Ñayóꞌo káꞌa̱n xa̱ꞌa̱ ña ka̱ku ta̱Isaac
21
Nda̱tán yóo ña ni̱ka̱ꞌa̱n Ndios xíꞌin ta̱Abraham,
ta Ndiosa ki̱sa ndivi ra ñava̱ꞌa xíꞌin ñáSara.
2 Ta saá ni̱ke̱e sa̱ꞌya ñáSara,
ta ka̱ku ñii ta̱loꞌo sa̱ꞌya ñá xíꞌin yii̱ ñá ta̱Abraham,
ta ki̱vi̱ ka̱ku sa̱ꞌya na,
ta̱Abraham ta̱a ta̱xi̱kua̱ꞌa̱ ní kúu ra.
Ki̱vi̱ ka̱ku ta̱loꞌo yóꞌo kúu ki̱vi̱ ña ni̱ka̱ꞌa̱n Ndios xíꞌin na kaku sa̱ꞌya na.
3 Ta ta̱Abraham chi̱nóo ra ki̱vi̱ ta̱loꞌo sa̱ꞌya ra xíꞌin ñáSara,
na̱ní ra Isaac;b
4 ta ki̱vi̱ ni̱xi̱no̱ ta̱Isaac o̱na̱ ki̱vi̱,
ta ta̱Abraham ki̱sa ndivi ra costumbre ña na̱ní circuncisión xíꞌin ta̱loꞌo,
nda̱tán yóo ña xa̱ꞌnda chiño Ndios no̱o̱ ra.
5 Xa kómí ta̱Abraham ñii ciento kui̱ya̱ ta ka̱ku ta̱Isaac.
6 Ta xa̱ni si̱ni̱ ñáSara saá:
“Ndios sa̱kusii̱ ra ini yó,
ta ndiꞌi ni̱vi na koni̱ so̱ꞌo xa̱ꞌa̱ ta̱loꞌo sa̱ꞌya yó,
xíꞌin ñasi̱i̱ ini na kuaku̱ na xíꞌin yó.
7 ¿Yukú na kivi kani si̱ni̱ ña kuchiño koo sa̱ꞌya ta̱Abraham xíꞌin yó?
Vitin ta̱a ta̱xi̱kua̱ꞌa̱ ní kúu ra,
ta ka̱ku ta̱loꞌo sa̱ꞌya ra xíꞌin yó.”
Ñayóꞌo káꞌa̱n xa̱ꞌa̱ ña ta̱va ta̱Abraham ñáAgar xíꞌin ta̱Ismael veꞌe ra
8 Ta ta̱loꞌo ta̱Isaac kama va̱xi kuaꞌno ra ta ki̱vi̱ ni̱ndaa ra ña o̱n vása ní‑chichín ka̱ ra,
ta sa̱kana ta̱Abraham ñii viko̱ káꞌno.
9 Ta ñáSara xi̱ni ñá ta̱loꞌo sa̱ꞌya ñáAgar xíꞌin ta̱Abraham,
ku̱siki ta̱loꞌo yóꞌo ta̱Isaac.
10 Ta saá nda̱to̱ꞌon ñá xíꞌin ta̱Abraham,
káchí ñá xíꞌin ra:
―Tata,
¡tava ún ñáñaꞌa̱ kísa chiño yóꞌo xíꞌin sa̱ꞌya ñá,
ná ko̱ꞌo̱n na!
O̱n vása ñii ki̱ꞌva nakiꞌin sa̱ꞌya ñáyóꞌo ñakuíká xíꞌin sa̱ꞌya i̱ ta̱Isaac ―káchí ñá.
11 Ta kúchuchú ní ini ta̱Abraham xíni̱ so̱ꞌo ra to̱ꞌon yóꞌo,
chi sa̱ꞌya mi̱i ra kúu ta̱Ismael ta̱ kúu sa̱ꞌya ñáAgar.
12 Ta ni̱ka̱ꞌa̱n Ndios xíꞌin ra:
―O̱n kundiꞌi ini ún xa̱ꞌa̱ ta̱loꞌo,
xíꞌin xa̱ꞌa̱ ñá kísa chiño no̱o̱ ún.
Kasa ndivi ún ña ni̱ka̱ꞌa̱n ñáSara xíꞌin ún,
chi kuiti sa̱ꞌya ñani síkuá ta̱Isaac kuu sa̱ꞌya ñani síkuá ndinoꞌo ún.
