Ñayóꞌo káꞌa̱n xa̱ꞌa̱ ña ni̱ka̱ꞌa̱n Ndios ndí koo sa̱ꞌya ta̱Abraham
18
Ta ni̱xi̱yo ta̱Abraham no̱o̱ ñoꞌo̱ ta̱Mamre no̱o̱ yóo ní yito̱n tón na̱ní tatá.
Ndeé ní ñiꞌní ma̱ꞌñó ndiví,
ta nákindée ta̱Abraham yéꞌé veꞌe mandiado ra,
ta siꞌa ni̱xi̱yo na̱ti̱vi Ndiosa no̱o̱ ra.
2 Ta na̱koto ta̱Abraham yíta u̱ni̱ ta̱a yatin no̱o̱ yóo ra.
Ta na̱kundichi ra ta xi̱no ra kua̱ꞌa̱n ra nakiꞌin ñaꞌá ra,
ta ni̱xaa̱ ra ta ki̱sa to̱ꞌó ra na xíꞌin ña chi̱ndee ra no̱o̱ ra no̱o̱ u̱ni̱ nata̱a yóꞌo,
3 ta káchí ra saá xíꞌin ñii ta̱a yóꞌo:
―Tata,
ta xáku ndáꞌví i̱ ña keꞌé ún ñava̱ꞌa xíꞌin i̱,
ta o̱n kama ní yaꞌa ndó ko̱ꞌo̱n ndó no̱o̱ i̱.
4 Va̱ꞌa kindo̱o loꞌo ndó ta ná kixi loꞌo takuií ndoo xa̱ꞌa̱ ndó,
ta nakindée ndó ku̱nda̱ti̱ yito̱n yóꞌo,
5 ta ko̱ꞌo̱n i̱ kiꞌin i̱ loꞌo ña kuxu ndó ña ná koo ndee̱ ndó,
ta saá tá kóni ndó,
ta nakiꞌin ndó yichi̱ ko̱ꞌo̱n ndó,
saá chi yi̱ꞌi̱ kúu ta̱a ta̱ kísa chiño no̱o̱ ndó ―káchí ra.
―Va̱ꞌa,
kasa ndivi ún ña ni̱ka̱ꞌa̱n ún xíꞌin ndi̱ ―káchí na.
6 Ta ta̱Abraham kua̱ꞌa̱n ra ta ni̱ki̱ꞌvi ra ini veꞌe mandiado ra,
ta ni̱ka̱ꞌa̱n ra xíꞌin ñáSara,
káchí ra saá:
―Kama ní kiꞌin ún o̱ko̱ kilob trigo ña va̱ꞌa ní,
ta kasa va̱ꞌa ún si̱ta̱ va̱ꞌa ―káchí ra xíꞌin ñá,
ta saá ki̱sa ndivi ñáSara ñayóꞌo.
7 Ta saá ta̱Abraham xi̱no ra kua̱ꞌa̱n ra no̱o̱ ndóo si̱ndi̱ki̱ sa̱na̱ ra,
ta na̱ka̱xin ra ñii si̱ndi̱ki̱ tí sa̱kán loꞌo kui̱ya̱,
tí yúta̱ kúu rí ta nduꞌu̱ ní rí,
ta ta̱xi ra rí ndaꞌa̱ ta̱ kísa chiño no̱o̱ ra,
ta xa̱ꞌnda chiño ra no̱o̱ ta̱yóꞌo kasa ndivi ra rí ña kuxu nata̱a ki̱xaa̱ veꞌe ra.
8 Ta ta̱xi ra leche xíꞌin ko̱ñu si̱ndi̱ki̱ yóꞌo,
ta̱xi ra ña ku̱yúú no̱o̱ leche,
ta chi̱ndoso ra ndiꞌi ñayóꞌo no̱o̱ u̱ni̱ nata̱a,
ta xi̱xi na.
Ta ta̱Abraham yóo ra xíꞌin na ku̱nda̱ti̱ tón yito̱n,
ta yóo tiꞌva ra ndáti ra taxi ra yukú ka̱ ña xíni̱ ñóꞌó no̱o̱ na kuxu na.
