Ñayóꞌo káꞌa̱n xa̱ꞌa̱ ta̱Abraham xíꞌin ta̱Abimelec
20
Ta ta̱Abraham ke̱e ra kua̱ꞌa̱n ra no̱o̱ ñoꞌo̱ Neguev,
ta ni̱xi̱yo ra ñii ñoo na̱ní Gerar,
ña nákaa̱ ma̱ꞌñó ñoo Cades xíꞌin ñoo Shur.
2 Ta ni̱ka̱ꞌa̱n ra xíꞌin ni̱vi na táku̱ ñoo yóꞌo ndí ñáSara kúu ki̱ꞌva̱ ra.
Ta saá ta̱Abimelec ta̱rey ñoo Gerar xa̱ꞌnda chiño ra ña kixi ñáSara kuu ñá ñásíꞌí ra.
3 Ta ñii ñoó Ndios xíꞌin ñii xa̱ni ki̱xaa̱ ra no̱o̱ ta̱Abimelec,
ta ni̱ka̱ꞌa̱n ra xíꞌin ra,
káchí ra saá:
“Ndixa kivi̱ ún vitin,
chi ñaꞌa̱ ñá na̱kiꞌin ún kuu ñásíꞌí ún,
ñáyóꞌo ndixa kúu ñá ñásíꞌí inka̱ ta̱a.”
4 Ta saá ni,
ta̱Abimelec o̱n ta̱ꞌán to̱nda̱a ra ku̱su̱n ra xíꞌin ñá,
ta nda̱kuii̱n ra,
káchí ra saá:
“Tata Ndios,
¿án xáni ini ún kaꞌni ún ñii ta̱a ta̱ o̱n ko̱ó kua̱chi kómí?
5 Mi̱i ta̱Abraham nda̱to̱ꞌon ra xíꞌin i̱ ndí ki̱ꞌva̱ ra kúu ñá,
ta ñáSara ñii káchí saá ni̱ka̱ꞌa̱n ñá ndí ki̱ꞌva̱ ñá kúu ra.
Ni̱‑xani si̱ni̱ i̱ keꞌé i̱ ña o̱n váꞌa xíꞌin ñá,
ta xíꞌin ña ndinoꞌo ini i̱ na̱kiꞌin i̱ ñá,
ta vitin o̱n ko̱ó kua̱chi ndíso i̱ xíꞌin ñá.”
6 Ta Ndios nda̱kuii̱n ra,
ni̱ka̱ꞌa̱n ra xíꞌin ra:
“Xíni̱ va̱ꞌa i̱ ndí ndinoꞌo ini ún ke̱ꞌé ún ñayóꞌo.
Ña̱kán ni̱‑taxi i̱ to̱nda̱a ún ñáSara,
ko̱to̱ ki̱ꞌvi ún kua̱chi xíꞌin ñá no̱o̱ i̱.
7 Ta vitin nataxi ún ñá ndaꞌa̱ ta̱Abraham,
chi ta̱yóꞌo kúu ta̱profeta,
ta̱ káꞌa̱n ndoso to̱ꞌon i̱,
ta ndukú ra no̱o̱ i̱ xa̱ꞌa̱ ún ña kutaku̱ ka̱ ún.
Ta tá o̱n xi̱in ún nataxi ún ñá ndaꞌa̱ yii̱ ñá,
ta ndixa yóꞌó xíꞌin naveꞌe ún kivi̱ ndiꞌi ndó.”
Ñayóꞌo ni̱ka̱ꞌa̱n Ndios xíꞌin ta̱Abimelec ti̱xin ñii xa̱ni.
8 Ta inka̱ ki̱vi̱ xita̱a̱n nda̱koo ta̱Abimelec,
ta ka̱na ra nata̱a na kísa chiño xíꞌin ra,
ta ki̱xaa̱ na,
ta nda̱to̱ꞌon ra xíꞌin na ndiꞌi ña ni̱xa̱ní ra.
Ta ni̱yi̱ꞌví ní na xi̱ni̱ so̱ꞌo na ñayóꞌo.
9 Ta ka̱na ta̱Abimelec ta̱Abraham,
ta ki̱xaa̱ ra no̱o̱ ra,
ta káchí ra saá xíꞌin ra:
―Tata,
¿nda̱chun ke̱ꞌé ún ñayóꞌo xíꞌin ndi̱?
Ta,
¿yukú ña o̱n váꞌa ke̱ꞌé i̱ xíꞌin ún,
ña̱kán níꞌi ún kua̱chi yóꞌo ki̱xaa̱ ña no̱o̱ i̱ xíꞌin no̱o̱ ni̱vi nañoo i̱?
O̱n vása va̱ꞌa ke̱ꞌé ún xíꞌin ndi̱,
tata.
10 ¿Yukía̱ xa̱ni si̱ni̱ ún ña ke̱ꞌé ún ña o̱n váꞌa yóꞌo xíꞌin ndi̱?
―káchí ta̱Abimelec xíꞌin ta̱Abraham.
11 Ta nda̱kuii̱n ta̱Abraham,
káchí ra saá:
―Tata,
xa̱ni si̱ni̱ i̱:
“O̱n ko̱ó ni̱vi na kísa to̱ꞌó Ndios ñoo yóꞌo,
ta kaꞌni na yi̱ꞌi̱ xa̱ꞌa̱ ñásíꞌí i̱”,
saá xa̱ni si̱ni̱ i̱.
12 Ñanda̱a̱ kía̱ ki̱ꞌva̱ i̱ kúu ñáSara;
sa̱ꞌya yivá i̱ kúu ñá,
ta o̱n si̱ví sa̱ꞌya siꞌí i̱ kúu ñá;
ta to̱nda̱ꞌa̱ i̱ xíꞌin ñá.
13 Ki̱vi̱ ni̱ka̱ꞌa̱n Ndios xíꞌin i̱ ña ke̱e i̱ veꞌe yivá i̱,
ta ni̱ka̱ꞌa̱n i̱ xíꞌin ñáSara ndí ka̱ꞌa̱n ñá ki̱ꞌva̱ ñá kúu i̱,
nda̱ mí ka̱ no̱o̱ xaa̱ ndi̱ ―káchí ra.
14 Ta saá na̱taxi ta̱Abimelec ñáSara ndaꞌa̱ ta̱Abraham.
Ta sa̱níꞌi ñaꞌá ra ndikachi xíꞌin si̱ndi̱ki̱ xíꞌin na kísa chiño no̱o̱ ra,
nata̱a xíꞌin náñaꞌa̱,
15 ta ni̱ka̱ꞌa̱n ra saá xíꞌin ra:
―Koto ún,
ndiꞌi ñoꞌo̱ yóꞌo kúu no̱o̱ xáꞌnda chiño i̱;
ta vitin ka̱xin ún míchí kóni ún kutaku̱ ún,
tata ―káchí ra.
16 Ta xíꞌin ñáSara ni̱ka̱ꞌa̱n ra saá:
―Nana,
ta̱xi i̱ ndaꞌa̱ ki̱ꞌva̱ ún ta̱Abraham ñii mil si̱ꞌún ñaplata,
ta xíꞌin ñayóꞌo kunda̱a̱ ini ni̱vi ndí o̱n ko̱ó ña o̱n váꞌa ní‑keꞌé ún,
ta ña kéꞌé i̱ saá,
taxi ña kanóo va̱ꞌa to̱ꞌon mi̱i ún no̱o̱ ndiꞌi na táku̱ veꞌe ún ―káchí ta̱Abimelec xíꞌin ñáSara.