13 Ta xa̱ꞌa̱ ta̱Ismael sa̱ꞌya ñá kísa chiño no̱o̱ ún,
keꞌé i̱ ña kuu ra yivá ni̱vi ñii ñoo káꞌno,
chi sa̱ꞌya ún kúu ra ―káchí Ndios.
14 Ta saá inka̱ ki̱vi̱ xita̱a̱n ní,
ta̱Abraham ti̱in ra si̱ta̱ va̱ꞌa xíꞌin takuií tá ñóꞌo ini ñii̱,
ta sa̱kuiso ra ndiꞌi ñayóꞌo sa̱ta̱ ñáAgar,
ta na̱taxi ra ta̱loꞌo Ismael kua̱ꞌa̱n ra xíꞌin ñá,
ta ni̱nda̱yi táꞌan ra xíꞌin ñá.
Ta ke̱e ñá kua̱ꞌa̱n ñá,
ta xíka ñá no̱o̱ ñoꞌo̱ yi̱chí na̱ní ña Beerseba.
15 Ta saá ndi̱ꞌi ndaa takuií ñóꞌo ini ñii̱ ndíso ñá,
ta sa̱ndakoo ñá ta̱loꞌo kándúꞌu̱ ra ku̱nda̱ti̱ xa̱ꞌa̱ ñii yito̱n loꞌo,
16 ta kua̱ꞌa̱n ñá ta xi̱koo ñá ñii xíká loꞌo,
chi ni̱‑xiin ñá koto ñá ndasaá kivi̱ ta̱loꞌo.
Ta ki̱xáꞌá ta̱loꞌo ndeé ní xáku ra.
17 Ta xi̱ni̱ so̱ꞌo Ndios xáku ta̱loꞌo,
ta nda̱ ñoyívi ni̱no ñaángel no̱o̱ Ndios ka̱na ña ñáAgar,
káchí ña saá xíꞌin ñá:
―Ndios káchí ra saá xíꞌin ún:
“¿Yukía̱ ndóꞌo ún?,
nana.
O̱n kuyi̱ꞌví ún,
chi yi̱ꞌi̱ Ndios xi̱ni̱ so̱ꞌo i̱ xáku ta̱loꞌo no̱o̱ kándúꞌu̱ ra.
18 Nakundichi ún ta ko̱ꞌo̱n ún ndaníꞌi ún ta̱loꞌo ta tiin ún ndaꞌa̱ ra,
o̱n sandakoo ún ra,
chi yi̱ꞌi̱ keꞌé i̱ ña kuu ra yivá ni̱vi ñii ñoo káꞌno”,
káchí Ndios xíꞌin ún ―káchí ñaángel xíꞌin ñáAgar.
19 Ta saá ta̱xi Ndios ña xi̱ni ñáAgar ñii pozo takuií.
Ta ni̱xa̱ꞌa̱n ñá sa̱kutú ñá takuií ini ñii̱ ndíso ñá,
ta ta̱xi ñá rá ndaꞌa̱ ta̱Ismael koꞌo ra.
20-21 Ta Ndios yóo ra xíꞌin ta̱loꞌo ta chíndeé ñaꞌá ra.
Ta ta̱loꞌo xa̱ꞌno ra ta táku̱ ra no̱o̱ ñoꞌo̱ yi̱chí na̱ní ña Parán,
ta ndu̱u ra ñii ta̱a ta̱ va̱ꞌa ní kíní kiti̱ xíꞌin kuxu̱n.
Ta ñáAgar na̱ka̱xin ñá ñii ñaꞌa̱ ñáEgipto ña to̱nda̱ꞌa̱ ñá xíꞌin ta̱Ismael.
Ñayóꞌo káꞌa̱n xa̱ꞌa̱ ña ki̱ndo̱o ta̱Abraham ñava̱ꞌa xíꞌin ta̱Abimelec
22 Kui̱ya̱ yóꞌo ta̱Abimelec ni̱xa̱ꞌa̱n ra ni̱ka̱ꞌa̱n ra xíꞌin ta̱Abraham.
Ta ta̱Ficol,
ta̱ ndíso chiño xíꞌin natropa ta̱Abimelec ni̱xa̱ꞌa̱n ra xíꞌin ra.