9 Ta nata̱a ki̱xaa̱ veꞌe ra ni̱nda̱ka̱ to̱ꞌon na ta̱Abraham:
―¿Míchí yóo ñásíꞌí ún ñáSara?
Ta nda̱kuii̱n ta̱Abraham:
―Yóo ñá ini veꞌe mandiado ñíndichi kaa̱,
tata ―káchí ra.
10 Ta ñii ta̱a ki̱xaa̱ yóꞌo kúu Ndios,
ta ni̱ka̱ꞌa̱n Ndios xíꞌin ta̱Abraham,
káchí ra saá:
―Tá yaꞌa ñii kui̱ya̱ ta saá ndixa ndikó i̱ koto i̱ yóꞌó,
ta ñásíꞌí ún ñáSara xa yóo sa̱ꞌya ñá ñii ta̱loꞌo ki̱vi̱ saá ―káchí ra.
Ta ñáSara xíni̱ so̱ꞌo ñá ndiꞌi to̱ꞌon yóꞌo,
yóo ñá yéꞌé veꞌe mandiado yatin sa̱ta̱ ta̱Abraham.
11 Ta ta̱Abraham xíꞌin ñáSara ni̱vi naxi̱kua̱ꞌa̱ ní kúu na,
ta xa ni̱yaꞌa kui̱ya̱ ña ku̱chiño kaku sa̱ꞌya ñáSara.
12 Ta ñáSara xáku̱ ndaa ñá xíꞌin mi̱i ñá,
xáni ini ñá saá:
“¿Án taxi Ndios kusii̱ ini yó xíꞌin ñii sa̱ꞌya yó,
ta ñaꞌa̱ ñáxi̱kua̱ꞌa̱ ní kúu mi̱i yó,
ta ta̱a ta̱xi̱kua̱ꞌa̱ ní kúu yii̱ yó?”
13 Ta Ndios ni̱ka̱ꞌa̱n ra xíꞌin ta̱Abraham:
―¿Nda̱chun xáku̱ ñáSara?,
káchí ñá:
“¿Án ndixa koo sa̱ꞌya i̱ ta ñaꞌa̱ ñáxi̱kua̱ꞌa̱ ní kúu i̱?”,
káchí ñá.
14 ¿Án yóo ñayo̱ꞌvi̱ ní ña o̱n ki̱ví kasa ndivi yi̱ꞌi̱ Ndios xa̱ꞌa̱ ún?
Kui̱ya̱ ña va̱xi ndikó i̱ koto i̱ yóꞌó,
ta xa yóo ñii ta̱loꞌo sa̱ꞌya ñáSara ―káchí ra.
15 Ta ni̱yi̱ꞌví ní ñáSara xi̱ni̱ so̱ꞌo ñá ñayóꞌo,
ta saá ni̱ka̱ꞌa̱n ñá,
káchí ñá saá:
―Tata,
o̱n vása ní‑xaku̱ i̱ ―káchí ñá.
Ta Ndios ni̱ka̱ꞌa̱n ra xíꞌin ñá:
―O̱n si̱ví ñanda̱a̱ kúu ña nda̱kuii̱n ún,
ndixa xíni̱ i̱ ni̱xaku̱ ún ―káchí ra xíꞌin ñá.
Ñayóꞌo káꞌa̱n xa̱ꞌa̱ ña xa̱ku ndáꞌví ta̱Abraham no̱o̱ Ndios xa̱ꞌa̱ ñoo Sodoma
16 Ta saá na u̱ni̱ ta̱a yóꞌo na̱kuita na,
ta kóni na kee na ko̱ꞌo̱n na yichi̱,
ta na̱koto na chí ñoo Sodoma.
Ta saá ke̱e na kua̱ꞌa̱n na,
ta ta̱Abraham kua̱ꞌa̱n loꞌo ra xíꞌin na ña nakiꞌin na yichi̱ na.
17 Ta saá xa̱ni ini Ndios:
“Xíni̱ ñóꞌó ndato̱ꞌon yó xíꞌin ta̱Abraham yukía̱ keꞌé yó,
18 chi ta̱yóꞌo kuu ra yivá kua̱ꞌa̱ ní ni̱vi,
ta ni̱vi yóꞌo nduu na ñii ñoo káꞌno ña ndeé ní.
