa̱ sa̱ꞌya ta̱Nacor
20 Ki̱vi̱ ndi̱ꞌi ndo̱ꞌo ta̱Abraham ñayóꞌo,
ta nda̱to̱ꞌon na xíꞌin ra xa yóo kua̱ꞌa̱ nata̱a sa̱ꞌya ñáMilca xíꞌin ta̱Nacor,
ñani ta̱Abraham.
21 Sa̱ꞌya nayóꞌo kúu:
ta̱no̱ó na̱ní Uz,
ta inka̱ ra na̱ní Buz,
ta inka̱ ra na̱ní Kemuel,
yivá ta̱Aram.
22 Inka̱ na na̱ní Quesed,
Hazo,
Pildas,
Jidlaf,
xíꞌin Betuel.
23 Ta ta̱Betuel xi̱kuu yivá ñáRebeca.
Nayóꞌo xi̱kuu o̱na̱ sa̱ꞌya ñáMilca xíꞌin ta̱Nacor,
ñani ta̱Abraham.
24 ÑáReúma xi̱kuu inka̱ ñásíꞌí ta̱Nacor,
ta ka̱ku ko̱mi̱ ta̱a sa̱ꞌya na;
nayóꞌo na̱ní:
Teba,
Gaham,
Tahas xíꞌin Maaca.