Ta káchí ta̱Abimelec saá xíꞌin ta̱Abraham:
―Yi̱ꞌi̱ xíni i̱ ndí Ndios chíndeé ra yóꞌó xíꞌin ndiꞌi ña kéꞌé ún,
tata.
23 Ta vitin chináꞌa ún Ndios no̱o̱ i̱ ña o̱n keꞌé ún ñandiva̱ꞌa xíꞌin i̱,
ni xíꞌin nasa̱ꞌya i̱,
ni xíꞌin nasa̱ꞌya ñani síkuá i̱.
Ka̱ꞌa̱n ún xíꞌin i̱,
ndí nda̱tán kéꞌé i̱ ñava̱ꞌa xíꞌin ún,
saá keꞌé ún ñava̱ꞌa xíꞌin i̱,
ta ñii ki̱ꞌva saá keꞌé ún xíꞌin ni̱vi na ndóo no̱o̱ táku̱ ún ―káchí ra.
24 ―Ndixa káꞌa̱n i̱ ndí saá keꞌé i̱ xíꞌin ún,
tata ―káchí ta̱Abraham.
25 Ta ta̱Abraham ta̱xi ra kua̱chi ndaꞌa̱ ta̱Abimelec xa̱ꞌa̱ ñii pozo;
chi na kísa chiño no̱o̱ ta̱Abimelec xa ki̱ndaa na ña ndaꞌa̱ ta̱Abraham.
26 Ta nda̱kuii̱n ta̱Abimelec:
―O̱n ta̱ꞌán koni̱ so̱ꞌo i̱ xa̱ꞌa̱ ñayóꞌo a̱nda̱ ki̱vi̱ vitin,
chi o̱n vása ní‑ndato̱ꞌon ún xíꞌin i̱ xa̱ꞌa̱ ña.
O̱n vása xíni̱ i̱ yukú na ke̱ꞌé saá ―káchí ra.
27 Ta saá ki̱ꞌin ta̱Abraham ndikachi xíꞌin si̱ndi̱ki̱ sa̱na̱ ra,
ta ta̱xi ra rí ndaꞌa̱ ta̱Abimelec;
tá mií ki̱vi̱ yóꞌo o̱vi̱ nata̱a yóꞌo saá ki̱ndo̱o na ñii ñava̱ꞌa xíꞌin táꞌan na.
28 No̱o̱ tí kua̱ꞌa̱ ní kúu ndikachi sa̱na̱ ta̱Abraham,
ta̱va síín ra u̱xa̱ tísiꞌí válí,
29 ta ni̱nda̱ka̱ to̱ꞌon ñaꞌá ta̱Abimelec:
―¿Nda̱chun chi̱ndoo síín ún u̱xa̱ ndikachi siꞌí válí yóꞌo?
30 Ta nda̱kuii̱n ta̱Abraham:
―Tata,
kóni i̱ ña nakiꞌin ún u̱xa̱ ndikachi yóꞌo,
ta xíꞌin ña keꞌé ún saá,
sanáꞌa ún ndí kúnda̱a̱ ini ún ndí yi̱ꞌi̱ kúu ta̱a ta̱ ki̱sa va̱ꞌa pozo yóꞌo ―káchí ra.
31 Ña̱kán xiiña yóꞌo na̱ní ña Beerseba,c
chi kán o̱vi̱ nata̱a yóꞌo ki̱ndo̱o na ñii ñava̱ꞌa.
32 Ta ndi̱ꞌi ki̱ndo̱o ra ñava̱ꞌa xíꞌin ta̱Abraham,
ndi̱kó ta̱Abimelec xíꞌin ta̱Ficol,
ta̱a ta̱ ndíso chiño xíꞌin natropa ra kua̱ꞌa̱n noꞌo̱ na no̱o̱ ñoꞌo̱ naFilistea.
33 Ta xiiña Beerseba yóꞌo chi̱ꞌi ta̱Abraham ñii yito̱n tón na̱ní tamarisco,
ta ni̱ka̱ꞌa̱n ra xíꞌin Ndios,
ta̱a ta̱ táku̱ ndiꞌi saá ki̱vi̱,
ta ki̱sa to̱ꞌó ñaꞌá ra.
34 Ta kua̱ꞌa̱ ní kui̱ya̱ xi̱taku̱ ta̱Abraham no̱o̱ ñoꞌo̱ ña kúu ñoꞌo̱ naFilistea.