Ni̱ka̱ꞌa̱n yó xíꞌin ra ndixa ndí xa̱ꞌa̱ ra keꞌé yó ñava̱ꞌa xíꞌin ndiꞌi ni̱vi ñoyívi yóꞌo.
19 Na̱ka̱xin yó ra xa̱ꞌa̱ ña kaꞌnda chiño ra no̱o̱ nasa̱ꞌya ra xíꞌin nasa̱ꞌya ñani síkuá ra ña vivíi kundiko̱n na yichi̱ yó,
ña kasa ndivi na ñava̱ꞌa ta keꞌé na ñanda̱a̱,
ta saá tá kasa ndivi na ñayóꞌo,
ta mi̱i yó kasa ndivi yó to̱ꞌon ña ki̱ndo̱o yó xíꞌin na”,
xa̱ni ini Ndios.
20 Ta ni̱ka̱ꞌa̱n Ndios,
káchí ra saá xíꞌin ta̱Abraham:
―Ni̱vi nañoo Sodoma xíꞌin ni̱vi nañoo Gomorra kue̱ꞌe̱ ní kánóo to̱ꞌon xa̱ꞌa̱ na,
chi ndeé ní kéꞌé na ña o̱n váꞌa ñii ñii ki̱vi̱.
21 Ta saá vitin ko̱ꞌo̱n i̱ koto i̱ ni̱vi yóꞌo án ndixa ke̱ꞌé na ña o̱n váꞌa nda̱tán yóo ña xi̱ni̱ so̱ꞌo i̱.
Ta saá kunda̱a̱ ini i̱ xa̱ꞌa̱ na ―káchí Ndios.
22 Ta saá o̱vi̱ nata̱a nátaꞌan xíꞌin Ndios ke̱e na kua̱ꞌa̱n na nda̱ ñoo Sodoma,
ta ta̱Abraham ni̱ndo̱o ra xíꞌin Ndios.
23 Ta ni̱to̱nda̱a yatin ta̱Abraham no̱o̱ Ndios,
ta ni̱nda̱ka̱ to̱ꞌon ñaꞌá ra,
káchí ra saá:
―Tata Ndios,
¿án ñii ki̱ꞌva sandiꞌi ún xa̱ꞌa̱ ni̱vi na va̱ꞌa xíꞌin ni̱vi na o̱n váꞌa?
24 Tá kuiti yóo o̱vi̱ si̱ko̱ u̱xu̱ ni̱vi va̱ꞌa ñoo yóꞌo,
¿án sandiꞌi ún xa̱ꞌa̱ ndiꞌi ñoo yóꞌo?
¿Án o̱n kasa káꞌno ini ún xa̱ꞌa̱ ni̱vi ñoo yóꞌo ña kúndáꞌví ini ún ña táku̱ o̱vi̱ si̱ko̱ u̱xu̱ ni̱vi va̱ꞌa?
25 Yóꞌó kúu ta̱a ta̱va̱ꞌa,
ña̱kán o̱n ki̱ví taxi ún kivi̱ ni̱vi na va̱ꞌa xíꞌin ni̱vi na o̱n váꞌa;
o̱n ki̱ví ñii ki̱ꞌva saxo̱ꞌvi̱ ún na va̱ꞌa xíꞌin na o̱n váꞌa.
Chi yóꞌó kúu ta̱ kasa nani xa̱ꞌa̱ ndiꞌi ni̱vi ñoyívi yóꞌo,
ta o̱n ki̱ví keꞌé ún ña o̱n vása nda̱a̱ ―káchí ta̱Abraham.
26 Ta nda̱kuii̱n Ndios,
káchí ra saá:
―Tá kuiti táku̱ o̱vi̱ si̱ko̱ u̱xu̱ ni̱vi va̱ꞌa ñoo Sodoma,
ta xa̱ꞌa̱ ni̱vi yóꞌo kasa káꞌno ini i̱ xa̱ꞌa̱ ndiꞌi nañoo yóꞌo ―káchí ra.
27 Ta tuku ni̱ka̱ꞌa̱n ta̱Abraham:
―Kasa káꞌno ini ún xa̱ꞌa̱ i̱ ña káꞌa̱n i̱ xíꞌin ún,
Tata,
chi yi̱ꞌi̱ kuiti yaa̱ ñoꞌo̱ kúu i̱,
ta yóꞌó kúu Ndios.
28 Tá táku̱ o̱vi̱ si̱ko̱ o̱ꞌo̱n ni̱vi na va̱ꞌa ñoo Sodoma,
¿án ndixa sandiꞌi ún xa̱ꞌa̱ ndiꞌi ñoo yóꞌo?
―káchí ta̱Abraham.
Ta nda̱kuii̱n Ndios:
―Tá táku̱ o̱vi̱ si̱ko̱ o̱ꞌo̱n ni̱vi na va̱ꞌa,
ta o̱n sandiꞌi i̱ xa̱ꞌa̱ ndiꞌi ñoo ―káchí Ndios.
29 Ta saá tuku ni̱ka̱ꞌa̱n ta̱Abraham xíꞌin Ndios:
―Tá táku̱ o̱vi̱ si̱ko̱ ni̱vi na va̱ꞌa,
¿yukía̱ keꞌé ún xíꞌin ñoo?
―káchí ta̱Abraham.
―Xa̱ꞌa̱ o̱vi̱ si̱ko̱ ni̱vi na va̱ꞌa,
o̱n sandiꞌi i̱ xa̱ꞌa̱ ndiꞌi ni̱vi ñoo yóꞌo ―káchí Ndios.
30 Ta tuku xa̱ku ndáꞌví ta̱Abraham no̱o̱ ra:
―O̱n saa̱ ún koni ún yi̱ꞌi̱ ña tuku káꞌa̱n i̱ xíꞌin ún,
Tata.
Tá yóo o̱ko̱ u̱xu̱ ni̱vi na va̱ꞌa,
¿án sandiꞌi ún xa̱ꞌa̱ ñoo yóꞌo?
―káchí ra.
Ta tuku ni̱ka̱ꞌa̱n Ndios:
―Xa̱ꞌa̱ o̱ko̱ u̱xu̱ ni̱vi va̱ꞌa,
kasa káꞌno ini i̱ xa̱ꞌa̱ ni̱vi ñoo yóꞌo ―káchí Ndios.
31 Ta ni̱ka̱ꞌa̱n tuku ta̱Abraham:
―Tata,
ndixa ndeé ní no̱o̱ i̱ chi xa kua̱ꞌa̱ ní yichi̱ ndáka̱ to̱ꞌon i̱ yóꞌó xa̱ꞌa̱ ni̱vi yóꞌo,
ta,
¿yukía̱ kundoꞌo ni̱vi ñoo yóꞌo tá ndasaá kuiti yóo o̱ko̱ ni̱vi va̱ꞌa?
―káchí ra.
Ta nda̱kuii̱n Ndios:
―Xa̱ꞌa̱ o̱ko̱ ni̱vi va̱ꞌa,
o̱n sandiꞌi i̱ xa̱ꞌa̱ ñoo yóꞌo ―káchí Ndios.
32 Ta saá tuku káchí ta̱Abraham xíꞌin Ndios:
―Tata,
ndixa o̱n saa̱ ini ún chi si̱ín la̱á kuiti yichi̱ ndáka̱ to̱ꞌon i̱ yóꞌó.
Tá yóo u̱xu̱ ni̱vi va̱ꞌa ñoo yóꞌo,
¿yukía̱ keꞌé ún xíꞌin ñoo?
―káchí ra.
Ta nda̱kuii̱n Ndios:
―Xa̱ꞌa̱ u̱xu̱ ni̱vi va̱ꞌa,
o̱n sandiꞌi i̱ xa̱ꞌa̱ ñoo yóꞌo ―káchí Ndios.
33 Ta saá sa̱ndiꞌi Ndios ni̱ka̱ꞌa̱n ra xíꞌin ta̱Abraham,
ta ke̱e ra kua̱ꞌa̱n ra;
ta kua̱ꞌa̱n noꞌo̱ ta̱Abraham no̱o̱ yóo veꞌe mandiado ra.